Fasiotiga Tagata i le Suafa o le Atua

TUSIA E LE SUI O LE ALA MAI! I FALANI

“I le Suafa o le Atua, Matou te Fasiotia ai ma o le a Faaauau Pea le Fasiotiga Tagata”

I LALO o le ulutala e pei ona siiina mai i luga, na matauina ai e le International Herald Tribune e faapea: “O lenei senituri, lea e masani ona mananao nisi e iai se vaaiga mautinoa e taʻua o le vaitaimi o tagata malamalama, ua faailogaina e pei lava foi o isi senituri na muamua atu i le faanaunauga matautia o tagata o le fefasiotiai lea i le suafa o le Atua.”

Na sii mai e le tusitala ia faataitaiga o le fasiotia ma le sauā e lotu o le tele o tagata i senituri na muamua atu. Ona faasino atu lea i fasiotiga tagata ua faia i le 20 senituri, fai mai lana faaiuga: “O mea ua tatou matauina o le faaauau pea lea o faiga e mataʻu ai ma fasiotiga tagata lē pulea a tagata ua mavae atu. O loo faaauau pea ona avea tapuaiga ma faamolemolega i sauaga faapolotiki ma laufanua e fāoa faamalosi i taimi o taua.”

Ua taumafai nisi e tausaoina ia faiga taua a lotu i aso nei e ala i le faapea mai sa faamaonia e le Atua le fasiotia o tagata Kanana e Isaraelu anamua. Peitai, o na taua e lē mafai ona tauamiotonuina ai taua a Kerisiano faatagāfai i aso nei. Aisea? Auā o Isaraelu na faatonuina saʻo mai lava e le Atua e gaoioi e avea ma faaoosala o lana faamasinoga amiotonu agaʻi i tagata tapuai i temoni, lea sa aofia ai i a latou tapuaiga ia amioga lē mamā faaleituaiga ma le osia o taulaga i tamaiti.—Teuteronome 7:1-5; 2 Nofoaiga a Tupu 28:3.

O se faamaoniga e iloa ai o taua a Isaraelu anamua e lē pei o taua masani o loo iai nei, o auala faavavega na avatu ai e le Atua le manumalo i le nuu. Mo se faataitaiga, sa faatonu Isaraelu anamua i se tasi taimi e faaaogā ia pu, o kate, ma sulu—o mea na e lē faaaogaina i taua e masani ai! I se tasi mea na tupu sa faatulaga ai tagata pepese e pito i luma o le autau a Isaraelu lea na faafetaiaia se autau a ni atunuu e sili ona toatele ia i latou.—Faamasino 7:17-22; 2 Nofoaiga a Tupu 20:10-26.

E faaopoopo atu i lena, sa iai taimi na au atu ai Isaraelu i taua e lei faatonuina e le Atua, sa lei faamanuia le Atua ia i latou ma na latou toilalo ai. (Teuteronome 28:15, 25; Faamasino 2:11-14; 1 Samuelu 4:1-3, 10, 11) E lē mafai la ona taʻua taua a Isaraelu e taʻuamiotonuina ai taua a Kerisinetoma.

I le igoa o lotu, ua faasagatau ai Hinitu agaʻi i Musalimi ma tagata Sikh; ua siitau Musalimi Shiite agaʻi i Musalimi Sunni; ae i Sri Lanka, o loo fefasiotiai ai le lotu Puta ma Hinitu.

O se tasi o faataitaiga o le fasiotia o tagata i le suafa o le Atua o taua ia na tauina i Falani i totonu o le 16 senituri. O le tala e uiga i nei taua ua faamauina ai le tele o le toto masaa i le talafaasolopito o le lotu Katoliko Roma ma le Porotesano i Europa. Seʻi o tatou iloiloina nei taua, ma vaai po o le ā tatou te aʻoaʻoina mai ai.

[Ē Ana le Ata i le itulau 17]

U.S. Army photo