Ituaiga o Olaga Lē Mamā—O le ā le Telē o le Aafiaga?

FAI mai le muagagana faa-Tenemaka: “O faamaʻi ua pule i tagata uma lava.” So o se tasi lava la e maua i se maʻi faaumiumi o le a tautino mai e faapea, o lenei “pule” e matuā sauā moni lava! Ae peitai, atonu o le a faateia oe e iloa o maʻi e masani lava ona foliga mai e pei o se mālō valaaulia nai lo o se pule. Ua taʻua e Nofoaga Autū e Pulea ma Puipuia Faamaʻi i le Iunaite Setete e faapea, o le 30 pasene o aso e faaaluina e tagata mamaʻi i le falemai ona o faamaʻi ma manuʻaga, sa ono mafai ona alofia. O le ā le mafuaaga? Ona o ituaiga o olaga lē mamā ma le lamatia. Seʻi manatu i nisi o faaaoaoga.

ULAULA. O Ira, e 53 tausaga le matua, e maua i le maʻi e taʻua o le emphysema (fefete le māmā)—o āuga o le toeitiiti lava atoa le fasefulu tausaga o ulaula. Ina ia togafitia lona maʻi, e manaomia ona maua pea se sapalai o le okesene ua utuina i fagu, o le tau e tusa ma le 400 tālā Amerika i le masina. I le 1994, o le tau o le faataotolia o ia i le falemai mo le iva aso ona o lona maʻi, na oo atu i le $18,000, ua oo ai le tau atoa o le tausiga o le soifua maloloina o Ira i lena tausaga i le sili atu i le $20,000. Peitai, e leai lava se lagona naunautai o Ira e taofia lana ulaula. Fai mai a ia: “E iai pea ia te au lenei tuinanauga uigaese.”

E lē na o Ira e iai i lenei tulaga. E ui lava ina lauiloa le tulaga lamatia o le ulaula, ae e ulaina pea e tagata i le lalolagi aoao le tusa ma le 15 piliona sikareti i aso taitasi. I tausaga taitasi i le Iunaite Setete, o le tau mo le tausia o tagata mamaʻi ona o le ulaula, ua faatatauina e tusa ma le $50 piliona. O le uiga o lenei mea e faapea, i le 1993, o le faatatauga o pepa sikareti uma e faatauina mai, e tusa ma le $2.06 na faaaluina i vailaau mo le togafitia o tagata e mamaʻi i le ulaula.

Pe a fanau mai se tamaitiiti, ua amata ai foi ona faateleina le tau o vailaau mo togafitiga ona o le ulaula. Seʻi taʻua na o se faaaoaoga se tasi, i se suesuega na faia i le Iunaite Setete, na iloa ai o pepe e fananau mai i tinā o ē ulaula, e tusa ua faaluaina ona lamatia i le maua i le maʻi e mavaevae laugutu po o le pito i luga i totonu o le gutu, o se tulaga e ono manaomia ai le faia o ni taotoga se fa a o lua tausaga le matua. O le faatatauga o le tau o vailaau mo togafitiga i le olaga atoa o se tagata ona o lenei tulaga, e tusa ma le $100,000 a le tagata. O le mea moni, e lē tāitai tutusa le tau o le tālā ma le tau o faalogona ootia pe a maua i se tulaga lē atoatoa o le tino mai lava i le taimi e fanau mai ai.

Fai mai nisi tagata, o le taugata o togafitiga mo maʻi ona o le ulaula, ua fetaui lelei ma le mea moni e faapea, e toatele tagata ulaula ua lē mafai ona ola umi e mauaina a latou tupe o taui mai le Saogalemu (Social Security). Ae peitai, e pei ona matauina e le New England Journal of Medicine e faapea, “o lenei faaiuga, ua faia ai ni fefinauaiga; e lē gata i lea, e toatele o le a ioe mai e faapea, o le vave ona feoti ona o le ulaula, e lē o se auala lea e puleaina ai le tau o le tausiga o le soifua maloloina.”

FAAAOGASESEINA O LE ʻAVA MALOSI. O le faaaogaseseina o le ʻava malosi ua fesootai ma le tele o faafitauli tau le soifua maloloina, e aofia ai le faaleagaina o le ate (cirrhosis of the liver), maʻi o le fatu, manava fefete, puta papala, ma le ate alii. E mafai ona faigofie ona aafia ai se tasi i faamaʻi pipisi e pei o le niumonia. I tausaga taitasi i le Iunaite Setete, e tusa ai ma le faamatalaga a Dr. Stanton Peele e faapea: “E $10 piliona e faaaogā e togafitia ai tagata o ē e lē mafai ona pulea lo latou tagofia o le ʻava malosi.”

O le ʻava malosi, e masani ona aafia ai le pepe faatoʻā afuafua i le manava o le tinā. I tausaga taitasi, e faitau sefulu afe tamaiti i le Iunaite Setete e fananau mai e lē atoatoa tino ona sa inu ʻava o latou tinā a o maua i le maitaga. O nisi o nei pepe ua suesueina ma iloa ai ua maua i latou i maʻi e māfua mai i le ʻava malosi (FAS), ma e masani lava o nei tamaiti e pagatia i le lē atoatoa o le tino ma le mafaufau. O le faatatauga o le tau o togafitiga faafomai mo olaga o nei tamaiti taitoatasi e aafia i le FAS, ua faatatauina e tusa ma le $1.4 miliona.

Talu ai e faaitiitia e le ʻava malosi le puleaina o gaoioiga soonafai, o le inu tele la i ai, e masani ona faamaite ai faiga sauā, ia e mafai ona iu ai i ni manuʻa e manaomia ai ni togafitiga faafomai. Ua matuā telē foi le afaina ua māfua mai ia i latou e aveina taavale a o onanā. Seʻi manatu i le aafiaga na oo ia Lindsey, o se teineitiiti e valu tausaga le matua, o lē na tau seʻi mai i fafo mai le nofoa i tua o le taavale a lona tinā ina ua fetaui le la taavale ma le taavale a se avetaavale onā. E fitu vaiaso na faataotolia ai Lindsey i se falemai, ma sa manaomia ai le faia o ni taotoga. Na oo atu le tau o ona togafitiga i le silia ma le $300,000. E faafetaia ona sa lei maliu i le faalavelave.

FAAAOGASESEINA O VAILAAU FAASAINA. Ua fuafuaina e se tasi tamaitai suesue tau i le faaaogaseseina o vailaau faasaina i Amerika i tausaga taitasi e faapea, e oo atu i le $67 piliona. Ua taʻua foi e Joseph A. Califano, Jr., o le peresitene o le Nofoaga Tutotonu e Suesueina ma Puleaina le ʻAva Malosi ma Vailaau Faasaina i le Iunivesite o Kolomepia i Niu Ioka se isi vala taugata o le faafitauli e faapea: “O pepe ia e fananau mai ia i latou e taumafaina le vailaau faasaina o le crack, o se mea sa seāseā ona maua i le sefulu tausaga ua mavae, ua matuā faatumulia ai le falemai mo pepe e oo atu i le $2,000 le tupe e faaalu ai i le aso. . . . E mafai ona oo atu i le $1 miliona le tau e tausia ai pepe taitasi o feola mai seia oo ina tagata matua.” E faaopoopo i lena mea, ua matauina e Califano e faapea, “o le lē taulau ona sailia e tinā totō se tausiga a o iai i lea tulaga, ma lē taulau ona taofia le faaaogaseseina o vailaau faasaina, ua māfua ai ona oo atu i le toetoe lava $3 piliona tupe na faaaluina mo Togafitiga o Gasegase i le 1994 i le tausiaina o maʻi i falemai mo pepe o loo aafia ona o le faaaogaseseina o vailaau faasaina.”

Ua matuā faateteleina le leaga o lenei tulaga pe a tatou mafaufau atu i le lē mafaitaulia o ola ua maimau ai i lenei amioga leaga. O fevaevaeaiga i faaipoipoga, tamaiti ua tuulafoaia, o le faaitiitia o alagatupe faatasi ma faafitauli masani o loo aafia ai aiga ua malepelepe, ona o le faaaogaseseina o fualaau faasaina.

FEUSUAIGA TUUFAU. E sili atu i le 12 miliona tagata i le Iunaite Setete ua pisia i faamaʻi pipisi (STD) i tausaga taitasi, ua tulaga maualuga ai le Iunaite Setete i le aofai o tagata ua pisia i ia faamaʻi nai lo o se isi lava atunuu tamaoaiga. Ua taʻua ai e David Celentano o le Aʻoga o le Tumamā ma le Soifua Maloloina Lautele i le Iunivesite o Johns Hopkins lenei mea e faapea, “o se faalumaina o le atunuu.” O le tupe saʻo lava ua faaaluina i nei faamaʻi e lē aofia ai le AIDS, e tusa lea ma le $10 piliona i le tausaga. Ua lamatia faapitoa ai lava le au talavou. Ma e lē o se mea e ofo ai! E tusa ai ma se tasi o lipoti e faapea, e oo atu i le vasega 12, ua tusa ma le 70 pasene i latou ua faia feusuaiga faaleituaiga, ma e latalata atu i le 40 pasene o i latou ua taʻi fa ni paaga pe a itiiti mai.

O le AIDS, o se mala i le itu tau tausiga. I le amataga lava o le 1996, o le togafitiga sa sili atu ona aogā na maua—o polōtini e taofia ai le faamaʻi (petesa inhibitors) faatasi ma vailaau ua leva lava ona iai—o le tau, e i la va o le $12,000 ma le $18,000 i le tausaga mo le tagata e toatasi. Ae ua na o se vaega mea o le aofaiga tele o tupe e lē mailoa ua faaaluina mo le togafitia o le AIDS, lea e aofia ai le lē mafai e le tagata maʻi ona faia ni galuega e fua mai, faapea ma i latou o ē ua tuua galuega ma aʻoga ina ia tausia o ia. Ua faatatauina e faapea, ona o le HIV ma le AIDS, e oo atu i le tausaga e 2000 ua alu uma ai se tupe i le va o le $356 ma le $514 piliona i le lalolagi aoao—e tutusa lea ma le faaumatia o le tamaoaiga atoa o Ausetalia po o Initia.

FAIGA SAUĀ. A o avea ma fomai tipitipi mo le lautele i Amerika, na lipotia mai ai e Joycelyn Elders e faapea, o le tau o togafitiga faafomai ona o faiga sauā sa $13.5 piliona i le 1992. Na matauina e le peresitene o le Iunaite Setete o Bill Clinton e faapea: “O le tasi o mafuaaga ua taugata tele ai le tausiga faafomai o le soifua maloloina i Amerika, ona ua tutumu o tatou falemai ma potu mo faalavelave faafuasei i tagata o ē lavevea ma tafanaina.” O se mafuaaga lelei lea ua taʻua ai e le Journal of the American Medical Association faiga sauā i le Iunaite Setete e faapea, “o se faalavelave mo le soifua maloloina o tagata lautele.” Ua faaauau mai le lipoti e faapea: “E ui lava o faiga sauā e lē o se faamaʻi i se uiga ‘iloga,’ a o ona aafiaga i le soifua maloloina totino ma tagata lautele, e matuā loloto, e pei lava o le tele o maʻi o le tino—pe atonu foi e sili atu.”

Ua faapea mai se lipoti mai ni falemai se 40 i Colorado, o le faatatauga o le tau mo tagata taitoatasi na aafia i faiga sauā i uluai masina e iva o le 1993, e $9,600. O le sili atu i le ʻafa o i latou na faataotolia i le falemai, e lei inisiuaina mo togafitiga ma o le toatele o i latou nei sa lē mafai pe na lē mananao e totogi pili o o latou togafitiga. O tulaga faapena ua iu ai i le siitai o lafoga, maualuluga tupe e totogi mo saofaga o inisiua, ma le tetele o pili o falemai. Ua lipotia mai e le Faalapotopotoga o le Falemai i Colorado e faapea: “O tatou uma lava ua totogia nei tupe.”

Suia le Ituaiga o Olaga

E tusa ai ma tulaga faaletagata, e matuā itiiti lava se faamoemoe mo le suia o ituaiga o olaga lē mamā. Ua faapea mai se lipoti a le Iunivesite o Kolomepia: “O Amerika, e lē o le Faatoaga o Etena, ma o le a lē mafai lava ona taofia i tatou mai le faaaogaseseina o mea. Ae o le tele e tatou te puleaina ai i tatou lava, o le a tatou maua ai se seleselega matuā sili ona lelei o ni pepe e sili atu ona soifua maloloina, faaitiitia faiga sauā ma solitulafono, paʻū le totogi o lafoga, faaitiitia le totogi o tausiga faafomai, tele tupe faasili, tamaiti aʻoga e sili atu ona lelei, ma e toaitiiti o le a maua i le AIDS.”

Ua iloa e Molimau a Ieova o le Tusi Paia o se fesoasoani aupito sili lea i le faataunuuina o lena sini. O le Tusi Paia, e lē pei o isi tusi. Ua faagaeeina le Tusi Paia e Lē na Faia le tagata, o Ieova le Atua lea. (2 Timoteo 3:16, 17) O ia “o loo aʻoaʻo ia te oe i mea e aoga, o loo taʻitaʻiina oe i le ala e te ui ai.” (Isaia 48:17) O mataupu silisili o loo faataatitia mai i le Tusi Paia, e aogā, ma o i latou e savavali ai i ana fautuaga, o le a maua ai aogā.

Mo se faaaoaoga, o Eseta, o se tagata na matuā fiafia i le ulaula.a Ina ua ia suesueina le Tusi Paia ma Molimau a Ieova, na valaaulia ai o ia e lona faiaʻoga o le Tusi Paia ina ia faaavanoa se aso e asiasi atu ai e maimoa i le ofisa ulu o Molimau a Ieova i le lalolagi aoao, i Brooklyn, Niu Ioka. Muamua lava, sa faatalatū Eseta. I le iloaina e lē ulaula Molimau a Ieova, sa ia tau mānatu po o le a faapefea ona iai o ia iina faatasi ma i latou i se aso atoa. O lea na tuu ai e Eseta se sikareti se tasi i lana tamai ato, ma le manatu afai e na te lagona ua oso lona fia ula, o le a na ona ia faagalo atu lava i se fale ese. E pei lava ona ia fuafuaina, ina ua uma se tasi o maimoaga, na alu atu ai Eseta i le fale mo tamaitai ma avane i fafo lana sikareti. Ae i le taimi lena, na ia matauina ai se mea. O le potu e matuā mamā lava, ma e mamā foi le ea. Ua faapea mai Eseta: “Sa lē mafai ona ou faapalapalaina le nofoaga i le ulaina o lena sikareti, o lea na ou faaaluina ai i le fale ese. Ma o le sikareti mulimuli lava lena na ou paʻi i ai!”

I le lalolagi aoao, e faitau miliona tagata e pei o Eseta ua aʻoaʻoina ina ia ola e tusa ma mataupu silisili o le Tusi Paia. Ua latou maua ai aogā, ma ua avea i latou ma tagata e sili atu ona aogā i le nuu o latou nonofo ai. O le mea e sili ona tāua, ua latou faamamaluina ai Lē na Faia i latou, o Ieova le Atua.—Faatusatusa i le Faataoto 27:11.

E ui lava ina lē mafai e taumafaiga sili ona lelei a le tagata ona toe faafoisia maia le “Faatoaga i Etena,” ae ua faapea mai le Tusi Paia, o le a faia faapea e le Atua. Ua taʻua i le 2 Peteru 3:13 e faapea: “A e faatalitali i tatou i le lagi fou ma le lalolagi fou, pei o lana [le Atua] na folafola mai, e mau ai le amiotonu.” (Faatusatusa i le Isaia 51:3.) I lena lalolagi fou, o le a lē toe popole ai i ni tausiga faafomai o le soifua maloloina, auā o le a olioli le fanau a tagata i le ola faatasi ma le soifua maloloina lelei atoatoa—i le auala na fuafuaina ai e le Atua i le amataga. (Isaia 33:24) Pe e te manao e aʻoaʻo atili e uiga i folafolaga a le Atua? O le a fiafia lava Molimau a Ieova e fesoasoani atu ia te oe.

[Faaopoopoga i lalo]

[Ē Ana le Ata i le itulau 30]

© 1985 P. F. Bentley/Black Star