TEUTERONOME

1 O upu nei na fai atu ai Mose iā Isaraelu uma i le vaipanoa o Ioritana i le fanua laugatasi o le toafa,* i luma o Sufe i le vā o Parana, Topelu, Lapana, Haserota, ma Tisaapa. 2 E 11 aso e malaga ai mai i Horepa agaʻi i Katesa-panea+ e ui atu i le mauga o Seira. 3 I le tausaga lona 40,+ i le masina lona 11, i le aso muamua o lea masina, na fai atu ai Mose i le fanauga a Isaraelu* e tusa ma mea uma na poloaʻi mai ai Ieova iā te ia mo i latou. 4 O le taimi lea ua uma ona ia faatoʻilaloina Sekono+ le tupu o tagata Amorī, o lē sa nofo i Hesepona, ma ina ua uma ona faato‘ilalo fo‘i i Eterei+ o Oko+ le tupu o Vasana, o lē sa nofo i Aserota.* 5 I le vaipanoa o Ioritana i le atunuu o Moapi, ua amata ona faamatala atu e Mose lenei Tulafono+ e faapea:

6 “Na fetalai mai Ieova lo tatou Atua iā i tatou i Horepa, ‘Ua lava aso na outou nonofo ai i lenei vaega maugā.+ 7 Ia liliu ma ō atu loa i vaega maugā ua iai tagata Amorī+ ma o latou tuaoi uma i Arapa,*+ o le vaega maugā, o Sefila,* o le laufanua o Nekepi,* ma le talafatai,+ o le laueleele o tagata Kanana, ma Lepanona*+ e oo atu i le vaitafe tele, o le vaitafe lea o Eufirate.+ 8 Vaai, ua ou tuuina atu le laueleele i o outou luma. Inā ō atu ia ma fai mo outou le laueleele lea na tautō ai Ieova i o outou tamā, o Aperaamo, o Isaako,+ ma Iakopo,+ e tuuina atu iā i latou ma a latou fanau pe a mavae atu i latou.’+

9 “Ona ou faapea atu lea iā te outou i lenā taimi, ‘Ou te lē lavātia ona ou taʻitaʻiina na o aʻu o outou.+ 10 Ua faatoʻateleina outou e Ieova lo outou Atua, ma i le asō ua toʻatele outou e pei o fetu o le lagi.+ 11 Tau ina ia faaafe ona faatoʻateleina outou+ e Ieova le Atua o o outou augātamā, ma ia faamanuia outou e pei ona ia folafola mai iā te outou.+ 12 E faapefea ona ou lavātia ona tauaveina na o aʻu o outou, auā e mamafa tele lenei avega atoa ma a outou faitioga?+ 13 Ia outou filifilia ni tane atamamai, e faautauta ma agavaa mai i o outou ituaiga, ina ia ou tofia i latou e fai ma ulu iā te outou.’+ 14 Ona outou tali mai ai lea iā te aʻu: ‘E lelei le mea ua e fai mai ai iā i matou.’ 15 Ona ou aveina lea o ulu o o outou ituaiga, o tane atamamai ma agavaa, ma tofia i latou e fai ma ulu iā te outou, o ta‘ita‘i o le taʻitoʻaafe, o ta‘ita‘i o le taʻitoʻaselau, o ta‘ita‘i o le taʻitoʻalima sefulu, o ta‘ita‘i o le taʻitoʻasefulu, ma alii o o outou ituaiga.+

16 “Na ou poloaʻi atu i o outou faamasino i lenā taimi e faapea, ‘Pe a outou faalogo i se mataupu i o outou uso, ia outou faamasino ma le amiotonu+ i le vā o se tamāloa ma lona uso po o le tagata ese+ o loo iā te ia. 17 Aua tou te faaʻauʻau i a outou faamasinoga.+ E ao ona outou faalogo i lē e faatauvaa e pei ona outou faalogo i lē e aloaʻia.+ Aua tou te fefefe i tagata+ auā o le Atua e ona le faamasinoga;+ ma afai e faigatā tele se mataupu mo outou, ia outou tuu mai iā te aʻu ou te faalogo atu i ai.’+ 18 Na ou poloaʻi atu foʻi iā te outou i lenā taimi i mea uma e ao ona outou faia.

19 “Ona tatou malaga ese lea mai i Horepa ma savavali atu i lenā toafa uma e telē ma mataʻutia,+ lea na outou vāai i ai i le ala e ui ane i vaega maugā ua iai tagata Amorī,+ e pei ona poloa‘i mai ai Ieova lo tatou Atua iā i tatou, ma mulimuli ane tatou taunuu ai i Katesa-panea.+ 20 Ona ou fai atu lea iā te outou, ‘Ua outou taunuu i le vaega maugā ua iai tagata Amorī, lea ua tuuina mai e Ieova lo tatou Atua iā i tatou. 21 Vaai, ua tuuina mai e Ieova lo outou Atua le laueleele iā te outou. Ia outou ō aʻe ma fai mo outou e pei ona fetalai mai ai Ieova le Atua o o outou augātamā iā te outou.+ Aua le fefefe pe matataʻu.’

22 “Peitaʻi, na outou faalatalata uma mai iā te aʻu ma faapea mai, ‘Seʻi o tatou aauina atu ni tamāloloa e muamua atu iā i tatou, ina ia latou vaavaai i le laueleele mo i tatou ma taʻu mai se faamatalaga e faatatau i le ala e ao ona tatou uia, ma ituaiga o aai o le a tatou ō atu i ai.’+ 23 Ua lelei lea mea i loʻu manatu, o lea na ou filifilia ai tane e toʻa 12 mai iā te outou, e taʻitasi mai i le ituaiga.+ 24 Ona sauni lea o i latou ma ō aʻe i le vaega maugā,+ ma na oo atu i le vanu* o Esekolo ma mataʻi faalilolilo le laueleele. 25 Na latou aumaia ni fua o le laueleele ma tuuina mai iā i tatou, ma ua latou ō mai ma le faamatalaga e faapea, ‘E lelei le laueleele ua tuuina mai e Ieova lo tatou Atua iā i tatou.’+ 26 Ae na outou lē mananaʻo e ō aʻe, ma na outou fouvale i le faatonuga a Ieova lo outou Atua.+ 27 Na outou muimui pea i o outou faleʻie ma faapea ane, ‘O le ʻinoʻino o Ieova iā i tatou na ia aumaia ai i tatou mai i Aikupito, ina ia tuuina atu i tatou e faaumatia e tagata Amorī. 28 O fea a tatou ō i ai? Ua faavaivaia o tatou loto e o tatou uso,+ i le faapea mai: “O i latou o tagata e sili atu ona malolosi ma uumi nai lo o i tatou, o o latou aai e tetelē ma malupuipuia e oo i le lagi,*+ ma na matou vaaia ai atalii o tagata Anakima.”’+

29 “Ona ou fai atu lea iā te outou, ‘Aua tou te matataʻu pe fefefe ona o i latou.+ 30 E muamua Ieova lo outou Atua iā te outou ma tau mo outou,+ e pei ona ia faia i Aikupito a o outou vāai i ai.+ 31 Na outou vaaia foʻi i le toafa le tausia o outou e Ieova lo outou Atua e pei ona tausia e se tamā o lona atalii, i mea uma na outou ō ai seʻia outou oo mai i lenei mea.’ 32 Peitaʻi e ui i nei mea uma, e tou te leʻi faatuatua iā Ieova lo outou Atua,+ 33 o lē na muamua atu iā te outou i le ala e mataʻi faalilolilo se mea e tou te tolauapi ai. Na faaali atu o ia e ala i le afi i le pō ma le ao i le ao, ina ia faailoa atu le ala e ao ona outou savavali ai.+

34 “Na faafofoga Ieova i a outou faamatalaga uma, ona toʻatamaʻi ai lea o ia ma matuā tautō+ mai e faapea, 35 ‘E lē vaai se tasi o nei tagata o lenei tupulaga leaga i le laueleele lelei lea na ou tautō ai e avatu i o outou tamā,+ 36 seʻi vaganā ai Kalepo le atalii o Iefune. O le a ia vaai i ai, ma o le a ou tuuina atu iā te ia ma ona atalii le laueleele na ia savali ai, auā na mulimuli o ia iā Ieova ma le lotoatoa.+ 37 (Na toʻatamaʻi fo‘i Ieova iā te aʻu ona o outou ma na ia fetalai mai, “O oe foʻi e te lē alu i ai.+ 38 O Iosua le atalii o Nuno o lē o loo tū i ou luma,+ o ia lea o le a ulu atu i le laueleele.+ Ia e faamalosia o ia,*+ auā e na te taʻitaʻia Isaraelu ina ia nonofo ai i inā.”) 39 E lē gata i lea, o a outou fanau na outou faapea mai o le a ave e fai ma pagota,+ atoa ma o outou atalii o ē ua lē iloa le lelei ma le leaga i nei aso, o i latou ia e ulu atu i le laueleele, ma ou te avatu iā i latou e fai mo i latou.+ 40 A o outou, ia outou liliu ma ō atu i le toafa e agaʻi i le auala i le Sami Ulaula.’+

41 “Ona outou faapea mai lea iā te aʻu, ‘Ua matou agasala iā Ieova. O le a matou ō aʻe e tau e pei ona poloaʻi mai ai Ieova lo matou Atua iā i matou!’ Na taʻitasi foʻi outou ma fusi i ana auupega o le taua, ma manatu e faigofie le ō aʻe i le mauga.+ 42 Ae ua fetalai mai Ieova iā te aʻu, ‘Ia fai atu iā i latou: “Aua tou te ō aʻe e tau, auā ou te lē o faatasi ma outou.+ Pe a outou ō a‘e, e faatoʻilaloina outou e o outou fili.”’ 43 Ona ou fai atu ai lea iā te outou ae tou te leʻi faalogo. Ae na outou fouvale i le faatonuga a Ieova, ma na outou faamaualuluga ma taumafai e ō aʻe i le mauga. 44 Ona ō mai lea o tagata Amorī o ē na nonofo i le la mauga e faafetaui outou ma tuliloa iā te outou, e pei ona faia e pi, ma faataapeapeina outou i Seira e oo lava i Horema. 45 Ona outou toe foʻi mai lea ma fetagisi i luma o Ieova, ae e leʻi faafofoga mai Ieova iā te outou pe ua‘i mai iā te outou. 46 O le māfuaaga lea na outou nonofo ai pea i Katesa mo le tele o aso.

2 “Ona tatou liliu lea ma malaga atu i le toafa, i le ala e tau atu i le Sami Ulaula, e pei ona fetalai mai ai o Ieova iā te aʻu,+ ma na tele aso na tatou savalia ai le mea o loo iai le mauga o Seira. 2 Ona fetalai mai lea o Ieova iā te aʻu, 3 ‘Ua lava aso ua outou savavali ai i le mea ua iai lenei mauga. Ia outou liliu ane i le itu i mātū. 4 Ia faatonuina le nuu e faapea: “E tou te ui ane i le tuaoi o o outou uso, o ē e tupuga mai iā Esau+ o loo nonofo i Seira,+ ma o le a fefefe i latou iā te outou,+ ma e ao ona outou faaeteete. 5 Aua tou te faaita iā i latou, auā ou te lē tuuina atu iā te outou se vaega o lo latou fanua, e oo lava i sina mea e tusa ma se alofivae, auā na ou avatu le mauga o Seira iā Esau e fai ma ona tofi.+ 6 Ia outou avatu iā i latou tupe mo mea‘ai e tou te aai ai, ma ia outou faatau mai i tupe vai e tou te feinu ai.+ 7 Auā ua faamanuia Ieova lo outou Atua iā te outou i mea uma ua outou faia. Ua ia silafia lelei la outou savaliga i lenei toafa telē. Na iā te outou Ieova lo outou Atua i tausaga e 40, ma e leai se mea na outou matitiva ai.”’+ 8 Na tatou ui ane i o tatou uso, o ē e tupuga mai iā Esau,+ o loo nonofo i Seira, ma na tatou lē ui atu i le ala lea e tau i Arapa,* o Elata ma Esiokape.+

“Ona tatou liliu lea ma ō atu i le ala e tau atu i le toafa o Moapi.+ 9 Na fetalai mai Ieova iā te aʻu, ‘Aua e te faaita pe tau ma tagata Moapi, auā ou te lē avatua iā te oe se vaega o lona fanua e fai mo oe, auā na ou tuuina atu Aro i ē e tupuga mai iā Lota+ e fai ma o latou tofi. 10 (Na nonofo muamua ai tagata Emema,+ o se nuu malosi ma le toʻatele, ma uumi e pei o tagata Anakima. 11 Ua taʻua foʻi tagata Rafaimi+ e pei o tagata Anakima,+ ma sa masani ona taʻua i latou e tagata Moapi o tagata Emema. 12 Na nonofo muamua tagata Horī+ i Seira, ae na tutuliesea i latou e ē tupuga mai iā Esau ma faaumatia i latou ma nonofo i le mea sa iai i latou,+ e pei o le a faia foʻi e Isaraelu i le laueleele ua fai ma ona tofi, lea o le a foaʻi mai lava e Ieova iā i latou.) 13 O lenei, ia outou ō ma sopoʻia le vanu* o Sareta.’ O lea na tatou sopoʻia ai le vanu* o Sareta.+ 14 O le umi na tatou savavali ai mai i Katesa-panea seʻia o tatou sopoʻia atu le vanu* o Sareta, e 38 tausaga, seʻia oo ina feoti le tupulaga uma o tane o le taua mai i le nuu, e pei ona tautō mai ai Ieova iā i latou.+ 15 Na oo le aao o Ieova iā i latou ina ia aveesea i latou mai i le nuu seʻia oo ina feoti uma i latou.+

16 “O le taimi lava na feoti ai tane uma o le taua mai i le nuu,+ 17 ona fetalai mai lea o Ieova iā te aʻu e faapea, 18 ‘O le asō, e te ui ane ai i le vaipanoa o Moapi, o Aro lea. 19 Pe a e latalata atu i tagata Amonī, aua e te faasauā pe faaita iā i latou, auā ou te lē avatua iā te oe se vaega o le fanua o tagata Amonī e fai ma ou tofi, auā na ou tuuina atu i ē e tupuga mai iā Lota e fai ma o latou tofi.+ 20 Na taʻua foʻi o le laueleele o tagata Rafaimi. (Na nonofo muamua ai tagata Rafaimi,+ ma na faaigoa foʻi i latou e tagata Amonī o tagata Samasuma. 21 O i latou o se nuu malosi ma le toʻatele, ma uumi e pei o tagata Anakima,+ ae na faaumatia e Ieova i latou mai i luma o tagata Amonī, ma na latou tutuliesea i latou ma nonofo i le mea sa latou iai. 22 O le mea lenā sa ia faia i ē e tupuga mai iā Esau na nonofo i Seira,+ ina ua ia faaumatia tagata Horī+ mai i o latou luma, ina ia tutuliesea i latou ma nonofo ai i le mea sa latou iai seʻia oo mai i le asō. 23 A o tagata Gavī o ē na nonofo i nuu e oo i Kasa,+ na faaumatia i latou e tagata Kafatori+ o ē na ō mai mai i Kafatori,* ma nonofo ai i le mea sa latou iai.)

24 “‘Inā tutū ia outou, ia ō atu ma sopoʻia le vanu o Arinona.*+ Vaai! ua ou tuuina atu i ou lima Sekono+ le tagata Amorī, o le tupu o Hesepona. Ia amata loa ona fai mo oe lona fanua, ma siitaua atu iā te ia. 25 O le aso nei ou te faaoo atu ai le atuatuvale ma le fefe ona o oe i nuu uma i lalo o le lagi, o ē o le a faalogo i le tala e uiga iā te oe. O le a atugalu i latou ma gatete* ona o oe.’+

26 “Ona ou aauina atu lea o avefeʻau mai i le toafa o Katemoti,+ iā Sekono le tupu o Hesepona ma ni upu o le filemu,+ e faapea, 27 ‘Seʻi oʻu ui atu i lou laueleele. E na o le auala tele ou te savali ai, ou te lē liliu i le itu taumatau po o le itu tauagavale.+ 28 Ou te ʻai tau lava o meaʻai ma inu tau lava o vai e te faatau mai iā te aʻu. E na ona matou savavali e ui atu ai, 29 e pei ona sa faia iā te aʻu e ē tupuga mai iā Esau o loo nonofo i Seira, ma tagata Moapi o loo nonofo i Aro, seʻia oo ina ou sopoʻia atu Ioritana ma oo atu i le laueleele o le a tuuina mai e Ieova lo matou Atua iā i matou.’ 30 Ae e leʻi faatagaina i tatou e Sekono le tupu o Hesepona e ui ane i ai, auā na tuu pea o ia e Ieova lou Atua e faamaaaina lona loto+ ma lotomalō ai, ina ia tuuina atu o ia i ou lima e pei ona iai i le asō.+

31 “Ona fetalai mai lea o Ieova iā te aʻu, ‘Vaai! o lea ua amata ona ou tuuina atu Sekono ma lona laueleele iā te oe. Ia amata nei ona e ave lona fanua mo oe.’+ 32 Ina ua ō mai Sekono ma ona tagata uma e faafetaui iā i tatou i le taua i Iaesa,+ 33 ona tuuina mai lea o ia e Ieova lo tatou Atua iā i tatou, ma na tatou faatoʻilaloina o ia, o ona atalii, ma lona nuu atoa. 34 I lenā taimi, na tatou faoa ona aai uma ma faaumatia aai uma, e aofia ai tane, o fafine, atoa ma fanau. E leai se tasi na tatou faatotoeina.+ 35 E na o lafumanu na tatou ave e fai mo tatou, atoa ma vete* i o latou aai na tatou faoa. 36 E amata mai i Aroeru,+ e lata i le pito o le vanu o Arinona* (e aofia ai le aai i totonu o le vanu), e oo lava i Kiliata, e leai lava se aai e le‘i mafai ona tatou faatoʻilaloina. Na tuuina mai e Ieova lo tatou Atua ia aai uma iā i tatou.+ 37 Peita‘i, e tou te leʻi ō atu i le laueleele o tagata Amonī,+ o le pito atoa o le vanu* o Iapoka,+ ma aai o vaega maugā, po o so o se vaipanoa ua faasāina e Ieova lo tatou Atua.

3 “Ona tatou liliu lea ma ō aʻe i le ala i Vasana. Ona sau lea o Oko le tupu o Vasana ma ona tagata uma ina ia faafetaui i tatou i le taua i Eterei.+ 2 Ua fetalai mai Ieova iā te aʻu: ‘Aua e te fefe iā te ia, auā ou te tuuina atu o ia i lou lima atoa ma ona tagata uma ma ona laueleele, ma e te faia iā te ia le mea e pei ona e faia iā Sekono le tupu o tagata Amorī, o lē sa nofo i Hesepona.’ 3 Ona tuuina mai foʻi lea e Ieova lo tatou Atua i o tatou lima o Oko le tupu o Vasana ma ona tagata uma, ma na tatou fasiotia i latou seʻia oo ina lē toe iai se isi e totoe o ona tagata. 4 Na tatou faoa ona aai uma. E leai so latou aai e tatou te leʻi faoa, e 60 aai, o le vaipanoa atoa o Arakopo, le malo o Oko i Vasana.+ 5 Ua malupuipuia ia aai uma i pā maualuluga, o faitotoʻa ma pou faalava i ia faitotoʻa, atoa ma le tele o nuu i tua. 6 Peitaʻi, na tatou matuā faaumatia+ ia mea uma e pei ona tatou faia iā Sekono le tupu o Hesepona, na matuā faaumatia aai uma, e aofia ai tane, fafine, ma fanau.+ 7 Na tatou ave foʻi mo i tatou lava o lafumanu uma ma mea na faoa mai i ia aai.

8 “Ona tatou avea lea i lenā taimi o le laueleele mai i tupu e toʻalua o tagata Amorī+ o ē na nonofo i le vaipanoa o Ioritana, mai i le vanu o Arinona* seʻia oo atu i le mauga o Heremoni+ 9 (o le mauga na masani ona taʻua e tagata Saitonu o Siriona, ae na taʻua e tagata Amorī o Senira), 10 o aai uma lava i le fanua maualuga laugatasi, o Kiliata uma, atoa ma Vasana uma e oo atu i Saleka ma Eterei,+ o aai ia o le malo o Oko i Vasana. 11 O Oko le tupu o Vasana, o le tagata mulimuli lea o tagata Rafaimi. O lona moega* o le moega uʻamea, ma o loo iai pea i Rapa o le aai o tagata Amonī. E iva kupita* le umi ae e fā kupita le lautele, e tusa ma le fua masani o le kupita. 12 O le laueleele lenei sa fai mo i tatou i na ona pō: e amata mai i Aroeru,+ lea e latalata i le vanu o Arinona,* ma le ʻafa o vaega maugā o Kiliata, ma ua ou tuu atu ona aai i tagata o le ituaiga o Reupena ma i latou o le ituaiga o Kato.+ 13 Ae ua ou tuu atu le vaega uma o totoe o Kiliata ma Vasana uma o le malo o Oko, i le ʻafa o le ituaiga o Manase.+ O vaipanoa uma o Arakopo, o laueleele ia o Vasana, sa ta‘ua o le laueleele o tagata Rafaimi.

14 “Na ave e Iairo+ le atalii o Manase le vaipanoa uma o Arakopo+ e oo atu i le tuaoi o tagata Kasuri, ma tagata Maakati,+ ma na ia faaigoaina ai na nuu o Vasana i lona lava igoa, o Havota-iairo*+ seʻia oo mai i le asō. 15 Ua ou avatu Kiliata iā Makiro.+ 16 Ua ou avatu i tagata o le ituaiga o Reupena ma i latou o le ituaiga o Kato+ le laueleele e amata mai i Kiliata e oo i le vanu o Arinona,* e tuaoi i le ogatotonu o le vanu, ma ua ou tuu atu foʻi seʻia oo atu i Iapoka, o le vanu lea ua fai ma tuaoi o tagata Amonī, 17 ma Arapa,* ma Ioritana ma ona auvai, e mai i Kinereta e oo atu i le sami o Arapa, o le Sami Oona* lea, o loo i lalo ifo o malifa o Peseka i le itu i sasaʻe.+

18 “Ona ou tuuina atu lea o lenei poloa‘iga, ‘Ua tuuina atu iā te outou e Ieova lo outou Atua lenei laueleele e fai mo outou. O o outou tane totoa uma, e latou te sauni mo le taua ma sopo‘ia le isi itu i luma o o outou uso le fanauga a Isaraelu.+ 19 Ae o le a nonofo pea a outou avā, o a outou fanau, ma a outou lafumanu (ua ou iloa ua anoanoaʻi a outou lafumanu) i aai ua ou foaʻiina atu iā te outou, 20 seʻia avatu e Ieova i o outou uso le mapusaga faapea ma outou, ua fai foʻi mo i latou le laueleele lea na tuuina mai e Ieova lo outou Atua iā i latou i le isi itu o Ioritana. Ona outou toe foʻi mai lea, e taʻitasi i lona tofi na ou avatu iā te outou.’+

21 “O lea taimi na ou poloaʻi ai iā Iosua+ e faapea, ‘Na vaai ou mata i mea na faia e Ieova lo outou Atua i ia tupu e toʻalua. O le a faapea foʻi ona faia e Ieova i malo uma ia o le a outou ui atu i ai.+ 22 Aua tou te fefefe iā i latou, auā o Ieova lo outou Atua, o ia e tau mo outou.’+

23 “I lenā taimi na ou ʻaiʻoi atu ai iā Ieova e faapea, 24 ‘Ieova e, le Alii Pule Silisili Ese, ua oo ina e faaalia mai i lau auauna lou silisili ese ma lou aao malosi,+ auā o ai se atua i le lagi po o le lalolagi e na te faia galuega mamana e pei o oe?+ 25 Faamolemole seʻi e faataga mai aʻu ou te alu atu ma vaavaai i le laueleele lelei i le isi itu o Ioritana, o le laueleele maugā lauolaola ma Lepanona.’+ 26 Ae na matuā toʻasā pea Ieova iā te aʻu ona o outou ma e leʻi faafofoga mai iā te aʻu.+ Ua fetalai mai fo‘i Ieova iā te aʻu, ‘Ua lava lea! Aua neʻi e toe fai mai iā te aʻu i lea mataupu. 27 Ia e alu aʻe i le tumutumu o Peseka+ ma tepa aʻe i le itu i sisifo, i mātū, i saute ma sasaʻe ma vaai i ai ou mata, auā e te lē sopoʻia atu lava i le isi itu o lenei Ioritana.+ 28 Ia tofia Iosua e fai ma taʻitaʻi,+ ia faalaeiauina ma faamalosia o ia, auā o ia e sopo‘ia le isi itu+ i luma o lenei nuu, o ia foʻi e taʻitaʻiina i latou i le laueleele e fai ma o latou tofi lea e te vaai atu i ai.’ 29 Na tutupu uma nei mea a o tatou nonofo i le vanu i luma o Pete-peoro.+

4 “O lenei, Isaraelu e, inā faalogo mai ia i tulafono ma iʻuga o faamasinoga ia ua ou aʻoaʻo atu ai iā te outou e tausi, ina ia outou ola+ ma ō atu ma fai mo outou le laueleele, lea o le a avatu e Ieova le Atua o o outou augātamā iā te outou. 2 Aua tou te faaopoopo se upu i upu ua ou poloaʻi atu ai iā te outou, aua foʻi neʻi outou toese se upu mai i ia upu,+ ina ia tausia ai poloaʻiga a Ieova lo outou Atua ua ou poloaʻi atu ai iā te outou.

3 “Na vāai lava o outou mata i mea na faia e Ieova e tusa ma le mataupu iā Paala o Peoro; na faaumatia e Ieova lo outou Atua mai iā te outou o tagata uma na mulimuli iā Paala o Peoro.+ 4 Ae o outou o ē ua pipiimau atu iā Ieova lo outou Atua, o loo ola uma outou i le asō. 5 Vaai, ua ou aʻoaʻoina outou i tulafono ma iʻuga o faamasinoga+ e pei ona poloaʻi mai ai Ieova loʻu Atua iā te aʻu, ina ia outou faia faapea i le laueleele lea o le a fai mo outou. 6 E ao ona outou matuā tausia ia mea,+ auā e faaalia ai lo outou atamamai+ ma lo outou malamalama+ i luma o tagata o ē o le a faalogo i ia tulafono uma, ma faapea ane, ‘E matuā atamamai ma malamalama tagata o lenei nuu matuā toʻatele.’+ 7 Po o fea ea se nuu e matuā toʻatele ua faalatalata i ai o latou atua, e pei o Ieova lo tatou Atua o lē ua latalata mai i so o se taimi e tatou te valaau atu ai iā te ia?+ 8 Po o fea foʻi se nuu e matuā toʻatele ua iai ni tulafono ma iʻuga o faamasinoga tonu, e pei o lenei Tulafono uma ua ou folasia i o outou luma i le asō?+

9 “Ia outou faaeteete ma mataala* iā te outou lava, ina ia aua neʻi galo iā te outou mea na vāai i ai o outou mata, ma aua neʻi teʻa ese mai i o outou loto i aso uma o o outou olaga. E ao fo‘i ona outou faailoa atu ia mea i o outou atalii ma atalii o o outou atalii.+ 10 I le aso na outou tutū ai i luma o Ieova lo outou Atua i Horepa, na fetalai mai ai Ieova iā te aʻu, ‘Ia faapotopoto mai le nuu iā te aʻu ina ia latou faalogo mai i aʻu upu,+ ma latou aʻoaʻo ai ina ia matataʻu iā te aʻu+ i aso uma e ola ai i le fogāeleele ma aʻoaʻo ai o latou atalii.’+

11 “Ona outou faalatalata atu lea ma tutū i le auvae o le mauga, ma na mū le mauga i le afi lea na oo atu i le vanimonimo; na pogisa, na iai foʻi ao ma na matuā uliuli lava.+ 12 Ona fetalai mai lea o Ieova iā te outou mai i totonu o le afi.+ E na o upu na outou faalogo i ai ae leai se tino na outou vāai i ai,+ e na o le siʻufofoga lava.+ 13 Na ia faailoa mai iā te outou lana feagaiga,+ lea na ia faatonuina outou e tausia, o Tulafono e Sefulu.*+ Mulimuli ane, na ia tusia ia mea i papamaa e lua.+ 14 I lenā taimi na poloaʻi mai Ieova iā te aʻu e aʻoaʻo outou i tulafono ma iʻuga o faamasinoga, ina ia outou tausia i le laueleele lea e tou te ulu atu i ai e fai mo outou.

15 “O lea, ia outou mataala* iā te outou lava, auā na outou lē vāai i se tino i le aso na fetalai mai ai Ieova iā te outou i Horepa mai i totonu o le afi, 16 ina ia aua neʻi outou faia ni mea e faaleagaina ai e ala i le faia mo outou o se tupua ua tā e foliga i se faatusa o se mea, o se faatusa o se tane po o se fafine,+ 17 o se faatusa o so o se manu ua iai i le lalolagi, po o se faatusa o so o se manulele o loo lele i le lagi,+ 18 o se faatusa o so o se manu fetolofi ua iai i le eleele, po o se faatusa o so o se iʻa i le sami po o le vai i lalo o le laueleele.+ 19 Pe a tetepa aʻe o outou mata i le lagi ma vāai atu i le lā, i le masina, i fetu, o ʻau uma ia o le lagi, aua neʻi outou tosina atu i ai ma ifo atu i ia mea ma auauna i ai.+ O mea ia ua tuuina atu e Ieova lo outou Atua i tagata uma i lalo o le lagi atoa. 20 Ae o outou na ave e Ieova ma aumaia mai i le ogaumu e tunu ai uʻamea, mai i Aikupito, ina ia avea outou ma ona lava tagata*+ e pei ona iai i lenei aso.

21 “Na toʻatamaʻi Ieova iā te aʻu ona o outou,+ ma na ia tautō e faapea ou te lē sopoʻia atu Ioritana, pe alu atu i le laueleele lelei o le a tuuina atu e Ieova lou Atua e fai ma ou tofi.+ 22 Auā ou te oti i lenei laueleele; ou te lē sopoʻia Ioritana,+ ae e sopoʻia atu e outou, ma o le a fai mo outou lenā laueleele lelei. 23 Ia outou faaeteete ina neʻi galo iā te outou le feagaiga a Ieova lo outou Atua lea na ia osia ma outou,+ ma aua neʻi outou faia mo outou lava se tupua ua tā, o se faatusa o so o se mea lea ua faasā mai e Ieova lou Atua.+ 24 Auā o Ieova lou Atua e pei o se afi e faaumatia ai,+ o le Atua e finagalo e tapuaʻi atu tau lava o ia.*+

25 “Pe a oo ina fai ni a outou fanau ma fanau a a outou fanau, ma ua leva foʻi ona outou nonofo i le laueleele, ma faia ni mea e faaleagaina ai i le faia o ni tupua ua tā,+ o se faatusa o so o se mea, ma faia mea leaga i le silafaga a Ieova lou Atua e faatigā ai i lona finagalo,+ 26 ou te faia le lagi ma le lalolagi ma molimau e faasaga iā te outou i le aso nei, o le a vave ona faaumatia lava outou mai i le laueleele lea o le a outou sopoʻia atu ai Ioritana ina ia fai mo outou. E lē faaumiumi o outou aso i lea laueleele, auā o le a matuā faaumatia outou.+ 27 E faataapeapeina outou e Ieova i isi nuu,+ ma e toʻaitiiti outou e faatotoeina+ i nuu o le a tutuli i ai outou e Ieova. 28 O le a outou auauna ai i atua ua faia i lima o tagata,+ o laau ma maa, o atua e lē mafai ona vāai, faalogo, aai pe sogisogi.

29 “Ae afai tou te saʻili atu iā Ieova lo outou Atua mai i inā, e tou te maua lava o ia,+ pe afai e tou te saʻili atu iā te ia ma o outou lotoatoa ma ola atoa.+ 30 Pe afai e matuā puapuagatia outou ma ua faataunuuina ia upu uma iā te outou i le lumana‘i, ona outou toe foʻi lea iā Ieova lo outou Atua ma faalogo i lona siʻufofoga.+ 31 Auā o Ieova lo outou Atua, o se Atua e alofa mutimutivale.+ E na te lē tuulafoaʻiina outou pe faaumatia outou pe faagaloina le feagaiga lea na ia tautō atu ai i o outou augātamā.+

32 “O lea, ia fesili atu e faatatau i aso anamua ia na muamua iā te outou, talu mai le aso na foafoaina ai e le Atua le tagata i le lalolagi; ia suʻesuʻe e amata mai i le isi pito o le lagi e oo atu i le isi pito o le lagi. Pe na iai se isi mea na tupu e sili atu lona mataʻutia po o se mea na faalogoina e pei o lenei mea?+ 33 Pe na faalogo se isi nuu i le siʻufofoga o le Atua o saunoa mai i totonu o le afi e pei ona outou faalogo i ai ma ola pea?+ 34 Pe na gaoioi ea le Atua e ave se nuu mo ia lava mai i totonu o se isi atunuu i le faia o faamasinoga,* o faailoga, o vavega,+ o taua,+ ma le aao malosi,+ ma le aao faaloaloa ma mea mataʻutia,+ e pei o mea na faia e Ieova lo outou Atua mo outou i Aikupito a o outou vāai i ai? 35 Ua faailoa atu iā te outou lava nei mea ina ia outou iloa ai o Ieova o le Atua moni+ ia; e leai lava se isi e na o ia.+ 36 Na ia fetalai mai i le lagi ina ia outou faalogo i lona siʻufofoga ina ia aʻoaʻia ai outou, ma na ia faaalia mai lana afi tele i le lalolagi ina ia outou vāai i ai, na outou faalogo foʻi i ana fetalaiga mai i totonu o le afi.+

37 “Auā na ia alofa i o outou augātamā ma na ia filifilia a latou fanau ina ua mavae atu i latou,+ na aveese ai outou mai i Aikupito i lona silasila mai ma lona mana tele. 38 Na ia tuliesea mai i o outou luma o nuu e sili ona malolosi ma toʻatele iā te outou, ina ia avatu outou i lea mea ma tuuina atu iā te outou o latou laueleele e fai ma o outou tofi e pei ona faia i le taimi nei.+ 39 Ia outou iloa foʻi i le aso nei, ma ia manatua i o outou loto o Ieova o le Atua moni i le lagi i lugā atoa ma le lalolagi i lalo nei.+ E leai lava se isi.+ 40 E tatau foʻi ona outou tausia ana tulafono ma ana poloaʻiga ia ua ou poloaʻi atu ai iā te outou i le asō, ina ia manuia ai outou ma o outou atalii pe a mavae atu outou, ma umi ai ona outou nonofo i le laueleele lea o le a avatu e Ieova lo outou Atua iā te outou.”+

41 Ona faatulagaina lea e Mose o aai e tolu i le itu i sasaʻe o Ioritana.+ 42 Afai e fasioti e se fasioti tagata paʻivalea lona tuaoi e aunoa ma le fuafuaina ma e leʻi ʻinoʻino muamua iā te ia,+ e ao ona sola o ia i se tasi o ia aai ma ola ai.+ 43 O aai ia, o Peseri+ i le fanua maualuga laugatasi i le toafa mo le ituaiga o Reupena, o Ramota+ i Kiliata mo le ituaiga o Kato, ma Koleni+ i Vasana mo le ituaiga o Manase.+

44 O le Tulafono+ lenei na faataatia e Mose i luma o le fanauga a Isaraelu. 45 O faamanatuga nei, ma tulafono, ma iʻuga o faamasinoga na tuuina atu e Mose i le fanauga a Isaraelu ina ua latou ō ese mai i Aikupito,+ 46 i le vaipanoa o Ioritana i le vanu e feagai ma Pete-peoro,+ i le laueleele o Sekono le tupu o tagata Amorī, o lē sa nofo i Hesepona,+ o lē na faatoʻilaloina e Mose ma le fanauga a Isaraelu ina ua latou ō ese mai i Aikupito.+ 47 Ua fai mo latou lona laueleele ma le laueleele o Oko+ le tupu o Vasana, o tupu ia e toʻalua o tagata Amorī o ē na nonofo i le vaipanoa i le itu i sasa‘e o Ioritana, 48 e amata mai i Aroeru+ lea e i le pito o le vanu o Arinona* e oo atu i le mauga o Seona, o Heremoni+ lea, 49 e aofia ai foʻi ma Arapa* atoa i le vaipanoa i le itu i sasa‘e o Ioritana, ma e oo atu i le sami o Arapa* o loo i lalo ifo o malifa o Peseka.+

5 Ona aami lea e Mose o Isaraelu uma ma faapea atu iā i latou: “Isaraelu e, ia faalogo mai i tulafono ma iʻuga o faamasinoga ou te faailoa atu iā te outou i le asō, ma e ao ona outou aʻoaʻo ma matuā tausi i ia mea. 2 Na osia e Ieova lo tatou Atua se feagaiga ma i tatou i Horepa.+ 3 E lē o o tatou augātamā na osia ai e Ieova lenei feagaiga, a o i tatou, o i tatou uma lava o loo ola mai nei i le asō. 4 Na faafesagaʻi Ieova ma outou ma fetalai mai i le mauga mai i totonu o le afi.+ 5 Na ou tū i le vā o Ieova ma outou i lenā taimi+ ina ia taʻu atu le afioga a Ieova iā te outou, auā na outou fefefe ona o le afi ma lē ō aʻe ai i le mauga.+ Na ia fetalai mai:

6 “‘O aʻu o Ieova lou Atua, o lē na aveesea oe mai i le atunuu o Aikupito, o le mea na e nofo pologa ai.+ 7 Aua neʻi e fai mo oe nisi atua e ese mai iā te aʻu.*+

8 “‘Aua neʻi e faia se tupua ua tā+ po o se faatusa o se mea o i le lagi i lugā, po o se mea i lalo nei i le laueleele, po o se mea i le vai i lalo o le laueleele. 9 Aua e te ifo i ai pe auauna i ai,+ auā o aʻu o Ieova lou Atua, o le Atua e manaʻo e tapuaʻi mai e tau lava o aʻu,*+ o lē na te faasalaina atalii ona o mea sesē a o latou tamā, e oo i le tupulaga e tolu ma le fā, o i latou o ē e ʻinoʻino mai iā te aʻu,+ 10 ae ou te faaalia le alofa faamaoni i afe o tupulaga, o ē e alolofa mai iā te aʻu ma tausi i aʻu poloaʻiga.

11 “‘Aua e te faaaogā ma le lē tatau le suafa o Ieova lou Atua,+ auā e lē faasaoina e Ieova mai i le faasalaga se tasi e faaaogā ma le lē tatau lona suafa.+

12 “‘Ia tausia le aso Sapati ina ia faapaiaina pea, e pei ona poloaʻi mai ai o Ieova lou Atua iā te oe.+ 13 Ia e galue ma faia au galuega uma i aso e ono,+ 14 ae o le aso lona fitu, o le sapati lea iā Ieova lou Atua.+ Aua e te faia ai se galuega,+ o oe, o lou atalii, ma lou afafine, o lau tane pologa, ma lau teine pologa, o lau povi poʻa, po o lau asini, po o se tasi o au manu lalata, po o se tagata ese o loo aumau i totonu o tou aai,+ ina ia mālōlō ai lau tane pologa ma lau teine pologa e pei lava o oe.+ 15 Ia e manatua na e nofo pologa i le atunuu o Aikupito, ma na aumaia oe e Ieova lou Atua mai i lea mea i lona aao malosi ma lona aao faaloaloa.+ O le mea lea na poloaʻiina ai oe e Ieova lou Atua ia tausia le aso Sapati.

16 “‘Ia e āva i lou tamā ma lou tinā+ e pei ona poloaʻi mai ai Ieova lou Atua iā te oe, ina ia faaumiumi ai ou aso ma ia manuia ai oe i le laueleele o le a foaʻiina mai e Ieova lou Atua iā te oe.+

17 “‘Aua e te fasioti tagata.+

18 “‘Aua foʻi e te mulilua.+

19 “‘Aua foʻi e te gaoi.+

20 “‘Aua foʻi e te molimau i ni mea pepelo faasaga i lou tuaoi.+

21 “‘Aua e te manaʻo i le avā a lou tuaoi.+ Aua foʻi e te manaʻo fua i le fale o lou tuaoi, o lona fanua, o lana tane pologa, o lana teine pologa, o lana povi poʻa, o lana asini, po o se isi lava mea a lou tuaoi.’+

22 “O tulafono* ia na fetalai mai ai Ieova i lo outou faapotopotoga atoa a o iai o ia i le mauga mai i totonu o le afi, o le ao ma le pogisa tele,+ ma se siʻufofoga leotele, ma e na te leʻi faaopoopo atu i ai nisi mea; ona ia tusia lea o ia mea i papamaa e lua ma tuuina mai iā te aʻu.+

23 “Ina ua outou faalogo i le siʻufofoga mai i le pōuliuli, a o mū le mauga i le afi,+ na faalatalata mai iā te aʻu o ulu uma o o outou ituaiga ma o outou toeaina. 24 Ona outou faapea mai lea, ‘Ua faaali mai e Ieova lo tatou Atua lona mamalu ma lona silisili ese, ua matou faalogo foʻi i lona siʻufofoga mai i le afi.+ O le asō ua matou vāai ai ua fetalai le Atua i le tagata ma ua ola pea o ia.+ 25 Aiseā o le a matou feoti ai? Auā atonu e faaumatia i matou e lenei afi tele. Afai e matou te faalogo pea i le siʻufofoga o Ieova lo tatou Atua, e mautinoa e matou te feoti. 26 Auā o ai se tasi mai i tagata uma o lē na faalogo i le siʻufofoga o le Atua soifua o fetalai mai i le afi e pei ona sa matou faalogo ai, ae e ola pea o ia? 27 Ia e faalatalata atu ma faalogo i mea uma ua fetalai mai ai Ieova lo tatou Atua, ma ia e faamatala mai iā i matou o mea uma ua fetalai mai ai Ieova lo tatou Atua iā te oe, ma e matou te faalogo i ai ma faia.’+

28 “Na faafofoga Ieova i upu na outou talanoa mai ai iā te aʻu, ma ua fetalai mai Ieova iā te aʻu, ‘Ua ou faalogo i faamatalaga a lenei nuu ua fai atu iā te oe. E lelei upu uma ua latou fai atu ai.+ 29 Pe ana atiaʻe i o latou loto le mataʻu iā te aʻu+ i taimi uma, ma tausia pea aʻu poloaʻiga uma,+ ona manuia ai lea o i latou ma o latou atalii e faavavau!+ 30 Ia e fai atu iā i latou: “Ia toe foʻi atu i o outou faleʻie.” 31 Ae ia e tū mai i inei iā te aʻu, ma ou te taʻu atu iā te oe o poloaʻiga, o tulafono, ma iʻuga o faamasinoga uma e ao ona e aʻoaʻo atu ai iā i latou, e ao foʻi ona latou tausia i le laueleele ou te avatu e fai mo latou.’ 32 E ao iā te outou ona tausia ia mea e pei ona poloaʻi mai ai Ieova lo outou Atua iā te outou.+ Aua tou te liliu i le itu taumatau po o le itu tauagavale.+ 33 Ia outou savavali atoatoa i le ala ua poloaʻi mai ai Ieova lo outou Atua iā te outou,+ ina ia outou ola ma taulau manuia ai, ma faaumiumi ai o outou aso i le laueleele lea o le a fai mo outou.+

6 “O poloaʻiga, o tulafono, ma iʻuga o faamasinoga ia na tuuina mai e Ieova lo outou Atua e aʻoaʻo ai outou, ina ia outou tausia i le laueleele e tou te sopo atu i ai e fai mo outou, 2 ina ia e mataʻu ai iā Ieova lou Atua ma tausia ana tulafono ma ana poloaʻiga uma ia ua ou poloaʻi atu ai iā te oe, o oe ma lou atalii ma le atalii o lou atalii,+ i aso uma o lou olaga, ina ia faaumiumi ai ou aso.+ 3 Isaraelu e, ia e faalogo mai ma ia e tausia nei mea uma, ina ia e manuia ai ma matuā faatoʻateleina ai outou i le laueleele lea e tafe ai le suāsusu ma le meli, e pei ona folafola mai e Ieova le Atua o ou augātamā iā te oe.

4 “Isaraelu e, faalogo mai ia: O Ieova lo tatou Atua, o Ieova e toʻatasi lava ia.+ 5 Ia e alofa atu iā Ieova lou Atua ma lou lotoatoa, ma lou ola atoa,+ ma lou malosi atoa.+ 6 Ia teu i lou loto upu ia ua ou poloaʻi atu ai iā te oe i le asō, 7 ma ia e matuā aʻoaʻo soo ai i lau fanau,*+ ia e tautala ai pe a e nofo i lou fale, pe a e savali i le ala, pe a e taoto, ma pe a e tulaʻi foʻi.+ 8 Ia e fusi ia mea i lou lima e fai ma faamanatuga, ma ia pei ia mea o se fusi i lou muāulu.*+ 9 Ia e tusi ia mea i pou o le faitotoʻa o lou fale ma i faitotoʻa o le aai.

10 “Pe a avatu oe e Ieova lou Atua i le laueleele na ia tautō ai i ou augātamā o Aperaamo, o Isaako, ma Iakopo e tuuina atu iā te oe,+ o aai tetele ma le matagofie e te leʻi fausiaina,+ 11 o fale ua tumu i mea lelei uma e te leʻi faatumuina, o vaieli na eliina ae e te leʻi elia, o togāvine ma laau olive e te leʻi totōina, e te ʻai ma e maʻona ai,+ 12 ia e faaeteete ina neʻi e faagaloina Ieova,+ o lē na aveeseina oe mai i Aikupito, mai i le mea sa nofo pologa ai. 13 E tatau ona e mataʻu iā Ieova lou Atua,+ ia e auauna iā te ia,+ ma ia e tautō foʻi i lona suafa.+ 14 Aua neʻi outou mulimuli i isi atua, o so o se atua o tagata o ē o loo siʻomia outou,+ 15 auā o loo faatasi ma oe Ieova lou Atua, o le Atua lea e finagalo e tapuaʻi atu e tau lava o ia,*+ ina neʻi matuā toʻasā Ieova lou Atua iā te oe,+ ma ia faaumatia ai oe mai i le fogāeleele.+

16 “Aua tou te faia se mea e tofotofo ai iā Ieova lo outou Atua,+ e pei ona outou tofotofo iā te ia i Mase.+ 17 E ao ona outou matuā tausia poloaʻiga a Ieova lo outou Atua, o ana faamanatuga, ma ana tulafono na ia poloaʻi mai ai iā te oe ina ia tausia. 18 E ao ona e faia le mea ua tonu ma lelei i le silafaga a Ieova, ina ia e manuia ai, ma e ulu atu ma fai mo oe le laueleele lelei lea na tautō ai Ieova i ou augātamā,+ 19 e ala i le tutuliesea o ou fili uma mai i ou luma e pei ona folafola mai e Ieova.+

20 “Pe afai e fesili mai lou atalii iā te oe i le lumanaʻi e faapea, ‘O le ā le uiga o faamanatuga, o tulafono, ma iʻuga o faamasinoga na poloaʻi mai ai Ieova lo tatou Atua iā te outou?’ 21 ona e tali atu lea i lou atalii, ‘Na matou nofo pologa iā Farao i Aikupito ae na aumaia i matou e Ieova mai i Aikupito i le aao malosi. 22 Na faia pea e Ieova faailoga ma vavega tetele ma le mataʻutia na aafia ai Aikupito,+ ma Farao, ma lona aiga uma, a o matou vāai i ai.+ 23 Na ia aveesea i matou mai i lea mea ma aumaia i matou i inei, ina ia tuuina mai iā i tatou le laueleele lea na ia tautō ai i o tatou augātamā.+ 24 Ona poloaʻi mai ai lea o Ieova iā i matou ia tausia nei tulafono uma, ia matataʻu foʻi iā Ieova lo tatou Atua mo lo tatou lelei i aso uma,+ ma ola ai pea+ e pei ona tatou ola i le asō. 25 E taʻua i tatou o tagata amiotonu pe a tatou tausia ia poloaʻiga uma i luma o Ieova lo tatou Atua, e pei ona ia poloaʻi mai ai iā i tatou.’+

7 “Pe a oo ina ave oe e Ieova lou Atua i le laueleele lea o le a e alu atu i ai ma fai mo oe,+ e na te aveesea foʻi atunuu e matuā toʻatele mai i ou luma:+ o tagata Hetī, o tagata Kirekasē, o tagata Amorī,+ o tagata Kanana, o tagata Perisē, o tagata Hivī, ma tagata Iepusē,+ o atunuu ia e fitu e sili atu ona toʻatele ma malolosi nai lo o oe.+ 2 E tuuina mai i latou e Ieova lou Atua iā te oe, ma e te faatoʻilaloina i latou.+ E ao ona e matuā faaumatia+ lava i latou. Aua e te osia se feagaiga ma i latou, pe agalelei atu fo‘i iā i latou.+ 3 Aua tou te fefaaipoipoaʻi* ma i latou. Aua neʻi avatua o outou afafine mo o latou atalii, aua foʻi neʻi aumaia o latou afafine mo o outou atalii.+ 4 Auā latou te faaliliueseina o outou atalii mai i le mulimuli mai iā te aʻu ae auauna i isi atua;+ ona matuā toʻasā ai lea o Ieova iā te outou, ma ia faaumatia ai loa outou.+

5 “Ae o le mea lenei e ao ona outou faia iā i latou: Ia lepeti a latou fata faitaulaga, ia gausia a latou poutū paia,+ ia talepe i lalo a latou pou paia,*+ ma ia susunu i le afi a latou tupua ua tā.+ 6 Auā o oe o le nuu paia iā Ieova lou Atua, ma o oe na filifilia e Ieova lou Atua e avea ma ona nuu faapitoa,* mai i nuu uma i le lalolagi atoa.+

7 “E lē ona o outou o le nuu e sili ona toʻatele i lo o isi nuu, na ala ai ona alofa Ieova iā te outou i lona filifilia o outou,+ auā e toʻaitiiti lava outou mai i nuu uma.+ 8 Ae ona o le alofa o Ieova iā te outou, ma lona tausia o lana tautoga lea na ia tautō ai i o outou augātamā,+ na aumai ai outou e Ieova i le aao malosi, ina ia laveaʻiina outou mai i le mea sa nofo pologa ai,+ mai i le pule a* Farao le tupu o Aikupito. 9 Ua e iloa lelei o Ieova lou Atua o le Atua moni, o le Atua faamaoni, e tausi i lana feagaiga ma e faaalia le alofa faamaoni i le afe o tupulaga o ē e alolofa iā te ia, ma tausia ana poloaʻiga.+ 10 Ae e tauia e ia o ē e ʻinoʻino iā te ia e ala i le faaumatiaina+ o i latou. E lē faatuai o ia e faasala ē e ʻinoʻino iā te ia; ae e na te taui atu iā i latou. 11 O lea, e ao ona e tausia pea poloaʻiga, o tulafono, ma iʻuga o faamasinoga ua ou poloaʻi atu ai iā te oe i le asō, e ala i le faia o ia mea.

12 “Pe a outou faalogo pea i nei iʻuga o faamasinoga, ma outou tausia ma faia, o le a tausia pea e Ieova lou Atua le feagaiga ma oe, ma faaalia le alofa faamaoni lea na ia tautō ai i ou augātamā. 13 E alofa foʻi o ia iā te oe ma faamanuia iā te oe, ma faatoʻateleina oe. Ioe, e na te faamanuia oe i le toʻatele o le fanau,*+ ma fua o lou fanua, o au fatu, o lau uaina fou, o lau suāuu,+ o tamaʻi povi o au lafu povi, ma tamaʻi mamoe o au lafu mamoe, i le eleele na ia tautō ai i ou augātamā e avatu iā te oe.+ 14 O le a sili ona faamanuiaina oe i tagata uma;+ e lē maua iā te oe se tane po o se fafine e leai sana fanau, e oo lava i au lafumanu.+ 15 E aveesea e Ieova mai iā te oe o maʻi uma, ma e na te lē faaoo atu iā te oe so o se faamaʻi leaga na e vaaia i Aikupito,+ ae e na te faaoo atu i ē uma ua ʻinoʻino iā te oe. 16 E ao ona e faaumatia nuu uma ia e tuuina atu e Ieova lou Atua iā te oe.+ Aua e te alofa iā i latou,*+ ma aua foʻi neʻi e auauna i o latou atua,+ auā e fai ia mea ma mailei iā te oe.+

17 “Afai ua e faapea ifo i lou loto, ‘E sili atu ona toʻatele tagata o ia atunuu nai lo o aʻu. E mafai faapefea ona ou tuliesea i latou?’+ 18 aua e te fefe iā i latou.+ Ia e manatua le mea na faia e Ieova lou Atua iā Farao ma Aikupito+ uma, 19 o faasalaga* tetele na vaai i ai ou mata, o faailoga, o vavega,+ o le aao malosi ma le aao faaloaloa lea na aveese ai outou e Ieova lou Atua.+ O le mea foʻi lea o le a faia e Ieova lou Atua i nuu uma ia e te fefe i ai.+ 20 E faatupuina e Ieova lou Atua faalogona o le atuatuvale iā i latou, seʻia faaumatia ē o totoe+ ma ē o lalafi i ou luma. 21 Aua neʻi e mataʻu ona o i latou, auā o loo faatasi Ieova lou Atua ma oe,+ o le Atua silisili ma le ofoofogia.+

22 “E auauaʻi ona tuliesea e Ieova lou Atua ia nuu mai i ou luma.+ E lē faatagaina ona e vave faaumatia i latou, neʻi faateleina manufeʻai o le fanua ma lamatia ai lou ola. 23 E tuuina atu i latou e Ieova lou Atua iā te oe, ma e faatoʻilalo lava i latou seʻia oo ina faaumatia i latou.+ 24 E na te tuuina mai foʻi o latou tupu i lou lima,+ ma e te soloiesea o latou igoa mai i lalo o le lagi.+ E leai se tasi e tū mai e tetee iā te oe,+ seʻia oo ina e faaumatia i latou uma.+ 25 Ia outou susunu o latou tupua ua tā i le afi.+ Aua e te manaʻo i le siliva ma le auro o ia mea, pe ave foʻi mo oe+ ina neʻi maileia ai oe, auā o se mea lea e inosia e Ieova lou Atua.+ 26 Aua e te aumaia se mea inosia i lou fale, ma avea ai oe ma sē e tatau ona faaumatia e pei o lea mea. Ia e matuā ʻinoʻino i ai ma matuā ita foʻi i ai, auā o se mea lea e tatau ona faaumatia.

8 “E ao ona outou toʻaʻaga e tausia poloaʻiga uma ua ou tuuina atu iā te outou i le asō, ina ia outou ola ai pea+ ma faatoʻateleina ai outou, ma ō atu ma fai mo outou le laueleele lea na tautō ai Ieova i o outou augātamā.+ 2 Ia e manatua le ala umī na tuu ai oe e Ieova lou Atua e te savali ai i le toafa mo tausaga e 40,+ ina ia aʻoaʻoina ai oe ia lotomaulalo ma tofotofoina ai oe+ ina ia iloa mea o i lou loto,+ pe e te tausia pea ana poloaʻiga pe leai. 3 Na ia faamaulaloina oe ma tuu oe ia matelāina,+ ma fafaga iā te oe i le manai+ lea e te leʻi masani ai pe masani ai foʻi ou augātamā, ina ia e iloa ai e lē na o meaʻai e ola ai le tagata, ae o afioga uma e tulei mai i le fofoga o Ieova+ e ola ai le tagata. 4 E leʻi pala lou ofu lea na ofu, e leʻi fulafula foʻi ou vae i na tausaga e 40.+ 5 Ua e iloa foʻi i lou lava loto, e pei ona faasaʻo e se tamāloa o lona atalii, e faapena foʻi ona faasaʻo oe e Ieova lou Atua.+

6 “E ao ona e tausia poloaʻiga a Ieova lou Atua e ala i le savali i ona ala ma mataʻu iā te ia. 7 Auā e avatu oe e Ieova lou Atua i le laueleele lelei,+ o le laueleele e tele ai vaitafe,* o vaipuna ma vai loloto o loo puna aʻe i fanua laugatasi* ma vaega maugā, 8 o le laueleele e tele ai saito, o karite, o vine, o mati ma rimoni,+ o le laueleele e iai le suāuu olive ma le meli,+ 9 o le laueleele e lē oge lava, e te lē mativa ai i se mea e tasi, o le laueleele e maua ai maa e tumu i uʻamea, ma e te eli ai foʻi le ʻapamemea i ona mauga.

10 “Pe a e ʻai ma e maʻona ai, e ao ona e viia Ieova lou Atua, ona o le laueleele lelei ua ia avatu iā te oe.+ 11 Ia faaeteete neʻi galo iā te oe Ieova lou Atua ma e lē tausia ai ana poloaʻiga, o ana iʻuga o faamasinoga, ma ana tulafono ua ou poloaʻi atu ai iā te oe i le asō. 12 Pe a e ʻai ma e maʻona ai, ma e fausia ni fale mananaia ma e nofo ai,+ 13 ma faateleina au lafu povi ma lafu mamoe, ma faateleina foʻi au siliva ma auro, ma faateleina au mea uma lava, 14 aua ne‘i faamaualugaina lou loto+ ma galo ai iā te oe Ieova lou Atua, o lē na aveesea oe mai i Aikupito, mai i le mea sa e nofo pologa ai,+ 15 o lē na taʻitaʻia oe i le toafa telē ma mataʻutia,+ na iai gata feʻai, o akarava ma le laueleele naumati e leai se vai. Na ia faatafe mai le vai mai i le papa malō mo oe,+ 16 ma fafagaina oe i le manai+ i le toafa, lea na lē masani ai ou augātamā, ina ia faamaulaloina oe+ ma ina ia tofotofoina ai oe mo lou lava lelei i le lumanaʻi.+ 17 Pe a e faapea ifo i lou loto, ‘O loʻu lava malosi ma le malosi o oʻu lima ua ou mauʻoa ai,’+ 18 ia e manatua o Ieova lou Atua e na te avatua le malosi iā te oe e mauʻoa ai,+ ina ia tausia lana feagaiga na ia tautō ai i ou augātamā, e pei ona ia faia i le aso nei.+

19 “Afai e galo lava iā te oe Ieova lou Atua, ma e mulimuli atu i isi atua ma auauna iā i latou ma ifo iā i latou, ou te taʻutino atu iā te outou i le asō, o le a faaumatia lava outou.+ 20 E pei o atunuu ia o le a faaumatia e Ieova i o outou luma, o le a faapena foʻi ona faaumatia outou, auā tou te lē faalogo lava i le siʻufofoga o Ieova lo outou Atua.+

9 “Isaraelu e, faalogo mai ia, o le a e sopoʻia atu Ioritana+ i le aso nei ina ia e alu atu ma faatoʻilaloina atunuu e sili ona toʻatele ma malolosi nai lo o oe,+ ma aai tetele ma malupuipuia e oo i le lagi,*+ 2 o tagata e malolosi ma uumi, o atalii o tagata Anakima,+ o ē ua e iloa ma ua e faalogo i se tala e faapea, ‘O ai sē e mafai ona tū atu i luma o atalii o Anaki?’ 3 O lea, ia e iloa i le aso nei, e muamua ona sopo atu Ieova lou Atua iā te oe.+ O ia o le afi e faaumatia ai,+ ma e na te faaumatia i latou. E na te faatoʻilaloina i latou i ou luma ina ia vave ona e tuliesea i latou ma faaumatia i latou, e pei ona folafola mai e Ieova iā te oe.+

4 “Pe a tuliesea e Ieova lou Atua i latou mai i ou luma, aua e te faapea ifo i lou loto, ‘O laʻu amiotonu ua ala ai ona aumai aʻu i inei e Ieova e fai mo aʻu lenei laueleele.’+ Peitaʻi, o amioga leaga a ia nuu+ ua ala ai ona tuliesea e Ieova i latou mai i ou luma. 5 E lē ona o lau amiotonu po o le saʻo o lou loto e te alu atu ai ma fai mo oe lo latou laueleele. Ae ona o amioga leaga a nei nuu, e tuliesea ai e Ieova lou Atua i latou mai i ou luma,+ ina ia faataunuu ai foʻi afioga ia na tautō ai Ieova i ou augātamā o Aperaamo,+ o Isaako,+ ma Iakopo.+ 6 E ao ona e iloa e lē ona o lau amiotonu o le a avatu ai e Ieova lou Atua iā te oe lea laueleele lelei e fai mo oe, auā o oe o le nuu faauamaaa.+

7 “Ia manatua: Aua neʻi galo mea na e faatupu ai le toʻasā o Ieova lou Atua i le toafa.+ E mai i le aso na outou tuua ai Aikupito seʻia outou oo mai i lenei nofoaga, ua outou fouvale iā Ieova.+ 8 Na outou faatupu foʻi le toʻasā o Ieova i Horepa ma na matuā toʻatamaʻi ai Ieova iā te outou, ma toetoe a ia faaumatia ai outou.+ 9 Ina ua ou alu aʻe i le mauga e talia papamaa,+ o papamaa ia o le feagaiga na osia e Ieova ma outou,+ na ou nofo ai pea i le mauga i ao e 40 ma pō e 40,+ ma ou te leʻi ʻai i se meaʻai pe inu i se vai. 10 Ona tuuina mai lea e Ieova iā te aʻu o papamaa e lua ia na tusia e le aao* o le Atua, ma na iai foʻi afioga uma na fetalai mai ai Ieova iā te outou i le mauga mai i totonu o le afi i le aso na faapotopoto ai le faapotopotoga.+ 11 Ina ua uma ao e 40 ma pō e 40, ona tuuina mai lea e Ieova iā te aʻu o papamaa e lua, o papamaa ia o le feagaiga, 12 ona fetalai mai lea o Ieova iā te aʻu, ‘Ia e tulaʻi ma faavave ona e alu ifo i lalo auā ua leaga tele le mea ua faia e le nuu na e aumai mai i Aikupito.+ Ua vave ona latou liliuese mai i le ala na ou poloaʻi atu iā i latou e mulimuli i ai. Ua latou faia se tupua uʻamea mo i latou lava.’+ 13 Na fetalai mai fo‘i Ieova iā te aʻu, ‘Ua ou iloa lenei nuu, faauta foʻi! o se nuu e faauamaaa.+ 14 Ia tuu mai a‘u se‘i o‘u faaumatia i latou ma soloiesea o latou igoa mai i lalo o le lagi, ae seʻi oʻu faia oe ma nuu e sili ona malosi ma toʻatele nai lo o i latou.’+

15 “Ona ou liliu lea ma alu ifo mai i le mauga, a o mū le mauga i le afi,+ ma na uu i oʻu lima papamaa e lua o le feagaiga.+ 16 Ona ou vaai atu lea ma iloa ai ua outou agasala iā Ieova lo outou Atua! Na outou faia se tamaʻi povi uʻamea mo outou lava. Na vave ona outou liliuese mai i le ala na poloaʻi mai ai Ieova e tou te mulimuli i ai.+ 17 Na ou uu papamaa e lua ma togi i lalo mai i oʻu lima ma na nutililii a o outou vāai i ai.+ 18 Ona ou faapaʻū faō lea i luma o Ieova, i ao e 40 ma pō e 40 e pei ona faia muamua. Ou te leʻi ʻai i se meaʻai pe inu i se vai,+ ona o a outou agasala uma na outou faia ina ua outou faia mea leaga i le silafaga a Ieova ma faatigā ai i lona finagalo. 19 Auā na ou fefe ona o le toʻasā tele o Ieova iā te outou+ ma toetoe a faaumatia ai outou. Peitaʻi, na faafofoga mai Ieova iā te aʻu i lenā foʻi taimi.+

20 “Na matuā toʻatamaʻi foʻi Ieova iā Arona na toetoe a ia faaumatia ai o ia,+ ae na ou faatoga foʻi mo Arona i lenā taimi. 21 Ona ou ave lea o le mea na outou agasala ai, o le tamaʻi povi+ lea, ma ou susunuina i le afi; na ou tuʻininiia ma matuā olo seʻia oo ina pei o le pefu, ona ou togi lea o le pefu i le vaitafe na tafe mai i le mauga.+

22 “Na outou faatupu foʻi le to‘asā o Ieova i Tapara,+ ma Mase,+ ma Kiperota-atava.+ 23 Ina ua aauina atu outou e Ieova mai i Katesa-panea,+ na ia fetalai mai, ‘Ia outou ō aʻe ma fai mo outou le laueleele o le a ou tuuina atu iā te outou!’ ona outou toe fouvale lea i le faatonuga a Ieova lo outou Atua,+ na outou lē faatuatua+ iā te ia ma lē usiusita‘i iā te ia. 24 Na outou fouvale iā Ieova talu mai lava le aso na ou iloa ai outou.

25 “O lea, na ou faapaʻū faō pea i luma o Ieova i ao e 40 ma pō e 40,+ na ou faapaʻū faō faapea talu ai na fetalai mai Ieova e na te faaumatia outou. 26 Ona ou faatoga atu lea iā Ieova ma faapea atu, ‘Ieova e, le Alii Pule Silisili Ese, aua neʻi e faaumatia lou nuu. O i latou o ou lava tagata,*+ o ē na e laveaʻiina i lou mana ma aumaia mai i Aikupito i le aao malosi.+ 27 Ia e manatua au auauna o Aperaamo, o Isaako, ma Iakopo.+ Aua neʻi e amanaʻiaina le lotomalō o lenei nuu, o a latou amioga leaga, ma a latou agasala,+ 28 ina neʻi faapea mai tagata o le atunuu lea na e aumai ai i matou: “Ua lē mafai e Ieova ona avatu i latou i le laueleele lea na ia folafola e avatu iā i latou, ma talu ai na ia ʻinoʻino iā i latou, na ia aveese ai i latou mai i inei ina ia fasiotia i latou i le toafa.”+ 29 Auā o i latou o lou nuu ma ou lava tagata,*+ o ē na e aumaia i lou mana tele ma lou aao faaloaloa.’+

10 “Ona fetalai mai lea o Ieova iā te aʻu i lenā taimi, ‘Ia e tā mai ni papamaa se lua e pei o papamaa muamua,+ ma ia e sau iā te aʻu i luga o le mauga; ia e faia foʻi mo oe se ato* i laupapa. 2 Ou te tusia foʻi i ia papamaa o upu na tusia i papamaa muamua ia na e nutililiia, ma e ao ona e tuu i totonu o le atolaau.’ 3 Ona ou faia lea o le ato i laau o le setima ma tā ai papamaa e lua e pei o ia na iai muamua, ma ou alu aʻe i le mauga ma papamaa e lua o loo uu i loʻu lima.+ 4 Na ia tusia i ia papamaa o upu na ia tusia muamua,+ o Tulafono e Sefulu,*+ ia na fetalai mai ai Ieova iā te outou i le mauga mai i totonu o le afi+ i le aso na faapotopoto ai le faapotopotoga;+ ma na tuuina mai e Ieova ia papamaa iā te aʻu. 5 Ona ou liliu lea ma alu ifo mai i le mauga+ ma tuu papamaa i totonu o le atolaau na ou faia, ma o loo iai pea i inā, e pei ona poloaʻi mai ai Ieova iā te aʻu.

6 “Ona malaga ese lea o le fanauga a Isaraelu mai i Perota Pene-akana, e aga‘i i Mosera. O i inā na maliu ai Arona ma tanu ai o ia,+ ona amata ai lea ona auauna lona atalii o Eleasaro e fai ma ositaulaga e sui iā te ia.+ 7 Na latou malaga ese mai i lea mea mo Kikata ma mai i Kikata na ō atu ai i Iatepata,+ o le laueleele e tele ai vaitafe.*

8 “I lenā taimi na vavaeese ai e Ieova le ituaiga o Levi+ e amoina le atolaau o le feagaiga a Ieova,+ ia tutū foʻi i luma o Ieova e auauna iā te ia ma faamanuia atu i tagata i lona suafa+ seʻia oo mai i lenei aso. 9 O le mea lea ua lē tuuina atu ai iā Levi se fanua po o se tofi faatasi ma ona uso. O Ieova o lona tofi lea, e pei ona fetalai mai ai Ieova lou Atua iā te ia.+ 10 A o aʻu, na ou nofo i le mauga e pei o le taimi muamua i ao e 40 ma pō e 40,+ ma na faafofoga foʻi Ieova iā te aʻu i lea taimi.+ E leʻi finagalo Ieova e faaumatia oe. 11 Ona fetalai mai lea o Ieova iā te aʻu, ‘Ia muamua atu i luma o le nuu ma sauni e malaga ese, ina ia latou ō atu ma fai mo i latou le laueleele na ou tautō ai e avatu i o latou augātamā.’+

12 “O lenei Isaraelu e, po o le ā se mea e finagalo i ai Ieova lou Atua iā te oe?+ Tau o lea: ia mataʻu iā Ieova lou Atua,+ ia savali i ona ala uma,+ ia alofa iā te ia, ia auauna iā Ieova lou Atua ma lou lotoatoa ma lou ola atoa,+ 13 ma tausia poloaʻiga ma tulafono a Ieova ua ou poloaʻi atu ai iā te oe i le aso nei mo lou lava lelei.+ 14 Faauta, o Ieova lou Atua e ona le lagi, e oo foʻi i lagi o lagi, ma le lalolagi ma mea uma ua iai.+ 15 Ae e na o ou augātamā lava na mafuta vavalalata i ai Ieova ma faaali i ai lona alofa, ma na ia filifilia outou, o a latou fanau,+ mai i nuu uma e pei ona iai i lenei aso. 16 E ao ona outou faamamā loa* o outou loto+ ma tuu lo outou faauamaaa.+ 17 Auā o Ieova lo outou Atua, o le Atua o atua,+ o le Alii o alii, o le Atua silisili, e malosi, ma ofoofogia, e lē faailoga tagata,+ ma e na te lē taliaina se foaʻi e faia i se auala faaalatua. 18 E na te faia le faamasinogatonu mo le tama ua leai sona tamā,* ma le fafine ua oti lana tane,+ e alofa foʻi i le tagata ese ua aumau iā te outou,+ e avatu iā te ia o meaʻai ma ofu. 19 Ia outou alolofa atu foʻi i tagata ese ua aumau iā te outou, auā na outou aumau o ni tagata ese i le atunuu o Aikupito.+

20 “E ao ona e mataʻu iā Ieova lou Atua, e ao ona e auauna iā te ia,+ ma pipii atu iā te ia ma ia e tautō foʻi i lona suafa. 21 O Ia e ao ona e vivii i ai.+ O ia o lou Atua, o lē na faia mo oe nei mea tetele ma ofoofogia na vaai i ai ou mata.+ 22 Na ō ifo i Aikupito o tagata e toʻa 70 o ou augātamā ia,+ a o lenei ua faatoʻateleina oe e Ieova lou Atua e pei o le tele o fetu o le lagi.+

11 “E ao ona e alofa iā Ieova lou Atua+ ma tausia pea lau matafaioi iā te ia, o ana tulafono, o iʻuga o ana faamasinoga, ma ana poloaʻiga. 2 Ua outou iloa o loo o‘u tautala atu iā te outou i le asō, ae e lē o o outou atalii o ē e leʻi iloa pe vāai i aʻoaʻiga a Ieova lo outou Atua,+ o lona silisili ese,+ o lona aao malosi+ ma lona aao faaloaloa. 3 E latou te le‘i vāai i ana faailoga ma ana galuega na ia faia i Aikupito iā Farao le tupu o Aikupito, atoa ma lona atunuu uma;+ 4 po o le mea na ia faia i ʻautau a Aikupito, o solofanua ma kariota o le taua a Farao, ia na ufitia i suāsami o le Sami Ulaula a o latou tuliloaina outou, ma na faaumatia a‘ia‘i i latou e Ieova.*+ 5 E latou te leʻi vāai i mea na ia faia mo outou* i le toafa seʻia oo ina outou ō mai i lenei nofoaga, 6 po o le mea na ia faia iā Tatano ma Apiramo o atalii ia o Eliapo, o le atalii lea o Reupena, ina ua faamaga le gutu o le eleele ma folo ai i latou ma o latou aiga ma o latou faleʻie, ma so o se mea e iai le ola na mulimuli iā i latou, i luma o Isaraelu uma.+ 7 Na vāai i ai o outou lava mata i galuega mamana uma na faia e Ieova.

8 “Ia outou tausia poloaʻiga uma ua ou poloaʻi atu ai i le aso nei iā te outou, ina ia outou malolosi ai ma outou sopo atu i le laueleele ina ia fai mo outou, 9 ma ia faaumiumi ai o outou aso+ i le laueleele lea na tautō ai Ieova e avatu i o outou augātamā ma a latou fanau,+ o le laueleele e tafe ai le suāsusu ma le meli.+

10 “O le laueleele lea o le a fai mo outou, e lē pei o le atunuu o Aikupito lea na outou ō ese mai ai, o le mea na masani ona outou lūlū ai fatu ma faasūsū le laueleele i lou vae,* e pei o se faatoʻaga o laau ʻaina. 11 Ae o le laueleele lea o le a outou sopo atu i ai e fai mo outou, o se laueleele e tele ai mauga ma fanua laugatasi.*+ E inu lava i le timu mai i le lagi;+ 12 o le laueleele lea ua tausia e Ieova lou Atua. O loo silasila pea i ai fofoga o Ieova lou Atua, e mai i le amataga o le tausaga seʻia oo i le faaiʻuga o le tausaga.

13 “Pe afai tou te matuā usiusitaʻi i aʻu poloaʻiga ua ou poloaʻi atu ai iā te outou i le asō, ma alolofa iā Ieova lo outou Atua, ma auauna iā te ia ma o outou lotoatoa, ma o outou ola atoa,+ 14 ou te avatua fo‘i le timu i o outou laueleele i ona taimi atofaina, o timuga i le tau e afu ai mea ma timuga i le tau e totogo ai mea, e te aoao foʻi au fatu ma lau uaina fou ma lau suāuu.+ 15 Ou te avatu foʻi vao i lou fanua mo au lafumanu, ma e te ʻai ma e maʻona ai.+ 16 Ia faaeteete ina neʻi faasesēina o outou loto ma liliuese ai, ma tapuaʻi atu i isi atua ma ifo atu i ai.+ 17 Auā a leai, o le a matuā toʻasā Ieova iā te outou ma ia punitia le lagi ina ia lē timu ai,+ e lē fua mai foʻi le laueleele ma e vave ona fano outou mai i le nuu lelei lea e avatu e Ieova iā te outou.+

18 “E ao ona outou tāmau aʻu upu nei i o outou loto ma faatatau i o outou olaga, ia outou fusi ia mea i o outou lima e fai ma faamanatuga, ma ia pei ia mea o se fusi i o outou muāulu.*+ 19 Ia outou aʻoaʻo ia upu i a outou fanau, ma ia e tautala atu ai iā i latou pe a e nofo i lou fale, pe a e savali i le ala, pe a e taoto, pe a e tulaʻi foʻi.+ 20 Ia e tusi ia mea i pou o le faitotoʻa o lou fale ma faitotoʻa o le aai, 21 ina ia faateleina ai o outou aso ma aso o a outou fanau+ i le laueleele lea na tautō ai Ieova e avatu i o outou augātamā,+ e pei ona iai pea le lagi i luga o le lalolagi.

22 “Afai tou te matuā tausisi i nei poloaʻiga ua ou tuuina atu iā te outou ma faia ia mea, ia alolofa iā Ieova lo outou Atua,+ ia savavali i ona ala uma ma pipii atu iā te ia,+ 23 ona tuliesea lea e Ieova o nei nuu uma mai i o outou luma,+ ma e tou te faatoʻilaloina nuu e sili atu ona malolosi ma toʻatele nai lo o outou.+ 24 E fai mo outou o mea uma e savavali ai o outou vae.+ O lo outou tuaoi e mai i le toafa e oo i Lepanona, e mai i le Vaitafe, o le vaitafe lea o Eufirate, e oo atu i le sami i le itu i sisifo.*+ 25 E leai se tasi e tū mai e tetee iā te outou.+ E tuuina atu le atuatuvale ma le fefe e Ieova lo outou Atua i tagata o le laueleele atoa lea o le a outou savavali ai,+ e pei ona ia folafola mai iā te outou.

26 “Vaai, ua ou tuuina atu i o outou luma i le asō, le manuia ma le malaia:+ 27 o le manuia pe afai e tou te usiusitaʻi i poloaʻiga a Ieova lo outou Atua, ia ua ou poloaʻi atu ai iā te outou i le asō,+ 28 ma le malaia pe afai e tou te lē usiusitaʻi i poloaʻiga a Ieova lo outou Atua,+ ma outou liliuese mai i le ala ua ou poloaʻi atu ai iā te outou i le asō, ma mulimuli i isi atua e tou te leʻi iloa.

29 “Pe a avatu oe e Ieova lou Atua i le laueleele lea o le a fai mo oe, ia e faamanuia atu i tagata o loo i le mauga o Keresema, ma faamalaia tagata o loo i le mauga o Evalu.+ 30 Pe e lē o iai ea ia mauga i le isi itu o Ioritana i le itu i sisifo,* i le laueleele o tagata Kanana e nonofo i le laufanua o Arapa,* e fesaga‘i ma Kilikala, i autafa o laau maualuluga o Morē?+ 31 Auā o le a outou sopo atu i Ioritana ma ō atu e fai mo outou le laueleele e avatu e Ieova lo outou Atua iā te outou.+ Pe a fai mo outou lea laueleele ma nonofo ai, 32 ia outou usiusita‘i i tulafono uma ma iʻuga o faamasinoga ua ou tuuina atu i o outou luma i le asō.+

12 “O tulafono nei ma iʻuga o faamasinoga e ao ona outou toʻaʻaga e tausia i aso uma e tou te ola ai, i le laueleele o le a tuuina mai iā te outou e Ieova le Atua o o outou augātamā, e fai mo outou. 2 E tatau ona outou faatama‘ia atoatoa nofoaga uma o loo auauna ai i o latou atua+ o nuu ia o le a outou faatoʻilaloina, e tusa po o luga o mauga maualuluga po o aʻega po o lalo o laau lauolaola uma. 3 E ao ona outou tala i lalo o latou fata faitaulaga, nutililii o latou poutū paia,+ susunu i le afi o latou pou paia,* ma talepe i lalo tupua ua tā o o latou atua,+ ina ia soloiesea ai o latou igoa mai i lea mea.+

4 “Aua ne‘i outou tapua‘i iā Ieova lo outou Atua i lenā auala.+ 5 Nai lo o lea, ia outou saʻili iā Ieova lo outou Atua i so o se nofoaga e na te filifilia e tuu i ai lona suafa ma lona afioaga i o outou ituaiga uma, ma ia outou ō atu ai i inā.+ 6 O i inā e ao ona outou avatu i ai a outou taulaga mū,+ o a outou taulaga, o a outou sefuluaʻi,+ o le foaʻi a o outou lima,+ o a outou taulaga o tautoga, o a outou taulaga tauofo,+ ma ulumatua o a outou lafu povi ma lafu mamoe.+ 7 E tatau ona outou aai i inā i luma o Ieova lo outou Atua, ma fiafia i mea uma tou te faia,+ o outou ma o outou aiga,+ auā ua faamanuia oe e Ieova lou Atua.

8 “Aua tou te faia mea o loo tatou faia i inei i le asō, ua taʻitasi le tagata ma faia le mea ua tonu i lana vaai,* 9 auā tou te leʻi oo atu i le nofoaga e nonofo ai+ ma le tofi lea o le a avatu e Ieova lou Atua iā te oe. 10 Pe a outou sopoʻia atu Ioritana+ ma nonofo i le laueleele ua tuuina mai e Ieova lo outou Atua iā te outou e fai mo outou, e na te avatu lava iā te outou le mapusaga mai i o outou fili uma o loo siʻomia ai outou, ma e tou te nonofo ma le saogalemu.+ 11 O le a outou avatu mea uma ua ou poloaʻi atu ai iā te outou i le nofoaga o le a filifilia e Ieova lo outou Atua e tuu ai lona suafa,+ o a outou taulaga mū, o a outou taulaga, o a outou sefuluaʻi,+ o foaʻi a o outou lima, ma a outou taulaga o tautoga ua outou tautō ai iā Ieova. 12 E tou te fiafia i luma o Ieova lo outou Atua,+ o outou ma o outou atalii, o o outou afafine, o a outou tane pologa, o a outou teine pologa, ma le sa Levī o loo i totonu o o outou aai, auā e leʻi tuuina atu sona fanua po o sona tofi faatasi ma outou.+ 13 Ia faaeteete ina neʻi e ofoina atu au taulaga mū i so o se isi nofoaga e te vaai i ai.+ 14 Ae ia faia au taulaga mū tau lava o le nofoaga e filifilia e Ieova mai i se tasi o laueleele o ou ituaiga, ma o i inā foʻi e ao ona e faia ai mea uma ua ou poloaʻi atu ai iā te oe.+

15 “Peitaʻi pe a e matuā fia ʻai i se aano o se manu, e mafai ona e fasia se manu ma ʻai i le aano,+ e tusa ai ma le faamanuia a Ieova lou Atua iā te oe i totonu o ou aai. E mafai e le tagata e lē mamā ma le tagata e mamā ona ʻai ai, e pei ona ʻaina o le manu o le sevi ma le ʻaila. 16 Ae aua neʻi outou aai i le toto;+ e ao ona e sasaa i le palapala e pei o le vai.+ 17 E lē faatagaina ona e ʻai le sefuluaʻi o au fatu i totonu o ou aai, po o lau uaina fou, o lau suāuu, o ulumatua o au lafu povi ma au lafu mamoe,+ o se tasi o au taulaga o tautoga e te tautō ai, o au taulaga tauofo, po o foaʻi a ou lima. 18 O mea na e te ʻai ai i luma o Ieova lou Atua i le nofoaga o le a filifilia e Ieova lou Atua,+ o oe ma lou atalii ma lou afafine, o lau tane pologa, o lau teine pologa ma le sa Levī o loo i totonu o ou aai; ma e te fiafia i luma o Ieova lou Atua i mea uma e te faia. 19 Ia faaeteete neʻi e tuulafoaʻiina le sa Levī+ i aso uma e te mau ai i lou fanua.

20 “Pe a faalauteleina e Ieova lou Atua lou laueleele,+ e pei ona ia folafola mai ai iā te oe,+ ma e faapea ane, ‘Ou te fia ʻai i se aano o manu,’ auā ua e matuā fia ʻai i le aano o manu, e mafai ona e ʻai i aano o manu i so o se taimi e te matuā fia ʻai ai.+ 21 Afai e mamao mai iā te oe le nofoaga lea e filifilia e Ieova lou Atua e tuu ai lona suafa,+ e ao ona e fasia ni manu mai i lau lafu povi po o lau lafu mamoe ua foaʻi atu e Ieova iā te oe, e pei ona ou poloaʻi atu ai iā te oe, ma e ao ona e ʻai i totonu o ou aai po o le ā lava le taimi e te matuā fia ʻai ai. 22 E mafai ona e ʻaina e pei ona ʻaina o le manu o le sevi ma le ʻaila;+ e mafai ona ʻai ai le tagata e lē mamā ma le tagata e mamā. 23 Ia e maumauaʻi e aua neʻi ʻaina le toto,+ auā o le toto o le ola lea,+ ma aua neʻi ʻaina le ola* faatasi ma le aano. 24 Aua e te ʻai ai. E ao ona e sasaa i le palapala e pei o le vai.+ 25 Aua e te ʻai ai ina ia manuia ai oe ma lau fanau pe a mavae atu oe, auā ua e faia le mea ua saʻo i le silafaga a Ieova. 26 E ao ona e ave na o mea paia ia o le a fai mo oe e fai ai au taulaga, ma au taulaga o tautoga pe a e alu atu i le nofoaga lea o le a filifilia e Ieova. 27 E te ofo ai i inā au taulaga mū, o le aano ma le toto+ i luga o le fata faitaulaga a Ieova lou Atua, e ao foʻi ona e sasaa le toto o au taulaga i tala ane o le fata faitaulaga+ a Ieova lou Atua, a o le aano e te ʻaina.

28 “Ia uaʻi atu ma ia e usiusitaʻi i nei upu uma ua ou poloaʻi atu ai iā te oe, ina ia manuia ai pea oe ma ou atalii pe a mavae atu oe, auā ua e faia le mea ua lelei ma saʻo i le silafaga a Ieova lou Atua.

29 “Pe a faaumatia e Ieova lou Atua nuu ia o le a e faatoʻilaloina,+ ma e nofo ai i o latou laueleele, 30 ia faaeteete ina neʻi maileia oe pe a mavae ona faaumatia i latou mai i ou luma. Aua neʻi e fesili e faatatau i o latou atua e faapea, ‘Na faapefea ona auauna nei nuu i o latou atua? O aʻu foʻi ou te faia faapea.’+ 31 Aua e te faia faapea iā Ieova lou Atua, auā ua latou faia i o latou atua o mea uma e inosia e Ieova ma ua ia ʻinoʻino i ai, e oo fo‘i i le susunuina o o latou atalii ma o latou afafine i le afi i o latou atua.+ 32 O upu uma ou te poloaʻi atu ai iā te outou, o mea ia e ao ona outou toʻaʻaga e fai.+ Aua tou te faaopoopo se upu pe toese se upu mai i ia upu.+

13 “Afai e tulaʻi mai iā te oe se perofeta po o sē e vavalo e ala i miti ma tuuina atu iā te oe se faailoga po o se valovaloga, 2 ma ua taunuu le faailoga po o se valovaloga lea na ia fai atu ai, ma ua faapea atu, ‘Seʻi o tatou mulimuli i isi atua,’ o atua e tou te leʻi iloa, ‘ma tatou auauna iā i latou,’ 3 aua e te faalogo i upu a lenā perofeta po o lenā faimiti,+ auā e tofotofoina outou e Ieova lo outou Atua,+ ina ia silafia ai pe tou te alolofa iā Ieova lo outou Atua ma o outou lotoatoa ma o outou ola atoa.+ 4 Ia outou mulimuli iā Ieova lo outou Atua, ia matataʻu iā te ia, ia outou tausia ana poloaʻiga, ia outou faalogo i lona siʻufofoga; o ia e tatau ona outou auauna i ai, ma o ia e tatau ona outou pipiimau atu i ai.+ 5 Ae ia fasiotia lenā perofeta po o lenā faimiti,+ auā na ia faapogaia le fouvalega iā Ieova lo outou Atua, o lē na aumaia outou mai i le atunuu o Aikupito, ma laveaʻiina oe mai i le mea sa e nofo pologa ai, ina ia faaliliuese ai oe mai i le ala na poloaʻi mai ai Ieova lou Atua ia e savali ai. E ao ona e aveese le mea leaga mai i lou nuu.+

6 “Afai e faaoso faalilolilo oe e lou uso, o le tama tama a lou tinā, po o lou atalii, po o lou afafine, po o lau avā faapelepele, po o lau uō mamae, ma faapea mai, ‘Seʻi o tatou ō ia ma auauna i isi atua,’+ o atua e te le‘i iloa, o oe ma ou augātamā, 7 o atua o nuu o loo siʻomia ai outou, e tusa pe latalata iā te oe, po o i latou e mamao mai iā te oe, e mai i le isi pito o le laueleele e oo i le isi pito, 8 aua e te lolo atu i lona manaʻo pe faalogo atu iā te ia,+ aua foʻi e te alofa mutimutivale iā te ia pe puipuia o ia; 9 ae ia e fasiotia lava o ia.+ Ia muamua ona oo lou lima iā te ia e fasioti iā te ia, mulimuli ane ona oo lea o lima o le nuu uma iā te ia.+ 10 Ia e fetogi o ia i maa ina ia oti ai,+ auā ua ia taumafai e faaliliuese oe mai iā Ieova lou Atua, o lē na aumaia oe mai i Aikupito, le mea sa e nofo pologa ai. 11 Ona faalogo lea i ai o Isaraelu uma ma fefefe ai, ma e latou te lē toe faia se mea leaga faapena i lou nuu.+

12 “Afai e te faalogo o taʻua lea mea i se tasi o ou aai, lea ua foaʻiina mai e Ieova lou Atua iā te oe e te nofo ai, 13 ‘Ua ō ese mai iā te outou o tamāloloa e lē aogā ina ia latou faaliliuese tagata o lo latou aai, ma faapea mai: “Seʻi tatou ō ma auauna i isi atua,” o atua e tou te leʻi iloa,’ 14 e ao ona e suʻesuʻe i le mataupu, ia iloiloina māeʻaeʻa ma saʻiliʻili i ai;+ ma afai e mautinoa e moni o loo faia lava lenā mea inosia i lou nuu, 15 ia fasiotia lava tagata o lenā aai i le pelu.+ E tatau foʻi ona faaumatia+ i le pelu le aai ma mea uma o iai, atoa ai ma lafumanu. 16 Ona e aoaoina lea o ana mea uma na faoa i le ogatotonu o le nofoaga faitele o le aai ma susunu le aai i le afi, ma o mea na faoa o le a fai ai le taulaga atoa iā Ieova lou Atua. O le a avea pea ma faaputuga o mea na lepetia. Ia aua lava neʻi toe fausia. 17 Aua lava neʻi tago lou lima i se mea ua tuuesea mo le faaumatiaga,+ ina ia liliuese ai Ieova mai i lona toʻasā ma faaalia lona alofa mutimutivale iā te oe ma faatoʻateleina oe, e pei ona ia tautō ai i ou augātamā.+ 18 Ia e usiusita‘i iā* Ieova lou Atua, e ala i le tausia o ana poloaʻiga uma ua ou poloaʻi atu ai iā te oe i le asō, ina ia faia le mea ua saʻo i le silafaga a Ieova lou Atua.+

14 “O outou o fanau a Ieova lo outou Atua. Aua neʻi o outou selei i o outou tino+ pe sele mamā o outou muāulu* mo se tagata ua oti.+ 2 Auā o oe o le nuu paia+ iā Ieova lou Atua, ma o oe na filifilia e Ieova e avea ma ona nuu faapitoa,* mai i nuu uma i le lalolagi atoa.+

3 “Aua e te ʻai i so o se mea e inosia.+ 4 O manu nei e tou te aai ai:+ o le povi poʻa, o le mamoe, o le ʻoti, 5 o le ʻaila, o le sevi, o le imura, o le ʻoti vao, o le tisona, o le mamoe vao, ma le mamoe e nofo i le mauga. 6 E tou te aai i manu uma e magalua atigivae ma ua iai le vā i atigivae, ma toe ʻai i lana mama. 7 Peita‘i, aua tou te aai i manu nei e toe aai i a latou mama pe magalua o latou atigivae: o le kamela, o le rapiti, ma le sefanai, auā e toe aai ia manu i a latou mama, ae e lē magalua atigivae. E lē mamā ia manu mo outou.+ 8 E faapena foʻi le puaa, auā e magalua ona atigivae ae e lē toe ʻai i lana mama. E lē mamā lea manu mo outou. Aua tou te aai i o latou aano pe paʻi i o latou tino mamate.

9 “O meaola uma nei o loo i le vai e tou te aai ai: O meaola uma e iai ʻapaʻapa ma una e tou te aai ai.+ 10 Ae aua tou te aai i meaola uma e leai ni ʻapaʻapa po o ni una. E lē mamā ia meaola mo outou.

11 “Ia outou aai i so o se manulele e mamā. 12 Ae aua tou te aai i manulele nei: o le aeto, o le perese, o le oseni uliuli,+ 13 o le aia mūmū, o le aia uliuli, o so o se ituaiga o kite, 14 o so o se ituaiga o oreva, 15 o le iaena, o le lulu, o le saape, o so o se ituaiga o nesa, 16 o le lulu laʻitiiti, o le lulu e uumi taliga, o le tanisamiti, 17 o le kati, o le oseni, o le saleka, 18 o le kasita, o so o se ituaiga o matuu, o le tukapiti, ma le peʻa. 19 O meaola fai apaʻau uma foʻi e feoaʻi faatasi,* e lē mamā ia mo outou. Aua le aai ai. 20 O manulele mamā uma e tou te aai ai.

21 “Aua tou te aai i se manu e maua atu ua mate.+ Ia outou avatu i le tagata ese ua aumau i o outou aai, ma e mafai ona ʻai ai o ia, pe faatau atu foʻi i se tagata mai i se isi atunuu. Auā o oe o le nuu paia iā Ieova lou Atua.

“Aua e te sakaina le tamaʻi ʻoti i le suāsusu o lona tinā.+

22 “E ao lava ona e avatu le sefuluaʻi o fua uma o au fatu e tutupu i le fanua i lea tausaga ma lea tausaga.+ 23 O le a e ʻai i le sefulua‘i o au fatu, o lau uaina fou, o lau suāuu, ma ulumatua o lau lafu povi ma lau lafu mamoe i luma o Ieova lou Atua, i le nofoaga e na te filifilia e tuu ai lona suafa,+ ina ia e iloa ai ona mataʻu pea iā Ieova lou Atua.+

24 “Ae afai e mamao tele le malaga iā te oe, ma e lē mafai ona e aveina na mea uma i le nofoaga e filifilia e Ieova lou Atua e tuu ai lona suafa,+ talu ai e mamao tele mai iā te oe (auā e faamanuia Ieova lou Atua iā te oe), 25 ia e faaliliuina na mea i tupe, ma e ao ona tuu i se ato ma uu i lou lima, ma e alu atu i le nofoaga o le a filifilia e Ieova lou Atua. 26 Ia e faaalu le tupe e faatau mai ai so o se mea e te manaʻo i ai, e pei o povi, o mamoe, o ʻoti, o uaina ma isi ʻava malosi ma so o se mea lava e te loto i ai; ona e ʻai ai lea i inā i luma o Ieova lou Atua ma le fiafia, o oe ma lou aiga.+ 27 Aua e te tuulafoaʻiina le sa Levī o loo i totonu o ou aai,+ auā e leʻi tuuina atu sona fanua po o sona tofi faatasi ma oe.+

28 “I faai‘uga uma o tausaga ta‘itolu, e ao ona e aumai ai le sefuluaʻi o au faaeleeleaga uma i lenā tausaga, ma e te teua i ou aai.+ 29 Ona ō mai ai lea o le sa Levī o lē e leʻi tuuina atu sona fanua po o sona tofi faatasi ma oe, o le tagata ese e aumau iā te outou, o le tama e leai se tamā,* ma le fafine ua oti lana tane o loo i totonu o ou aai, e latou te aai foʻi ma maoona ai,+ ina ia faamanuia Ieova lou Atua iā te oe i mea uma e te faia.+

15 “Ia e faia se faasaʻolotoga i faaiʻuga uma o tausaga taʻifitu.+ 2 E faapenei ona faia le faasaʻolotoga: Ia taʻitasi i latou uma na nonō atu mea ona tuusaʻoloto lona tuaoi mai i lana aitalafu na ia aitalafu ai iā te ia. E lē tatau ona ia tāpā mai i lona tuaoi po o lona uso se totogi, auā ua faalauiloa atu le faasa‘olotoga a Ieova.+ 3 Ia e tāpā se totogi mai i le tagata o se isi atunuu,+ ae ia tuu fua atu so o se mea o loo nofo aitalafu ai lou uso iā te oe. 4 Peita‘i, e lē tatau ona mativa se tasi o iā te oe, auā e faamanuia lava e Ieova oe+ i le laueleele ua tuuina mai e Ieova lou Atua iā te oe e fai ma ou tofi, 5 pe afai e te matuā faalogo i le siʻufofoga o Ieova lou Atua, ma e toʻaga e tausia nei poloaʻiga uma ua ou poloaʻi atu ai iā te oe i le asō.+ 6 Auā e faamanuia Ieova lou Atua iā te oe e pei ona ia folafola mai iā te oe, ma e te nonō atu mea* i nuu e tele, ae e te lē aitalafu mai ni mea;+ e te pule foʻi i nuu e tele, ae e latou te lē pule iā te oe.+

7 “Pe afai e mativa se tasi o ou uso o loo iā te oe i se tasi o ou aai, i le laueleele e tuuina mai e Ieova lou Atua iā te oe, aua e te faamaaa atu lou loto pe limamau i lou uso mativa.+ 8 Ia e matuā agalelei ma lima mafola iā te ia,+ ma ia nonō atu lava* o so o se mea e na te manaʻomia po o mea e na te lē o maua. 9 Ia e faaeteete neʻi iai se manatu leaga i lou loto e faapea, ‘Ua latalata i le tausaga lona fitu, o le tausaga lea o le faasaʻolotoga,’+ ma e ʻaiū ai i lou uso mativa, e te lē ave foʻi i ai se mea. Pe afai e alaga atu o ia iā Ieova faasaga iā te oe, ona e agasala ai lea.+ 10 Ia e limafoaʻi iā te ia,+ ma aua e te faatalatū* e foaʻi atu iā te ia, talu ai o lenei mea o le a faamanuia ai oe e Ieova lou Atua, i au galuega uma ma au gaoioiga uma.+ 11 Auā o le a iai pea tagata matitiva i le laueleele.+ O le mea lea ou te poloaʻi atu ai iā te oe, ‘Ia e matuā agalelei ma lima mafola i lou uso o loo puapuagatia ma mativa i lou laueleele.’+

12 “Afai e faatau atu iā te oe lou uso, o se tane Eperu po o se fafine Eperu, ma ua auauna o ia iā te oe i tausaga e ono, a oo i le tausaga lona fitu, ona e faasaʻolotoina lea o ia.+ 13 Pe afai e te faasaʻolotoina o ia, aua e te auina ese o ia e aunoa ma se mea. 14 Ae ia e matuā foaʻiina atu iā te ia ni mea mai i lau lafu mamoe, mai i mea e soli ai saito, mai i lau suāuu o le olive ma le mea e soli ai vine. E pei ona faamanuia mai Ieova lou Atua iā te oe, e ao ona e foaʻi atu iā te ia. 15 Ia manatua na e nofo pologa i le atunuu o Aikupito ma na laveaʻiina oe e Ieova lou Atua. O le mea lea ua ou poloaʻi atu ai iā te oe e faia lenei mea i le asō.

16 “Ae afai e fai mai o ia iā te oe, ‘Ou te lē alu ese mai iā te oe!’ auā e alofa o ia iā te oe ma lou aiga, talu ai na fiafia o ia a o faatasi ma oe,+ 17 ona e tago lea i se mea maʻai, ma tui ai lona taliga i le faitotoʻa, ma e fai o ia ma au pologa i lona olaga atoa. Ia e faia foʻi faapea i lau teine pologa. 18 Aua neʻi faafaigatā iā te oe ona e faasaʻolotoina o ia ma ia tuua ai oe, auā o lana auaunaga iā te oe i tausaga e ono, e tusa ma le faaluaina o le totogi o se tagata ua faafaigaluega, ua faamanuia foʻi Ieova lou Atua iā te oe i mea uma na e faia.

19 “Ia e faapaiaina iā Ieova lou Atua o tama ulumatua uma o lau lafu povi ma lau lafu mamoe.+ Aua e te faia se galuega i ulumatua o lau lafu povi,* pe sele fulufulu a ulumatua o lau lafu mamoe. 20 Ia ʻaina e oe ma lou aiga lea manu i luma o Ieova lou Atua i lea tausaga ma lea tausaga i le nofoaga o le a filifilia e Ieova.+ 21 Ae afai e iai se faalētonu i le manu, e pipili pe tauaso, po o so o se mea leaga lava, aua e te faia ai le taulaga iā Ieova lou Atua.+ 22 Ia e ʻai lea mea i totonu o ou aai, o le tagata e lē mamā ma le tagata e mamā e la te aai ai, e pei o le manu o le sevi ma le ʻaila.+ 23 Ae aua e te ʻaina lona toto;+ ia e sasaa i le palapala e pei o le vai.+

16 “Ia e tausia le masina o Apipa,* ma faamanatu ai le Paseka iā Ieova lou Atua,+ auā o le masina o Apipa na aumaia ai oe e Ieova lou Atua mai i Aikupito i le pō.+ 2 Ia e faia le taulaga o le Paseka iā Ieova lou Atua+ i mamoe ma povi,+ i le nofoaga e filifilia e Ieova e tuu ai lona suafa.+ 3 Aua e te ʻai se mea faafefete faatasi ma le taulaga;+ ia e ʻai i aso e fitu i falaoa e lē faafefeteina, o le falaoa o le puapuaga, auā na faavave ona e alu ese mai i le atunuu o Aikupito.+ Ia faia lenei mea ina ia e manatua ai le aso na e alu ese mai ai i le atunuu o Aikupito i aso uma e te ola ai.+ 4 Aua foʻi neʻi maua iā te oe se paluga ua fefete i lou fanua atoa i aso e fitu,+ aua foʻi neʻi faatotoe e oo i le taeao se aano o se manu e te faia ai le taulaga i le afiafi o le aso muamua.+ 5 E faasā ona e faia le taulaga o le Paseka i so o se aai ua tuuina mai e Ieova lou Atua iā te oe. 6 Ae ia faia i le nofoaga e filifilia e Ieova lou Atua e tuu ai lona suafa. Ia e faia le taulaga o le Paseka i le afiafi i le goto o le lā,+ i le taimi tonu na e alu ese ai mai i Aikupito. 7 Ia e tunu i le afi ma e ʻai+ i le nofoaga o le a filifilia e Ieova lou Atua,+ ma pe a oo i le taeao ia e toe foʻi i ou faleʻie. 8 Ia e ʻai falaoa e lē faafefeteina i aso e ono, ae i le aso lona fitu e faia ai se fonotaga paia iā Ieova lou Atua. Aua e te faia ai ni galuega.+

9 “Ia e faitauina vaiaso e fitu. Ia amata ona e faitauina vaiaso e fitu mai i le taimi e faatoʻā sala ai le togāsaito i le selesaito.+ 10 Ona e faamanatu ai lea o le Tausamiga o Vaiaso iā Ieova lou Atua+ ma le taulaga tauofo ua avatu e ou lima, e tusa ma le faamanuia a Ieova lou Atua iā te oe.+ 11 Ia e olioli i luma o Ieova lou Atua, o oe ma lou atalii, o lou afafine, o lau tane pologa, o lau teine pologa, o le sa Levī o loo i totonu o ou aai,* o le tagata ese e aumau iā te outou, o le tama e leai se tamā,* ma le fafine ua oti lana tane, o i latou ua iā te oe, i le nofoaga e filifilia e Ieova lou Atua e tuu ai lona suafa.+ 12 Ia e manatua foʻi na e nofo pologa i Aikupito,+ ma ia e tausia ma faia nei tulafono.

13 “E ao ona e faamanatu le Tausamiga o Fale Lauvao*+ mo aso e fitu, pe a e aoaoina fatu mai i le mea e soli ai saito, ma le suāuu mai i le mea e soli ai olive ma le uaina mai i le mea e soli ai vine. 14 Ia e olioli i le taimi o lau tausamiga,+ o oe ma lou atalii, o lou afafine, o lau tane pologa, o lau teine pologa, o le tagata sa Levī, o le tagata ese e aumau iā te outou, o le tama e leai se tamā, ma le fafine ua oti lana tane, o ē o loo i totonu o ou aai. 15 E fitu aso e te faamanatu ai le tausamiga+ iā Ieova lou Atua i le nofoaga e filifilia e Ieova, auā e faamanuia Ieova lou Atua i fua uma o au faaeleeleaga ma mea uma e te faia,+ ma o le a e matuā olioli ai.+

16 “E faatolu i le tausaga ona tutū ou tane uma i luma o Ieova lou Atua i le nofoaga e filifili e ia: o le Tausamiga o Falaoa e Lē Faafefeteina,+ o le Tausamiga o Vaiaso+ ma le Tausamiga o Fale Lauvao,*+ ma e lē tatau ona tū se tasi o i latou i luma o Ieova e aunoa ma se mea. 17 E taʻitasi le tagata ma aumai le meaalofa e tusa ma le faamanuiaga ua tuuina mai e Ieova lou Atua iā te oe.+

18 “Ia e tofia ni faamasino+ ma ni leoleo mo ituaiga taʻitasi i aai* uma e tuuina mai e Ieova lou Atua iā te oe, ma e ao ona latou faamasinoina tagata i le faamasinogatonu. 19 Aua e te faapi‘oina le faamasinogatonu,+ pe faaʻauʻau,+ pe talia ni foaʻi e faia i se faiga faaalatua, auā e faatauasoina ai mata o ē e atamamai+ ma mimilo sesē ai upu a ē e amiotonu. 20 Ia e tausisi i le faamasinogatonu,+ ia e saʻilia le faamasinogatonu, ina ia e ola ai pea ma fai mo oe le laueleele e tuuina mai e Ieova lou Atua iā te oe.

21 “Aua e te totōina so o se laau e fai ma pou paia*+ e latalata i le fata faitaulaga a Ieova lou Atua, lea e te faia mo oe lava.

22 “Aua foʻi e te faatū mo oe se poutū paia,+ o se mea lea e inosia e Ieova lou Atua.

17 “Aua e te fai taulaga iā Ieova lou Atua i se povi poʻa po o se mamoe e iai se faalētonu, po o so o se mea e leaga ai, auā o se mea lea e inosia e Ieova lou Atua.+

2 “Seʻi faapea ua maua iā te oe se tamāloa po o se fafine i se tasi o ou aai ua tuuina mai e Ieova lou Atua iā te oe, o lē e faia le mea ua leaga i le silafaga a Ieova lou Atua ma solia ai lana feagaiga,+ 3 ma ua ia tuua le Atua ae tapuaʻi i isi atua ma ifo i ai, po o le lā, po o le masina, po o ʻau uma o le lagi,+ o le mea lea ou te leʻi poloaʻi atu ai.+ 4 Pe afai e taʻu mai iā te oe pe e te logotala ai, ona e matuā saʻili lea i le mataupu. Afai ua mautinoa e moni+ le tala ua faia lenei mea inosia i Isaraelu, 5 ia e aumaia lenā tamāloa po o lenā fafine o lē na faia lenei mea leaga i fafo o faitotoʻa o le aai, ma ia fetogia le tamāloa po o le fafine i maa ma oti ai.+ 6 O faamatalaga a* molimau e toʻalua pe toʻatolu,+ e fasiotia ai lē ua tatau i ai le oti. E lē fasiotia o ia i le faamatalaga a se molimau e toʻatasi.+ 7 Ia muamua ona fetogia o ia e molimau i maa ina ia oti ai, mulimuli ane ona fetogia lea o ia e tagata uma. E tatau ona e aveesea le mea leaga mai iā te outou.+

8 “Afai e tula‘i mai se mataupu i se tasi o ou aai ma e matuā faigatā iā te oe ona faamasinoina, e tusa po o se mataupu i le faamasaatoto+ po o se talosaga faaletulafono, po ua faia se gaoioiga sauā, po o isi feeseeseaʻiga, ia e tulaʻi ma alu atu i le nofoaga e filifilia e Ieova lou Atua.+ 9 Ia e alu atu i ositaulaga sa Levī ma lē ua fai ma faamasino+ i lea aso, ma talosaga atu mo se faamasinoga, ma e latou te taʻu mai iā te oe le iʻuga o le faamasinoga.+ 10 Ona e faia lea e tusa ma le faai‘uga e latou te taʻu mai iā te oe mai i le nofoaga e filifilia e Ieova. Ia e toʻaga e faia mea uma e latou te faatonuina ai oe. 11 Ia e faia e tusa ma le tulafono e latou te faasino mai iā te oe, ma e tusa foʻi ma le faaiʻuga e latou te taʻu mai iā te oe.+ Aua e te liliuese mai i le faai‘uga e latou te taʻu mai iā te oe, i le itu taumatau po o le itu tauagavale.+ 12 O le tagata e gaoioi ma le faamaualuga e ala i le lē faalogo i le ositaulaga, o lē o loo auauna iā Ieova lou Atua po o le faamasino, e tatau ona oti lenā tagata.+ E tatau ona e aveesea le mea leaga mai i Isaraelu.+ 13 Ona logotala uma ai lea o tagata ma fefefe ai, ma e latou te lē toe gaoioi ai ma le faamaualuga.+

14 “Pe a e ulu atu i le laueleele e tuuina mai e Ieova lou Atua iā te oe, e fai mo oe ma e nofo ai, ma e te faapea ane, ‘Ou te tofia se tupu mo aʻu e pei o atunuu uma o loo siʻomiaina aʻu,’+ 15 afai o lea, e ao lava ona e tofia se tupu o lē ua filifilia e Ieova lou Atua.+ E ao ona e tofia se tupu mo oe mai i ou uso. E faasā ona e tofia se tagata o se isi atunuu, o se tasi e lē o sou uso. 16 Peita‘i, aua neʻi faateleina mo ia lava ni solofanua,+ pe toe faafoʻi tagata i Aikupito ina ia aumai nisi solofanua,+ auā ua fetalai mai Ieova iā te outou, ‘Aua neʻi outou toe foʻi atu i lea lava ala.’ 17 Aua foʻi neʻi faatoʻateleina ni ana avā, neʻi liliuese lona loto+ mai iā te aʻu; aua foʻi neʻi soona faateleina mo ia lava ni siliva ma ni auro.+ 18 Pe a nofo o ia i le nofoālii o lona malo, e ao ona ia tusia i se tusi* se kopi o lenei Tulafono mo ia lava, mai i le tusi o loo tausia e ositaulaga sa Levī.+

19 “E ao ona iai pea lenei kopi iā te ia, e na te faitau foʻi i ai i aso uma e ola ai+ ina ia aʻoaʻoina ai o ia e mataʻu iā Ieova lona Atua, ma tausia upu uma o lenei Tulafono ma nei tuutuuga e ala i le faia o ia mea.+ 20 O lea, o le a lē faualuga ai lona loto i ona uso ma lē liliuese ai o ia mai i le poloaʻiga, i le itu taumatau po o le itu tauagavale, ina ia faaumiumi ai ona aso i lona malo, o ia ma ona atalii i Isaraelu.

18 “O ositaulaga sa Levī ma le ituaiga uma o Levi, e lē tuuina atu iā i latou se fanua po o se tofi faatasi ma Isaraelu. E latou te aai i taulaga iā Ieova ua faia i le afi, o lona tofi lea.+ 2 E lē maua so latou tofi faatasi ma o latou uso. O Ieova o lo latou tofi, e pei ona ia fetalai mai ai iā i latou.

3 “O mea nei e tatau ona maua e ositaulaga mai i le nuu: O so o se tasi e faia se taulaga, po o se povi poʻa po o se mamoe, e ao ona ave i le ositaulaga le alagalima, o le auvaealalo, ma le puta. 4 E ao ona e avatu iā te ia le uluaʻi fua o lau saito,* o lau uaina fou, o lau suāuu, ma le selega muamua o fulufulu mamoe o lau lafu.+ 5 Ua filifilia e Ieova lou Atua o ia ma ona atalii mai i ou ituaiga uma, ina ia auauna pea i le suafa o Ieova.+

6 “Ae afai e alu ese se sa Levī mai i se tasi o ou aai i Isaraelu i le mea sa nofo ai,+ ma e mana‘o o ia e alu i le nofoaga e filifilia e Ieova,*+ 7 e mafai ona ia auauna i inā i le suafa o Ieova lona Atua e pei ona faia e ona uso uma, o le ʻau sa Levī, o ē e tutū i lea mea i luma o Ieova.+ 8 E tutusa lana tufaaga o mea‘ai e maua faatasi ma i latou,+ e faaopoopo i mea e na te maua mai i le faatau atu o meatotino a lona aiga.

9 “Pe a e ulu atu i le laueleele ua tuuina mai e Ieova lou Atua iā te oe, aua neʻi e faataʻitaʻi i mea inosia ua faia e na nuu.+ 10 Aua neʻi maua iā te oe o se tasi e faaui* ane lona atalii po o lona afafine i le afi,+ o sē e faia valovaloga faataulāitu,+ o sē e faia faiga faaagaga,+ o sē e saʻili i ni faailoilo o mea o le a tutupu,+ o se faataulāitu,+ 11 o sē e na te faalauatau i isi, o se tasi e alu atu i sē e saʻili i agaga,+ po o sē e vavalo i mea e tutupu i le lumanaʻi,+ po o sē e fesili atu i ē ua oti.+ 12 E inosia e Ieova i latou uma e faia na mea, e tuliesea foʻi i latou e Ieova lou Atua mai i ou luma ona o ia mea inosia. 13 Ia lē ponā lau amio i luma o Ieova lou Atua.+

14 “Auā ua masani ona faalogo nuu ia e te faatoʻilaloina i ē e faia faiga faaagaga,+ ma ē e faia valovaloga faataulāitu,+ ae e leʻi faatagaina oe e Ieova lou Atua e faia faapea. 15 E tofia e Ieova lou Atua mo oe se perofeta e pei o aʻu, mai i ou uso. E tatau ona outou faalogo iā te ia.+ 16 E tusa lea ma lau talosaga iā Ieova lou Atua i Horepa i le aso na faapotopoto ai le faapotopotoga,+ ina ua e faapea mai, ‘Aua neʻi oʻu faalogo i le siʻufofoga o Ieova loʻu Atua, pe toe vaai i lenei afi tele, neʻi oʻu oti.’+ 17 Ona fetalai mai lea o Ieova iā te aʻu, ‘Ua lelei le mea ua latou fai mai ai. 18 Ou te tofia mo i latou mai i o latou uso se perofeta e pei o oe,+ ou te tuu foʻi aʻu upu i lona gutu,+ ma o le a ia tautala atu iā i latou i mea uma ou te poloaʻi atu ai iā te ia.+ 19 O le mea moni, ou te tāpā se tali mai i le tagata e lē faalogo i aʻu upu e fai atu ai o ia i lo‘u igoa.+

20 “‘Afai e tautala ma le faamaualuga se perofeta i loʻu igoa i se upu ou te leʻi poloaʻi atu e tautala ai pe tautala i se igoa o isi atua, e tatau ona oti lenā perofeta.+ 21 Peita‘i, e te ono faapea ifo i lou loto: “E faapefea ona matou iloa o le upu e leʻi fetalai mai ai Ieova?” 22 Pe a tautala le perofeta i le suafa o Ieova ma e lē taunuu le upu pe e lē oo foʻi lea mea, o le upu lea e leʻi fetalai mai ai Ieova. Na tautala ma le faamaualuga le perofeta. Aua e te fefe iā te ia.’

19 “Pe a faaumatia e Ieova lou Atua o nuu e ona laueleele e tuuina mai e Ieova lou Atua iā te oe, pe a e faatoʻilaloina foʻi i latou ma nonofo i o latou aai ma o latou fale,+ 2 ia e tuu ese ni aai se tolu mai i ou laueleele e tuuina mai e Ieova lou Atua iā te oe e fai mo oe.+ 3 E te vaevaeina i ni vaega se tolu le fanua o le laueleele ua tuuina mai e Ieova lou Atua iā te oe e fai mo oe, ma saunia auala ina ia mafai ai e se fasioti tagata paʻivalea ona sola atu i se tasi o na aai.

4 “O le mea lenei e tupu i le fasioti tagata paʻivalea o lē e sola i inā ina ia ola ai: Pe a ia fasiotia lona tuaoi e aunoa ma le fuafuaina ma e leʻi ʻinoʻino muamua foʻi iā te ia;+ 5 pe afai e ō ma lona tuaoi i le vaomatua e fai fafie, ma ua sii aʻe lona lima o loo iai le toʻi e tā ai le laau ae ua see ese le uʻamea mai i le ʻau o le toʻi, ma lavea ai lona tuaoi ma oti ai, e tatau ona sola atu le fasioti tagata paʻivalea i se tasi o na aai ina ia ola ai.+ 6 A leai, o le a tuliloaina le fasioti tagata paʻivalea e lē e tauimasui i le toto+ ona ua ita lona loto,* ma maua atu o ia ma fasiotia lava o ia ona e mamao le ala i le aai. Peita‘i, sa lē tatau iā te ia le oti, auā e leʻi ʻinoʻino muamua o ia i lona tuaoi.+ 7 O le mea lea ua ou poloaʻi atu ai iā te oe: ‘Ia tuu ese ni aai se tolu.’

8 “Afai e faalauteleina e Ieova lou Atua lou fanua e tusa ma le mea na ia tautō ai i ou augātamā,+ ma ua ia tuuina mai iā te oe le laueleele uma na ia folafola mai e avatu i ou augātamā,+ 9 pe afai e te tausia ma le faamaoni poloaʻiga uma ua ou tuuina atu iā te oe i le asō, ina ia e alofa iā Ieova lou Atua ma savali pea i ona ala,+ ona e faaopoopo lea o isi aai e tolu i nei aai e tolu.+ 10 O le faia faapea, o le a lē faamaligiina ai le toto o se tasi ua lē sala+ i lou laueleele e tuu mai e Ieova lou Atua iā te oe e fai ma ou tofi, ma e te lē nofosala ai i le faamasaatoto.+

11 “Ae afai e ʻinoʻino se tagata i lona tuaoi,+ ma ua lamalama o ia iā te ia ma fasi faamo‘amo‘a o ia, ma ua oti ai o ia, ae ua sola atu le tagata i se tasi o nei aai, 12 e aauina e toeaina o lona aai nisi e aumai o ia mai i inā, e latou te avatu o ia i lima o lē e tauimasui i le toto ma e tatau ona ia fasiotia o ia.+ 13 Aua e te alofa iā te ia,* ma ia e aveesea mai i Isaraelu le nofosala i le toto o sē ua lē sala,+ ina ia e lelei ai.

14 “Pe a e maua lou tofi i le laueleele e foaʻiina mai e Ieova lou Atua iā te oe e fai mo oe, aua e te tuu i tua pine o le fanua a lou tuaoi+ mai i le mea ua uma ona faatulaga e tou tuaa.

15 “E lē mafai e se molimau e toʻatasi ona faasalaina* se tagata i se mea sesē po o se agasala e na te faia.+ E faamaonia le mataupu i faamatalaga a* molimau e toʻalua po o faamatalaga a molimau e toʻatolu.+ 16 Afai e tula‘i se molimau ua faufau leaga faasaga i se tagata ma molia o ia i se solitulafono,+ 17 o le a tutū i luma o Ieova tane e toʻalua ua feeseeseaʻi, i luma o ositaulaga ma faamasino o ē o le a auauna i na aso.+ 18 E saʻiliʻili māeʻaeʻa+ e faamasino, ma pe afai e pepelo le molimau ma ua ia aumaia se moliaga pepelo e faatatau i lona uso, 19 ia outou faia iā te ia e pei ona ia faufau e faia i lona uso,+ ma ia e aveesea le mea leaga mai i lou nuu.+ 20 Ona fefefe ai lea o ē ua totoe o le a faalogo i ai, ma e latou te lē toe faia ai se mea leaga faapea i lou nuu.+ 21 Aua e te alofa iā te ia:*+ O le ola e sui ai le ola, o le mata e sui ai le mata, o le nifo e sui ai le nifo, o le lima e sui ai le lima, o le vae e sui ai le vae.+

20 “Afai e te alu atu e tau ma ou fili ma e iloa atu ai a latou solofanua ma kariota ma fitafita e sili atu ona toʻatele nai lo o oe, aua e te fefe iā i latou, auā e faatasi Ieova lou Atua iā te oe, o lē na aumaia oe mai i Aikupito.+ 2 Pe a outou sauni e tau, e ao i le ositaulaga ona faalatalata atu ma tautala i le nuu.+ 3 E ao ona ia fai atu iā i latou, ‘Isaraelu e, faalogo mai ia, o le a outou tau ma o outou fili. Aua neʻi outou lotovaivai. Aua tou te fefefe pe matataʻu pe gatete ona o i latou, 4 auā e faatasi Ieova lo outou Atua i la outou savaliga, e tau mo outou faasaga i o outou fili ina ia faaolaina outou.’+

5 “E ao foʻi i leoleo ona fai atu i le nuu, ‘O ai se tamāloa ua fausia lona fale fou ae e leʻi faapaiaina? Ia tuu atu o ia e toe foʻi i lona fale, neʻi oti o ia i le taua ae faapaiaina ai e se isi tamāloa lona fale. 6 O ai foʻi se tamāloa na ia totōina lona togāvine ae na te leʻi seleseleina? Ia tuu atu o ia e toe foʻi i lona fale, neʻi oti o ia i le taua ae selesele e se isi tamāloa lona togāvine. 7 O ai foʻi se tamāloa ua faamau ma se fafine ae e leʻi faaipoipo iā te ia? Ia tuu atu o ia e toe foʻi i lona fale,+ neʻi oti o ia i le taua ae fai le fafine ma avā a se isi tamāloa.’ 8 E ao i leoleo ona fesili atu fo‘i i le nuu, ‘O ai se tamāloa e palaai ma lotovaivai?+ Ia toe foʻi o ia i lona fale, ina neʻi faavaivaia e ia loto o ona uso e pei o lona loto.’+ 9 Pe a uma ona talanoa atu leoleo i le nuu, e ao ona latou tofia taʻitaʻi o ʻautau e taʻitaʻiina le nuu.

10 “Afai e te latalata atu i se aai ina ia siitaua i ai, ia e faailoa atu maliega o le filemu.+ 11 Afai e tali filemu mai iā te oe ma tatala mai faitotoʻa o le aai iā te oe, o tagata uma e maua i totonu o le aai e fai ma ou tagata e faia galuega mamafa, ma e latou te auauna iā te oe.+ 12 Ae afai e mumusu tagata o le aai e faia se leleiga ma oe ma siitaua mai iā te oe, e ao ona e osofaʻia lea aai, 13 e tuuina mai lava e Ieova lou Atua le aai i ou lima, ma ia e fasiotia tane uma o le aai i le pelu. 14 Peita‘i, o fafine, o tamaiti, o lafumanu, ma mea uma ua i le aai, o le vete uma e mafai ona e faoa mo oe,+ ma e te ʻaina le vete mai i ou fili, lea ua tuuina mai e Ieova lou Atua iā te oe.+

15 “Ia faapea ona e faia i aai uma e matuā mamao mai iā te oe, ae e lē o aai o ia atunuu e lata ane. 16 Ae o aai o ia tagata ua tuuina mai e Ieova lou Atua iā te oe e fai ma ou tofi, aua e te faasaoina ai so o se tagata ola.*+ 17 Ae e tatau lava ona e matuā faaumatia i latou, o tagata Hetī, o tagata Amorī, o tagata Kanana, o tagata Perisē, o tagata Hivī, ma tagata Iepusē,+ e pei ona poloaʻi mai ai o Ieova lou Atua iā te oe; 18 ina neʻi o latou aʻoaʻoina outou e mulimuli i mea inosia uma ua latou faia i o latou atua, ma outou agasala ai iā Ieova lo outou Atua.+

19 “Afai e te osofaʻia se aai i le tele o aso ma siitaua atu ina ia faatoʻilaloina, aua e te faatamaʻia ona laau e ala i le tāina i se toʻi. E te ʻai mai i na laau, ae aua e te tāina i lalo.+ Po o se tagata ea lenā laau o le fanua e te faatamaʻiaina ai? 20 E na o le laau e te iloa e lē ʻaina e te faatamaʻia. E te tāina i lalo ma fausia ai pā e siʻomia ai le aai lea e siitaua mai iā te oe, seʻia faatoʻilaloina.

21 “Afai e maua se tasi ua fasiotia i se fanua ua tuuina mai e Ieova lou Atua e fai mo oe, ma ua lē iloa po o ai na fasiotia o ia, 2 e ao i ou toeaina ma ou faamasino+ ona ō atu ma fua le mamao o le vā o le tino o le tagata ua fasiotia ma aai ua siʻomia ai. 3 Ona ave lea e toeaina o le aai e sili ona latalata i ai le tino o le tagata ua fasiotia, o se tamaʻi povi fafine o le lafu e leʻi faia muamua se galuega, pe e leʻi tosoina foʻi se amo, 4 ma e ao i toeaina o lenā aai ona avatu le tamaʻi povi fafine i se vanu* i le mea o loo tafe ai le vai, lea e leʻi faatoʻaina pe totōina ai ni fatu, ma e ao ona latou gausia le ua o le tamaʻi povi fafine i le vanu.+

5 “E faalatalata atu ositaulaga, o le ʻau sa Levī, auā o i latou ua filifilia e Ieova lou Atua e auauna iā te ia+ ma faamanuia atu i le suafa o Ieova.+ E latou te faailoa atu le auala e foʻia ai feeseeseaʻiga uma e fesootaʻi atu i faiga sauā.+ 6 O toeaina uma fo‘i o le aai e sili ona latalata i ai le tino o le tagata ua fasiotia, e latou te fafano o latou lima+ i luga o le tamaʻi povi fafine lea na gausia le ua i le vanu, 7 ma e ao ona latou faailoa mai, ‘E leʻi faamasaa e o matou lima lenei toto, pe vāai foʻi i ai o matou mata o faamasaaina. 8 Ieova e, aua neʻi tuuaʻia i lenei mea lou nuu o Isaraelu o ē ua e laveaʻiina,+ aua fo‘i e te faaee mai i lou nuu o Isaraelu le toto o lē ua lē sala.’+ Ona lē nofosala lea o i latou i le toto. 9 O le faia faapea, e te aveesea ai le nofosala i le toto o sē ua lē sala mai iā te outou, pe a e faia le mea ua saʻo i le silafaga a Ieova.

10 “Afai e te alu e tau ma ou fili, ma e faato‘ilaloina e Ieova lou Atua i latou ma e te ave faapagota i latou,+ 11 ua e vaaia foʻi se fafine aulelei mai i tagata na ave faapagota, ua e naunau iā te ia ma ua e mana‘o e ave o ia e fai ma au avā, 12 e ao ona e aumaia o ia i totonu o lou fale. E ao ona sele e ia lona ulu, ʻoti ona atigilima, 13 ma aveese lona ofu tele na ave faapagota ai, e nofo foʻi o ia i lou fale. E tagi o ia mo lona tamā ma lona tinā mo le masina atoa,+ mulimuli ane ona lua feusuaʻi lea ma ia; e avea oe ma ana tane, ma e avea o ia ma au avā. 14 Ae afai ua e lē fiafia iā te ia, e ao ona e tuu o ia e alu+ i le mea ua manaʻo i ai. Ae aua lava e te faatauina atu o ia i tupe pe agaleaga iā te ia, talu ai ua e faalumaina o ia.

15 “Afai e iai i se tamāloa ni avā se toʻalua ma e sili atu lona alofa i le tasi nai lo o le isi,* ma ua fanaua e i laʻua uma ni ona atalii, ma o le atalii ulumatua ua fanaua e lē ua itiiti lona alofa i ai,+ 16 a oo i le aso e na te avatu ai i ona atalii ni tofi, e lē faatagaina ona avea ma ulumatua le tama a lē ua ia alofa i ai, ae tuua le tama a lē ua itiiti lona alofa i ai, auā o ia o le ulumatua. 17 E ao ona ia amanaʻia o le ulumatua, o le tama lea a lē ua itiiti lona alofa i ai, e ala i le tuuina atu iā te ia o vaega e lua o mea uma ua iā te ia, auā o ia lea na ia muaʻi fai fanau ai. O ia e ana le aiā tatau o le ulumatua.+

18 “Afai e iai se atalii o se tamāloa e faauamaaa ma fouvale, e lē usita‘i o ia i lona tamā po o lona tinā,+ ma ua la aʻoaʻi iā te ia ae e lē faalogo o ia iā i laʻua,+ 19 ona fetagofi lea o lona tamā ma lona tinā ma avatu o ia i toeaina o loo i le faitoto‘a o lona aai 20 ma fai atu i toeaina o lona aai, ‘O la ma tama lea, e faauamaaa ma fouvale, ma e lē usita‘i o ia iā i ma‘ua. E soona ʻai tele+ foʻi o ia ma onā.’+ 21 E tatau i tane uma o lona aai ona fetogia o ia i maa ina ia oti ai o ia. E tatau foʻi ona e aveesea le mea leaga mai iā te oe, e faalogo foʻi i ai Isaraelu uma ma fefefe ai.+

22 “Afai e faia e se tamāloa se agasala ua tatau i ai le oti, ma ua fasiotia o ia,+ ua e faatautau foʻi o ia i luga o le laau,+ 23 aua neʻi tuua lona tino oti i luga o le laau i le pō atoa.+ Ae ia e tanu lava o ia i lenā aso, auā ua faamalaia e le Atua lē ua faatautauina i se laau,+ aua foʻi e te faaleagaina lou laufanua, lea ua tuuina mai e Ieova lou Atua iā te oe e fai ma ou tofi.+

22 “A e iloa atu le povi poʻa a lou uso po o lana mamoe ua sē, aua e te ‘aloese mai ai.+ E ao lava ona e toe taʻitaʻiina atu le manu i lou uso. 2 Ae afai e lē nofo latalata mai lou uso iā te oe pe e te lē iloa o ia, ia e aumaia le manu i lou fale ma tuu pea iā te oe seʻia saʻilia e lou uso lana manu. Ia e toe faafoʻi atu iā te ia lana manu.+ 3 Ia faapea foʻi ona e faia i lana asini, i lona ofu tele, ma so o se mea a lou uso ua leiloa ae ua e mauaina. Aua e te ʻaloese mai ai.

4 “A e iloa atu le asini a lou uso po o lana povi poʻa ua paʻū i le auala, aua neʻi e ʻaloese mai ai. E ao lava ona e fesoasoani iā te ia e faatū i luga le manu.+

5 “Aua neʻi ofu se fafine i ofu o se tamāloa, aua foʻi neʻi ofu se tamāloa i ofu o se fafine. Auā e inosia e Ieova lou Atua so o se tasi e faia ia mea.

6 “Afai e te tau atu i se faamoega o se manulele i le ala, i luga o se laau po o le laueleele, ua iai ni toloaʻi po o ni ona fua, ma o loo nofo ai i luga le tinā i le toloaʻi po o ona fua, aua e te ave le tinā faatasi ma lana toloaʻi.+ 7 E ao lava ona e faasola le tinā, ae ave ma oe lana toloaʻi. Ia faia lenei mea ina ia e manuia ai, ma faaumiumi ai ou aso.

8 “Afai e te fausia se fale fou, ia e fausia foʻi ma se puipui e siʻo ai le taualuga,+ neʻi e nofosala i le faamasaatoto pe afai e paʻū ai se tasi mai i lou fale.

9 “Aua neʻi e lūlūina ni fatu o ituaiga eseese se lua+ i lou togāvine, neʻi avatu fua uma mai i fatu na e lūlūina atoa ma fua o lau togāvine i le faleʻie paia.

10 “Aua e te tuufaatasia le povi poʻa ma se asini e suatia le fanua.+

11 “Aua neʻi e ofuina ni ofu ua lalaga faatasi i le fulufulu mamoe ma le ʻie lino.+

12 “Ia e faia ni teuteu e faia i filo e tautau mai i pito e fā o lou ofu o loo e ofu ai.+

13 “Afai e faaipoipo se tamāloa i se fafine ma feusuaʻi ma ia, ma ua oo ina ʻinoʻino iā te ia,* 14 ma ua ia tuuaʻia o ia i amioga leaga ma ua ia ta‘uleagaina lona igoa, ma faapea mai, ‘O le fafine lenei na ou faaipoipo i ai, na ou feusuaʻi ma ia, ae ou te leʻi mauaina ni faamaoniga o lona teine muli,’ 15 e ao ona avatu e le tamā ma le tinā o le teine le faamaoniga o le teine muli o le teine i toeaina o loo i le faitotoʻa o le aai. 16 E ao i le tamā o le teine ona fai atu i toeaina, ‘Na ou avatu loʻu afafine i lenei tamāloa e fai ma ana avā, ae o lea ua ʻinoʻino o ia iā te ia* 17 ma tuuaʻia o ia i amioga leaga e faapea: “Ua ou iloa e leai ni faamaoniga o le teine muli o lou afafine.” O le faamaoniga lenei o le teine muli o loʻu afafine.’ Ona la fofola lea o le ofu tele i luma o toeaina o le aai. 18 E ave e toeaina o le aai+ le tamāloa ma aʻoaʻi iā te ia.+ 19 E latou te faasala o ia i le 100 sekeli* siliva ma avatu i le tamā o le teine, auā ua taʻuleagaina e le tamāloa se teine muli o Isaraelu,+ ma e avea pea o ia ma ana avā. E lē mafai ona ia tatalaina la la‘ua faaipoipoga i aso uma e ola ai o ia.

20 “Peitaʻi, afai e moni le tuua‘iga, ma ua lē maua se faamaoniga o le teine muli o le teine, 21 e ao ona latou aumai le teine i le faitotoʻa o le fale o lona tamā, ma fetogia o ia i maa e tamāloloa o lona aai ma oti ai o ia, auā ua ia faia se amioga matagā+ i Isaraelu i le faia o amioga lē mamā taufeusuaʻiga* i le fale o lona tamā.+ O lea, e tatau ona e aveesea le mea leaga mai iā te oe.+

22 “Afai e maua se tamāloa o momoe ma se avā a se isi tamāloa, ia fasiotia i laʻua uma, o le tamāloa na momoe ma le fafine atoa ma le fafine.+ O lea, e tatau ona e aveesea le mea leaga mai iā Isaraelu.

23 “Afai e iai se teine muli ua faamau ma se tane, ae ua maua e se isi tamāloa o ia i le aai ma ua momoe ma ia, 24 ia outou aumaia i laʻua uma i le faitotoʻa o lenā aai ma fetogia i laʻua i maa ina ia feoti ai, o le teine ona o le lē eʻē i le aai, a o le tamāloa ona o lona faalumaina o le avā a lona tuaoi.+ O lea, e tatau ona e aveesea le mea leaga mai iā te oe.

25 “Peita‘i, afai o le fanua na maua ai e le tamāloa le teine ua faamau, ma ua toso faamalosi e le tamāloa o ia ma la momoe, e ao ona oti tau lava o le tamāloa na momoe ma ia, 26 ae aua neʻi faia se mea i le teine. E leai se agasala a le teine e tatau ai ona oti o ia. E tutusa lenei mea ma le osofa‘i e se tamāloa o lona tuaoi ma fasiotia lava o ia.+ 27 Auā na ia maua o ia i le fanua, ma na eʻē le teine ua faamau ae ua leai se isi e laveaʻiina o ia.

28 “Afai e maua e se tamāloa se teine, o se teine muli e leʻi faamau, ua ia toso o ia ma la momoe, ma ua maua i laʻua,+ 29 e ao i le tamāloa na momoe ma le teine ona avatu le 50 sekeli siliva i le tamā o le teine, ma e fai o ia ma ana avā.+ Talu ai ua ia faalumaina o ia, e lē mafai ona ia tatalaina la la‘ua faaipoipoga i aso uma e ola ai o ia.

30 “Aua neʻi ave e se tamāloa le avā a lona tamā, ina ne‘i faalumaina e ia lona tamā.*+

23 “Aua neʻi avea se tane ua faaleagaina ona fuāmanava po ua tipi ese lona totogasā ma sui o le faapotopotoga a Ieova.+

2 “Aua neʻi avea se tama o le pō ma sui o le faapotopotoga a Ieova.+ Aua foʻi neʻi avea se tasi e tupuga mai iā te ia ma sui o le faapotopotoga a Ieova, e oo lava i le tupulaga lona sefulu.

3 “Aua ne‘i avea se tagata Amonī po o se tagata Moapi ma sui o le faapotopotoga a Ieova.+ Aua lava neʻi avea se tasi e tupuga mai iā i latou ma sui o le faapotopotoga a Ieova, e oo lava i le tupulaga lona sefulu, 4 talu ai na latou lē fesoasoani iā te outou ma avatu ni meaʻai ma ni vai ina ua outou ō ese mai i Aikupito,+ talu ai foʻi na latou totogia Palaamo le atalii o Peoro mai i Petoru i Mesopotamia, ina ia faamalaia* iā te oe.+ 5 Ae e leʻi fia faafofoga Ieova lou Atua iā Palaamo.+ Nai lo o lea, na faaliliuina e Ieova lou Atua le faamalaia e fai ma faamanuia iā te oe,+ auā e alofa Ieova lou Atua iā te oe.+ 6 Aua e te fesoasoani iā i latou ina ia nonofo filemu ma tamaoaiga ai i ou aso uma lava.+

7 “Aua e te ʻinoʻino i se tagata Etoma, auā o ia o lou uso.+

“Aua e te ʻinoʻino i se tagata Aikupito, auā na e aumau o se tagata ese i lona atunuu.+ 8 O tamaiti e fananau mai iā i latou i lona tolu o tupulaga, e mafai ona avea i latou ma sui o le faapotopotoga a Ieova.

9 “Afai e te siitaua atu i ou fili, ia e faaeteete neʻi e faia se mea leaga.+ 10 Afai ua lē mamā se tane ona ua sau le sua mai iā te ia i le pō,+ e ao ona alu o ia i tua o le togālauapi ma aua neʻi toe sau i le togālauapi. 11 Pe a oo i le afiafi, e ao ona tāʻele o ia i le vai, ma a goto le lā e mafai ona toe sau o ia i le togālauapi.+ 12 E tatau ona iai se nofoaga faapitoa* e faaaogā i tua o le togālauapi, ma e tatau ona e alu i ai. 13 E tatau ona iai se tamaʻi suō faatasi ma au meafaigaluega. Pe a e faatū i fafo, ia e eli se pū i lau suō ma tanu ai ou otaotavale. 14 Auā o loo fesavaliaʻi Ieova lou Atua i totonu o lou togālauapi,+ ina ia laveaʻi iā te oe ma tuuina atu ou fili iā te oe, ma e tatau ona paia+ lou togālauapi, ina neʻi silasila o ia i se mea leaga iā te oe ma liliuese ai ma lē ō faatasi ma oe.

15 “Aua e te toe faafoʻi se pologa i lona matai pe a sola ese o ia mai i lona matai ma sau iā te oe. 16 E mafai ona nofo o ia faatasi ma oe i so o se mea e filifili ai o ia i se tasi o ou aai, po o fea lava e manaʻo ai o ia. Aua e te agaleaga iā te ia.+

17 “Aua neʻi avea se tasi o afafine o Isaraelu ma fafine talitane o le malumalu,+ aua foʻi neʻi avea se tasi o atalii o Isaraelu ma tamāloa talitane o le malumalu.+ 18 Aua e te aumaia le totogi o se fafine talitane po o le totogi o se tamāloa talitane* i le fale o Ieova lou Atua ina ia faataunuu ai se tautoga, auā e inosia e Ieova lou Atua i la‘ua uma.

19 “Aua e te manaʻo i se tupe faasili+ mai i lou uso, o tupe faasili i tupe, o se totogi faasili i meaʻai, po o se totogi faasili i so o se mea e mafai ona tāpā mai e se tasi se mea faasili. 20 E mafai ona e manaʻo e totogi mai e se tagata mai i se isi atunuu se tupe faasili,+ ae aua e te manaʻo e totogi mai e lou uso se tupe faasili,+ ina ia faamanuia mai ai Ieova lou Atua iā te oe i mea uma e te faia i le laueleele e te alu atu i ai ina ia fai mo oe.+

21 “Afai e te faia se tautoga iā Ieova lou Atua,+ aua e te faifaiaga e faataunuu.+ Auā o le a tāpā mai lava e Ieova lou Atua mai iā te oe lou faia o lea mea; ina ne‘i avea o se agasala iā te oe.+ 22 Ae afai e te leʻi faia se tautoga, e lē o se agasala lea iā te oe.+ 23 Ia e tausia au upu e te fai atu ai,+ ma ia e faia e pei ona tautō ai lou gutu, o se taulaga tauofo lea iā Ieova lou Atua.+

24 “Afai e te alu i le togāvine a lou tuaoi, ia e ʻai tau lava o fuifui vine e te maʻona ai, ae aua neʻi e fafao ni fuifui vine i lau ato.+

25 “Afai e te alu i le fanua o iai togāsaito a lou tuaoi, ia e tau mai na o fua matua i lou lima, ae aua e te sala i le selesaito le togāsaito a lou tuaoi.+

24 “Afai e faaipoipo se tamāloa i se fafine ma ua lē fiafia o ia i le fafine auā ua ia iloa ua leaga se mea ua ia faia, e ao ona ia tusia mo ia se tusi e faamaonia ai ua tatala la laʻua faaipoipoga,+ ma tuu i lona lima, ma tuliese o ia mai i lona fale.+ 2 Pe a alu ese o ia mai i lona fale, e mafai ona ia alu atu ma nonofo ma se isi tamāloa.+ 3 Afai foʻi e ʻinoʻino le tamāloa lona lua iā te ia* ma tusia mo ia se tusi e faamaonia ai ua tatala la laʻua faaipoipoga, ma tuu i lona lima ma tuliese o ia mai i lona fale, po ua oti le tamāloa lona lua o lē na faaipoipo iā te ia, 4 e lē mafai e lana tane muamua o lē na faate‘a iā te ia, ona toe ave o ia e fai ma ana avā ina ua uma ona faaleagaina o ia, auā e inosia e Ieova lenā mea. Aua e te faatupuina le agasala i le laueleele ua tuuina mai e Ieova lou Atua iā te oe e fai ma ou tofi.

5 “Afai e faatoʻā faaipoipo se tamāloa, aua neʻi alu o ia i le taua pe avatu nisi tiute tauave iā te ia. E tatau ona nofo saʻoloto o ia i lona fale mo se tausaga ma ia faafiafia i lana avā.+

6 “Aua ne‘i ave e se tasi se mea e olo ai fatu po o se maa olo i luga, e fai ma mea e faamau ai se aitalafu,+ auā o le ola* o se isi tagata lea ua ave e fai ma mea e faamau ai le aitalafu.

7 “Afai ua maua se tagata ua ia ave faamalosia se tasi o ona uso Isaraelu, ua agaleaga iā te ia ma faatau atu o ia,+ ia fasiotia lenā tagata na ave faamalosia lona uso.+ E ao ona e aveesea le mea leaga mai iā te oe.+

8 “Pe a pipisi le faama‘i o le lepela,* ia outou toʻaʻaga e faia mea uma ua faatonu mai e ositaulaga sa Levī iā te outou.+ Ia outou toʻaʻaga e fai e pei lava ona ou poloaʻi atu ai iā i latou. 9 Ia manatua le mea na faia e Ieova lou Atua iā Miriama i le ala, ina ua outou ō ese mai i Aikupito.+

10 “Afai e te nonō atu i lou tuaoi so o se mea,+ aua neʻi e ulu atu i lona fale e aumai le mea e faamau ai lana aitalafu. 11 Ia e tū i fafo, ma e ao i le tagata o lē na e nonō atu i ai ona aumai i fafo iā te oe le mea e faamau ai lana aitalafu. 12 Afai e mativa le tamāloa, aua neʻi e alu ma oe i lou moega le mea na ia avatu e faamau ai lana aitalafu.+ 13 E ao lava ona e faafoʻi atu iā te ia le mea na ia avatu e faamau ai lana aitalafu i le taimi lava e goto ai le lā, ma e alu o ia i lona moega ma lona ofu,+ e faamanuia foʻi o ia iā te oe; ma e silasila Ieova lou Atua i lenei mea o se gaoioiga amiotonu.

14 “Aua e te faapiʻopiʻo ona fai se totogi o sē ua e faafaigaluegaina ua pagatia ma mativa, e tusa po o se tasi o ou uso, po o se tagata ese o aumau i lou laueleele, i totonu o ou aai.*+ 15 E ao ona e avatu iā te ia lona totogi i lenā lava aso+ a o leʻi goto le lā, auā e mativa o ia ma e faalagolago lona ola i lona totogi. Auā a leai, o le a alaga atu o ia iā Ieova ona o oe, ma avea ma mea e te agasala ai.+

16 “Aua neʻi fasiotia tamā ona o mea e faia e a latou fanau, aua foʻi neʻi fasiotia fanau ona o mea e faia e o latou tamā.+ Ia fasiotia le tagata i lana lava agasala.+

17 “Aua e te faapiʻoina le faamasinoga o le tagata ese e aumau iā te outou po o le tama e leai se tamā,*+ aua foʻi e te ave le ofu o se fafine ua oti lana tane e fai ma mea e faamau ai se aitalafu.+ 18 Ia e manatua na e nofo pologa i Aikupito, ma na laveaʻiina oe e Ieova lou Atua mai i inā.+ O le mea lea ua ou poloaʻi atu ai iā te oe ia faia lenei mea.

19 “Afai e te selesele lau seleselega i lou fanua, ma galo ai se fusi saito i le fanua, aua neʻi e toe alu e aumai. E ao ona tuu lea mea mo le tagata ese e aumau iā te outou, o le tama ua leai se tamā, ma le fafine ua oti lana tane,+ ina ia faamanuia ai Ieova lou Atua iā te oe i mea uma e te faia.+

20 “Afai e te sasa i lalo olive mai i lau laau o le olive, aua e te faia faapea i ona lālā. Ia tuu ai pea ia mea mo le tagata ese e aumau iā te outou, o le tama e leai se tamā, ma le fafine ua oti lana tane.+

21 “Afai e te aoao fuifui vine o lau togāvine, aua neʻi e toe foʻi e ao mai mea e totoe. Ia tuu ia mea mo le tagata ese e aumau iā te outou, o le tama e leai se tamā, ma le fafine ua oti lana tane. 22 Ia e manatua na e nofo pologa i le atunuu o Aikupito. O le mea lea ua ou poloaʻi atu ai iā te oe ina ia faia lenei mea.

25 “Afai e aliaʻe se feeseeseaʻiga i le vā o ni tagata, ia latou ō atu i luma o faamasino,+ ma e latou te faamasinoina ia tagata ma taʻu atu e amiotonu lē ua amiotonu, ma amioleaga lē ua amioleaga.+ 2 Afai e tatau ona sasaina lē ua amioleaga,+ e ao i le faamasino ona faatonu atu e faafaō o ia, ma sasa o ia i ona luma. E fua le aofaʻiga o ana tā i le leaga o ana gaoioiga. 3 E ao ona sasa o ia i tā e 40,+ ae aua ne‘i sili atu i lenā. Pe afai e faaauau ona ia sasaina o ia i nisi tā e faaopoopo i nei tā, e faalumaina ai lou uso i ou luma.

4 “Aua e te fusi le gutu o le povi poʻa a o solisolia le saito.+

5 “Afai e nonofo faatasi ni uso ma ua oti le tasi o i latou ae e leai sona atalii, e lē tatau i le avā a lē ua oti ona faaipoipo atu i se tasi e ese mai i le aiga. E ao i le uso o lana tane ona alu atu iā te ia, ma fai o ia ma ana avā e ala i le faaipoipo atu i le toʻalua o lona uso ua oti.+ 6 O le a tauaveina e le ulumatua e na te fanaua le igoa o lona uso ua oti,+ ina ia aua neʻi soloia le igoa o lona uso mai i Isaraelu.+

7 “Ae afai e lē manaʻo le tamāloa e faaipoipo i le avā a lona uso ua oti, e ao ona alu atu le avā a lona uso ua oti i toeaina o loo i le faitotoʻa o le aai ma faapea atu, ‘E musu le uso o laʻu tane e faatumauina le igoa o lona uso i Isaraelu. E lē ioe o ia e faaipoipo iā te a‘u, le toʻalua o lona uso ua oti.’ 8 E ao i toeaina o lona aai ona aami o ia ma talanoa atu iā te ia. Pe a maumauaʻi o ia ma faapea mai, ‘Ou te lē manaʻo e faaipoipo iā te ia,’ 9 ona faalatalata atu lea o le toʻalua o lona uso ua oti iā te ia i luma o toeaina, ma tatala ese le seevae mai i le vae o le tamāloa+ ma feanu i ona foliga ma faapea atu, ‘O le mea lenā e fai i le tagata e musu e faaauau le gafa o le aiga o lona uso.’ 10 Ona faaigoa lea o lona aiga i Isaraelu e faapea, ‘O le aiga o lē na tatalaina ese lona seevae.’

11 “Afai e fufusu ni tamāloloa se toʻalua ma alu atu le avā a se tasi o i laʻua e puipui lona toʻalua mai i lē ua tuʻi iā te ia, ma ua ia tuu atu lona lima ma tago atu i totogasā o le isi tamāloa, 12 e ao ona e tipi ese lona tapulima. Aua neʻi e alofa iā te ia.*

13 “Aua neʻi iai i totonu o lau ato ni maa eseese se lua e fua ai le mamafa o se mea,+ o le fua telē ma le fua laʻitiiti. 14 Aua neʻi iai i lou fale ni ato eseese se lua e fua ai le tele o se mea,*+ o le fua telē ma le fua laʻitiiti. 15 E ao pea ona iai iā te oe se fua e saʻo ma tonu e fua ai le mamafa o se mea, ma se fua e saʻo ma tonu e fua ai le tele o se mea, ina ia faaumiumi ai ou aso i le laueleele o le a tuuina mai e Ieova lou Atua iā te oe.+ 16 Auā o i latou uma ua faia ia mea, o i latou uma ua faia le mea lē tonu, o mea ia e inosia e Ieova lou Atua.+

17 “Ia manatua le mea na faia e Amaleka iā te oe i le ala ina ua outou ō ese mai i Aikupito,+ 18 ina ua ia faafetaui iā te oe i le ala ma osofaʻia ē uma na mulimuli mai i ou tua, a o e vaivai ma lē lavā. E leʻi mataʻu o ia i le Atua. 19 Pe a tuuina mai e Ieova lou Atua iā te oe le mapusaga mai i ou fili uma, o ē e siʻomia oe i le laueleele e tuuina mai e Ieova lou Atua iā te oe e fai ma ou tofi,+ e ao ona e soloiesea le toe taʻua o Amaleka mai i lalo o le lagi.+ Aua lava neʻi galo iā te oe.

26 “Pe a oo ina e ulu atu i le laueleele e tuuina mai e Ieova lou Atua e fai ma ou tofi, ua fai mo oe ma ua e nofo ai, 2 e ao ona e aumai ni uluaʻi fua o fua uma o faaeleeleaga, e te aumai mai i lou laueleele ua tuuina mai e Ieova lou Atua iā te oe, ma tuu i totonu o se ato ma alu atu i le nofoaga o le a filifilia e Ieova lou Atua e tuu ai lona suafa.+ 3 Ia e alu atu i le ositaulaga o le a auauna i na aso ma faapea atu iā te ia, ‘Ou te faailoa atu i le aso nei iā Ieova lou Atua, ua ou oo mai i le laueleele lea na tautō ai Ieova i o tatou augātamā e tuuina mai iā i tatou.’+

4 “Ona talia lea e le ositaulaga o le ato mai i lou lima ma tuu i luma o le fata faitaulaga a Ieova lou Atua. 5 Ia e faailoa atu i luma o Ieova lou Atua, ‘O loʻu tamā o se tagata Arama+ na aumau solo,* na alu ifo o ia i Aikupito+ ma aumau ai i inā o se tagata ese faatasi ma lona aiga toʻaitiiti.+ Ae na oo ina avea o ia ma nuu tele, e malosi ma e matuā toʻatele.+ 6 Na sauāina ma faapuapuagatia i tatou e tagata Aikupito, ma faapologaina i tatou i galuega matuā mamafa.+ 7 Ona tatou alalaga atu lea iā Ieova le Atua o o tatou augātamā ma na faafofoga mai Ieova i o tatou leo, ma silasila mai i o tatou puapuaga, ma o tatou tigā, ma le sauāina o i tatou.+ 8 Mulimuli ane na aveese e Ieova i tatou mai i Aikupito i le aao malosi, ma le aao faaloaloa,+ ma mea mataʻutia tele, ma faailoga ma vavega.+ 9 Ona ia aumaia lea o i tatou i lenei nofoaga ma tuuina mai iā i tatou lenei laueleele, o se laueleele o loo tafe ai le suāsusu ma le meli.+ 10 O lenei ua ou aumaia uluaʻi fua o fua o le laueleele ua tuuina mai e Ieova iā te aʻu.’+

“E ao ona e tuu atu ia mea i luma o Ieova lou Atua ma ifo i luma o Ieova lou Atua. 11 Ona e olioli lea i mea lelei uma ua tuuina mai e Ieova lou Atua iā te oe ma lou aiga, o oe, o le sa Levī ma le tagata ese ua aumau iā te oe.+

12 “Pe a uma ona e aoaoina le sefuluaʻi+ o au faaeleeleaga uma i le tausaga lona tolu, o le tausaga o le sefuluaʻi, ona e avatu ai lea i le sa Levī, o le tagata ese ua aumau iā te oe, o le tama e leai se tamā,* ma le fafine ua oti lana tane, ma e latou te aai i ia mea i totonu o ou aai* ma maoona ai.+ 13 Ona e fai atu lea i luma o Ieova lou Atua, ‘Ua ou aveesea mea ua paia mai i loʻu fale ma tuuina atu i le sa Levī, o le tagata ese ua aumau iā te a‘u, le tama e leai se tamā, ma le fafine ua oti lana tane,+ e pei ona e poloaʻi mai ai iā te aʻu. Ou te leʻi solia pe faagaloina au poloaʻiga. 14 Ou te leʻi ʻai ai ina ua ou faavauvau, pe ave foʻi sina mea a o oʻu lē mamā, pe avatu ia mea ona o se tasi ua oti. Na ou usitaʻi i le siʻufofoga o Ieova loʻu Atua ma faia e tusa ma mea uma ua e poloaʻi mai ai iā te aʻu. 15 Ia e silasila mai i lou afioaga paia, o le lagi lea, ma faamanuia i lou nuu o Isaraelu ma le eleele ua e tuuina mai iā i matou,+ e pei ona e tautō ai i o matou augātamā,+ o le laueleele o loo tafe ai le suāsusu ma le meli.’+

16 “O le aso lenei ua poloaʻi mai ai Ieova lou Atua iā te oe, ina ia e usiusitaʻi i nei tulafono ma iʻuga o faamasinoga. Ia e tausia ma usiusitaʻi i na mea uma ma lou lotoatoa+ ma lou ola atoa. 17 Ua e maua i le asō le taʻutinoga a Ieova e faapea o le a avea o ia ma ou Atua pe a e savali i ona ala ma tausi i ana tulafono,+ o ana poloaʻiga,+ o iʻuga o ana faamasinoga,+ ma pe a e faalogo foʻi i lona siʻufofoga. 18 Ua maua foʻi e Ieova i le asō lau taʻutinoga e faapea o le a avea oe ma ona nuu faapitoa,*+ e pei ona ia folafola mai iā te oe, ma e te tausia ana poloaʻiga uma, 19 ma o le a ia faasilisilia oe i isi nuu uma na ia faia,+ ma e viiviia, taʻutaʻua, ma faamamaluina ai oe a o avea oe ma nuu paia o Ieova lou Atua,+ e pei ona ia folafola mai.”

27 Ona poloaʻi atu lea o Mose ma toeaina o Isaraelu i le nuu e faapea: “Ia outou tausia poloaʻiga uma ua ou tuuina atu iā te outou i le asō. 2 Pe a oo i le aso tou te sopo atu ai Ioritana ma ō atu i le laueleele ua tuuina mai e Ieova lou Atua iā te oe, ia e faatūina ni maa tetele ma ia vali pa‘epa‘e.*+ 3 Ona e tusia lea i ia maa o upu uma o lenei Tulafono, pe a e sopo atu ina ia e oo atu i le laueleele ua tuuina mai e Ieova lou Atua iā te oe, o se laueleele o loo tafe ai le suāsusu ma le meli, e pei ona folafola mai e Ieova le Atua o ou augātamā iā te oe.+ 4 Pe a outou sopoʻia Ioritana, ia outou faatutūina nei maa i le mauga o Evalu+ ma ia vali pa‘epa‘e nei maa,* e pei ona ou poloaʻi atu ai iā te outou i le asō. 5 E ao fo‘i ona e faia se fata faitaulaga i inā iā Ieova lou Atua, o le fata e fai i maa. Aua e te faaaogā ai se meafaigaluega uʻamea i nei maa.+ 6 Ia e fausia le fata faitaulaga a Ieova lou Atua i maa atoatoa, ma ia e ofoina atu taulaga mū iā Ieova lou Atua i luga o lea fata faitaulaga. 7 E ao ona e faia ai taulaga faifaatasi+ ma ʻai ai i inā,+ ma o le a e olioli ai i luma o Ieova lou Atua.+ 8 Ia manino lelei ona e tusia i nei maa o upu uma o lenei Tulafono.”+

9 Ona fai atu lea o Mose ma ositaulaga sa Levī iā Isaraelu uma e faapea: “Isaraelu e, ia fifilemu ma faalogo mai. O le asō ua avea ai oe ma nuu o Ieova lou Atua.+ 10 Ia e faalogo i le siʻufofoga o Ieova lou Atua ma tausia ana poloaʻiga ma ana tulafono,+ ua ou poloaʻi atu ai iā te oe i le asō.”

11 Ona poloaʻi atu lea o Mose i le nuu i lenā aso e faapea: 12 “O ituaiga nei o le a tutū i le mauga o Keresema+ e faamanuia atu i le nuu pe a outou sopoʻia atu Ioritana: o Simeona, o Levi, o Iuta, o Isakara, o Iosefa, ma Peniamina. 13 A o ituaiga nei o le a tutū i le mauga o Evalu+ e faamalaia atu: o Reupena, o Kato, o Asera, o Sepulona, o Tanu, ma Nafatali. 14 O le a tali atu fo‘i ma le leotetele le ʻau sa Levī i tagata uma o Isaraelu:+

15 “‘E malaia le tagata e na te faia se faatusa ua tā,+ po o se tupua uʻamea,+ o le mea lea e inosia e Ieova,+ o le galuega a lima o se tufuga,* ma na ia tuu ai i se mea lilo.’ (Ona tali mai lea o le nuu uma e faapea, ‘Amene!’*)

16 “‘E malaia le tagata e manatu faatauvaa i lona tamā po o lona tinā.’+ (Ona tali mai lea o le nuu uma e faapea, ‘Amene!’)

17 “‘E malaia le tagata e na te tuu i tua le pine o le fanua a lona tuaoi.’+ (Ona tali mai lea o le nuu uma e faapea, ‘Amene!’)

18 “‘E malaia le tagata e na te faasesēina le mea e alu i ai le tauaso.’+ (Ona tali mai lea o le nuu uma e faapea, ‘Amene!’)

19 “‘E malaia le tagata e na te faapiʻoina le faamasinoga+ o le tagata ese e aumau iā te outou, o le tama e leai se tamā,* po o le fafine ua oti lana tane.’+ (Ona tali mai lea o le nuu uma e faapea, ‘Amene!’)

20 “‘E malaia le tagata e momoe ma le avā a lona tamā, auā ua ia faalumaina lona tamā.’*+ (Ona tali mai lea o le nuu uma e faapea, ‘Amene!’)

21 “‘E malaia le tagata e momoe ma se manu.’+ (Ona tali mai lea o le nuu uma e faapea, ‘Amene!’)

22 “‘E malaia le tagata e momoe ma lona tuafafine, o le afafine o lona tamā po o le tama teine a lona tinā.’+ (Ona tali mai lea o le nuu uma e faapea, ‘Amene!’)

23 “‘E malaia le tagata e momoe ma le tinā o lana avā.’+ (Ona tali mai lea o le nuu uma e faapea, ‘Amene!’)

24 “‘E malaia le tagata e na te faapō ma fasiotia lona tuaoi.’+ (Ona tali mai lea o le nuu uma e faapea, ‘Amene!’)

25 “‘E malaia le tagata e na te taliaina se foaʻi ina ia fasiotia se tagata e lē sala.’+ (Ona tali mai lea o le nuu uma e faapea, ‘Amene!’)

26 “‘E malaia le tagata e lē faamamaluina upu o lenei Tulafono ona e lē o usiusitaʻi i ai.’+ (Ona tali mai lea o le nuu uma e faapea, ‘Amene!’)

28 “Afai foʻi e te matuā faalogo i le siʻufofoga o Ieova lou Atua, e ala i le toʻaga e tausia ana poloaʻiga uma ua ou poloaʻi atu ai iā te oe i le asō, e faasilisilia lava oe e Ieova lou Atua i atunuu uma o le lalolagi.+ 2 E oo foʻi iā te oe nei faamanuiaga uma, ma maua oe,+ pe afai e te faalogo pea i le siʻufofoga o Ieova lou Atua:

3 “O le a faamanuia oe i le aai, o le a faamanuia foʻi oe i le fanua.+

4 “O le a faamanuia oe i le fanaua mai o ni fanau,*+ i fua o lou fanua ma fanau a au lafumanu, o fanau foʻi a lau lafu povi atoa ma fanau a lau lafu mamoe.+

5 “O le a faamanuia lau ato+ ma lau mea e palu ai falaoa.+

6 “O le a faamanuia oe pe a e sau i totonu, o le a faamanuia foʻi oe pe a e alu i fafo.

7 “O le a faapogaia e Ieova le faatoʻilaloina i ou luma o ou fili o ē e siitaua iā te oe.+ E tasi le auala e latou te siitaua mai ai iā te oe, ae e fitu auala e latou te sosola ese ai mai i ou luma.+ 8 O le a faatonuina e Ieova mo oe le faamanuiaina o ou fale teuoloa,+ ma galuega uma e te faia, e na te faamanuia lava oe i le laueleele e tuuina mai e Ieova lou Atua iā te oe. 9 O le a faia oe e Ieova o se nuu paia mo ia lava,+ e pei ona ia tautō ai iā te oe,+ pe a faaauau ona e tausia poloaʻiga a Ieova lou Atua ma savali i ona ala. 10 O le a iloa ai e nuu uma o le lalolagi ua taʻua oe i le suafa o Ieova,+ e latou te fefefe foʻi iā te oe.+

11 “O le a matuā faateleina e Ieova lau fanau ma le fanau a au lafumanu, ma fua o lou fanua i le laueleele+ na tautō ai Ieova i ou augātamā e tuuina mai iā te oe.+ 12 O le a tatala atu e Ieova iā te oe lona fale teuoloa lelei, o le lagi lea, e na te faatotō ifo le timu i lou fanua i ona tau,+ e na te faamanuia foʻi mea uma e te faia. E te nonō atu mea i le tele o atunuu, a o oe e te lē nonō mai.+ 13 O le a fai oe e Ieova ma ulu ae e lē o le siʻusiʻu; ma e te pito i luga+ ae e lē pito i lalo, pe a e usitaʻi pea i poloaʻiga a Ieova lou Atua, lea ua ou poloaʻi atu ai iā te oe i le asō e tausia ma fai. 14 Aua neʻi e liliuese i le itu taumatau po o le itu tauagavale+ mai i upu uma ua ou poloaʻi atu ai iā te outou i le asō, ina neʻi outou mulimuli atu i isi atua ma auauna iā i latou.+

15 “Ae afai e te lē faalogo i le siʻufofoga o Ieova lou Atua e ala i le toʻaga e tausia ana poloaʻiga uma ma ana tulafono ua ou poloaʻi atu ai iā te oe i le asō, e oo iā te oe ia malaia uma ma maua ai oe:+

16 “O le a malaia oe i le aai, ma o le a malaia foʻi oe i le fanua.+

17 “O le a malaia lau ato+ ma lau mea e palu ai falaoa.+

18 “O le a malaia lou fanaua mai o fanau,*+ ma le fua o lou fanua ma fanau o lau lafu povi atoa ma fanau o lau lafu mamoe.+

19 “O le a malaia oe pe a e sau i totonu, o le a malaia foʻi oe pe a e alu i fafo.

20 “O le a auina mai e Ieova iā te oe le malaia, o le fenuminumiaʻi ma le faasalaga i galuega uma e te faia, seʻia faaumatia ma vave ona faafanoina oe, ona o le leaga o au gaoioiga ma ua e lafoaʻia ai aʻu.+ 21 O le a faapogaia e Ieova le faamaʻi e pipii iā te oe seʻia uma ona ia faaumatia oe mai i le laueleele, lea e te alu i ai e fai mo oe.+ 22 O le a taia oe e Ieova i le māmāpala, o le maualuga o le fiva,+ mūmū o le tino ona o le siama, vevela o le tino ona o le fiva, o le pelu,+ o le lāmala, ma le polopologā;+ e tuliloa oe e ia mea seʻia faaumatia ai oe. 23 O le a avea foʻi le lagi i luga aʻe o lou ulu ma ʻapamemea ma le lalolagi i ou lalo ifo ma uʻamea.+ 24 O le a faatotō ifo e Ieova i lou laueleele le pauta ma le pefu e fai ma timu, e alu ifo i ou luga mai i le lagi seʻia faaumatia ai oe. 25 O le a faapogaia e Ieova le faatoʻilaloina o oe i luma o ou fili.+ E tasi le auala e te alu atu ai e siitaua iā i latou ae e fitu auala e te sola ese ai i o latou luma; ma o le a matuā fefefe malo uma o le lalolagi+ pe a latou iloa mea leaga ua oo iā te oe. 26 E fai lou tino oti ma meaʻai a manufelelei uma o le lagi atoa foʻi ma manu o le fanua, e leai se tasi e faamataʻu i ai.+

27 “O le a taia oe e Ieova i le maʻi sua o Aikupito, o le fula,* o le mūmū mageso ma poʻu, ia o le a e lē toe malosi ai. 28 O le a taia oe e Ieova i le faalētonu o le mafaufau, le tauaso+ ma le fenuminumiaʻi.* 29 O le a e tautagotago i le ao teatea, e pei o le tagata tauaso o loo tautagotago i le pōuliuli,+ ma e lē taulau so o se mea e te faia; o le a ave faagaoi ma faoa au mea i taimi uma, ae e leai se tasi e laveaʻi iā te oe.+ 30 E te faamau i se fafine, ae e toso faamalosi o ia e se isi tamāloa. E te fausia se fale ae e te lē nofo ai.+ E te totō se togāvine ae e lē taitai ona e faaaogāina.+ 31 E fasia lau povi poʻa a o e vaai i ai, ae e te lē ʻai ai. E gaoia lau asini mai i ou luma, ae e te lē toe mauaina. E avatu foʻi au mamoe i ou fili ae e leai se faaola mo oe. 32 E avatu ou atalii ma ou afafine i nisi tagata+ a o e vaavaai atu, ma e te naunau lava e toe aumaia i latou, ae o le a leai se malosi i ou lima. 33 O fua o lou laueleele ma au faaeleeleaga uma o le a aai ai tagata e te lē iloa,+ ma o le a ave faagaoi au mea ma sauāina oe i taimi uma. 34 O le a faalētonu lou mafaufau i mea e vaai i ai ou mata.

35 “O le a taia oe e Ieova i le papala leaga e tigā i ou tuli ma ou vae, o le maʻi e te lē toe malosi ai, mai i ou alofivae e oo i lou tumua‘i. 36 O le a taʻitaʻiina e Ieova oe ma le tupu ua e tofia e pule iā te oe i se atunuu e tou te lē iloa ma ou augātamā,+ ma o le a e auauna i inā i isi atua, o atua ua faia i laau ma maa.+ 37 E fai oe ma mea e fefefe ai tagata ma o se mea e inosia,* ma e tauemu i ai nuu uma lava o le a taʻitaʻiina i ai oe e Ieova.+

38 “E tele fatu e te totōina i le fanua, ae itiiti mea e te aoaoina+ auā o le a ʻaina e sē akerise. 39 E te totōina togāvine ma galueaʻiina, ae e te lē inu i se uaina ma e te lē aoaoina foʻi se mea,+ auā e ʻaina uma e anufe. 40 O le a iai laau o le olive iā te oe i lou fanua uma, ae e lē uuina lou tino i se suāuu, auā o le a toʻulu ou olive. 41 E te fanaua ou atalii ma afafine, ae e lē fai pea i latou ma au fanau, auā e ave faapagota i latou.+ 42 O le a faatamaʻia e le anoanoaʻi o iniseti* au laau uma ma fua o lou fanua. 43 O le a atili maualuga iā te oe le tagata ese e aumau iā te oe, a o oe, o le a atili ona e maulalo iā te ia. 44 E na te nonō atu iā te oe, a o oe, e te lē nonō atu iā te ia.+ E fai o ia ma ulu, a o oe, e fai ma siʻusiʻu.+

45 “E oo iā te oe nei malaia uma+ ma tuliloa iā te oe, ma maua ai oe seʻia oo ina faaumatia oe,+ auā ua e lē faalogo i le siʻufofoga o Ieova lou Atua, e ala i lou lē tausia o ana poloaʻiga ma ana tulafono na ia poloaʻi atu ai iā te oe.+ 46 O le a iai pea ia mea iā te oe ma lau fanau e fai ma faailoga ma lapataʻiga tumau,+ 47 talu ai e te leʻi auauna iā Ieova lou Atua ma le lotoolioli ma le fiafia a o tele au mea uma.+ 48 O le a aauina atu e Ieova ou fili e faasagatau iā te oe, ma e te auauna iā i latou+ faatasi ma le fia ʻai+ ma le fia inu, o le lē lavalavā ma le mativa i mea uma. E na te faaee foʻi le amo uʻamea i lou ua seʻia oo ina faaumatia oe e ia.

49 “E faatulaʻi e Ieova se atunuu mai i se mea mamao+ e faasagatau iā te oe, mai i le isi pito o le lalolagi; e pei ona pu‘e faafuase‘i e se aeto+ ana mea‘ai, o se atunuu e te lē malamalama i lana gagana,+ 50 o se atunuu foliga sauā, e lē agalelei i toeaina pe alofa foʻi i tama.+ 51 E latou te aai i fanau a au lafumanu ma fua o lou fanua seʻia faaumatia oe. E latou te lē faatotoeina mo oe ni fatu, o uaina fou po o suāuu, po o fanau a au povi, po o fanau foʻi a au mamoe, seʻia latou faaumatia oe.+ 52 E latou te siʻomia oe, ma taofia oe i totonu o ou aai* uma seʻia solofa i lalo ou pā maualuluga ma malupuipuia, ia e te faatuatuaina i ou laueleele uma. E moni, e latou te siʻomia lava oe i totonu o ou aai i lou laueleele uma, lea ua tuuina mai e Ieova lou Atua iā te oe.+ 53 Ona e ʻaia lea o au fanau,* o tino o ou atalii ma ou afafine,+ o ē ua tuuina mai e Ieova lou Atua iā te oe, ona o le mata‘utia o le tulaga ua iai ina ua si‘omia oe ma faapuapuagatia oe e lou fili.

54 “E oo lava i se tane ua iā te oe e sili ona agavaivai ma na tausi a‘e ma le faapelepele, o le a lē alofa i lona uso po o lana avā pele po o ona atalii o loo totoe, 55 ma e na te lē avatu i se tasi o i latou na se fasi tino o ona atalii o le a ia ʻai ai, auā e leai se mea o totoe iā te ia, ona o le mata‘utia o le tulaga ua iai ina ua si‘omia ma faapuapuagatia ou aai+ e lou fili. 56 O le fafine fo‘i ua iā te oe e agavaivai ma na tausi a‘e ma le faapelepele, o lē e lē taitai ona mafaufau e tū ona alofivae i le palapala ona o lona agavaivai,+ o le a lē alofa o ia i lana tane pele po o lana tama tama po o lana tama teine, 57 e oo lava i le fanua e paʻū mai i le vā o ona vae, ma i ana tama tama foʻi ua ia fanaua, auā e na te ʻai faalilolilo ia mea ona o le mata‘utia o le tulaga ua iai ina ua si‘omia ma faapuapuagatia ou aai e lou fili.

58 “Afai e te lē toʻaga e tausia upu uma o lenei Tulafono o loo tusia i lenei tusi,+ ma e te lē mataʻu i lenei suafa mamalu ma le ofoofogia,+ o Ieova+ lou Atua, 59 o le a faaoo e Ieova mala e matuā mataʻutia iā te oe ma au fanau, o mala tetele ma e umi lava,+ ma maʻi leaga ma faaumiumi. 60 O le a ia toe aumaia iā te oe o faamaʻi uma o Aikupito na e fefe ai, ma e pipii lava ia mea iā te oe. 61 E lē gata i lea, o le a faaoo mai e Ieova iā te oe so o se maʻi po o se mala e leʻi tusia i le tusi o lenei Tulafono, seʻia oo ina faaumatia oe. 62 E ui ua toʻatele outou e pei o fetu o le lagi,+ e toʻalaiti lava outou o le a totoe,+ talu ai e te leʻi faalogo i le siʻufofoga o Ieova lou Atua.

63 “E pei ona fiafia Ieova e faamanuia iā te outou ma faatoʻateleina outou, e faapea foʻi ona fiafia Ieova e faaumatia outou ma tafiesea outou; e aveesea foʻi outou mai i le laueleele lea e fai mo oe.

64 “E faataapeapeina e Ieova oe i atunuu uma mai i le tasi pito o le lalolagi e oo i le isi pito o le lalolagi,+ ma o i inā e te auauna ai i atua e faia i laau ma maa, o atua e tou te leʻi iloa muamua ma ou augātamā.+ 65 E te lē maua se filemu i na atunuu,+ pe maua foʻi se mea tumau e tū ai ou alofivae. Ae e tuuina atu e Ieova iā te oe se lotoatuatuvale+ ma le leaga o le vaai ma le lotofaanoanoa.+ 66 E matuā lamatia lou ola ma e te matuā fefe i le pō ma le ao; e te lē mautinoa foʻi pe e te ola pe leai. 67 E te faapea mai i le taeao, ‘Maʻimau pe ana o le afiafi!,’ ma e te faapea mai i le afiafi, ‘Maʻimau pe ana o le taeao!’ ona o le fefe tele o lou loto, ma ona o mea e vaai i ai ou mata. 68 O le a faafoʻi atu lava oe e Ieova i Aikupito i le vaa, i le auala na ou fai atu ai iā te oe, ‘E te lē toe vaai i ai,’ ma e tou te faatauina atu lava outou i inā i o outou fili e fai ma tane ma teine pologa, ae e leai se tagata e na te faatauina mai outou.”

29 O upu nei o le feagaiga na poloaʻi mai ai Ieova iā Mose ia osia ma le fanauga a Isaraelu i le atunuu o Moapi, e ese mai i le feagaiga na ia osia ma i latou i Horepa.+

2 Ua aami e Mose Isaraelu uma ma faapea atu iā i latou: “Ua outou vāai i mea uma na faia e Ieova i o outou luma, i le atunuu o Aikupito iā Farao ma ana auauna uma atoa ma lona atunuu uma,+ 3 o faasalaga* tetele na outou vāai i ai, o faailoga ma vavega+ tetele na. 4 Ae e leʻi tuuina mai e Ieova iā te outou se loto e malamalama ai, mata e vaai ai, ma taliga e faalogo ai, ua oo mai lava i le aso nei.+ 5 ‘A o oʻu taʻitaʻia outou i tausaga e 40 i le toafa,+ e leʻi pala o outou ofu na oofu ai, e leʻi pala foʻi o outou seevae na see i o outou vae.+ 6 E tou te leʻi aai i se falaoa, e tou te leʻi feinu foʻi i se uaina po o se isi lava ʻava malosi, ina ia outou iloa ai o aʻu o Ieova lo outou Atua.’ 7 Mulimuli ane na outou ō mai i lenei mea, ona ō mai lea o Sekono le tupu o Hesepona+ ma Oko le tupu o Vasana+ e siitaua mai iā i tatou, ae na tatou faatoʻilaloina i latou.+ 8 Ona tatou avea lea o o latou laueleele ma avatu e fai ma tofi o le ituaiga o Reupena, ma le ituaiga o Kato, ma le ʻafa o le ituaiga o Manase.+ 9 O lea, ia outou tausia upu o lenei feagaiga ma usiusitaʻi i ai, ina ia manuia ai mea uma e tou te faia.+

10 “O loo outou tutū uma i luma o Ieova lo outou Atua i le asō, o ulu o o outou ituaiga, o o outou toeaina, o o outou leoleo, o tane uma o Isaraelu, 11 o a outou fanau, o a outou avā,+ ma le tagata ese e aumau iā te oe+ i lou togālauapi, mai i le tagata e fai au fafie e oo i le tagata e asuina ou vai. 12 Ua e iai i inei ina ia ulu atu i le feagaiga a Ieova lou Atua ma lana tautoga, lea ua osia e Ieova lou Atua ma oe i le asō+ 13 ina ia faatumauina oe e ia i lenei aso e fai ma ona nuu,+ ma ia avea foʻi o ia ma ou Atua,+ e pei ona ia folafola mai iā te oe ma e pei foʻi ona ia tautō ai i ou augātamā o Aperaamo,+ o Isaako,+ ma Iakopo.+

14 “E lē na o outou ua ou osia ai lenei feagaiga ma lenei tautoga, 15 ae atoa ma ē o loo tutū i inei ma i tatou i le asō i luma o Ieova lo tatou Atua, ma i latou foʻi e lē o faatasi ma i tatou i le asō. 16 (Auā ua outou iloa lelei na tatou nonofo i le atunuu o Aikupito ma na tatou ui mai i laueleele o nisi o atunuu i la tatou faigāmalaga.+ 17 Na masani ona outou vāai i a latou mea inosia, ma a latou tupua inosia*+ na faia i laau ma maa, ma siliva ma auro, na iai iā i latou.) 18 Ia faaeteete ina ne‘i iai se tamāloa po o se fafine, o se aiga po o se ituaiga mai iā te outou i le aso nei e liliuese lona loto mai iā Ieova lo tatou Atua ma alu atu e auauna i atua o na atunuu,+ ina ia lē maua ai mai iā te outou se aa e tupu mai ai fua o le laau e oti ai ma se laau oona.+

19 “Ae afai e faalogo se tasi i upu o lenei tautoga ma ua ia mitamita i lona loto ma faapea ifo, ‘Ou te maua le filemu e ui lava ua ou maumauaʻi e savali e tusa ai ma loʻu loto,’ ma faaumatia ai mea uma* i lona ala, 20 e lē finagalo Ieova e faamagalo o ia.+ Peita‘i, o le a oo mai e pei o se afi le toʻasā tele o Ieova i lea tagata, ma o le a oo iā te ia o mala uma ua tusia i lenei tusi,+ e aveesea foʻi e Ieova lona igoa mai i lalo o le lagi. 21 E vavaeese e Ieova o ia mai i ituaiga uma o Isaraelu ina ia oo i ai mala, e tusa ma mala uma o le feagaiga ua tusia i lenei tusi o le Tulafono.

22 “A o le tupulaga o loo fai mai, o o outou atalii atoa ma le tagata ese ua sau mai i se atunuu mamao, pe a latou vāai i mala ma tulaga leaga o le laueleele o le a faaoo mai i ai e Ieova, 23 o le teiō,* o le masima ma le mū, o le a lē totō ai se mea i le laueleele atoa, e lē ola ai se mea, pe tutupu aʻe ai ni laau, e pei ona faaumatia o Sotoma ma Komoro,+ o Atama ma Sepoiima,+ ia na faaumatia e Ieova i lona toʻasā ma lona toʻatamaʻi, 24 o le a latou faapea ane ma nuu uma, ‘Aiseā na faia ai faapena e Ieova i lenei atunuu?+ Aiseā na aasa tele ai lenei toʻasā?’ 25 Ona latou faapea lea, ‘Na tutupu na mea talu ai ua latou tuulafoaʻia le feagaiga a Ieova+ le Atua o o latou augātamā, lea na osia ma i latou ina ua ia aumaia i latou mai i le atunuu o Aikupito.+ 26 Ae na latou ō ma auauna i isi atua ma ifo atu iā i latou, o ni atua na latou lē iloa muamua ma e na te leʻi faatagaina i latou e tapuaʻi i ai.+ 27 Ona oo mai lea o le toʻasā o Ieova i le atunuu, e ala i le aumaia i o latou luga o malaia uma ua tusia i lenei tusi.+ 28 O lea, na liaʻieseina ai e Ieova i latou mai i o latou laueleele i lona to‘atama‘i+ ma lona ma‘ema‘eā ma lona toʻasā e matuā tele, ma na tiaʻi i latou i se isi atunuu e pei ona iai i lenei aso.’+

29 “O mea ua lilo, e iā Ieova lo tatou Atua ia,+ a o mea ua faaalia, e iā i tatou ma ē e tupuga mai iā i tatou e faavavau, ina ia tatou tausia upu uma o lenei Tulafono.+

30 “Pe a oo ina taunuu ia upu uma iā te oe, o le manuia ma le malaia ua ou tuuina atu i ou luma,+ ma e toe manatua+ foʻi ia mea i nuu uma ua faataapeapeina i ai oe+ e Ieova lou Atua, 2 ma e toe foʻi mai iā Ieova lou Atua+ ma faalogo i lona siʻufofoga e tusa ma mea uma ua ou poloaʻi atu ai iā te oe i le asō, o oe ma ou atalii, ma lou lotoatoa ma lou ola atoa,+ 3 ona aumaia lea e Ieova lou Atua o ou tagata na ave faapagota+ ma faaalia atu iā te oe le alofa mutimutivale,+ ma toe faapotopoto ai oe mai i nuu uma na faataapeapeina i ai oe+ e Ieova lou Atua. 4 E tusa pe e salalau solo ou tagata i tuluʻiga o le lagi, e faapotopoto e Ieova lou Atua oe mai i lenā mea ma toe aumaia oe mai i inā.+ 5 E avatu oe e Ieova lou Atua i le laueleele na nonofo ai ou tamā, e fai mo oe lenā laueleele; ma o le a ia faamanuia iā te oe ma faatoʻateleina oe e sili atu i ou tamā.+ 6 O le a faamamāina* e Ieova lou Atua lou loto ma loto o lau fanau,+ ina ia e alofa ai iā Ieova lou Atua ma lou lotoatoa ma lou ola atoa ina ia e ola ai.+ 7 O le a faaoo e Ieova lou Atua ia malaia uma i luga o ou fili, o ē na ʻinoʻino ma faasauā iā te oe.+

8 “E te toe foʻi mai ma faalogo i le siʻufofoga o Ieova, ma tausia ana poloaʻiga uma ua ou poloaʻi atu ai iā te oe i le asō. 9 O le a matuā faamanuiaina oe e Ieova lou Atua i galuega uma a ou lima,+ i le faateleina o au fanau, o fanau a au lafumanu, ma fua o lou fanua, auā e toe fiafia Ieova e faamanuia iā te oe, e pei ona fiafia o ia i ou augātamā.+ 10 O le a e faalogo fo‘i i le siʻufofoga o Ieova lou Atua, ma tausia ana poloaʻiga ma ana tulafono ua tusia i lenei tusi o le Tulafono, ma o le a e toe foʻi iā Ieova lou Atua ma lou lotoatoa ma lou ola atoa.+

11 “E lē faigatā lenei poloaʻiga ua ou poloaʻi atu ai iā te oe i le asō pe mamao foʻi.+ 12 E lē o iai i le lagi lenei poloaʻiga ina ia faapea ane ai se tasi, ‘O ai e alu aʻe i le lagi ina ia aumaia lea mea mo i tatou, ina ia tatou faalogo i ai ma faia ia mea?’+ 13 E lē o iai foʻi i le isi itu o le sami, ina ia faapea ane ai se tasi, ‘O ai e sopoʻia le isi itu o le sami ina ia aumaia ai mo i tatou, ina ia tatou faalogo i ai ma faia ia mea?’ 14 Auā ua matuā latalata mai iā te oe le upu, i lou lava gutu ma lou lava loto,+ ina ia e faia ai.+

15 “Vaai, ua ou tuuina i ou luma i le asō le ola ma le manuia, o le oti foʻi ma le malaia.+ 16 Afai e te faalogo i poloaʻiga a Ieova lou Atua ia ua ou poloaʻi atu ai iā te oe i le asō, e ala i le alofa iā Ieova lou Atua+ ma savali i ona ala ma tausia ana poloaʻiga, o ana tulafono, ma iʻuga o ana faamasinoga, ona e ola ai lea+ ma faatoʻateleina ai, ma o le a faamanuia oe e Ieova lou Atua i le laueleele lea e te alu atu i ai e fai mo oe.+

17 “Ae afai e liliuese lou loto+ ma e lē faalogo, ma e faasesēina oe ina ia e ifo i isi atua ma e auauna i ai,+ 18 ou te fai atu iā te outou i le asō, o le a faaumatia lava outou.+ O le a lē faaumiumi o outou aso i le laueleele o le a e sopoʻia ai Ioritana e fai mo oe. 19 Ou te faia le lagi ma le lalolagi ma molimau e faasaga iā te outou i le asō, ou te tuuina atu le ola ma le oti i ou luma, o le manuia ma le malaia;+ ma ia e filifili i le ola ina ia e ola ai,+ o oe ma ē e tupuga mai iā te oe,+ 20 e ala i le alofa iā Ieova lou Atua,+ e ala i le faalogo i lona siʻufofoga, ma pipii atu iā te ia,+ auā o ia o lou ola ma o ia foʻi e na te faaumiumi ou aso i le laueleele lea na tautō ai Ieova e avatu i ou augātamā o Aperaamo, o Isaako, ma Iakopo.”+

31 Ona alu atu lea o Mose ma fai atu nei upu iā Isaraelu uma, 2 ma faapea atu iā i latou: “Ua 120 oʻu tausaga i lenei aso.+ E lē mafai ona ou toe ta‘ita‘iina outou,* auā ua fetalai mai Ieova iā te aʻu, ‘E te lē sopoʻia atu lenei vaitafe o Ioritana.’+ 3 O le a sopoʻia muamua atu Ieova lou Atua iā te oe, ma o ia lava e na te faaumatia ia atunuu uma mai i ou luma, ma e te tuliesea i latou.+ E muamua ona sopo‘ia atu e Iosua le isi itu+ iā te oe, e pei ona fetalai mai ai Ieova. 4 O le a faia e Ieova iā i latou e pei ona ia faia iā Sekono+ ma Oko,+ o tupu o tagata Amorī, atoa ma o laʻua laueleele ina ua ia faaumatia i laʻua.+ 5 E faato‘ilaloina foʻi e Ieova i latou mo outou, ma e ao ona outou faia iā i latou e tusa ma poloaʻiga uma ua ou tuuina atu iā te outou.+ 6 Ia outou lototetele ma faamalolosi.+ Aua e te fefe pe mataʻu iā i latou,+ auā e savali Ieova lou Atua faatasi ma oe. E na te lē tuua oe, e na te lē tuulafoaʻi lava iā te oe.”+

7 Ona aami lea e Mose o Iosua ma faapea atu iā te ia i luma o Isaraelu uma: “Ia e lototele ma faamalosi,+ auā o oe, o le a e avatua lenei nuu i le laueleele na tautō ai Ieova i o latou augātamā e avatu iā i latou, ma o le a e avatua lea laueleele iā i latou e fai ma o latou tofi.+ 8 O Ieova o ia lea o loo savali muamua atu iā te oe, ma e faatasi pea o ia ma oe.+ E na te lē tuua oe, e na te lē tuulafoaʻi lava iā te oe. Aua e te fefe pe mataʻu.”+

9 Ona tusia lea e Mose o lenei Tulafono+ ma avatu i ositaulaga, o le ‘au sa Levī, o ē e amoina le atolaau o le feagaiga a Ieova, atoa foʻi ma toeaina uma o Isaraelu. 10 Ona poloaʻi atu lea o Mose iā i latou e faapea: “O faaiʻuga uma o tausaga ta‘ifitu, i le taimi atofaina o le tausaga o le faasaʻolotoga,+ i le Tausamiga o Fale Lauvao,*+ 11 pe a ō mai Isaraelu uma e tutū i luma o Ieova+ lou Atua i le nofoaga o le a ia filifilia, ia e faitau lenei Tulafono i luma o Isaraelu uma a o latou faalogo mai.+ 12 Ia faapotopoto le nuu,+ o tane, o fafine, o fanau iti, ma le tagata ese e aumau iā te oe i ou aai,* ina ia latou faalogo ma latou aʻoaʻo ai, ma matataʻu ai iā Ieova lo outou Atua, ma ia toʻaʻaga e tausia upu uma o lenei Tulafono. 13 O o latou atalii o ē e leʻi iloa muamua lea Tulafono, e latou te faalogo+ ma aʻoaʻoina ia matataʻu iā Ieova lo outou Atua i aso uma e tou te ola ai i le laueleele, lea tou te sopoʻia atu ai Ioritana e fai mo outou.”+

14 Ona fetalai mai lea o Ieova iā Mose: “Faauta! Ua lata mai le taimi e te oti ai.+ Ia aami iā Iosua, ma ia oulua ō atu i le faleʻie o le feiloaʻiga, ina ia ou tofia o ia e fai ma taʻitaʻi.”+ Ona ō lea o Mose ma Iosua i le faleʻie o le feiloaʻiga. 15 Ona faaali mai lea o Ieova i se ao faaniutū i luga o le faleʻie, ma ua tū ai le ao faaniutū i tala ane o le faitotoʻa o le faleʻie.+

16 Ona fetalai mai lea o Ieova iā Mose: “Faauta! Ua lata ona e oti,* ae o le a faia e lenei nuu faiga faatalitane faaleagaga ma atua ese i le atunuu lea latou te ō atu i ai.+ E latou te tuulafoaʻia aʻu+ ma solia laʻu feagaiga na ou osia ma i latou.+ 17 Ona ou matuā ita ai lea iā i latou+ i lenā taimi, ma ou tuulafoaʻia i latou+ ma natia oʻu mata mai iā i latou,+ seʻia faaumatia i latou. Pe a oo iā i latou mala ma puapuaga e tele,+ ona latou faapea mai lea, ‘Pe e lē ua oo mai ea ia mala iā i tatou ona ua lē faatasi mai lo tatou Atua ma i tatou?’+ 18 Ae ou te matuā natia oʻu mata i lenā aso ona o mea leaga uma latou te faia, auā ua latou liliu atu i isi atua.+

19 “Ia oulua tusia lenei pese+ ma aʻoaʻo ai i le fanauga a Isaraelu.+ Ia latou taulotoina* ina ia fai ai lea pese ma molimau iā te aʻu faasaga i le fanauga a Isaraelu.+ 20 Pe a ou aumaia i latou i le laueleele na ou tautō ai i o latou augātamā,+ o le laueleele e tafe ai le suāsusu ma le meli,+ e latou te aai ma maoona ai, e tamaoaiga ai,*+ o le a latou liliu atu i isi atua ma auauna i na atua ma lē āva mai ai iā te aʻu ma solia laʻu feagaiga.+ 21 Pe a oo iā i latou le tele o mala ma puapuaga,+ ona fai lea o lenei pese ma molimau iā i latou (auā e lē tatau ona galo i ē e tupuga mai iā i latou), ona ua ou iloa le faanaunauga ua latou atiaʻe+ ae ou te leʻi avatua i latou i le laueleele na ou tautō atu ai.”

22 Ona tusia lea e Mose o lenei pese i lenā aso ma aʻoaʻo atu i le fanauga a Isaraelu.

23 Ona tofia lea e le Atua o Iosua+ le atalii o Nuno e fai ma taʻitaʻi ma fetalai mai: “Ia lototele ma faamalosi,+ auā o oe o le a e avatua le fanauga a Isaraelu i le laueleele na ou tautō ai iā i latou,+ ma ou te faatasi pea ma oe.”

24 Ua uma foʻi ona tusia e Mose o upu o lenei Tulafono i se tusi seʻia oo ina māeʻa lelei,+ 25 ona poloaʻi atu lea o Mose i le ʻau sa Levī, o ē e amoina le atolaau o le feagaiga a Ieova, ua faapea atu: 26 “Ia ave lenei tusi o le Tulafono+ ma tuu i autafa o le atolaau+ o le feagaiga a Ieova lo outou Atua, ia fai ma molimau faasaga iā te outou. 27 Auā ua ou iloa lelei lou fouvale+ ma lou faauamaaa.+ Pe afai na outou gaoioi ma le fouvale iā Ieova a o oʻu ola pea faatasi ma outou, o le a sili atu ona outou faia faapea pe a ou oti! 28 Ia faapotopoto mai iā te aʻu o toeaina uma o o outou ituaiga ma o outou leoleo, seʻi oʻu tautala atu iā i latou i ia upu a o latou faalogo mai, ma seʻi oʻu faia le lagi ma le lalolagi e fai ma molimau faasaga iā i latou.+ 29 Auā ua ou iloa lelei pe a mavae loʻu oti, o le a outou matuā gaoioi ma le leaga+ ma liliuese mai i le ala na ou poloaʻi atu ai iā te outou. E oo mai foʻi mala iā te outou+ i le lumanaʻi, auā o le a outou faia le mea e leaga i le silafaga a Ieova, ma faatigā ai lona finagalo ona o galuega a o outou lima.”

30 A o faalogologo mai le faapotopotoga uma o Isaraelu, ua fai atu e Mose upu o lenei pese mai i le amataga seʻia oo ina māeʻa:+

 3 Auā ou te folafola atu le suafa o Ieova.+

Ia outou faailoa atu le silisili ese o lo tatou Atua!+

 5 O i latou lava, ua latou faia ni gaoioiga e leaga+ ai.

E lē o i latou o lana fanau, o lo latou ila o i latou na māfua ai.+

O i latou o se tupulaga faapiʻopiʻo ma le faaʻoleʻole!+

15 Ina ua oo ina lapoʻa Iesuruna,* ona ia aa atu lea ma le faatautee.

Ua e lapoʻa, ua telē lou tino, ua e ʻai faaloloto.+

29 Maʻimau pe ana latou atamamai!+ E latou te mafaufau loloto ai i lenei mea.+

E latou te manatunatu i lo latou iʻuga.+

Ia ō atu i latou ma fesoasoani iā te outou.

Ia avea i latou ma lafitaga mo outou.

Ou te fasiotia, ma ou te faaolaina.+

44 Ona sau ai lea o Mose ma fai atu upu uma o lenei pese a o faalogo mai i ai le nuu,+ o ia ma Hosea*+ le atalii o Nuno. 45 Ua māeʻa ona taʻu atu e Mose nei upu uma iā Isaraelu uma, 46 ona ia fai atu lea iā i latou: “Ia teu i o outou loto upu uma ia ua ou lapataʻi atu ai iā te outou i le asō,+ ina ia outou faatonuina a outou fanau ia toʻaʻaga e tausia upu uma o lenei Tulafono.+ 47 Auā e lē o se upu faatauvaa ia mo outou, ae e faalagolago i ai lo outou ola,+ ma o upu foʻi ia e faaumiumi ai o outou aso i le laueleele lea tou te sopoʻia ai Ioritana e fai mo outou.”

48 Ua fetalai mai Ieova iā Mose i lea lava aso e faapea: 49 “Ia e alu aʻe i le mauga o Aperima,+ le mauga o Nepo+ lea e iai i le laueleele o Moapi, o loo fesagaʻi ma Ieriko, ma vaai atu ai i le laueleele o Kanana, lea ou te tuuina atu i le fanauga a Isaraelu e fai mo latou.+ 50 Ona e maliu ai lea i le mauga lea e te alu aʻe ai, ma faatasia ma ou tagata,* e pei ona maliu lou uso o Arona i le mauga o Horo,+ ma ua faatasia ma ona tagata, 51 auā o oulua uma na lē faamaoni iā te aʻu i totonu o le fanauga a Isaraelu i vai o Meripa+ i Katesa, i le toafa o Tisina, talu ai na oulua lē faapaiaina aʻu i luma o le fanauga a Isaraelu.+ 52 E te vaai mamao atu foʻi i le laueleele, ae e te lē ulu atu i lenā laueleele lea ou te tuuina atu i le fanauga a Isaraelu.”+

33 O le faamanuiaga lenei na faamanuia atu ai Mose, le tagata o le Atua moni i le fanauga a Isaraelu, a o leʻi maliu o ia.+ 2 Ua ia fai atu:

7 Ua ia faailoa mai lenei faamanuiaga iā Iuta:+

8 Ua ia faapea atu e tusa ai ma Levi:+

12 Ua ia faapea atu e tusa ai ma Peniamina:+

13 Ua ia faapea atu e tusa ai ma Iosefa:+

18 Ua ia faapea atu e tusa ai ma Sepulona:+

19 E la te valaau tagata ia ō atu i le mauga.

O i inā e latou te faia ai taulaga o le amiotonu.

20 Ua ia faapea atu e tusa ai ma Kato:+

“E manuia lē e na te faalauteleina tuaoi o Kato.+

E faapotopoto mai ulu o le nuu.

22 Ua ia faapea atu e tusa ai ma Tanu:+

“O Tanu o le tamaʻi leona.+

E oso mai o ia mai i Vasana.”+

23 Ua ia faapea atu e tusa ai ma Nafatali:+

Ia fai mo ia le itu i sisifo ma le itu i saute.”

24 Ua ia faapea atu e tusa ai ma Asera:+

“Ua faamanuiaina Asera i ni atalii.

29 Isaraelu e, ua fiafia oe!+

34 Ona alu aʻe lea o Mose mai i le fanua laugatasi o le toafa o Moapi i le mauga o Nepo,+ i le tumutumu o Peseka+ lea e faafesagaʻi ma Ieriko.+ Ua faailoa mai e Ieova iā te ia le laueleele atoa, mai i Kiliata e oo atu i Tanu,+ 2 ma Nafatali uma, ma le laueleele o Efaraima ma Manase, ma le laueleele uma o Iuta e oo atu i le sami i sisifo,*+ 3 ma Nekepi*+ ma le itumalo o Ioritana,+ o le fanua laugatasi* o Ieriko, le aai o laau pama e oo atu i Soara.+

4 Ua toe fetalai mai Ieova iā te ia: “O le laueleele lenei na ou tautō atu ai iā Aperaamo, o Isaako, ma Iakopo e faapea, ‘Ou te avatu lea laueleele i lau fanau.’+ Ua ou faaali atu iā te oe ina ia vaai i ai ou mata, ae e te lē sopo atu i inā.”+

5 Ona maliu ai lea o Mose le auauna a Ieova i inā i Moapi, e tusa ma le fetalaiga a Ieova.+ 6 Ona ia* tanu lea o ia i le vanu i le laueleele o Moapi e feagai ma Pete-peoro, ma e leai se isi e iloa le mea e iai lona tuugamau e oo mai i le asō.+ 7 Na maliu Mose ina ua 120 ona tausaga.+ E leʻi puaoa lana vaai, ma e leʻi mou atu lona malosi. 8 Ona fetagisi lea o le fanauga a Isaraelu ona o Mose i le fanua laugatasi o le toafa o Moapi mo aso e 30.+ Mulimuli ane, ona māeʻa ai lea o aso ua fetagisi ma faavauvau ai ona o Mose.

9 Ua tumu Iosua le atalii o Nuno i le agaga e atamai ai, auā na faaee lima o Mose i ona luga;+ ona faalogo lea o le fanauga a Isaraelu iā te ia ma faia e pei ona poloaʻi mai ai Ieova iā Mose.+ 10 Ae e leʻi toe tulaʻi mai lava se perofeta i Isaraelu e pei o Mose,+ o lē na fesagaʻi ma Ieova.+ 11 Na ia faia faailoga ma vavega uma ia na auina atu ai o ia e Ieova e fai i le atunuu o Aikupito, iā Farao ma ana auauna uma ma lona atunuu atoa,+ 12 e tusa ma le lima malosi ma le mana ofoofogia lea na faaalia e Mose i luma o Isaraelu uma lava.+