Hula—Le Siva a Hawaii

TUSIA E LE SUI O LE ALA MAI! I HAWAII

E TAʻUA loa Hawaii, e vave lava ona oso ane i manatu le hula. E ui lava o le hula e tele sona fesootaiga ma Hawaii, ae o lona amataga e mai le Pasefika i Saute.

I aso anamua sa leai se gagana tusitusia a tagata Hawaii, o lea sa faaaogā ai pese ma solo e lagi faapese e faamatala atu ai la latou talafaasolopito ma aganuu. O fegaoioiaiga o suilapalapa, o lima, ma vae, faatasi ai ma foliga faaalia o le hula, ua ō faatasi ma nei solo e lagi faapese ma pese.

E leai ni faamaumauga e faamaonia ai le iai o le hula i luma atu o le 1778, ina ua taunuu Captain Cook ma lana aumalaga. O le siva lea ua lauiloa i aso nei, ua tele lava ina faia aʻe i gaoioiga, i pesepesega, ma solo e lagi faapese o le faaiuga o le senituri lona 19.

Atonu o hula sa iai muamua na avea ma vaega o sauniga faapitoa faaletapuaiga. Ae ui i lea, sa lei faapea ai o hula uma na avea ma gaoioiga o se tapuaiga po o se vaega o sauniga faalelotu.

Faasasaaga Mai Misionare

Na avea le hula ma faafiafiaga na faia mo tagata suesue femalagaai ma seila, i luga o vaa asiasi i le senituri lona 18 ma le 19. E masalomia na totogia e nei tagata matamata le hula e faaalialia ai faiga faaleituaiga.

Ina ua toʻai taunuu misionare i le 1820, na ia i latou mafuaaga malolosi e taʻusalaina ai le hula. Ina ua latou maua le faatagaga mai taʻitaʻi, na upuia loa e misionare le hula o se faiga faapaupau, e inosia ma o galuega a le Tiapolo. I luma atu o lena taimi, i le 1819, na suia ai e le tupu tamaitai o Kaahumanu, o le faletua o le tupu o Kamehameha I ua maliu, ia tu faaletapuaiga anamua. Na aofia ai le olopalaina i lalo o tupua ma le aveesea o faiga faaletapuaiga fenuminumiai. Na mou atu ai iina e faavavau le anoanoai o siva ma solo na lagi faapese.

Na talia ia Kaahumanu i le lotu i le 1825. I le 1830 na ia faasalalau ai le faasaina faaletulafono o le toe faia o le hula i nofoaga faitele. Ina ua mavae lona maliu i le 1832, na lē amanaiaina ai e nisi o taʻitaʻi lenei faasaaga faaletulafono. I le lua tausaga, lea na lē amanaiaina ai faasasaaga tauamio e le tupu talavou o Kamehameha III ma ana aumea, na amata toe lauiloa ai foi le hula. Ae i le 1835 na ioe ai le tupu i le sese o ona ala, ma toe foi atu ai le malo i le pulega a ē lagolagoina aʻoaʻoga a Kalavini.

Toe Olaola le Hula

A o faagasolo le nofoaiga a le tupu o Kalakaua (1874-1891), na lauiloa ai le toe olaola ma le talia atoatoa o faafiafiaga o le hula i nofoaga faitele. I lona faapaleina e avea ma tupu i le 1883, na faaaluina ai ma le fiafia e tagata ni nai masina e aʻoina ai solo e lagi faapese ma hula, na tusia faapitoa lava nisi ona o lena aso tele. E oo atu i le taimi na maliu ai i le 1891, ua iai ni suiga se tele i le hula i le auala e laalaa ai ma gaoioiga o le tino, ma sa faaaogā ai foi ma meafai faaili e pei o le ukulele, le kitara, ma le vaiolini.

Ina ua mavae le iuga o le nofoaiga tautupu i le 1893, na toe mou atu ai foi le hula. Ae peitai, e oo ifo i le ogatotonu o le senituri lona 20, ua toe olaola aʻe foi. Ina ia matagofie ma ia iai se vaaiga e ese mo le aumaimoa, na faia ai ni suiga fou se tele. Talu ai ona o le toatele sa lē malamalama i le gagana a Hawaii, o lea sa faaaogā ai upu faa-Peretania. Ua mātele atu le hula faaonaponei i le siva lava ia—o gaoioiga o lima ma vae, o le felueaiga o suilapalapa, atoa ai ma foliga faaalia.

A o faateleina pea le aofai o tagata asiasi ane i le motu, o le tele foi lena ina lauiloa o le hula. O tagata faimalaga mai Amerika na latou toe foi atu ma le siva lea na latou aʻoina ma amata loa ona faaalia i ata tifaga i Holywood na faaaogā ai tagata siva e lē o ni Hawaii. E oo lava i ata komi na siva ai Minnie Mouse i le hula mo Mickey, a o taina lana kitara, i le tausaga e 1935.

Le Hula i Aso Nei

I vaitaimi o le “Faaolaolaina o Siva ma Pese Faaanamua a Tagata Hawaii” i vaitausaga o le 1970, na faafouina ai e le poto o tagata na fatua solo e lagi faapese, tagata siva, ma tagata aʻo siva le faavae mo faiga tuai o le hula. I aso nei ua iai faiaʻoga o le hula ua latou toe faaolaolaina siva tuai ma i latou ua amataina siva fou. I na tulaga uma, na iu ai a latou taumafaiga i ni siva matagofie ma latou faaaliga ofoofogia.

O se tosinaga faaleagaga i va o atua a tagata Hawaii o loo faaauau mai pea ana faiga i le taimi nei. O tausaga uma lava a o lei amataina le aso Fiafia o le Nofoaiga a Merrie e faia i Hilo i Hawaii, e malaga atu ai ni vaega o tagata hula tuutoina i le gutu o le mauga mu o le atua fafine o Pele, po o nofoaga o fou ai le tafe o le lava. O iina e usu ai a latou solo e lagi faapese, e sisiva ma faia ai taulaga i fugalaau, o vine, ma le ʻava malosi, ma tagisia atu lana faamanuiaga i a latou taumafaiga mo le tauvaga. O vaega mai le lalolagi atoa e tauva mo po e tolu i lenei tauvaga, ua vaai i ai o le Olimepeka o le hula.

Ua avea le hula o se vaega tele o aganuu toe atiaʻe i Hawaii. Ua aofia ai siva e faia ma le paū lea na faia faatasi ma solo e lagi faapese ma tapuaiga mamalu i atua ma atua fafine, faapea foi ma faaaliga faigofie o le auala o loo ola ai i aso faisoo i le motu sa leai sona uiga faaletapuaiga.

E tatau i Kerisiano ona filifili lelei siva po o ituaiga o hula latou te matamata i ai. E manaomia ona latou matuā mautinoa latou te lē o avatua le faaaloalo ma le leiloa i se atua po o se atua fafine. E manaomia foi le faaeteete pe a faalogologo atu i pesepesega po o solo e lagi faapese. O le tele lava o nei pese e aofia ai upu lilo pe uiga lua foi. Afai tatou te manatuaina nei mea, o le a mafai la ona fiafia se tagata matamata pe siva foi i le hula, o se ituaiga o faafiafiaga e mamā.