Kirisimasi—O Lona Amataga
TUSIA E LE SUI O LE ALA MAI! I ITALIA
A O TOE tolu aso oo atu i le Kirisimasi o le 1993, sa faailoa atu ai e Pope Ioane Paulo II e faapea o le faamanatuina o le Kirisimasi e lē o faavaea mai i le Tusi Paia. E tusa ai ma le aso 25 o Tesema, sa talia e le Pope le mea moni e faapea: “O lena aso i tagata faapaupau anamua, sa latou faamanatu ai le aso fanau o le ‘La e Lē Faatoilaloina’ ina ia faafetaui atu i le taimi e amata ai le tau mālūlū i le itu i mātū o le lalolagi.” Na faapefea la, ona amata mai le Kirisimasi? Sa faaauau ona faapea mai le Pope: “E foliga mai sa o se mea e talafeagai ma masani ai Kerisiano le suia o lena faamanatuga i le faamanatuina o le La moni e toatasi, o Iesu Keriso.”
“I nisi faaupuga,” e pei ona tusia e le tusitala o Nello Ajello i le La Repubblica, “sa iai se tasi na ia faalauiloa sese le aso na fanau mai ai Iesu e faavae i ona lava mafaufauga, ma manatu sa ia fafau aʻe.” O anafea na tupu mai ai lenei faamatalaga sese? O se tusitusiga na tatalaina mai i le Vatikana sa faalauiloa mai e faapea: “O le faamanatuga o le Kirisimasi na aliali mai mo le taimi muamua lava i le 354 [T.A.].”
Ae faapefea Ianuari 6, o le Epifania lea e faamanatu ai le ō atu o Makoi e asiasi i le pepe fou o Iesu? Sa faaauau le tusitusiga na tatalaina: “E tele mea tutupu ua taʻitaʻiina atu ai i tatou e talitonu faapea o le filifilia o Ianuari 6, e pei foi o Tesema 25 o le aso mālōlō o tagata Roma e faamanatuina ai le fanau mai o Iesu, sa iai foi ona aafiaga i le faamanatuga faaletausaga e faapaupau. I Alexandria, o le mea moni, o le po i le va o Ianuari 5 ma le 6, sa masani ona faamanatu ai e tagata faapaupau le aso fanau o le atua o Aeon (atua o taimi ma le vavau). . . . E foliga mai sa manao le Lotu e faa-Kerisianoina lenei faamanatuga.”
Sa lei faatagaina e Iesu ona soo e tuufaatasia le tapuaiga moni ma aganuu faapaupau. Nai lo lena, sa ia faatonuina i latou ia aʻoaʻo atu “i mea uma ua ou fai atu ai ia te outou.” (Mataio 28:19, 20) E lē gata i lea, ina ua fesagai ma taʻitaʻi lotu tetee i ona aso, sa fesili atu Iesu ia te i latou: “Se a le mea ua soli ai e outou foi le poloaiga a le Atua i a outou uputuu?” (Mataio 15:3) O lena lava foi fesili e tasi atonu e mafai foi ona fai atu ia i latou o faapea mai o Kerisiano o ē o loo faaauau pea ona faia aganuu faapaupau i aso nei.