O Ai e Ao Ona Filifilia le Aofai o le Fanau?

TUSIA E LE SUI O LE ALA MAI! I PASILI

E NA o le tolu aso le matua o se pepe tama sa i totonu o se pepa iila na lafoai i se nofoaga e faatali ai nofoaafi. Peitai na taʻua e se nusipepa i Pasili e toatele aiga na latou ofo atu e fia tausia le pepe.

E ui e lē o se mea e masani ai lena na tupu, ae o le aofai o tamaiti na fananau mai e lē manaomia ma tamaiti ua lafoaia i le lalolagi aoao ua faatupulaia. O le tele o taimi ua tau lē maua ni mātua e taunapa i tamaiti. Pe o le taofiofia ea o le maʻito o le vaifofo lea? Pe sese ea le fuafua o le toatele o le fanau a se tasi?

I se faamatalaga a le Faalapotopotoga a le Soifua Maloloina i le Lalolagi, pe tusa o le 50 pasene o maʻito i le lalolagi aoao e lei fuafuaina. O le tele o taimi o se maʻito ua lē gata ina lē fuafuaina ae lē manaomia foi.

O le toatele ua latou taumafai e alofia le maʻito, atonu ona o le soifua maloloina, o mea e nonofo ai, po o faafitauli tau galuega. O lea, o auala e puipuia ai le maʻito, e pei o fualaau po o paʻu āfei (condoms), o se faiga ua masani ai. Ua faaaogā foi le faapaʻū tama ma isi togafitiga e taofiofia ai le toe fananau. E tusa ai ma le faapaʻū tama i Pasili, sa lipotia mai faapea e le nusipepa o le O Estadoe de S. Paulo: “O le fuafaatatau faaletausaga a le Faalapotopotoga o le Soifua Maloloina o le Lalolagi, o le 5 miliona mai le 13 miliona o fafine totō i Pasili e faapaʻū faalilolilo o latou maʻito.” E faapena foi le lipoti a le mekasini o le Time e faapea o le 71 pasene o fafine Pasili ua iai i o latou tausaga e fananau ai o loo nonofo ma se paaga, o loo faia se aiga fuafuaina. Ia i latou nei, e 41 pasene e faaaogā fualaau mo le puleaina o le fananau ma e 44 pasene ua faia ni faiga e taofia ai le toe fananau.

Ua faaalia e suesuega e 75 pasene tagata Pasili ua manatu e talafeagai le fuafuaina o le toatele o le fanau. E tetee nisi i le fai o aiga fuafuaina ona o le talitonuga i iuga tuupoina, pe manatu o le finagalo o le Atua e ao i se aiga ona faia ‘le tele o fanau e mafaia ua aumai e le Atua.’ O ai na te filifilia le toatele o le fanau—o le ulugalii po o le malo po o le manaoga o le lotu?

Puleaina o le Fananau—Aisea ua Avea ai ma Feteenaiga?

E ui ina taliaina le auala e fuafua lelei ai, (rhythm method) ae o le Lotu Katoliko Roma, le tapuaiga pito sili ona telē i Pasili, e matuā tetee i le faaaogaina o faiga e taofia ai le fananau, pe i le faapaʻū tama pe leai. Ua faapea mai Pope Paulo VI: “E so o se feusuaiga lava e tatau ona avea ma auala i le mauaina o le ola.” Sa taʻua e Pope Ioane Paulo II: “O faiga e puipuia ai le fananau pe a vaai i ai i se tulaga e lē faaituʻau, e matuā lē faaletulafono ma e lē tāitai ona saʻo po o le ā lava le pogai.” O le iuga, ua toatele tagata Katoliko ua faatalatū e pulea le toatele o a latou fanau, ma ua manatu i le taofiofia o le fananau mai o pepe o se agasala.

I le isi itu, ua faalauiloa mai e le tusi faafomaʻi o le Lancet: “E faitau miliona o loo ola e lei aʻoʻoga, e lē faigaluega, leaga fale e nonofo ai ma leai se avanoa e maua ai tulaga faigofie o le soifua maloloina, le auaunaga mo le soifuaga sololelei ma le tumamā, ma o le lē taofiofia o le toatele o tagata e fananau mai, o se pogai autū ua māfua ai ia tulaga.” O lea, o le mataʻu i le faatoateleina o le aofaiga o tagata ma le mativa, o nisi o malo ua latou uunaia le faia o aiga fuafuaina, e ui i teteega mai le lotu. O se faataitaiga, ua faapea mai Paul Ehrlich o se tagata faapitoa e suesueina le ola: “I Costa Rica ua latou faaitiitia le aofai o tamaiti i se aiga i se fuafaatatau mai le toafitu i le toatolu.”

Ua taʻua e le lomiga a le Iunaite Setete, Facts for Life—A Communication Challenge: “Pe a maua e se tinā se fanau e toafā, o isi maʻito e mulimuli mai o le a aumaia ai ni lamatiaga i le ola ma le soifua maloloina o le tinā ma le tamaitiiti. Ae maise pe afai o fanauga muamua atu sa lē silia ma le lua tausaga le va o tamaiti, e ono vaivai le tino o se tinā i le maʻito faalausosoo, le fanauina o tamaiti, le faasusuina, ma le vaaia o le fanau laiti.”

O aiga toatele o loo taatele pea i mea o loo tele ina maualuga ai le numera o tamaiti feoti, ae maise i tua i Aferika, Asia, ma Amerika Latina. Aisea? O le toatele e lē masani ma faiga e puipuia ai le fanautama. O se tasi o mafuaaga i nisi o atunuu atonu e pei ona taʻua e se tasi o le ʻau faitulafono, “e manatu le tane o ia moni o se tane pe afai e maʻito lana avā i tausaga uma.” Ua faamatalaina e le Jornal da Tarde atonu o se tasi mafuaaga, ae maise lava o se manatu faatinā e faapea: “O le fanau, o se tasi lea o puna latou te lē laumaua mo le fiafia, ma e aumaia ai se lagona o le faataunuuina totino o se mea.” Sa taʻua foi faapena e Paulo Nogueira Neto, o se failautusi muamua mo le siosiomaga i Pasili: “O tagata matitiva e faalagolago atu i a latou fanau e lagolagoina i latou pe a matutua.”

Le Mea o Loo Fai Mai ai le Tusi Paia

Pe na e silafia ea ua tuu atu e le Afioga a le Atua, le Tusi Paia, i le tane ma le avā e la te filifilia le aofaiga o le la fanau? Ua ia faaalia foi o le faaipoipo o se mea e talafeagai, pe mo le aumaia ai o ni fanau po o le faaalia ai o le alofa e ala i fesootaiga faaleituaiga vavalalata faamamaluina.—1 Korinito 7:3-5; Eperu 13:4.

Peitai pe e lei fetalai ea le Atua ia Atamu ma Eva i le Parataiso “ia fanafanau ia, ma ia uluola, ma ia tumu ai le lalolagi”? (Kenese 1:28) Ioe, ae leai se mea i le Tusi Paia o faaalia ai faapea o loo tatou iai pea i lena faatonuga i aso nei. Sa faamatilatila mai e le tusitala o Ricardo Lezcano e faapea: “E foliga mai i se isi itu e feteenai le faatatauina o lena faamatalaga ‘ia fanafanau ma ia uluola’ i le [faitau piliona] o tagata, lea sa faatatau atu na o tagata lava e toalua sa ʻaināina le lalolagi.” E tusa pe o le faaiuga o le lē faia lea o ni fanau, o le filifiliga totino lea e ao ona faaaloalogia.

O le mea e fiafia ai, na mātauina e le New Catholic Encyclopedia e faapea, o le vaaiga a Molimau a Ieova e faavae i le Tusi Paia. Ua taʻua e faapea: “Seʻi vaganā ai lava le puleaina o le fananau, lea e latou te tuu atu i le filifiliga a le ulugalii lava laua, ae o o latou tulaga faaleulugalii ma le mamā faaleituaiga ua fai lava si o latou maumaututū.” Ua ia faaopoopo mai: “E latou te faasino atu i le Tusi Paia e na o le pau lea o le puna o lo latou talitonuga ma le pule tau amio.”

Pe e tatau ea auala uma mo le faatapulaaina o le aofaiga o fanau? E leai. Talu ai o le ola e paia, o le Tulafono la a le Atua na tuuina atu ia Isaraelu na faamalosia ai e faapea, o se tasi e māfua ai se maʻi fafano e ao ona faia e pei o sē e fasioti tagata. (Esoto 20:13; 21:22, 23) I tulaga o le taofia o le fanautama, e pei o le taotoina o tane e taofia ai le fanautama (vasectomy), o le filifiliga e mo le tagata lava ia ma lona loto fuatia ifo, talu ai e lē o taʻu maia i le Tusi Paia. “Auā e taitasi ma ave i lana lava avega.” (Kalatia 6:5.)a Ma ona o loo iai le tele o auala mo le puleaina o le fanautama, o taʻiala faafomaʻi e mafai ai e se ulugalii ona filifili pe la te mananao e faia se tasi o na mea pe leai.

Faia Filifiliga e Mafai Ona E Ola e Tusa Ai

E lē o mea uma o le olaga e mafai ona fuafuaina. Ae pe e te faatauina ea se taavale po o se fale e aunoa ma le mafaufau lelei i mea e aafia ai? O se taavale po o se fale e mafai ona toe faatau atu, ae o fanau e lē mafai ona toe faafoia. Pe a fuafuaina se maʻito, pe lē tatau ea i le tane ma le avā ona iloilo totoʻa pe la te mafai ona tausia o latou manaoga o le olaga?

E mautinoa tatou te lē mananao e tausia o tatou aiga i meaʻai lē paleni, po o le avea foi o i tatou ma avega mamafa i isi. (1 Timoteo 5:8) I le taimi lava e tasi, e lē gata i meaʻai ma mea e nonofo ai, ae manaomia foi e tamaiti aʻoaʻoga, tulaga mamā tau amio, ma le alofa.

E lē gata i le faavasegaina po o le ā e manaomia i tulaga tau galuega, tupe, ma le onosai, e tatau foi ona mafaufauina le soifua maloloina lelei o le avā. O le lelei ona fuafua o taimi e maʻito ai e faasaoina ai le ola ae maise e faaleleia atili ai le soifua maloloina. Ua faapea mai le Facts for Life: “O se tasi o auala e sili ona lelei e faaitiitia ai lamatiaga i le taimi e maʻito ai ma le taimi e fanauina mai ai tamaiti, mo le tinā faapea foi ma le tamaitiiti, o le fuafua lelei lea o taimi e fananau mai ai tamaiti. E sili ona matautia le fanauina mai o tamaiti, pe afai o le tinā o loo i lalo ifo o le 18 po o le sili atu foi ma le 35 tausaga, pe ua uma le toafā po o le sili atu foi o maʻito, pe o le iai foi o se va e itiiti ifo i le lua tausaga talu mai le fanauga mulimuli.”

O ulugalii o loo mafaufauina le faia o tamaiti e tatau ona manatunatu e faapea, e pei ona valoia mai e le Tusi Paia, o loo siomia i tatou e se lalolagi ua faatumulia i faiga sauā, oge, taua, ma le lē mautinoa o le tulaga tau tamaoaiga. (Mataio 24:3-12; 2 Timoteo 3:1-5, 13; Faaaliga 6:5, 6) O le alofa moni i fanau o le a fesoasoani i mātua e iloa lelei le lalolagi o loo tatou ola ai, ia iloa o le tausia aʻe o ni fanau i le taimi nei e matuā faigata tele. O lea la nai lo le tuu o mea seʻi tutupu mai, ma maua le tele o tamaiti e fananau mai e aunoa ma le fuafua lelei ma faamoemoe o le a sologa lelei mea uma, o le toatele ua latou filifilia po o le ā le toatele o a latou fanau ina ia olioli ai a latou fanau i se olaga e sili atu le fiafia faapea foi ma le saogalemu.

E lē gata e fesoasoani ia i tatou e faia filifiliga atamai i mataupu faaleaiga, ae ua aumaia foi e le Tusi Paia ia i tatou le faamoemoe mautu mo le lumanai. Ua faaalia i le Tusi Paia e faapea o le fuafuaga a Lē na Foafoaina Mea mo tagata, ia ola e faavavau i le filemu ma le fiafia i se lalolagi parataiso. Ina ia faataunuuina lenei mea, o le a aumaia e le Atua le iuga i lenei faiga amioleaga o mea. O lea la, i se lalolagi amiotonu e aunoa ma le mativa ma le soona faatumulia i tagata, o le a lē toe iai ni tamaiti e tuulafoaia ona e lē o manaomia.—Isaia 45:18; 65:17, 20-25; Mataio 6:9, 10.

Ma le manino lava, o le magafagafa o le tasi i le isi faapea foi mo fanau, faatasi ai ma se vaaiga paleni o le fanautama, o le a fesoasoani i se ulugalii e filifili ai le aofai o le la fanau. Nai lo le tuu o mea e tutupu e aunoa ma le fuafuaina lelei, e tatau ona la sailia le taʻitaʻiga a Ieova i le tatalo. “O le faamanuia a Ieova, o lea e faatamaoaiga aʻi; na te le faaopoopo i ai se tiga.”—Faataoto 10:22.

[Faaopoopoga i lalo]

[Ata i le itulau 14]

E faitau miliona tamaiti ua tuulafoaiina

[Ata i le itulau 15]

E manaomia e fanau le tausiga alofa