2 Peteru

1 O aʻu o Simona Peteru, o le pologa+ ma le aposetolo+ a Iesu Keriso, o le tusi lenei i ē ua maua le faatuatua, o se faaeaga e tutusa ma lea ua iā i matou,+ e ala i le amiotonu+ a lo tatou Atua ma le Faaola o Iesu Keriso:+

2 Tau ina ia faateleina iā te outou+ le agalelei faifua ma le filemu i le mauaina o le poto saʻo+ i le Atua ma Iesu lo tatou Alii, 3 auā ua foaʻifuaina mai e le mana o le Atua o mea uma e tusa ai ma le ola+ ma le faamaoni i le Atua,+ e ala i le poto saʻo e faatatau i lē na valaauina+ i tatou i le mamalu+ ma le amiolelei. 4 E ala i nei mea ua ia foaʻifuaina mai iā i tatou folafolaga+ tāua ma le matagofie tele, ina ia avea ai outou o agaga e pei o le Atua+ e ala i nei mea, auā ua outou sao mai i mea leaga o i le lalolagi+ ona o le soona tuʻinanau.

5 Ioe, ona o lo outou faia o taumafaiga filigā+ e tali atu ai, o le mea lea ia outou faaopoopo ai i lo outou faatuatua le amiolelei,+ ia faaopoopo i la outou amiolelei le poto,+ 6 ia faaopoopo i lo outou poto le amio pulea,+ ia faaopoopo i la outou amio pulea le tumau, ia faaopoopo i lo outou tumau le faamaoni i le Atua,+ 7 ia faaopoopo i lo outou faamaoni i le Atua le alofa i le ʻauuso, ia faaopoopo i lo outou alofa i le ʻauuso le alofa.+ 8 Auā afai e iai nei mea iā te outou ma ua tele foʻi, e taofia ai outou ina neʻi outou paiē ma lē fua mai,+ e tusa ai ma le poto saʻo i lo tatou Alii o Iesu Keriso.

9 Auā afai e lē o iai i se tasi nei mea, ua tauaso la ma punitia e ia ona lava mata mai i le malamalama,+ ma ua oo ai ina galo+ lona faamamāina+ mai i ana agasala i aso ua mavae. 10 O le mea lea le ʻauuso e, ia outou saga finafinau ai ina ia faamautinoa le valaauina+ ma le filifilia+ o outou; auā a faaauau ona outou faia o nei mea, e tou te lē paʻuʻū lava.+ 11 O le mea moni, o le a faataga outou e ulufale+ atu ma le mamalu i le malo e faavavau+ o lo tatou Alii ma le Faaola o Iesu Keriso.+

12 O le mea lea, ou te nofosauni ai pea e faamanatu+ atu nei mea iā te outou, e ui lava ua outou iloa ma ua outou tutū mausalī i le upu moni+ lea ua iai iā te outou.+ 13 Ae ua tonu i loʻu manatu, a o ou iai pea i lenei faleʻie,+ ia ou faamalosiau atu iā te outou i loʻu faamanatu atu,+ 14 auā ua ou iloa e toeitiiti ona tuueseina lea o loʻu faleʻie,+ e pei lava ona faailoa mai iā te aʻu e lo tatou Alii o Iesu Keriso.+ 15 O lea, ou te faia ai foʻi le mea aupito i sili i taimi uma lava, ma pe a ou alu ese,+ e mafai ona outou faamanatu nei mea iā te outou.

16 E lē o ni tala sesē+ na fatuina ma le poto na ala ai ona matou faailoa atu le mana ma le faatasi mai o lo tatou Alii o Iesu Keriso,+ ae ona na matou vāaitino i lona matagofie.+ 17 Auā na ia maua mai i le Atua le Tamā le viiga ma le mamalu,+ ina ua tulei mai iā te ia o nei fetalaiga mai i le mamalu e sili ona matagofie: “O loʻu atalii pele lenei, o lē ua malie i ai loʻu loto.”+ 18 Ioe, o afioga nei na matou faalogo+ ai o tulei mai i le lagi a o matou faatasi ma ia i le mauga paia.+

19 O lea la, ua atili ai ona matou mautinoa+ i upu faavaloaga;+ ma e lelei ona outou uaʻi atu i ai e pei o se molī+ o loo susulu i le mea pogisa i o outou loto, seʻia tafa mai ata ma oso aʻe le fetu ao.+ 20 O le mea muamua lava lenei ia outou iloaina, e leai se valoaga o i Tusitusiga Paia e tupuga mai i manatu o tagata.+ 21 Auā e lē o loto o tagata na aumai ai valoaga,+ ae na tautatala tagata i mea na faailoa mai e le Atua+ e ala i le taʻitaʻiga a le agaga paia.+

2 Ae peitaʻi, na iai foʻi perofeta pepelo i le nuu o Isaraelu, o le a faapena foʻi ona iai aʻoaʻo pepelo iā te outou.+ O i latou lava ia e aumaia faalilolilo i totonu vaevaega e fano ai, ma latou lafoaʻia ai le matai na faatauina i latou,+ ma o i latou lava e vave oo mai ai lo latou faaumatiaga. 2 O le a mulimuli+ foʻi le toʻatele o tagata i a latou amioga matagā,+ e upuleagaina ai le ala o le upu moni ona o i latou.+ 3 O lo latou manaʻo tele, ua latou faavalea ai outou i upu taufaasesē.+ Ae e lē faatuai mai iā i latou le faamasinoga na faia i aso ua mavae,+ e oo mai lava lo latou faaumatiaga.+

4 O le mea moni, e leʻi taofia e le Atua le faasalaina o agelu+ na agasala, ae talu ai na lafo i latou i Tatara,*+ na ia tuuina atu ai i latou i le lua e matuā pogisa e faatalitali ai mo le faamasinoga;+ 5 ma e leʻi faatali o ia mai i le faasalaina o le lalolagi tuai,+ ae na laveaʻiina Noa o lē e talaʻi le amiotonu+ ma isi e toʻafitu,+ ina ua ia aumaia le lolo+ i le lalolagi o tagata faalēmataʻu; 6 na ia taʻusalaina i latou ina ua ia faaliu lefulefu aai o Sotoma ma Komoro,+ e fai ma faaaʻoaʻoga i mea o le a oo mai i tagata faalēmataʻu;+ 7 ae na ia laveaʻiina Lota+ le tagata amiotonu, o lē na matuā mafatia ona ua sasao faaafi amioga matagā a tagata solitulafono,+ 8 auā na matuā tigā le loto o lenā tagata amiotonu i a latou solitulafono, ona o mea na ia vaai ma faalogo i ai a o nonofo ma i latou i lea aso ma lea aso, 9 ma a fua i na mea, e moni lava e silafia e Ieova le auala e laveaʻi ai tagata e faamaoni iā te ia mai i o latou puapuaga,+ a ua taofia tagata amiolētonu mo le aso o le faamasinoga e faaumatia ai i latou,+ 10 aemaise o ē ua faia feusuaʻiga ma isi ina ia faaleagaina ai i latou,+ ma ē ua vaai maulalo i alii.+

E lē popoi, e lotomaaa, ma e lē migao i latou i ē e mamalu ae e fai upuleaga i ai,+ 11 a o agelu, e ui ina sili atu ona malolosi ma e iai le mana, ae latou te leʻi molia i latou i le fai atu i ai o ni upuleaga,+ latou te leʻi faia faapea ona o le faaaloalo iā Ieova.+ 12 A o tagata nei ua pei o ni manu e leai ni mafaufau, ua fananau mai ina ia puʻea ma fasimatea. E fai upuleaga+ i mea latou te lē iloa, o le mea lea e faaumatia ai i latou i o latou lava ala leaga, 13 ua faamanuʻalia ai i latou lava,+ o le taui lea o a latou mea sesē.+

Ua latou manatu o se mea fiafia le ola i se olaga soonafai i le ao.+ Ua pei i latou o ila ma pona, ua soona fiafia e faasesē isi i a latou lava aʻoaʻoga taufaasesē, a o faia a latou faigaʻai faatasi ma outou.+ 14 Ua naunau tele i latou i le mulilua,*+ ma ua lē mafai ona sosola ese i le agasala,+ ua latou faaosooso foʻi i ē ua tautevateva. Ua masani o latou loto i le manaʻo tele.+ O i latou o le fanau ua faamalaiaina.+ 15 Ua lafoaʻi le ala saʻo, ma ua faasesēina foʻi i latou. Ua latou mulimuli atu i le ala o Palaamo+ le atalii o Peoro, o lē na naunau i le taui o le fai mea sesē,+ 16 ae na aʻoaʻia o ia ona o lona solia o le tulafono.+ O se asini e leai se leo, a ua tautala mai i le leo o se tagata,+ ma faasalaveia ai le gaoioiga valea a le perofeta.+

17 O i latou nei o vaipuna e lē o iai ni vai,+ ma o ao ua lelea i matagi malolosi, ma ua tuu mo i latou le pogisa tele.+ 18 Ua latou tautatala i upu faasausili e lē aogā, ma e ala i tuʻinanauga o le tino+ ma masaniga matagā, ua latou faaosoosoina+ ai o ē ua faatoʻā sosola ese+ mai i tagata fai mea sesē. 19 Ua latou folafola atu iā i latou le saʻolotoga,+ a o i latou lava ua avea ma pologa a le iʻuvale.+ Auā o sē e faatoʻilaloina e se tasi, ua avea o ia ma pologa a lenā tagata.+ 20 E mautinoa lava, afai ua latou sosola ese mai i le faaleagaina e le lalolagi,+ ona o le poto saʻo i le Alii ma le Faaola o Iesu Keriso, a ua toe aafia i latou i mea lava nei, ma toʻilalo ai i latou i na mea,+ e sili atu ona leaga lo latou iʻuga nai lo o le amataga.+ 21 Auā e sili pe ana latou lē iloa lelei le ala o le amiotonu,+ nai lo o le iloa lelei, ae ua toe liliuese mai i le poloaʻiga paia na tuuina atu iā i latou.+ 22 Ua taunuu ai iā i latou le faataoto moni: “Ua toe foʻi le taʻifau+ i lona puaʻiga, ma ua toe taafili i le palapala le puaa fafine ua uma ona faatāʻele.”+

3 Le ʻaupele e, o le tusi lona lua lenei ua ou tusi atu ai iā te outou, e pei ona ou tusi atu i laʻu tusi muamua,+ e faatupu ai lo outou mafaufau lelei i loʻu faamanatu atu,+ 2 ia outou manatua upu na fai mai ai muamua le ʻauperofeta paia+ ma poloaʻiga a le Alii ma le Faaola, ia na ala mai i o outou aposetolo.+ 3 O le mea muamua lenei ia outou iloaina, o aso e gata ai+ e ō mai ai tagata tauemu+ ma latou faatauemu mai, ma ua latou faia faapea e tusa ai ma o latou lava tuʻinanauga+ 4 ma faapea ane:+ “Na folafola mai o ia e faatasi mai, ae o fea o iai?+ Auā e mai lava i le aso na maliliu* ai o tatou augātamā, e leai lava se mea o suia talu mai le foafoaga o le lalolagi.”+

5 E tusa foʻi ma o latou manaʻo, ua latou lē amanaʻia ai lenei mea moni e faapea, sa iai le lagi+ i aso anamua, ma na mautū foʻi le laueleele ma manu aʻe mai i le vai,+ ma sa i totonu foʻi o le vai,+ ona o le afioga a le Atua; 6 o mea foʻi ia na oo ai le faaumatiaga i le lalolagi i lenā taimi, ina ua lofia i le vai.+ 7 O le afioga foʻi lea ua tuu ai le lagi+ ma le lalolagi+ o loo iai i le taimi nei mo le afi,+ ma ua taofia seʻia oo i le aso faamasino+ ma le faaumatiaga o tagata faalēmataʻu.+

8 Le ʻaupele e, aua neʻi galo iā te outou lenei mea, o le aso e tasi iā Ieova e tusa lea ma le afe o tausaga, ma o le afe o tausaga e tusa lea ma le aso e tasi.+ 9 E lē faatuai mai Ieova e tusa ma lana folafolaga,+ e faapei ona manatu ai isi tagata i le faatuai, ae o loo onosaʻi mai pea o ia iā te outou, auā e lē finagalo o ia e faaumatia se tasi, ae e finagalo ia oo uma lava i le salamō.+ 10 Ae e oo mai le aso o Ieova+ e pei o se gaoi,+ e vave mou atu+ ai le lagi ma le gogolo tele,+ e mavae+ atu foʻi mea o fai aʻe ai ona o le aasa tele, e faaalia foʻi le lalolagi+ ma ana galuega.+

11 Talu ai o le a mavae atu nei mea uma, ia outou manatunatu pe e faapeʻī la outou amio e tatau ona iai, e tusa ai ma amioga paia ma galuega o le faamaoni i le Atua, 12 a o faatalitali+ ma tāmau i mafaufau le oo* mai o le aso o Ieova,+ lea o le a mavae+ atu ai le lagi ina ua mū, ma liusuavai ai foʻi mea o loo fai aʻe ai ona o le aasa tele! 13 Ae e tatou te faatalitali i le lagi fou+ ma le lalolagi fou,+ e tusa ma lana folafolaga, e mau ai le amiotonu.+

14 O le mea lea le ʻaupele e, a o outou faatalitali i nei mea, ia outou finafinau ai ina ia maua mai outou e ia, e leai so outou ila,+ e lē ponā, ma e filemu.+ 15 Ia manatunatu foʻi o le onosaʻi o lo tatou Alii ua maua ai le faaolataga, e pei o lo tatou uso pele o Paulo e tusa ma le atamai+ ua foaʻiina atu iā te ia, ua ia tusi atu ai iā te outou,+ 16 ua taʻua e ia nei mea e pei ona ia tusia i ana tusi. Ae peitaʻi, e iai nisi o mea e faigatā ona malamalama i ai, lea ua mimilo sesē e tagata e leʻi aʻoaʻoina ma ē ua lē faatumauina, e pei foʻi ona latou faia i isi mau uma o Tusitusiga Paia,+ ae e iʻu ai i lo latou faaumatiaga.

17 O le mea lea, o outou le ʻaupele e, ona ua outou muaʻi iloa lenei mea,+ ia outou leoleo ai iā te outou ina neʻi taʻitaʻieseina outou e i latou i le sesē o tagata solitulafono, ma outou paʻuʻū ai mai i lo outou tutū maumauaʻi.+ 18 Ae ia tuputupu pea i le agalelei faifua ma le poto e faatatau i lo tatou Alii ma le Faaola o Iesu Keriso.+ Ia iā te ia le mamalu i le taimi nei seʻia oo i le faavavau.+