O LE FAAALIGA IĀ IOANE

1 O le faaaliga a Iesu Keriso na tuuina atu e le Atua iā te ia,+ ina ia faailoa mai i ana pologa+ o mea ua toeitiiti ona tutupu lea. Ua auina mai foʻi e ia lana agelu e faailoa mai i faailoga e ala iā te ia i lana pologa o Ioane,+ 2 o lē na molimauina afioga na tuuina mai e le Atua atoa ma le molimau a Iesu Keriso, ioe, o mea uma na ia vaai i ai. 3 E fiafia o lē e faitau leotele, ma i latou e faalogo i upu o lenei valoaga, ma tausi i mea o tusia ai,+ auā ua lata mai le taimi atofaina.

4 O aʻu o Ioane, o laʻu tusi lenei i faapotopotoga e fitu+ o loo i le itumalo o Asia:

Tau ina ia iā te outou le agalelei faifua ma le filemu mai i “Lē o loo soifua, na soifua foʻi, o le a afio mai,”+ ma e mai i agaga e fitu+ o loo i luma o lona nofoālii, 5 e mai foʻi iā Iesu Keriso, o “le Molimau Faamaoni,”+ o “le ulumatua o ē e toetutū mai i le oti,”+ ma o “le Pule o tupu o le lalolagi.”+

O lē ua alofa mai iā i tatou+ ma faasaʻoloto i tatou mai i a tatou agasala e ala i lona lava toto,+ 6 (na ia faia foʻi i tatou o se malo,+ o ositaulaga+ i lona Atua ma lona Tamā) ia iā te ia le mamalu ma le malosi e faavavau. Amene.

7 Faauta! O loo afio mai o ia i ao,+ e iloa atu foʻi o ia e mata o tagata uma, ma i latou na tutuʻia o ia; ona taufaitagitu‘i ai lea o ituaiga uma o le lalolagi ona o ia.+ E moni lava, Amene.

8 Ua fetalai mai Ieova* le Atua: “O aʻu o le Alefa ma le Omeka,*+ o Lē o loo soifua, na soifua foʻi, o le a afio mai, o Lē e ona le malosi uma lava.”+

9 O aʻu o Ioane, o lo outou uso ma o lē ua tofutofusia ma outou i puapuaga,+ ma le malo,+ atoa ma le tumau+ o se soo o Iesu,+ ua ou iai i le motu e igoa o Patamo ona o le talaʻiga e uiga i le Atua, ma le molimau atu e faatatau iā Iesu. 10 Ona ua faagaeeina aʻu e le agaga, ua ou oo ai i le aso o le Alii, ma ou faalogo ai i se leo malosi mai i oʻu tua e pei o le leo o se pū, 11 ua faapea mai: “Ia e tusi i se tusi tāʻai mea ua e vaai i ai, ma auina atu i faapotopotoga e fitu: i Efeso,+ i Semurana,+ i Perekamo,+ i Tuatira,+ i Sarataisa,+ i Filatelefaia,+ ma i Laotikaia.”+

12 Ua ou liliu atu e vaai po o ai o loo tautala mai iā te aʻu, ma ina ua ou liliu atu, ua ou vaaia ai tuugāmolī auro e fitu,+ 13 ma ua i le ogatotonu o tuugāmolī se tasi e pei o le atalii o le tagata,+ ua ofu o ia i le ofu talaloa e oo i ona vae, ma ua fusi lona fatafata i le fusi auro. 14 E lē gata i lea, ua matuā paʻepaʻe lona ao ma lona lauao e pei o le paʻepaʻe o fulufulu mamoe, e pei foʻi o le kiona, o ona mata foʻi ua pei o se afi mumū,+ 15 o ona vae ua pei o le pupula o le ʻapamemea lelei+ i le ogaumu, ma o lona siʻufofoga e pei o le gogolo o vai e tele. 16 O loo i lona lima taumatau fetu e fitu,+ ma ua alu atu mai i lona fofoga* le pelu umī e maʻai uma ona itu,+ ma o ona foliga ua pei o le mumū o le lā ina ua mū tinitini.+ 17 Ina ua ou vaai iā te ia, ona ou faapaʻū ai lea i ona vae e peiseaʻī ua ou oti.

Ae ua ia tuu mai lona lima taumatau i oʻu luga ma faapea mai: “Aua e te fefe. O aʻu o Lē e muamua+ ma Lē e mulimuli,+ 18 ma lē e ola,+ na ou oti,+ ae faauta! ua ou ola e faavavau, faavavau lava,+ ma ua iā te aʻu ki o le oti ma le Tuugamau.*+ 19 O lea la, ia e tusi i lalo mea na e vaai i ai, o mea o loo tutupu i le taimi nei, ma mea o le a oo mai pe a mavae nei mea. 20 O le uiga lenei o le mea lilo paia, o fetu e fitu na e vaaia i luga o loʻu lima taumatau, ma tuugāmolī auro e fitu: O fetu e fitu o agelu ia o faapotopotoga e fitu, a o tuugāmolī e fitu o faapotopotoga ia e fitu.+

2 “Ia e tusi i le agelu+ o le faapotopotoga i Efeso:+ O mea nei ua fai mai ai lē o loo uu i lona lima taumatau fetu e fitu, ma o loo savali i le ogatotonu o tuugāmolī auro e fitu:+ 2 ‘Ua ou iloa au galuega, ma lou tautigā, ma lou tumau, ma e te lē faapalepale i tagata leaga, ma ua e tofotofoina o ē ua faapea mai o ni aposetolo+ ae e leai lava, ua e iloa foʻi o i latou o ni tagata pepelo. 3 Ua e faaalia foʻi le tumau, ua e onosaia le tele o faigatā ona o loʻu igoa,+ ma ua e lē faavaivai.+ 4 Peitaʻi, o le mea lenei ua ou lē fiafia ai iā te oe, ona ua e tuua le uluaʻi alofa sa iā te oe.

5 “‘O lea, ia manatua le mea na e paʻū mai ai, ma ia salamō+ ma toe foʻi e faia au galuega muamua. Afai e te lē salamō,+ ou te alu atu iā te oe ma aveesea lau tuugāmolī+ mai i lona tulaga. 6 E ui i lea, o loo iai se mea lelei iā te oe: ua e ʻinoʻino i galuega a le lotu Nikalaitai,+ lea foʻi ou te ʻinoʻino i ai. 7 O lē ua iai taliga, inā faalogo mai ia i mea ua fai mai ai le agaga i faapotopotoga:+ O lē e manumalo,+ ou te faataga o ia e ʻai i fua o le laau o le ola+ o loo i le parataiso a le Atua.’

8 “Ia e tusi foʻi i le agelu o le faapotopotoga i Semurana: O mea nei ua fai mai ai o ‘Lē e muamua ma Lē e mulimuli,’+ o lē na oti ae ua toe ola mai:+ 9 ‘Ua ou iloa lou puapuaga ma lou mativa (peitaʻi ua e tamaoaiga),+ ma upuleaga a i latou o ē ua faapea mai o i latou o tagata Iutaia ae e leai lava, a o le sunako o Satani+ i latou. 10 Aua e te fefe i mea o le a e tigā ai.+ Faauta! E faaauau ona lafoina e le Tiapolo nisi o outou i le falepuipui ina ia matuā tofotofoina ai outou, ma faapuapuagatia ai outou i aso e sefulu. Ia e faamaoni seʻia oo i le oti, ona ou avatu lea iā te oe o le pale o le ola.+ 11 O lē ua iai taliga, inā faalogo mai ia+ i mea ua fai mai ai le agaga i faapotopotoga: O lē ua manumalo,+ e lē afāina lava o ia i le oti faalua.’+

12 “Ia e tusi i le agelu o le faapotopotoga i Perekamo: O mea nei ua fai mai ai lē ua iai le pelu umī e maʻai uma ona itu:+ 13 ‘Ua ou iloa le mea o loo e nofo ai, o le mea lea o loo iai le nofoālii o Satani; ae ua e taofimau pea i loʻu igoa+ ma e te leʻi faafitia lou faatuatua iā te aʻu+ e oo lava i aso o Anetipa laʻu molimau faamaoni,+ o lē na fasiotia+ a o faatasi ma outou i le mea o loo nofo ai Satani.

14 “‘E ui i lea, o nai mea nei ua ou lē fiafia ai iā te oe, ona ua iā te oe o ē ua taofimau i le aʻoaʻoga a Palaamo,+ o lē na aʻoaʻo iā Palako+ ina ia tuu se mea e tausuai ai i luma o le fanauga a Isaraelu, ina ia aai i mea ua faataulaga mo tupua, ma faia amioga lē mamā taufeusuaʻiga.*+ 15 E faapena foʻi ona iā te oe i latou ua taofimau i aʻoaʻoga a le lotu Nikalaitai.+ 16 O le mea lea, inā salamō ia. Afai e leai, ona ou vave alu atu lea iā te oe, ma ou tau le taua ma i latou i le pelu umī e alu atu mai i loʻu gutu.+

17 “‘O lē ua iai taliga, inā faalogo mai ia i mea ua fai mai ai le agaga i faapotopotoga:+ O lē e manumalo,+ ou te tuuina atu iā te ia nisi o manai ua natia,+ ou te tuuina atu foʻi iā te ia se tamaʻi maa paʻepaʻe, ma e tusia se igoa fou i luga o le tamaʻi maa, lea e lē iloa e se tasi seʻi vaganā ai lē ua mauaina.’

18 “Ia e tusi i le agelu o le faapotopotoga i Tuatira:+ O mea ia ua faapea mai ai le Atalii o le Atua, o lē e pei o le afi mumū ona mata,+ ma ona vae e pei o le ʻapamemea lelei:+ 19 ‘Ua ou iloa au galuega, ma lou alofa, o lou faatuatua, o lau faiva ma lou tumau, ma ua sili atu au galuega i le taimi nei nai lo o le taimi muamua.

20 “‘E ui i lea, o le mea lenei ua ou lē fiafia ai iā te oe, ona ua e tuu ai pea le fafine o Iesepela,+ o lē ua ia taʻua o ia lava o se perofeta fafine, ma ua ia aʻoaʻoina ma faasesēina aʻu pologa ina ia faia amioga lē mamā taufeusuaʻiga,*+ ma aai i mea ua faataulaga mo tupua. 21 Na ou tuu atu le avanoa iā te ia ina ia salamō ai, ae e lē manaʻo o ia e salamō mai i ana amioga lē mamā taufeusuaʻiga.* 22 Faauta! ua toeitiiti ona ou taia lea o ia i se faamaʻi leaga, ma faaoo se puapuaga tele iā i latou ua mulilulua faatasi ma ia, seʻi vaganā ai ua latou salamō mai i ana galuega. 23 Ou te fasiotia foʻi lana fanau i se faamaʻi oti, ina ia iloa ai e faapotopotoga uma o aʻu o lē e suʻesuʻeina manatunatuga loloto* ma loto, ma ou te taui atu iā te outou taʻitoʻatasi e tusa ma a outou galuega.+

24 “‘Peitaʻi, ou te fai atu i isi uma o outou o i Tuatira, o i latou uma o ē e lē o mulimuli i lenei aʻoaʻoga, o ē e lē iloa le mea ua taʻua o “mea loloto a Satani”:+ Ou te lē toe tuu atu se isi lava avega mamafa iā te outou. 25 Ae e ui i lea, ia outou taofimau i le mea ua iā te outou seʻia ou alu atu.+ 26 O lē foʻi e manumalo ma mulimuli i aʻu galuega seʻia oo i le iʻuga, ou te tuuina atu iā te ia le pule i atunuu,+ 27 ma e pule o ia i* tagata i le tootoo uʻamea,+ ina ia faaumatia i latou e pei ona nutililiiina o ipu ʻele, e pei ona ou maua mai i loʻu Tamā. 28 Ou te avatu foʻi iā te ia le fetu ao.+ 29 O lē ua iai taliga, inā faalogo mai ia i mea ua fai mai ai le agaga i faapotopotoga.’

3 “Ia e tusi i le agelu o le faapotopotoga i Sarataisa: O mea nei ua fai mai ai lē ua iai agaga e fitu o le Atua+ ma fetu e fitu:+ ‘Ua ou iloa au galuega, ua iā te oe le igoa* ua e ola, ae ua e oti.+ 2 Ia mataala,+ ma faamalosia o ē o totoe o le a feoti,* auā ua ou iloa e te lē o matuā faataunuuina* au galuega i luma o loʻu Atua. 3 O le mea lea, ia manatunatu pea i* mea ua e maua, ma mea ua e faalogo i ai, ma ia e tausi i ai, ma ia salamō.+ O le mea moni, afai e te lē ala i luga, ou te alu atu e pei o se gaoi,+ ma e te matuā lē iloa foʻi po o lē fea itula ou te oo atu ai iā te oe.+

4 “‘Peitaʻi, ua iā te oe i Sarataisa ni nai tagata* e leʻi pisipisia o latou ofu tele,+ ma e latou te savavali faatasi ma aʻu i ofu papa‘e,+ auā ua tatau lea iā i latou. 5 O lē e manumalo+ e ofu o ia i ofu tele papa‘e,+ ma ou te lē aveesea* lava lona igoa mai i le tusi o le ola,+ ae ou te taʻutaʻu atu lona igoa i luma o loʻu Tamā ma ana agelu.+ 6 O lē ua iai taliga, inā faalogo mai ia i mea ua fai mai ai le agaga i faapotopotoga.’

7 “Ia e tusi i le agelu o le faapotopotoga i Filatelefaia: O mea nei ua fai mai ai lē e paia,+ o lē e moni,+ o lē ua iai le ki a Tavita,+ o lē ua tatalaina ae e leai se tasi e na te tapunia, ma o lē e na te tapunia ae e leai se tasi e na te tatalaina: 8 ‘Ua ou iloa au galuega (faauta! ua ou tuu i ou luma le faitotoʻa o loo matala,+ lea e leai se tasi e mafai ona ia tapunia. Ua ou iloa foʻi ua itiiti lou malosi, ae ua e tausi i laʻu upu, ma ua e faamaoni i loʻu igoa. 9 Faauta! Ou te faapogaia tagata mai le sunako o Satani o ē ua faapea mai o i latou o tagata Iutaia, ae e leai lava,+ o tagata pepelo i latou) faauta! ou te faapogaia i latou e ō atu i ou luma ma ifo i ou vae, e latou te iloa foʻi ou te alofa iā te oe. 10 Auā ua e tausia le upu e uiga i loʻu tumau,*+ ou te tausia foʻi oe i le itula o tofotofoga,+ lea o le a oo mai i le lalolagi uma, ina ia tofotofoina ai i latou o ē o nonofo i le lalolagi. 11 Ou te vave alu atu.+ Ia taofimau pea i mea ua iā te oe, ina neʻi aveesea e se tasi lou pale.+

12 “‘O lē e manumalo, ou te faia o ia ma poutū i le malumalu o loʻu Atua, ma e lē toe alu ese mai ai lava o ia, ou te tusia foʻi i luga iā te ia le suafa o loʻu Atua,+ ma le igoa o le aai o loʻu Atua, o le Ierusalema Fou+ lea ua alu ifo mai i le lagi mai i loʻu Atua, atoa foʻi ma loʻu igoa fou.+ 13 O lē ua iai taliga, inā faalogo mai ia i mea ua fai mai ai le agaga i faapotopotoga.’

14 “Ia e tusi i le agelu o le faapotopotoga i Laotikaia:+ O mea nei ua fai mai ai le Amene,+ o le molimau+ faamaoni ma le moni,+ o le amataga o foafoaga a le Atua:+ 15 ‘Ua ou iloa au galuega, e te lē maalili, e te lē vevela foʻi. Ou te manaʻo ia e maalili pe vevela. 16 Talu ai ua e māfanafana, e te lē vevela,+ e te lē maalili foʻi,+ o le mea lea ou te luai atu ai oe mai i loʻu gutu. 17 Auā ua e faapea mai, “Ua ou mauoloa+ ma ua tele aʻu ʻoa, ou te lē toe manaʻomia se isi mea,” ae e te lē iloa ua e malaia, ma pagatia, ma mativa, ma tauaso, ma lē lavalavā, 18 ou te fautuaina oe ia e faatau atu mai iā te aʻu le auro ua faamamāina i le afi, ina ia e mauʻoa ai, ma ofu tele papa‘e ina ia e ofu ai, ina neʻi iloa atu lou māsiasi i lou lē lavalavā,+ ma vaimata e nini ai ou mata+ ina ia e vaai ai.+

19 “‘O ē uma ou te alofa faapelepele i ai, ou te aʻoaʻi ma faasala iā i latou.+ O lea la, ia maelega ma salamō.+ 20 Faauta! Ou te tū i le faitotoʻa ma tuʻituʻi atu. Afai e faalogo se tasi i loʻu leo ma tatala mai le faitotoʻa, ona ou alu atu lea ma te aai faatasi ma ia i lona fale i le ʻaiga o le afiafi, o ia foʻi ma aʻu. 21 O lē e manumalo,+ ou te aumaia o ia ma te nonofo faatasi i loʻu nofoālii,+ e pei foʻi ona ou manumalo ma nonofo faatasi+ ma loʻu Tamā i lona nofoālii. 22 O lē ua iai taliga, inā faalogo mai ia i mea ua fai mai ai le agaga i faapotopotoga.’”

4 Ua mavae nei mea, ona ou iloa ai lea, faauta! o se faitotoʻa ua matala mai i le lagi, ma o le leo muamua ua ou faalogo ua tautala mai iā te aʻu, ua pei o le leo o se pū, ua faapea mai: “Sau ia i luga nei, ou te faailoa atu iā te oe mea e tatau ona tutupu.” 2 Ua mavae nei mea, ona faafuaseʻi lea ona ou iai i le mana o le agaga, faauta foʻi! ua tū mai le nofoālii i le lagi, ma o loo iai se tasi o afio ai i le nofoālii.+ 3 O Lē o loo afio i le nofoālii, ua pei ona foliga o se maa iasepi+ ma se maa salikea,* ma e iai se nuanua e pei o le maa samaraki* ua faataamilo i le nofoālii.+

4 O loo siʻosiʻomia foʻi le nofoālii e nofoālii e 24, ma i luga o nei nofoālii ua ou iloa atu ai toeaina e toʻa 24,+ ua oofu i ofu tele papaʻe ma ua i o latou ulu o pale auro. 5 Ua sau mai i le nofoālii o uila,+ ma leo, ma faititili;+ ma ua iai foʻi molī e fitu o loo mumū i luma o le nofoālii, ua fai ma faatusa o agaga e fitu o le Atua.+ 6 O loo i luma o le nofoālii se mea e pei o se sami tioata,+ ma e pei foʻi o se maa tioata.

Ua iai i le ogatotonu o le nofoālii ma ua siʻosiʻomia foʻi le nofoālii e foafoaga agaga e toʻafā,+ ua tumu i mata luma atoa ma tua. 7 O le foafoaga agaga muamua e pei o se leona,+ o le foafoaga agaga lona lua e pei o se tamaʻi povi poʻa,+ o le foafoaga agaga lona tolu+ e iai foliga e pei o se tagata, ma o le foafoaga agaga lona fā+ e pei o se aeto o loo lele.+ 8 O nei foafoaga agaga e toʻafā, e tofu i latou ma apaʻau e ono; e tumu i mata luga atoa ma lalo.+ Ua lē mālōlō i latou i le ao ma le pō i le faapea atu: “E paia, e paia, e paia Ieova*+ le Atua o Lē e ona le malosi uma lava, o lē o loo soifua, na soifua foʻi, o le a afio mai.”+

9 O so o se taimi lava e avatu ai e foafoaga agaga le viiga, le faaneeneega, ma le faafetai i Lē o loo afio i le nofoālii, o Lē e soifua pea e faavavau, faavavau lava,+ 10 ona faapaʻuʻū lea o toeaina e toʻa 24+ i luma o Lē o loo afio i le nofoālii, ma tapuaʻi atu i Lē e soifua pea e faavavau, faavavau lava, ma lafo atu o latou palealii i luma o le nofoālii ma faapea atu: 11 “Ieova* e, lo matou Atua, ua tatau lava oe ona e mauaina le viiga,+ ma le mamalu,+ ma le mana,+ auā na e foafoaina mea uma lava,+ ma o lou finagalo foʻi ua iai nei mea ma na foafoaina ai.”

5 Ua ou iloa foʻi Lē o loo afio i le nofoālii,+ o loo i lona lima taumatau se tusi tāʻai ua iai tusitusiga i ona itu uma,* ua faamauina i faamaufaailoga e fitu. 2 Ona ou iloa lea o se agelu malosi o loo faapea atu ma le leotele: “O ai ua agavaa e tatalaina le tusi tāʻai ma ona faamaufaailoga?” 3 Ae e leai se tasi i le lagi, po o le lalolagi, po o lalo ifo o le lalolagi e mafai ona ia tatalaina le tusi tāʻai pe vaai i ai. 4 Ona ou matuā tagi ai lea, auā ua lē maua se tasi e agavaa e tatalaina le tusi tāʻai pe vaai foʻi i ai. 5 Ae ua faapea mai se tasi o toeaina iā te aʻu: “Soia e te tagi. Faauta! Ua manumalo+ le Leona mai i le ituaiga o Iuta,+ o le aa+ o Tavita,+ ma ua mafai ona ia tatalaina le tusi tāʻai ma ona faamaufaailoga e fitu.”

6 Ona ou iloa lea o loo tū i le ogatotonu o le nofoālii ma foafoaga agaga e toʻafā atoa ma toeaina,+ se tamaʻi mamoe+ ua peiseaʻī ua fasia,+ ua iai seu e fitu, ma mata e fitu ia ua fai ma faatusa o agaga e fitu o le Atua+ ua aauina atu i le lalolagi uma. 7 Ona alu atu lea o le tamaʻi mamoe ma aumai le tusi tāʻai mai i le aao taumatau o Lē o loo afio i le nofoālii.+ 8 Ina ua ia ave le tusi tāʻai, ona faapaʻuʻū lea o foafoaga agaga e toʻafā ma toeaina e toʻa 24+ i luma o le Tamaʻi Mamoe, ua tofu i latou ma le kitara,* ma ipu auro ua tumu i mea manogi. (Ua fai mea manogi ma faatusa o tatalo a le ʻaupaia.)+ 9 Ua latou usuina foʻi se pese fou+ e faapea: “Ua tatau iā te oe ona e tago i le tusi tāʻai ma tatala ona faamaufaailoga, auā na fasia oe ma o lou toto foʻi na e faatauina mai ai tagata mo le Atua+ mai i ituaiga uma, ma gagana uma, ma nuu uma, ma atunuu uma,+ 10 ma ua e faia i latou ma malo+ ma ositaulaga i lo tatou Atua,+ e latou te pule mai foʻi o ni tupu+ i le lalolagi.”

11 Ua ou iloa foʻi ma ou faalogo i le leo o le tele o agelu o loo siʻosiʻomia le nofoālii, ma foafoaga agaga ma toeaina, ma o lo latou aofaʻi e mano ni mano,* ma afe ni afe,+ 12 ma ua latou faapea mai ma le leotetele: “Ua tatau i le Tamaʻi Mamoe na fasia,+ ona ia maua le mana, le tamaoaiga, le atamai, le malosi, le mamalu, le viiga atoa ma le manuia.”+

13 Ona ou faalogo lea i foafoaga uma o loo i le lagi, ma le lalolagi, ma lalo ifo o le lalolagi,+ ma le sami, ma mea uma o iai, ua faapea mai: “Ia iā te ia o Lē e afio i le nofoālii+ ma le Tamaʻi Mamoe,+ le manuia, le viiga, le mamalu,+ ma le malosi e faavavau, faavavau lava.”+ 14 Ona faapea mai lea o foafoaga agaga e toʻafā: “Amene!” ona faapaʻuʻū lea o toeaina ma tapuaʻi atu i le Atua.

6 Ua ou iloa atu foʻi ua tatala e le Tamaʻi Mamoe+ o le tasi o faamaufaailoga e fitu,+ ma ua ou faalogo ua faapea mai le tasi o foafoaga agaga+ i le leo e pei o se faititili: “Sau ia!” 2 Ona ou vaai ai lea, faauta foʻi! o le solofanua paʻepaʻe+ ma lē o loo tiʻetiʻe ai ua iai lana ʻaufana; ma ua tuuina atu iā te ia le pale,+ ua alu atu o ia ina ia manumalo, ma e oo ina manumalo aʻiaʻi.+

3 Ina ua ia tatalaina le faamaufaailoga lona lua, ona ou faalogo lea ua faapea mai le foafoaga agaga lona lua:+ “Sau ia!” 4 Ona alu atu loa lea o le solofanua mūmū, ma ua avatu i lē o loo tiʻetiʻe ai le faatagaga e aveesea ai le filemu mai i le lalolagi, ina ia latou fefasiotiaʻi ai; ma ua tuuina atu foʻi iā te ia le pelu telē.+

5 Ina ua ia tatalaina le faamaufaailoga lona tolu,+ ona ou faalogo lea ua faapea mai le foafoaga agaga lona tolu:+ “Sau ia!” Ona ou vaai ai lea, faauta foʻi! o le solofanua uliuli, ma o lē o loo tiʻetiʻe ai ua i lona lima se fua faatautau. 6 Ona ou faalogo lea i se leo e pei e sau mai i le ogatotonu o foafoaga agaga e toʻafā, ua faapea mai: “O le tau o le kilokalama o saito, o le tenari*+ lea, ma o le tau o kilokalama e tolu o karite,* o le tenari lea; ae aua e te faaleagaina le suāuu olive ma le uaina.”+

7 Ina ua ia tatalaina le faamaufaailoga lona fā, ona ou faalogo lea ua faapea mai le foafoaga agaga lona fā:+ “Sau ia!” 8 Ona ou vaai ai lea, faauta foʻi! o le solofanua samasama vaivai, ma lē o loo tiʻetiʻe ai ua igoa ia o le Oti. Ua mulimuli atu i ona tua le Tuugamau.* Ua tuuina atu i ai le pule i le tasi vaefā o le lalolagi, ina ia fasiotia i le pelu umī, ma le oge,+ ma le faamaʻi oti, ma e ala i manufeʻai o le lalolagi.+

9 Ina ua ia tatalaina le faamaufaailoga lona lima, ona ou iloa lea o loo i lalo o le fata faitaulaga+ le toto+ o ē ua fasiotia ona o le afioga a le Atua, ma le galuega talaʻi na latou faia.+ 10 Ua latou alalaga mai foʻi ma le leotetele e faapea: “Le Alii Pule Silisili Ese e, o lē e paia ma moni,+ o afea ea e te faamasinoina ai ma taui atu lo matou toto iā i latou o loo nonofo i le lalolagi?”+ 11 Ua tuuina atu iā i latou taʻitoʻatasi ni ofu talaloa papaʻe,+ ma ua faatonuina i latou e faatalitali teisi seʻia atoa le fuainumera o o latou uso a pologa ma o latou uso, o ē o le a fasiotia e pei foʻi o i latou.+

12 Ua ou iloa atu foʻi ua ia tatalaina le faamaufaailoga lona ono, ona lūlū lea o se mafuiʻe tele; ua pogisa foʻi le lā e pei o se ʻie talatala uliuli,* ma ua mūmū foʻi le masina atoa e pei o le toto,+ 13 ma ua paʻuʻū ifo fetu mai le lagi i le lalolagi, e pei o le toʻulu ifo o mati moto pe a lūlūina le laau o le mati e se matagi malosi. 14 Ua mou atu le lagi e pei o le taataʻai o le tusi tāʻai,+ ma ua aveesea mauga uma ma motu uma mai i mea sa iai.+ 15 O tupu foʻi o le lalolagi, o tagata aloaʻia, o taʻitaʻiʻau, o ē e mauʻoa, o ē e malolosi, o pologa uma, ma tagata saʻoloto uma, ua latou lalafi i totonu o ana ma vā o papa o mauga.+ 16 Ua latou alalaga atu pea i mauga ma papa: “Mafuli mai ia iā i matou,+ ina ia lilo ai i matou mai i fofoga o Lē o loo afio i le nofoālii,+ ma le toʻasā o le Tamaʻi Mamoe,+ 17 auā ua oo mai le aso tele o lo la toʻasā,+ ma o ai ea sē e mafai ona tū atu i ai?”+

7 Ua mavae lenei mea, ona ou iloa atu ai lea o agelu e toʻafā o loo tutū i tulimanu e fā o le lalolagi, o loo taofimau i matagi e fā o le lalolagi, ina ia lē agi atu i le laueleele, po o le sami, po o se laau e tasi. 2 Ua ou iloa foʻi le isi agelu ua alu aʻe mai i le mea e oso aʻe ai le lā,* ua iā te ia le faamaufaailoga a le Atua soifua; ma ua ia alaga atu ma le leotele i agelu e toʻafā, o ē ua maua le faatagaga e faaleagaina ai le laueleele ma le sami, 3 e faapea: “Aua le faaleagaina le laueleele, po o le sami, po o laau seʻia māeʻa ona matou faamaufaailogaina+ pologa a lo tatou Atua i o latou muāulu.”+

4 Ua ou faalogo foʻi i le faitau aofaʻi o i latou ua faamaufaailogaina, e 144,000,+ ua faamaufaailogaina mai i ituaiga uma o atalii o Isaraelu:+

9 Ua mavae lenei mea, ona ou iloa lea, faauta foʻi! o se motu o tagata e toʻatele e lē mafai e se tasi ona faitaulia mai i atunuu uma, ma ituaiga, ma nuu, ma gagana,+ o loo tutū i luma o le nofoālii ma i luma o le Tamaʻi Mamoe, o loo oofu i ofu talaloa papaʻe;+ o loo iai foʻi laupama i o latou lima.+ 10 Ua latou alalaga atu pea ma le leotetele e faapea: “O lo tatou faaolataga e mai le Atua o lē o loo afio i le nofoālii,+ ma le Tamaʻi Mamoe.”+

11 Ua tutū foʻi agelu uma e faataamilo i le nofoālii, atoa foʻi ma toeaina,+ ma foafoaga agaga e toʻafā, ma ua latou faapaʻuʻū faō i luma o le nofoālii ma tapuaʻi atu i le Atua, 12 ua faapea atu: “Amene! Ia iai i lo tatou Atua le viiga, le mamalu, le atamai, le faafetai, le faaneeneega, le mana, ma le malosi e faavavau, faavavau lava.+ Amene.”

13 Ona fesili mai lea o se tasi o toeaina iā te aʻu: “O ai i latou na o loo oofu i ofu talaloa papaʻe,+ ma o fea e latou te ō mai ai?” 14 Ona ou tali atu loa lea iā te ia: “Loʻu alii e, ua e silafia lenei mea.” Ua faapea mai o ia iā te aʻu: “O i latou nei o ē ua sao mai i le puapuaga tele,+ ma ua tatā o latou ofu talaloa, ma faapaʻepaʻeina i le toto o le Tamaʻi Mamoe.+ 15 O le māfuaaga lea ua latou iai i luma o le nofoālii o le Atua, ma ua latou tuuina atu le auaunaga paia i lona malumalu i le ao ma le pō; ma e fofola atu foʻi e Lē o loo afio i le nofoālii+ lona faleʻie i luga iā i latou.+ 16 E latou te lē toe fia aai, pe fia feinu foʻi, e lē toe afāina i latou i le susulu malosi mai o le lā, po o se isi mea e matuā vevela,+ 17 auā e leoleoina i latou e le Tamaʻi Mamoe+ o loo i tafatafa* o le nofoālii, ma e na te taʻitaʻia i latou+ i vaipuna o le vai o le ola.+ E soloiesea foʻi e le Atua o loimata uma mai i o latou mata.”+

8 Ina ua ia+ tatalaina le faamaufaailoga lona fitu,+ ona lē toe lagona ai lea o se leo i le lagi mo le ʻafa itula. 2 Ua ou iloa foʻi agelu e toʻafitu+ o loo tutū i luma o le Atua, ma ua tuuina atu iā i latou pū e fitu.

3 Ona taunuu mai lea o le tasi agelu o loo uuina se ipu auro o mea manogi* ma tū i le fata faitaulaga,+ ma ua tuuina atu iā te ia le anoanoaʻi o mea manogi,+ ina ia ofoina atu faatasi ma tatalo a le ʻaupaia uma i luga o le fata faitaulaga auro+ o i luma o le nofoālii. 4 Ua alu aʻe le asu o mea manogi mai i le lima o le agelu, faatasi ma tatalo+ a le ʻaupaia i luma o le Atua. 5 Ona ave loa lea e le agelu o le ipu o mea manogi, ua ia faatumuina i se afi mai i le fata faitaulaga ma lafo ifo i le lalolagi. Ona oo mai ai lea o faititili, o leo, o uila,+ ma le mafuiʻe. 6 O agelu foʻi e toʻafitu o loo iai pū e fitu,+ ua nofosauni i latou e ili pū.

7 Ua ili e le agelu muamua lana pū. Ona oo mai ai lea o le uatoʻa ma le afi ua fefiloi ma le toto, ma ua lafo ifo i le lalolagi;+ ua susunu ai le tasi vaetolu o le laueleele, ma le tasi vaetolu o laau, ua susunuina foʻi vao lauolaola uma.+

8 Ua ili e le agelu lona lua lana pū. Ona lafo ifo lea i le sami o se mea e pei o se mauga tele ua mū i le afi.+ Ua liutoto ai le tasi vaetolu o le sami;+ 9 ua mamate ai foʻi le tasi vaetolu o meaola i le sami,+ ma ua faaleagaina ai le tasi vaetolu o vaa.

10 Ua ili e le agelu lona tolu lana pū. Ona paʻū ai lea mai i le lagi o se fetu telē o loo mumū e pei o se molī, ma ua paʻū atu i luga o le tasi vaetolu o vaitafe ma luga o vaipuna.+ 11 O le igoa o le fetu o le Laau Oona. Ona faaoonaina ai lea o le tasi vaetolu o vai, ma e toʻatele tagata ua feoti ai ona o vai auā ua faaoonaina.+

12 Ua ili e le agelu lona fā lana pū. Ona taia ai lea o le tasi vaetolu o le lā,+ ma le tasi vaetolu o le masina, ma le tasi vaetolu o fetu, ina ia pogisa ai le tasi vaetolu o na mea,+ ina ia leai foʻi se malamalama o le tasi vaetolu o le ao, ma e faapena foʻi le pō.

13 Ua ou iloa foʻi ma faalogo i se aeto o loo lele i le taulotoa‘iga o le lagi ma faapea mai ma le leotele: “Auē, auē, auē+ i ē o nonofo i le lalolagi, ona o isi iligāpū a agelu e toʻatolu ua toeitiiti ona ili mai lea!”+

9 Ua ili e le agelu lona lima lana pū.+ Ona ou iloa lea o se fetu ua paʻū mai i le lagi i le lalolagi, ma ua tuuina atu iā te ia le ki o le tō.*+ 2 Ua ia tatalaina le tō* ma ua alu aʻe ai le asu mai i le tō* e pei o le asu o se ogaumu tele, ua pogisa foʻi le lā+ ma le ʻea ona o le asu o le tō.* 3 Ona ō aʻe ai lea o sē akerise mai i le asu ma ō atu i le laueleele,+ ma ua tuuina atu i ai le pule lea foʻi ua maua e akarava o le laueleele. 4 Ua faatonuina i latou e aua neʻi faaleagaina vao lauolaola o le laueleele, po o se mutia, po o se laau e tasi, ae e na o tagata o ē e lē o iai le faamaufaailoga a le Atua i o latou muāulu.+

5 Ua maua foʻi e sē akerise le faatagaga e faapuapuaga ai i latou mo masina e lima, ae aua neʻi fasiotia i latou, ma o puapuaga e oo iā i latou e pei o puapuaga e oo i se tagata pe a tuia e se akarava.+ 6 O na aso e saʻilia ai e tagata le oti, ae e lē maua lava, ma e latou te naunau e feoti ae e sola ese le oti mai iā i latou.

7 O le tino mai o sē akerise, ua pei o ni solofanua ua saunia mo le taua;+ ua i o latou ulu mea e foliga mai o ni palealii auro, ma o o latou foliga e pei o foliga o tagata, 8 a o o latou lauulu e pei o lauulu o fafine. O o latou nifo foʻi e pei o nifo o leona,+ 9 ma e iai o latou ufifatafata e pei o ufifatafata uʻamea. O le paʻō o o latou apaʻau e pei o le paʻō o kariota o loo tosoina e solofanua o loo taufetuli i le taua.+ 10 O o latou siʻusiʻu foʻi e iai tui e pei o siʻusiʻu o akarava, ma e iai i o latou siʻusiʻu le pule e faatigā ai i tagata i masina e lima.+ 11 Ua pule le tupu iā i latou, o le agelu lea o le tō.+ O lona igoa Eperu o Avatonu,* a o lona igoa Eleni o Apoluonu.*

12 Ua uma atu le auē muamua. Faauta! e lua isi auē+ o le a oo mai pe a mavae atu nei mea.

13 Ua ili e le agelu+ lona ono lana pū.+ Ona ou faalogo lea i se leo mai i seu o le fata faitaulaga auro+ o loo i luma o le Atua 14 o faapea atu i le agelu lona ono, o lē ua iai le pū: “Ia tatalaina agelu e toʻafā o loo saisaitia i le vaitafe tele o Eufirate.”+ 15 Ona tatalaina lea o agelu e toʻafā, o ē ua saunia mo le itula, ma le aso, ma le masina, ma le tausaga e fasiotia ai le tasi vaetolu o tagata.

16 O le faitau aofaʻi o vaegaʻau o loo tiʻetiʻe i solofanua, e lua mano o mano;* ua ou faalogo i lo latou faitau aofaʻi. 17 O le auala lenei na ou iloa ai solofanua i le faaaliga ma ē na tiʻetiʻe ai: Ua iai o latou ufifatafata e lanu mūmū sesega, ma lanu moana, ma e samasama foʻi e pei o le teiō,* ma o ulu o solofanua e pei o ulu o leona,+ ma na alu atu mai i o latou gutu le afi, ma le asu, ma le teiō.* 18 O le tasi vaetolu o tagata na faaumatia e ala i nei mala e tolu, o le afi, o le asu, ma le teiō* na alu atu mai i o latou gutu. 19 Ua iai le pule i gutu o solofanua ma o latou siʻusiʻu, auā ua pei o latou siʻusiʻu o gata ma e iai foʻi o latou ulu, ua latou faatigā foʻi i tagata i nei mea.

20 A o isi uma tagata e leʻi fasiotia i nei mala, e latou te leʻi salamō i galuega a o latou lima; na faaauau pea ona latou tapuaʻi i temoni, ma tupua ua fai i auro, ma siliva, ma ʻapamemea, ma maa, ma laau, ia e lē mafai ona vāai, pe faalogo, pe savavali.+ 21 E leʻi salamō foʻi i latou i lo latou fasiotia o tagata, o a latou faiga faaagaga, o a latou amioga lē mamā taufeusuaʻiga,* ma lo latou gāoi.

10 Ua ou iloa foʻi le tasi agelu malosi ua alu ifo mai i le lagi, ua pulupulu i le ao, ma ua iai i lona ulu le nuanua, o ona foliga foʻi ua pei o le lā,+ ma o ona vae ua pei o poutū afi, 2 ma ua i lona lima se tamaʻitusi tāʻai o loo matala. Ona tū lea o lona vae taumatau i le sami a o lona vae tauagavale i le laueleele, 3 ma ua ia alaga atu ma le leotele e pei ona tagi leotele o se leona.+ Ina ua ia alaga atu, ona tautatala mai lea o faititili+ e fitu.

4 A o tautatala mai faititili e fitu, ua ou sauni e tusi mea ua fai mai ai, ae ou faalogo loa i se leo mai i le lagi+ ua faapea mai: “Inā faamaufaailoga ia o mea ua fai mai ai faititili e fitu, ma aua neʻi tusia i lalo.” 5 O le agelu foʻi lea ua ou iloa o loo tū i le sami ma le laueleele, ua sii aʻe lona lima taumatau i le lagi, 6 ma ua ia tautō i Lē o loo soifua e faavavau, faavavau lava,+ o lē na foafoaina le lagi ma mea o iai, ma le lalolagi ma mea o iai, ma le sami ma mea o iai,+ e faapea: “E lē toe faatuai lava. 7 A o aso o le iligāpū a le agelu lona fitu,+ ina o le a ilia e ia lana pū,+ ona faataunuuina ai lea o le mea lilo paia+ a le Atua e tusa ma le tala lelei, lea na ia folafola atu i ana lava pologa, o le ʻauperofeta.”+

8 Ona ou faalogo ai lea i le leo mai i le lagi+ ua toe tautala mai iā te aʻu e faapea: “Inā alu ia ma ave le tusi tāʻai o loo tatala, lea o loo i le lima o le agelu o loo tū i le sami ma le laueleele.”+ 9 Ona ou alu ai lea i le agelu ma fai atu iā te ia e aumai iā te aʻu le tamaʻitusi tāʻai. Ua ia faapea mai: “Ia e tago i ai ma ʻai,+ e suamalie i lou gutu e pei o le meli, ae e oona i lou manava.” 10 Ua ou tago i le tamaʻitusi tāʻai o loo i le lima o le agelu ma ou ʻaina,+ ma ua suamalie i loʻu gutu e pei o le meli,+ ae ina ua uma ona ou ʻaina, ua oona i loʻu manava. 11 Ona faatonuina lea o aʻu e faapea: “Ia e toe faia valoaga e faatatau i tagata, ma nuu, ma gagana, ma tupu e toʻatele.”

11 Ua tuuina mai foʻi iā te aʻu se ū e pei o se tootoo,*+ ma ia faapea mai: “Inā tū ia i luga ma fua potu paia o le malumalu o le Atua, ma le fata faitaulaga, ma i latou o loo tapuaʻi ai. 2 A o le lotoā lea o loo i fafo o potu paia o le malumalu, ia tuu ai pea ma aua le fuaina, auā ua tuuina atu i atunuu, ma e latou te solia i o latou vae le aai paia+ mo le 42 masina.+ 3 Ou te aauina atu aʻu molimau e toʻalua e faia valoaga i aso e 1,260, ma e oofu i ʻie talatala.” 4 Ua faaatagia e nei molimau laau olive e lua,+ ma tuugāmolī e lua+ o loo tutū i luma o le Alii o le lalolagi.+

5 Afai e manaʻo se tasi e faatigā iā i laʻua, e alu atu le afi mai i o la gutu, ma faaumatia ai o la fili. Pe afai o le a manaʻo se tasi e faatigā iā i laʻua, e faapenei foʻi ona fasiotia o ia. 6 Ua iā i laʻua le pule e punitia ai le lagi+ ina ia aua neʻi paʻū se timu+ i aso a o faia a la valoaga, ma ua iā i laʻua foʻi le pule e liua ai le vai i le toto,+ ma taia ai le laueleele i mala eseese uma i le tele e la te mananaʻo ai.

7 Pe a uma la laʻua talaʻiga, ona siitaua mai lea iā i laʻua o le manufeʻai ua alu aʻe mai i le tō, ua faatoʻilaloina ma fasiotia ai i laʻua.+ 8 E taatitia foʻi o la tino oti i ala tetele o le aai tele, lea e taʻua faafaatusa o Sotoma ma Aikupito, o i inā na tutuʻia ai foʻi i luga o le laau lo laʻua Alii. 9 E vaavaai atu foʻi tagata, ma ituaiga, ma gagana, ma atunuu i o la tino oti mo aso e tolu ma le ʻafa,+ ma e latou te lē faatagaina o la tino oti ina ia tuu i le tuugamau. 10 E olioli foʻi ē o nonofo i le lalolagi ona o i laʻua, ma e fiafia i latou, e fetufaa‘i foʻi a latou meaalofa auā na faatigāina e nei perofeta e toʻalua i latou o loo nonofo i le lalolagi.

11 Ina ua mavae aso e tolu ma le ʻafa, ona ulufia lea o i laʻua e le agaga ola mai i le Atua,+ ua la tutū i luga i o la vae, ma ua matuā matataʻu ai i latou o loo vaavaai atu iā i laʻua. 12 Ona la faalogoina lea o se leotele mai i le lagi ua faapea mai iā i laʻua: “Inā ō mai ia i luga nei.” Ona la ō aʻe ai lea i ao i le lagi, ma ua vaavaai atu o la fili iā i laʻua. 13 I lenā lava itula ua tupu ai se mafuiʻe tele, ma ua paʻū ai le tasi vaesefulu o le aai; ua fasiotia ai foʻi tagata e toʻa 7,000 i le mafuiʻe, ona matataʻu ai lea o isi uma ma ua faamamaluina ai le Atua o le lagi.

14 Ua uma atu le auē lona lua.+ Faauta! E vave oo mai le auē lona tolu.

15 Ua ili e le agelu lona fitu lana pū.+ Ona iai lea i le lagi o leotetele ua faapea mai: “Ua avea le malo o le lalolagi ma Malo o lo tatou Alii+ ma lona Keriso,+ ma o le a pule o ia o se tupu e faavavau, faavavau lava.”+

16 Ona faapaʻuʻū faō lea o toeaina e toʻa 24,+ o ē ua tiʻetiʻe i o latou nofoālii i luma o le Atua, ma tapuaʻi atu i le Atua 17 ua faapea atu: “Ieova* e, le Atua, o Lē e ona le malosi uma lava, o lē e soifua+ ma na soifua foʻi, e matou te faafetai atu iā te oe, auā ua e tago i lou mana tele ma amata ona e pule o se tupu.+ 18 Ae ua feita foʻi atunuu, ma ua oo mai ai lou toʻasā ma le taimi atofaina e faamasinoina ai o ē ua oti, ma tuuina atu ai le taui+ i au pologa o le ʻauperofeta,+ ma le ʻaupaia, ma i latou o ē ua matataʻu i lou suafa, o ē e faatauvaa ma ē e aloaʻia, ma faafanoina ai i latou o loo faaleagaina* le laueleele.”+

19 Ona matala lea o potu paia o le malumalu o le Atua lea o loo i le lagi, ma ua vaaia foʻi le atolaau o lana feagaiga i potu paia o lona malumalu.+ Ona emo ai lea o uila, ma ua iai leo, ma faititili, ma le mafuiʻe ma le uatoʻa tele.

12 Ona iloa ai lea i le lagi o se faailoga mataʻina: O se fafine+ ua pulupulu* i le lā, ua i lalo ifo o ona vae le masina, ma ua i lona ulu se palealii o fetu e 12, 2 ua tō foʻi o ia. Ua faatigā o ia ma ua alaga i le tigā o le a fanau.

3 Ona iloa ai lea o se isi faailoga i le lagi. Faauta! O se tarako tele e lanu mūmū+ e fitu ona ulu, e iai ona seu e sefulu, ma e fitu foʻi palealii o loo i luga o ona ulu; 4 ua toso foʻi e lona siʻusiʻu le tasi vaetolu o fetu+ o le lagi, ma ua lafo ifo i latou i le lalolagi.+ Ae ua tū pea le tarako i luma o le fafine+ o le a fanau, ina ia ʻaina e ia lana tama pe a fanau mai.

5 Ua fanau e le fafine se tama tama,+ o lē e pule* i nuu uma i le tootoo uʻamea.+ Ona faafuaseʻi ai lea ona aveina aʻe o lana tama i le Atua ma lona nofoālii. 6 Ona sola lea o le fafine i le toafa,* ua saunia ai e le Atua se nofoaga mo ia, ina ia latou fafagaina ai o ia mo aso e 1,260.+

7 Ona tau ai lea o le taua i le lagi: O Mikaele*+ ma ana agelu ua tau ma le tarako, ua ‘au foʻi le tarako ma ana agelu e tau ai le taua, 8 ae ua lē manumalo i latou,* ua lē toe maua foʻi se mea e nonofo ai i le lagi. 9 Ona lafo ifo lea o le tarako tele,+ o le uluaʻi gata lea,+ ua igoa foʻi i le Tiapolo+ ma Satani,+ o lē ua faasesēina le lalolagi atoa;+ ua lafo ifo o ia i le lalolagi,+ ua lafo ifo foʻi ana agelu faatasi ma ia. 10 Ona ou faalogo lea i le leotele mai i le lagi, ua faapea mai:

“Ua iai nei le faaolataga,+ ma le mana, ma le Malo o lo tatou Atua,+ ma le pule a lona Keriso, auā ua lafo ifo i lalo o lē na molia o tatou uso, o lē na molia i latou i luma o lo tatou Atua+ i le ao ma le pō! 11 Ua latou manumalo foʻi iā te ia+ ona o le toto o le Tamaʻi Mamoe+ ma le upu o loo latou talaʻia,*+ ma ua latou lē faapelepele i o latou ola+ e oo lava i le oti. 12 O le mea lea ia olioli ai le lagi ma outou o loo nonofo ai! Oi talofa i le laueleele ma le sami,+ auā ua alu ifo iā te outou le Tiapolo ua lotoa tele, auā ua ia iloa ua puupuu lona taimi.”+

13 Ina ua iloa e le tarako ua lafo ifo o ia i le lalolagi,+ ona ia sauāina lea o le fafine+ na ia fanauina le tama tama. 14 Ae ua foaʻiina atu i le fafine o apaʻau e lua o le aeto tele,+ e lele atu ai o ia i lona nofoaga i le toafa, ina neʻi maua o ia e le gata,+ o i inā e fafagaina ai o ia mo le taimi, ma taimi e lua, ma le ʻafa taimi.*+

15 Ona luai atu lea e le gata o vai e pei o se vaitafe mai i lona gutu i le fafine, ina ia malemo ai o ia i le vaitafe. 16 Ae ua fesoasoani le laueleele i le fafine, ma faamaga lona gutu ma folo ai le vai na luai atu mai i le gutu o le tarako. 17 Ua matuā ita foʻi le tarako i le fafine, ona alu atu lea e tau le taua ma ē o totoe o lana fanau,+ o ē o loo tausi i poloaʻiga a le Atua, ma faia le galuega o le molimau atu e uiga iā Iesu.+

13 Ua tū o ia* i le oneone o le sami.

Ona ou iloa lea o le manufeʻai+ ua alu aʻe mai i le sami,+ e sefulu ona seu ma ona ulu e fitu, ua i luga foʻi o ona seu palealii e sefulu, a o ona ulu o loo iai igoa faifai. 2 O le manufeʻai foʻi ua ou iloa ua pei o le nameri,* o ona vae ua pei o vae o le pea,* ma lona gutu ua pei o le gutu o le leona. Ua avatu foʻi e le tarako+ i le manufeʻai lona malosi, ma lona nofoālii, ma le pule tele.+

3 Ua ou iloa foʻi le tasi o ona ulu e peiseaʻī ua foa a mate, ae ua pē lona manuʻa lea na toetoe lava a mate ai,+ ona mulimuli atu lea o le lalolagi uma i le manufeʻai ma vivii iā te ia. 4 Ua latou tapuaʻi atu i le tarako auā ua ia avatu le pule i le manufeʻai, ma ua latou tapuaʻi atu i le manufeʻai, ua faapea atu: “O ai e pei o le manufeʻai, ma o ai e mafai ona tau ma ia?” 5 Ua tuuina atu iā te ia le gutu e tautala faasausili ma fai upuleaga ai, ua tuuina atu foʻi iā te ia le pule e gaoioi ai i masina e 42.+ 6 Ona tautala lea o lona gutu i upuleaga+ faasaga i le Atua, e upuleaga ai i lona suafa ma lona afioaga, e oo lava iā i latou o loo nonofo i le lagi.+ 7 Ua faatagaina o ia e sii atu le taua i le ʻaupaia ma ia manumalo iā i latou,+ ua tuuina atu foʻi iā te ia le pule i ituaiga, ma tagata, ma gagana, ma atunuu uma. 8 E tapuaʻi atu foʻi iā te ia o i latou uma o loo nonofo i le lalolagi. Talu mai le faavaeina o le lalolagi, e leʻi tusia lava le igoa o se tasi o i latou i le tusi tāʻai o le ola+ a le Tamaʻi Mamoe, o lē na fasia.+

9 O lē ua iai taliga, inā faalogo mai ia.+ 10 Afai e tatau ona ave faapagota se tasi, ia ave faapagota o ia. Ai sē e na te fasioti i le pelu,* e tatau lava ona fasiotia o ia i le pelu.+ O le mea lenei e manaʻomia ai le tumau+ ma le faatuatua+ o le ʻaupaia.+

11 Ua ou iloa foʻi le isi manufeʻai ua alu aʻe mai i le laueleele, ua iai ona seu e lua e pei o se tamaʻi mamoe, ae ua tautala e pei o le tarako.+ 12 Ua faatino foʻi e ia le pule uma a le manufeʻai muamua+ i ona luma. Ua ia faamalosia foʻi le lalolagi ma ē uma o loo iai, e latou te tapuaʻi atu i le manufeʻai muamua, o lē ua pē lona manuʻa lea na toetoe a mate ai.+ 13 Ua ia faia faailoga tetele, e oo foʻi i lona faapogaia o se afi e alu ifo mai i le lagi i le lalolagi i luma o tagata uma.

14 Ua ia faasesē iā i latou o loo nonofo i le lalolagi, ona ua faatagaina o ia e faia faailoga i luma o le manufeʻai, a o ia fai atu foʻi iā i latou o loo nonofo i le lalolagi ina ia faia se faatusa+ o le manufeʻai, lea na manuʻa i le pelu ae ua toe malosi.+ 15 Ua faatagaina foʻi o ia ina ia mānava atu i le faatusa o le manufeʻai, ina ia tautala atu le faatusa o le manufeʻai, ma faapogaia le oti o i latou uma e mumusu e tapuaʻi i le faatusa o le manufeʻai.

16 Ua ia faamalosia foʻi tagata uma, o ē e faatauvaa ma ē e aloaʻia, o tagata mauʻoa ma matitiva, o tagata saʻoloto ma pologa, ina ia faailogaina i latou nei i o latou lima taumatau po o latou muāulu,+ 17 ina ia lē mafai e se tasi ona faatau mai pe e faatau atu, seʻi vaganā ai le tagata o loo iai le faailoga, o le igoa+ lea o le manufeʻai po o le numera o lona igoa.+ 18 O le mea lenei e manaʻomia ai le atamai: O lē ua iai le tofā mamao, inā faitau ia i le numera o le manufeʻai, auā o le numera a le tagata, o le numera e 666.+

14 Ona ou iloa lea, faauta foʻi! o loo tū mai le Tamaʻi Mamoe+ i le mauga o Siona,+ o loo faatasi ma ia le 144,000,+ o ē ua tusia lona suafa ma le suafa o lona Tamā+ i o latou muāulu. 2 Ua ou faalogo foʻi i leo e sau mai i le lagi e pei o le leo o vai e tele, ma e pei foʻi o le pāpā o faititili tetele; o leo foʻi na ou faalogo ai e pei o tagata pepese o loo tāina a latou kitara. 3 Ua latou usuina foʻi le pese e peiseaʻī o se pese fou+ i luma o le nofoālii, ma foafoaga agaga e toʻafā+ ma toeaina,+ ma ua leai se tasi e mafai ona aʻoaʻoina lelei lea pese, ae ua na o le 144,000,+ o ē na faatauina mai i le lalolagi. 4 O i latou ia e leʻi faaleagaina i fafine; o le mea moni, e mamā* i latou.+ O i latou foʻi nei ua mulimuli atu pea i le Tamaʻi Mamoe i mea uma e alu i ai o ia.+ O i latou ia ua faatauina+ mai i tagata, o uluaʻi fua+ mo le Atua ma le Tamaʻi Mamoe, 5 ma e leai se upu taufaasesē e maua i o latou gutu; e lē ponā foʻi i latou.+

6 Ona ou iloa lea o le isi agelu o loo lele i le taulotoaʻiga o le lagi, ua iā te ia le tala lelei e faavavau e folafola atu i ē o loo nonofo i le lalolagi, i atunuu uma, ma ituaiga uma, ma gagana uma, ma tagata uma.+ 7 Ua faapea atu o ia ma le leotele: “Ia matataʻu i le Atua ma ia faamamaluina o ia, auā ua oo mai le itula o lana faamasinoga,+ o lea ia tapuaʻi i Lē na faia le lagi, ma le lalolagi, ma le sami,+ ma vaipuna.”

8 Ona mulimuli atu lea o le isi agelu, o le lona lua lea, ua faapea atu: “Ua paʻū o ia! Ua paʻū+ Papelonia le Aai Tele,+ o lē ua ia faainu atunuu uma i le uaina o le tuʻinanau i ana* amioga lē mamā taufeusuaʻiga!”*+

9 Ona mulimuli atu lea iā i laʻua o le isi agelu, o le lona tolu lea, ua faapea atu ma le leotele: “Afai e tapuaʻi se tasi i le manufeʻai+ ma lona faatusa, ma maua le faailoga i lona muāulu po o lona lima,+ 10 e inu o ia i le uaina e lē suia o le toʻasā o le Atua ua liligiina atu i le ipu o Lona toʻasā,+ ma e faapuapuagatia foʻi o ia i le afi ma le teiō*+ i luma o le silafaga a agelu paia, ma le silafaga a le Tamaʻi Mamoe. 11 E alu aʻe foʻi e faavavau, faavavau lava le asu o lo latou puapuaga,*+ ma e lē mālōlō foʻi i le ao ma le pō i latou o ē e tapuaʻi i le manufeʻai ma lona faatusa, ma so o se tasi e mauaina le faailoga o lona igoa.+ 12 O le mea lenei e manaʻomia ai le tumau o le ʻaupaia,+ o i latou o loo tausi i poloaʻiga a le Atua ma taofimau i le faatuatua+ iā Iesu.”*

13 Ua ou faalogo foʻi i le leo mai i le lagi, ua faapea mai, “Inā tusi ia: E fiafia o ē e oti a o autasi ma le Alii+ e amata atu nei. Ioe, ua faapea mai le agaga, inā tuu pea ia i latou e mālōlō mai i a latou galuega tigā, auā o mea na latou faia e mulimuli atu iā* i latou.”

14 Ona ou iloa lea, faauta foʻi! o se ao paʻepaʻe, ma i luga o le ao o loo tiʻetiʻe ai se tasi e pei o le atalii o le tagata,+ o loo iai se palealii auro i lona ulu, ma se selesaito maʻai i lona lima.

15 Ona sau lea o le isi agelu mai i potu paia o le malumalu, ua alaga atu ma le leotele i lē o loo tiʻetiʻe i le ao: “Ia tago ia i lau selesaito ma selesele, auā ua oo mai le itula e selesele ai, auā ua matuā pula lava le fuata o le lalolagi.”+ 16 Ona faaoo atu lea e lē o loo tiʻetiʻe i le ao lana selesaito i le lalolagi, ma selesele ai le lalolagi.

17 Ona sau lea o le isi agelu mai i potu paia o le malumalu lea o loo i le lagi, ua iā te ia foʻi se selesaito maʻai.

18 Ua sau foʻi le isi agelu mai le fata faitaulaga ma ua iā te ia le pule i le afi. Ua ia alaga atu ma le leotele i lē o loo iai le selesaito maʻai e faapea: “Ia tago ia i lau selesaito maʻai ma aoao mai fuifui vine o le lalolagi, auā ua pula ona vine.”+ 19 Ona faaoo atu lea e le agelu o lana selesaito i le lalolagi, ma aoao mai ai vine o le lalolagi, ona ia lafo lea o vine i le soligavine tele o le toʻasā o le Atua.+ 20 Ua solia foʻi le soligavine i tua o le aai, ma ua tafe mai le toto mai i le soligavine ua oo atu i faagutu o solofanua, o le mamao e 1,600 setatio.*

15 Ua ou iloa foʻi i le lagi se isi faailoga mataʻina ma le ofoofogia, o agelu e toʻafitu+ ua iai mala e fitu. O mala mulimuli nei, auā o mala nei e faaiʻuina ai le toʻasā o le Atua.+

2 Ona ou iloa lea o le mea e peiseaʻī o se sami tioata+ o loo fefiloi ma le afi, ma o ē ua manumalo+ i le manufeʻai ma lona faatusa,+ ma le numera o lona igoa,+ o loo tutū i tafatafa o le sami tioata, ma o loo latou uuina kitara a le Atua. 3 Ua latou usuina le pese a Mose+ le pologa a le Atua, ma le pese a le Tamaʻi Mamoe+ e faapea:

“Ieova* e, le Atua, o Lē e ona le malosi uma lava,+ e mataʻina ma ofoofogia au galuega.+ E tonu ma faamaoni ou ala,+ le Tupu o le vavau e.+ 4 Ieova* e, o ai sē e lē mataʻu iā te oe ma faamamaluina lou suafa?+ Auā ua na o oe lava e faamaoni. E ō mai atunuu uma lava ma tapuaʻi atu i ou luma, talu ai ua faailoa mai au poloaʻiga amiotonu.”+

5 Ina ua uma nei mea, ona ou iloa ai lea o potu paia o le faleʻie lea e fai ma molimau,+ ua matala i le lagi,+ 6 ona ō mai ai lea mai i potu paia o agelu e toʻafitu ua iai mala e fitu,+ o loo oofu i ʻie lino mamā ma pupula, ua fusi o latou fatafata i fusi auro. 7 Ona avatu lea e le tasi o foafoaga agaga e toʻafā i agelu e toʻafitu o ipu auro e fitu, ua tutumu i le toʻasā o le Atua,+ o lē e soifua e faavavau, faavavau lava. 8 Ona faatumulia lea o potu paia i le asu ona o le mamalu o le Atua+ ma lona mana, ma e leai foʻi se tasi e mafai ona ulu atu i potu paia seʻia faaiʻuina mala e fitu+ ua i agelu e toʻafitu.

16 Ona ou faalogo lea i se leotele mai i potu paia,+ ua faapea atu i agelu e toʻafitu: “Inā ō ia ma sasaa atu ipu e fitu o le toʻasā o le Atua i le lalolagi.”+

2 Ua alu atu le agelu muamua ma sasaa atu lana ipu i le laueleele.+ Ona oo lea o le papala matuā leaga e tigā ai,+ i tagata ua iai le faailoga o le manufeʻai+ ma o loo tapuaʻi atu i lona faatusa.+

3 Ua sasaa atu e le agelu lona lua lana ipu i le sami.+ Ona liutoto+ ai lea e pei o le toto o se tagata oti, ma ua mamate ai meaola uma, ioe, o mea o loo iai i le sami.+

4 Ua sasaa atu e le agelu lona tolu lana ipu i luga o vaitafe ma vaipuna.+ Ona liutoto+ ai lea. 5 Ua ou faalogo foʻi i le agelu o vai ua faapea atu: “O oe, o Lē e soifua ma o Lē na soifua foʻi,+ o lo tatou Atua faamaoni+ ma amiotonu, auā ua e tuuina mai nei iʻuga faafaamasinoga,+ 6 auā na latou faamaligiina le toto o le ʻaupaia ma perofeta,+ ua e tuuina atu ai foʻi le toto e latou te inu ai;+ o le mea lenā ua tatau mo i latou.”+ 7 Ua ou faalogo foʻi i le fata faitaulaga o faapea atu: “Ioe, Ieova* e, le Atua, o Lē e ona le malosi uma lava,+ e moni ma tonu iʻuga o au faamasinoga.”+

8 Ua sasaa atu e le agelu lona fā lana ipu i le lā,+ ma ua tuuina atu i ai le malosi ina ia mū ai tagata i le afi. 9 Ua mū foʻi tagata i le aasa tele, ma ua latou fai upuleaga ai i le suafa o le Atua, o lē e iai le pule i nei mala, e leʻi salamō foʻi i latou ma faamamaluina o ia.

10 Ua sasaa atu e le agelu lona lima lana ipu i le nofoālii o le manufeʻai. Ona faapogisaina+ ai lea o lona malo, ma ua fe‘ati o latou laulaufaiva ona o lo latou tigā, 11 ae ua latou fai upuleaga i le Atua o le lagi ona o o latou tigā ma o latou papala, ma e leʻi salamō i a latou galuega.

12 Ua sasaa atu e le agelu lona ono lana ipu i luga o le vaitafe tele o Eufirate,+ ma ua mātūtū ai le vai,+ ina ia saunia ai le ala mo tupu+ mai i le mea e oso aʻe ai le lā.*

13 Ona ou iloa lea o faamatalaga lē mamā mai i agaga* e toʻatolu e foliga mai e pei o ni rane, ua ō mai mai i le gutu o le tarako,+ ma le gutu o le manufeʻai, ma le gutu o le perofeta pepelo. 14 O faamatalaga ia mai i temoni ua faia faailoga,+ ma ua latou ō atu i tupu o le lalolagi uma, ina ia faapotopoto i latou i le taua+ o le aso tele o le Atua o Lē e ona le malosi uma lava.+

15 “Faauta! ou te alu atu e pei o se gaoi.+ E fiafia o lē e mataala pea+ ma tausi i lona ofu tele, ina neʻi savali o ia e lē lavalavā ma iloa atu ai e tagata lona māsiasi.”+

16 Ua latou faapotopoto foʻi iā i latou i le mea ua igoa i le upu Eperu o Amaketo.*+

17 Ua sasaa atu e le agelu lona fitu lana ipu i le ʻea. Ona tulei mai lea o se siʻufofoga leotele mai i potu paia+ mai i le nofoālii e faapea: “Ua taunuu!” 18 Ona emo ai lea o uila, ma ua iai leo ma faititili, ma ua lūlū foʻi se mafuiʻe tele e leʻi faapea ona tupu muamua talu ona iai tagata i le lalolagi,+ o se mafuiʻe e matuā malosi lava. 19 Ona vaetoluina ai lea o le aai tele,+ ma ua paʻuʻū aai o atunuu; ua manatua foʻi e le Atua Papelonia le Aai Tele,+ ina ia avatu iā te ia le ipu o le uaina o lona toʻasā e matuā mamafa.+ 20 Ua mou ese atu motu uma, ma ua lē toe iai ni mauga.+ 21 Ona toʻulu ifo lea o uatoʻa tetele mai i le lagi i luga o tagata,+ e tusa o se taleni* le mamafa o le uatoʻa e tasi, ma ua fai upuleaga ai tagata i le Atua ona o le mala o le uatoʻa,+ auā o se mala e matuā tele lava.

17 Ona sau lea o le tasi o agelu e toʻafitu ua iai ipu e fitu,+ ma tautala mai iā te aʻu, ua faapea mai: “Sau ia, ou te faaali atu iā te oe le faasalaina o le fafine talitane sili o loo tiʻetiʻe i luga o vai e tele,+ 2 ua faia e tupu o le lalolagi amioga lē mamā taufeusuaʻiga*+ ma ia, ua onanā foʻi i latou o loo nonofo i le lalolagi i le uaina o ana amioga lē mamā taufeusuaʻiga.”*+

3 Ua ia aveina aʻu i le toafa i le mana o le agaga. Ona ou vaaia lea o le fafine o loo tiʻetiʻe i luga o le manufeʻai e lanu mūmū sesega, e tumu i igoa faifai, ma e iai ulu e fitu ma seu e sefulu. 4 Ua ofu foʻi le fafine i le ofu violē+ ma le ofu mūmū sesega, ma ua teuteuina i auro, ma maa tāua, ma penina,+ ua iai foʻi i lona lima le ipu auro ua tumu i mea inosia, ma mea lē mamā o ana amioga lē mamā taufeusuaʻiga.* 5 Ua tusia i lona muāulu le igoa, o le mea lilo lea: “Papelonia le Aai Tele, o le tinā o fafine talitane+ ma mea e inosia i le lalolagi.”+ 6 Ua ou iloa atu le fafine ua onā i le toto o le ʻaupaia ma le toto o ē na molimau iā Iesu.+

Ina ua ou vaai atu iā te ia, ona ou matuā teʻi ai lea. 7 Ona faapea mai lea o le agelu iā te aʻu: “Aiseā ua e teʻi ai? Ou te faailoa atu iā te oe le mea lilo i le fafine+ ma le manufeʻai o loo tiʻetiʻe ai o ia, lea e iai ulu e fitu ma seu e sefulu:+ 8 O le manufeʻai na e iloa, na iai, ae ua lē toe iai, o le a alu aʻe mai i le tō,+ ma alu atu i le faaumatiaga. O le a matuā taufaiofo ē e nonofo i le laueleele, o ē e leʻi tusia o latou igoa i le tusi tāʻai o le ola+ talu mai le faavaeina o le lalolagi, pe a latou iloa na iai le manufeʻai, ae ua lē toe iai, ma o le a iai.

9 “O le mea lenei e manaʻomia ai le mafaufau* e iai le atamai: O ulu e fitu,+ e faasino atu i mauga e fitu o loo tiʻetiʻe ai i luga le fafine. 10 O loo iai tupu e toʻafitu: Ua paʻuʻū le toʻalima, o loo iai nei le toʻatasi, ma e leʻi oo mai le isi; ae pe a oo mai, e matuā puupuu lava le taimi e iai o ia. 11 O le manufeʻai foʻi na iai, ae ua lē toe iai,+ o le tupu lona valu lea, peitaʻi e tupuga mai o ia i le toʻafitu, ma e alu atu foʻi i le faaumatiaga.

12 “O seu e sefulu sa e iloa, e faasino atu i tupu e toʻasefulu e leʻi maua se malo, ae ua latou mauaina le pule o ni tupu mo le itula e tasi, faatasi ma le manufeʻai. 13 Ua tasi foʻi le manatu o i latou nei, ma ua latou avatu lo latou malosi ma le pule i le manufeʻai. 14 E latou te tau ma le Tamaʻi Mamoe,+ ae e manumalo+ le Tamaʻi Mamoe iā i latou, auā o ia o le Alii o alii ma le Tupu o tupu.+ O i latou foʻi ua faatasi ma ia o ē ua valaauina, ma ua filifilia, ma faamaoni, e manumalo i latou.”+

15 Ona ia faapea mai lea iā te aʻu: “O vai sa e iloa ua tiʻetiʻe ai le fafine talitane, e faasino atu i tagata, ma motu o tagata, ma atunuu, ma gagana.+ 16 O seu e sefulu+ sa e iloa ma le manufeʻai,+ e latou te ʻinoʻino i le fafine talitane,+ ma faataugā ma faatelenoa iā te ia, e latou te ʻaina foʻi lona tino ma susunu uma o ia i le afi.+ 17 Auā ua tuuina e le Atua i o latou loto ina ia faataunuu lona finagalo,+ ioe, ina ia faataunuu lo latou manatu e tasi e tuuina atu lo latou malo i le manufeʻai,+ seʻia taunuu afioga a le Atua. 18 O le fafine+ lea sa e iloa, e faasino atu i le aai tele lea e pule i tupu o le lalolagi.”

18 Ua mavae nei mea, ona ou iloa atu lea o le tasi agelu ua alu ifo mai i le lagi ma le pule tele, ua faamalamalamaina foʻi le lalolagi i lona mamalu. 2 Ua ia alaga atu i se leo malosi e faapea: “Ua paʻū o ia! Ua paʻū Papelonia le Aai Tele,+ ua avea ma mea e nonofo ai temoni, ma mea e iai agaga lē mamā uma* ma manulele lē mamā uma ma inosia!+ 3 Auā ua maileia atunuu uma ona o le uaina o le tuʻinanau i ana* amioga lē mamā taufeusuaʻiga,*+ ma ua faia foʻi e tupu o le lalolagi amioga lē mamā taufeusuaʻiga ma ia,+ ma ua mauʻoa foʻi le ʻaufaatauʻoa* o le lalolagi ona o lona mauʻoa tele, lea e lē māsiasi ai.”

4 Ua ou faalogo foʻi i le tasi leo mai i le lagi, ua faapea mai: “Loʻu nuu e, ia outou ō ese mai iā te ia,+ pe afai e tou te lē mananaʻo e tofusia i ana agasala, ma lē mananaʻo e aafia i ona mala.+ 5 Auā ua tele ana agasala ma ua oo atu i le lagi,+ ua manatua foʻi e le Atua ana gaoioiga lē tonu.*+ 6 Ia toe taui atu iā te ia e pei ona ia feutagaʻi ma isi,+ ioe, ia taui faalua iā te ia mo mea na ia faia;+ o le ipu+ ua ia tuuina i ai le meainu, ia faaluaina i ai le meainu mo ia.+ 7 Auā e pei ona faamamaluina e ia o ia lava ma ola i se olaga matuā mauʻoa e lē māsiasi ai, ia faapea foʻi ona faatigāina o ia ma faavauvau ai. Auā ua ia faapea ifo i lona loto, ‘Ua ou nofo o se tupu fafine, e lē o aʻu o se fafine ua oti lana tane, ma e lē taitai ona ou faavauvau.’+ 8 O le māfuaaga lea e oo mai ai ona mala i le aso e tasi, o le oti, ma le faavauvau, ma le oge, ma e susunuina uma o ia i le afi,+ auā e mamana Ieova* le Atua, o lē e faamasino iā te ia.+

9 “O tupu foʻi o le lalolagi o ē na faia amioga lē mamā taufeusuaʻiga* ma ia, ma ola faatasi ma ia i ni olaga matuā mauʻoa e lē māsiasi ai, e latou te fetagisi ma taufaitagitu‘i i le faanoanoa ona o ia, pe a latou vāai atu i le asu a o susunuina o ia. 10 Ua latou tutū mamao mai ona o lo latou fefefe i ona puapuaga ma faapea ane: ‘Oi talofa, oi talofa iā te oe le aai tele, o oe Papelonia le aai malosi,+ auā o le itula e tasi ua oo mai ai lou faasalaga!’

11 “Ua fetagisi foʻi ma faanoanoa le ʻaufaatauʻoa o le lalolagi ona o ia, auā ua leai se tasi e toe faatauina a latou oloa e matuā tele, 12 o oloa e matuā tele o auro, o siliva, o maa tāua, o penina, o ʻie lino lelei, o ʻie violē, o ʻie silika, ma ʻie mūmū sesega; ma mea uma e fai mai i laau manogi; ma so o se mea e fai mai i nifo elefane, o laau e sili ona lelei, o le ʻapamemea, o le uʻamea, ma le maamora; 13 faapea foʻi ma kinamoni, o mea manogi mai i Initia, o mea manogi e mū, o suāuu manogi, o mea manogi papaʻe e mū, o le uaina, o le suāuu olive, o le falaoamata lelei, o le saito, o povi ma mamoe, o solofanua, o taavale e toso e solofanua, o pologa, ma tagata. 14 Ioe, ua mou atu mai iā te oe fua lelei na e naunau i ai, ua mavae atu foʻi mai iā te oe mea mananaia ma mea matuā matagofie, e lē toe maua lava.

15 “O tagata faatauʻoa na faatauina atu nei mea, o ē ua mauʻoa ona o ia, e tutū mamao ese ona o lo latou fefefe i ona puapuaga, ma e fetagisi foʻi ma faavauvau, 16 ma faapea atu, ‘Oi talofa, oi talofa i le aai tele, na ofu i le ʻie lino lelei ma ofu violē ma mūmū sesega, ma na teuteuina faamatagofie i auro, ma maa tāua ma penina,+ 17 auā e tasi le itula ua faaumatia ai ana oloa e tele!’

“Ua tutū mamao ese foʻi kapeteni o vaa, ma tagata folau uma, ma ʻauvaa, ma i latou uma na faia fefaatauaʻiga i le vasa 18 ma ua latou alalaga atu ina ua latou vaaia le asu a o susunuina o ia, ua latou faapea atu: ‘O ai se aai e tusa ma lenei aai tele?’ 19 Ua latou asu aʻe le efuefu i o latou ulu ma alalaga, ma fetagisi ma faavauvau, ma faapea atu: ‘Oi talofa, oi talofa i le aai tele, lea na mauʻoa ai i latou uma na iai vaa i le sami, ona o le tele o lona tamaoaiga, auā o le itula e tasi ua faatamaʻia ai o ia!’+

20 “Le lagi e, ia fiafia ona o ia,+ faapea outou le ʻaupaia,+ ma aposetolo, ma perofeta, auā ua faailoa atu e le Atua lana faasalaga iā te ia ona o outou!”+

21 Ona sii aʻe lea e le agelu malosi o le maa e pei o se maa olo tele, ma lafo ifo i le sami, ma faapea atu: “E faapena foʻi ona vave lafotūina Papelonia le aai tele, ma e lē toe maua lava o ia.+ 22 E lē toe lagonaina foʻi iā te oe leo o tagata pepese o loo tā a latou kitara, ma tagata fai musika, ma ē e ili faaili, ma ē e ili pū. E lē toe maua foʻi iā te oe ni tufuga e faia so o se galuega, ma e lē toe lagonaina foʻi iā te oe le paʻō o se maa olo. 23 E lē toe susulu ai foʻi iā te oe le malamalama o se molī, e lē toe lagona foʻi iā te oe le leo o le alii ma le tamaʻitaʻi faaipoipo; auā o ou tagata faatauʻoa na avea ma tagata aloaʻia o le lalolagi, ma na faasesēina atunuu uma i au faiga faaagaga.+ 24 Ioe, ua maua i lenei aai le toto o le ʻauperofeta, ma le ʻaupaia,+ ma tagata uma ua fasiotia i le lalolagi.”+

19 Ua mavae lenei mea, ona ou faalogo ai lea e peiseaʻī o se leotele mai i ē e toʻatele i le lagi. Ua latou faapea mai: “Ia vivii atu iā Ioa!*+ Ua i lo tatou Atua le faaolataga, ma le mamalu, ma le mana, 2 auā e moni ma tonu ana faamasinoga.+ Talu ai ua ia faasalaina le fafine talitane sili, o lē na faaleagaina le lalolagi i ana amioga lē mamā taufeusuaʻiga,* ma ua ia taui atu i le fafine talitane le toto o ana pologa.”+ 3 I le taimi lava lenā, ua latou toe faapea mai: “Ia vivii atu iā Ioa!*+ Ona alu aʻe lea o le asu mai i le susunuina o ia e faavavau, faavavau lava.”+

4 Ona faapaʻuʻū ai lea o toeaina e toʻa 24,+ ma foafoaga agaga e toʻafā+ ma tapuaʻi atu i le Atua o loo afio i le nofoālii, ma faapea atu: “Amene! Ia vivii atu iā Ioa!”*+

5 Ua oo mai foʻi le isi leo mai i le nofoālii ma faapea mai: “Ia vivii atu i lo tatou Atua, o outou uma o ana pologa,+ o ē e matataʻu iā te ia, o ē e faatauvaa ma ē e sili.”+

6 Ona ou faalogo lea e peiseaʻī o se leo mai i ē e toʻatele, ma e pei o le leo o vai e tele, ma le leo o faititili malolosi. Ua latou faapea atu: “Ia vivii atu iā Ioa,*+ auā o Ieova* o lo tatou Atua, o Lē e ona le malosi uma lava,+ ua amata ona pule o ia o se tupu!+ 7 Inā tatou fiafia ia ma matuā olioli, ma ia faamamaluina o ia, auā ua oo mai le aso o le faaipoipoga a le Tamaʻi Mamoe, ma ua saunia foʻi e le tamaʻitaʻi o ia lava mo le faaipoipoga. 8 Ioe, ua tuuina atu iā te ia ina ia ofu i le ʻie lino sesega, e mamā ma lelei, auā o le ʻie lino lelei e faasino atu i galuega amiotonu a le ʻaupaia.”+

9 Ua faapea mai foʻi le agelu iā te aʻu, “Ia e tusi: E fiafia i latou o ē ua valaaulia i le tausamaaga afiafi o le faaipoipoga a le Tamaʻi Mamoe.”+ Ua ia toe faapea mai foʻi: “O afioga moni ia a le Atua.” 10 Ona ou faapaʻū lea i ona luma e tapuaʻi atu iā te ia. Ae ua fai mai o ia iā te aʻu: “Ia e faaeteete! Aua neʻi e faia lenā mea!+ Ua na o aʻu o se uso a pologa, e pei o oe ma ou uso o loo iai le galuega o le molimau atu e faatatau iā Iesu.+ Ia tapuaʻi i le Atua!+ Auā o le autū o valoaga, o le molimau atu lea e faatatau iā Iesu.”+

11 Ona ou iloa lea o le lagi ua avanoa, faauta foʻi! o se solofanua paʻepaʻe.+ O lē o loo tiʻetiʻe ai ua faaigoa o ia o Faamaoni+ ma Moni,+ ma e na te faamasino ma tau ai le taua i le amiotonu.+ 12 O ona fofoga ua mumū e pei o le afi,+ ma ua i lona ao palealii e tele. Ua iā te ia le suafa ua tusia, lea e leai se tasi e na te iloaina seʻi vaganā ai o ia, 13 ua ofu o ia i le ofu tele ua pisipisia* i le toto, ma ua faaigoa o ia o Le Upu+ a le Atua. 14 Ua mulimuli atu foʻi ʻautau o le lagi iā te ia i solofanua papaʻe, ma ua latou oofu i ʻie lino papaʻe, e mamā ma lelei. 15 Ua ia taia foʻi atunuu i le pelu maʻai umī ua sau mai i lona fofoga,+ ma e pule* foʻi o ia iā i latou i le tootoo uʻamea.+ E na te solia foʻi le soligavine o le toʻasā matuā mamafa o le Atua, o Lē e ona le malosi uma lava.+ 16 Ua tusia foʻi i lona ofu tele, ioe, i luga o lona ogāvae le igoa, o le Tupu o tupu ma le Alii o alii.+

17 Ua ou vaaia foʻi se agelu o loo tū i le lā, ma ua alaga atu o ia ma le leotele ma faapea atu i manu uma o loo felelei i le taulotoaʻiga o le lagi: “Inā ō mai ia, ia faapotopoto faatasi mai i le faigaʻai tele i le afiafi a le Atua,+ 18 ina ia outou aai ai i tino o tupu, ma tino o taʻitaʻiʻau, ma tino o tagata malolosi,+ ma tino o solofanua ma i latou o tiʻetiʻe ai,+ ma isi tino uma, ma tino o tagata saʻoloto, faapea foʻi ma pologa, ma ē e faatauvaa, ma ē e sili.”

19 Ona ou iloa lea o le manufeʻai ma tupu o le lalolagi ma a latou ʻautau, ua faapotopoto e siitaua atu i lē o loo tiʻetiʻe i le solofanua ma lana ʻautau.+ 20 Ona puʻeina lea o le manufeʻai, faatasi ai ma le perofeta pepelo+ na faia faailoga i ona luma, ia na faasesēina ai i latou na maua le faailoga o le manufeʻai,+ ma ē na tapuaʻi atu i lona faatusa.+ Na lafoolaina i laʻua uma i le lepa afi o loo mumū i le teiō.*+ 21 Ae ua fasiotia o ē ua totoe i le pelu umī lea e sau mai i le fofoga o lē o loo tiʻetiʻe i le solofanua.+ Ua maoona foʻi manulele uma i o latou tino.+

20 Ona ou iloa lea o se agelu ua sau mai i le lagi ma le ki o le tō,+ ua i lona lima foʻi se filifili uʻamea tele. 2 Ua ia puʻeina le tarako,+ o le uluaʻi gata lea,+ o le Tiapolo+ ma Satani,+ ma saisai o ia mo le 1,000 tausaga. 3 Ua ia lafo o ia i le tō+ ma tapunia, ma faamauina, ina ia lē faasesēina e ia o atunuu seʻia uma tausaga e 1,000. Pe a māeʻa lenei mea, ona toe tatalaina lea o ia mo sina taimi.+

4 Na ou iloa foʻi nofoālii ma i latou o loo tiʻetiʻe ai, ua tuuina atu iā i latou le pule e faamasino ai. Ioe, ua ou iloa foʻi i latou na fasiotia* ona o la latou molimau e faatatau iā Iesu ma le tautatala atu e uiga i le Atua, ma i latou e leʻi tapuaʻi atu i le manufeʻai po o lona faatusa, e latou te leʻi maua foʻi le faailoga i o latou muāulu ma o latou lima.+ Ua oo ina ola i latou ma pule o ni tupu faatasi ma Keriso+ mo le 1,000 tausaga. 5 (A o ē e totoe o ē ua oti,+ e leʻi ola i latou seʻia mavae tausaga e 1,000.) O le uluaʻi toetū lea.+ 6 E fiafia ma paia so o se tasi e iai i le uluaʻi toetū;+ e leai se pule+ a le oti faalua+ iā i latou nei, ae e fai i latou ma ositaulaga+ a le Atua ma le Keriso, e pule foʻi i latou o ni tupu faatasi ma ia mo le 1,000 tausaga.+

7 Pe a mavae tausaga e 1,000, ona tatalaina mai loa lea o Satani mai i lona falepuipui, 8 ona alu atu lea o ia ma faasesē i atunuu i itu e fā o le lalolagi, o Koku ma Makoku, ina ia faapotopoto iā i latou i le taua. O lo latou faitau aofaʻi e pei o le oneone o le sami. 9 Ua latou agaʻi atu i le lalolagi uma ma siʻosiʻomia le togālauapi a le ʻaupaia, ma le aai pele. Ae ua sau le afi mai i le lagi ma faaumatia ai i latou.+ 10 Ua lafo foʻi le Tiapolo o lē na faasesē iā i latou i le lepa afi ma le teiō,* o le mea lenā o loo iai le manufeʻai+ ma le perofeta pepelo;+ ma e faapuapuagatia* ai i latou i le ao ma le pō e faavavau, faavavau lava.

11 Ua ou iloa foʻi se nofoālii tele paʻepaʻe ma Lē o loo afio ai.+ Ua sosola ese mai i ona luma o le lalolagi ma le lagi,+ ma ua lē toe maua se mea e nonofo ai. 12 Ona ou iloa lea o ē na oti, o ē e sili ma ē e faatauvaa, o loo tutū i luma o le nofoālii, ona tatala lea o tusi tāʻai. Ae ua tatala foʻi se isi tusi tāʻai; o le tusi tāʻai lea o le ola.+ Ona faamasinoina lea o ē ua oti i mea na tusia i tusi tāʻai, e tusa ma a latou galuega.+ 13 Ua ave aʻe e le sami i latou na oti o iai, ua ave aʻe foʻi e le oti ma le Tuugamau* i latou na oti o iai, ma ua faamasinoina i latou taʻitoʻatasi e tusa ma a latou galuega.+ 14 Ona lafo ai lea o le oti ma le Tuugamau* i le lepa afi.+ O le uiga o le lepa afi,+ o le oti faalua lea.+ 15 E lē gata i lea, o so o se tasi ua iloa e leʻi tusia i le tusi o le ola,+ e lafoina i le lepa afi.+

21 Ona ou iloa lea o le lagi fou ma le lalolagi fou;+ auā ua mavae atu le uluaʻi lagi ma le uluaʻi lalolagi,+ ua lē toe iai foʻi se sami.+ 2 Ua ou iloa foʻi le aai paia o Ierusalema Fou, ua alu ifo mai i le lagi mai i le Atua,+ ma ua saunia e faapei o se tamaʻitaʻi faaipoipo ua teuteuina mo lana tane.+ 3 Ona ou faalogo lea i le leotele mai i le nofoālii e faapea: “Faauta! Ua iai i tagata le faleʻie o le Atua, e mau o ia ma i latou, e fai foʻi i latou ma ona tagata. E faatasi foʻi le Atua ma i latou.+ 4 E na te soloiesea foʻi loimata uma i o latou mata,+ e lē toe iai se oti,+ po o se faanoanoa, po o se tagiauē, e lē toe iai foʻi se tigā.+ Auā ua mavae atu mea muamua.”

5 Ona fetalai mai lea o Lē o loo afio i le nofoālii:+ “Faauta! Ou te faia ia fou mea uma lava.”+ Ua ia toe fetalai mai foʻi: “Ia tusi, auā o upu nei e faamaoni* ma moni.” 6 Ua fetalai mai foʻi o ia iā te aʻu: “Ua taunuu! O aʻu o le Alefa ma le Omeka,* o le amataga ma le gataaga.+ O so o se tasi e fia inu, ou te avatu fua i ai vai mai i le puna o le vai ola.+ 7 O lē e manumalo e fai ma ona tofi nei mea, ma e avea aʻu ma ona Atua, e fai foʻi o ia ma oʻu atalii. 8 A o ē e palaaai, ma ē e lē faatuatua,+ ma ē e faia mea matagā e inosia, ma ē e fasioti tagata,+ ma ē e faia amioga lē mamā taufeusuaʻiga,*+ ma ē e faia faiga faaagaga, ma ē e ifo i tupua, ma ē uma e tala pepelo,+ o lo latou iʻuga o le lepa afi o loo mumū i le teiō.*+ O lona uiga, o le oti faalua lea.”+

9 Ona sau lea o le tasi o agelu e toʻafitu na iai ipu e fitu, na tumu i mala mulimuli e fitu,+ ua ia faapea mai iā te aʻu: “Sau ia, ou te faaali atu iā te oe le tamaʻitaʻi faaipoipo, o le faletua lea o le Tamaʻi Mamoe.”+ 10 Ona ia ave lea o aʻu i le mana o le agaga i luga o se mauga telē e maualuga, ma faaali mai iā te aʻu le aai paia o Ierusalema, ua alu ifo mai i le lagi mai i le Atua,+ 11 ma ua iai le mamalu o le Atua.+ O lona pupula ua pei o se maa e sili ona tāua, ua iila ma matuā manino e pei o le maa iasepi.+ 12 Ua iai se pā telē ma maualuga ma e iai faitotoʻa e 12, e toʻa 12 foʻi agelu o loo i faitotoʻa, ma o loo tusia i faitotoʻa igoa o ituaiga e 12 o le fanauga a Isaraelu. 13 Ua iai faitotoʻa e tolu i le itu i sasaʻe, ma faitotoʻa e tolu i le itu i mātū, e iai foʻi faitotoʻa e tolu i le itu i saute, ma faitotoʻa e tolu i le itu i sisifo.+ 14 Ua iai foʻi i le pā o le aai o maa faavae e 12, ua tusia ai igoa e 12 o aposetolo e toʻa 12+ o le Tamaʻi Mamoe.

15 O lē o loo tautala mai iā te aʻu, ua ia uuina se ū auro, o le fua lea e na te fuaina ai le aai, ma ona faitotoʻa, ma ona pā.+ 16 Ua taatia faatafafā le aai, e tutusa lona umi ma lona lautele. Ua ia fuaina foʻi le aai i le ū, e 12,000 setatio;* e tutusa lelei lona umi, ma lona lautele, ma lona maualuga. 17 Ua ia fuaina foʻi le pā, e 144 kupita* e tusa ma le fua a le tagata, o le fua foʻi lea a le agelu. 18 Ua fausia ona pā i maa iasepi,+ ma ua fausia le aai i auro māoʻi e pei o le tioata manino. 19 Ua teuteuina foʻi faavae o le pā o le aai i ituaiga uma o maa tāua* eseese: o le faavae muamua o le iasepi, o lona lua o le safaira, o lona tolu o le kakito, o lona fā o le samaraki, 20 o lona lima o le saritonu, o lona ono o le salikea, o lona fitu o le tasesa, o lona valu o le soama, o lona iva o le topasi, o lona sefulu o le kuasopera, o lona sefulu tasi o le uakini, ma o lona sefulu lua o le aselama. 21 O faitotoʻa foʻi e 12 o ni penina e 12; o faitotoʻa taʻitasi ua fai mai i penina taʻitasi. O le ala tele o le aai o le auro māoʻi lea, e manino e pei o se tioata.

22 Ou te leʻi vaaia ai foʻi se malumalu, auā o Ieova* le Atua o Lē e ona le malosi uma lava,+ o lona malumalu lea, faapea foʻi ma le Tamaʻi Mamoe. 23 E lē manaʻomia ona susulu i le aai le lā po o le masina, auā ua faamalamalamaina i le mamalu o le Atua,+ ma o lona molī o le Tamaʻi Mamoe lea.+ 24 E savavali foʻi atunuu i lona malamalama,+ ma e tuuina atu i ai e tupu o le lalolagi o latou mamalu. 25 E lē tapunia lava ona faitotoʻa i le ao atoa, auā e lē oo se pō i lea mea.+ 26 E latou te tuuina atu i ai le mamalu ma le viiga o atunuu.+ 27 Peitaʻi, e lē ulu lava i ai se mea leaga, po o se tasi e faia se mea matagā, po o se mea taufaasesē;+ e na o ē ua tusia i le tusi tāʻai o le ola a le Tamaʻi Mamoe o le a ulu atu i ai.+

22 Ua ia faaali mai foʻi iā te aʻu se vaitafe o le vai o le ola,+ e manino e pei o se tioata, o loo tafe mai i le nofoālii o le Atua ma le Tamaʻi Mamoe+ 2 i le ogatotonu o lona ala tele. Ua iai i itu taʻitasi o le vaitafe laau o le ola o loo fua mai i fuata e taʻi 12, ma e fua mai ai ni fua i masina taʻitasi. O lau foʻi o laau e faamālōlōina ai atunuu.+

3 E lē toe iai foʻi se malaia. Ae e iai i le aai le nofoālii o le Atua ma le Tamaʻi Mamoe,+ ma e tuuina atu foʻi e ana pologa le auaunaga paia iā te ia; 4 e latou te vāai atu foʻi i ona fofoga,+ ma e i o latou muāulu foʻi lona suafa.+ 5 E lē toe iai foʻi se pō,+ ma e latou te lē manaʻomia se molī e faamalamalama ai po o le susulu o le lā, auā e faamalamalamaina i latou e Ieova* le Atua,+ o le a pule foʻi i latou o ni tupu e faavavau, faavavau lava.+

6 Ona fai mai lea o ia iā te aʻu: “O upu nei e faamaoni* ma moni;+ ioe, o Ieova* le Atua o lē na faagaeeina ana perofeta,+ na ia auina mai lana agelu ina ia faaali mai i ana pologa o mea ua toeitiiti tutupu. 7 Faauta! Ou te vave alu atu.+ E fiafia lē e tausi i upu o le valoaga o loo i lenei tusi tāʻai.”+

8 O aʻu o Ioane o lē na faalogo ma vaai i nei mea. Ina ua ou faalogo ma vaai i ai, ona ou faapaʻū ai lea i vae o le agelu e tapuaʻi iā te ia, o lē na faailoa mai iā te aʻu nei mea. 9 Ae ua ia fai mai iā te aʻu: “Ia e faaeteete! Aua e te faia lenā mea! Ua na o aʻu o sou uso a pologa, ma o se tasi o ou uso a perofeta, o se tasi foʻi o i latou o ē e tausi i upu o lenei tusi tāʻai. Ia tapuaʻi i le Atua.”+

10 Ua ia faapea mai foʻi iā te aʻu: “Aua neʻi faamaufaailogaina upu o le valoaga o loo i lenei tusi tāʻai, auā ua latalata le taimi atofaina. 11 O lē e amiolētonu ia amiolētonu pea o ia; o lē e amio palapalā, ia faia pea e ia o mea palapalā; a o lē e amiotonu ia amiotonu pea o ia, ma o lē e paia ia paia pea o ia.

12 “‘Faauta! E vave ona ou alu atu, ua iā te aʻu foʻi le taui, e taui atu ai i tagata taʻitoʻatasi e tusa ma ana galuega.+ 13 O aʻu o le Alefa ma le Omeka,*+ o lē e muamua ma lē e mulimuli, o le amataga ma le gataaga. 14 E fiafia i latou ua tatā o latou ofu talaloa,+ ina ia faatagaina ai i latou e aai i fua o laau o le ola,+ ma ia mafai ai foʻi ona latou ulu atu i le aai i ona faitotoʻa.+ 15 O fafo o le aai, o loo iai taʻifau,* ma ē e faia faiga faaagaga, ma ē e faia amioga lē mamā taufeusuaʻiga,* ma ē e fasioti tagata, ma ē e ifo i tupua, ma ē e fiafia i le pepelo ma faia pea tala pepelo.’+

16 “‘O aʻu o Iesu, na ou auina atu laʻu agelu e molimau iā te outou i nei mea ina ia aogā i faapotopotoga. O aʻu o le aa ma le fanau a Tavita,+ ma le fetu ao pupula.’”+

17 Ua fai mai pea le agaga ma le tamaʻitaʻi faaipoipo,+ “Inā sau ia!” ma ia fai atu foʻi so o se tasi e faalogo, “Inā sau ia!” ia sau foʻi so o se tasi e fia inu;+ ma o so o se tasi e manaʻo i ai, ia ave fua le vai o le ola.+

18 “Ua ou molimau atu i tagata uma e faalogo i upu o le valoaga o loo i lenei tusi tāʻai: Afai e faaopoopo e se tasi ni upu i nei mea,+ e faaopoopoina foʻi e le Atua iā te ia o mala ua tusia i lenei tusi tāʻai;+ 19 ma afai e aveesea e se tasi se upu mai i upu o le tusi tāʻai o lenei valoaga, e aveesea foʻi e le Atua lona tofi mai i laau o le ola+ ma le aai paia,+ o mea ia ua tusia i lenei tusi tāʻai.

20 “Ua faapea mai foʻi lē e molimau i nei mea, ‘Ioe, ou te vave alu atu.’”+

“Amene! Inā maliu mai ia le Alii e, Iesu.”

21 Tau ina ia iai i le ʻaupaia le agalelei faifua o le Alii o Iesu.