Le Faamaʻi o Tainifo—Po o E Aafia Ai?
O LE faamaʻi o tainifo e toʻatele ua aafia ai. E lē vave ona iloa ni ona āuga i le taimi muamua e aafia ai, ma o le māfuaaga lenā e mataʻutia ai lenei faamaʻi. Ua lisiina mai e le International Dental Journal lea ituaiga o faamaʻi o tainifo o le periodontal, o se maʻi e “mataʻutia e lamatia ai le soifua mālōlōina o tagata.” Na taʻua atili e faapea o lenei faamaʻi e “matuā tigā, ma lē atoatoa ai le fiafia o tagata taʻitoʻatasi ma nuu.” O le talanoaina la o lenei faamaʻi o le a fesoasoani ai iā te oe e puipuia mai ai.
Mea Moni e Faatatau i le Faamaʻi o Tainifo
E eseese tulaga o lenei faamaʻi. I lona tau amatamataga, e fulafula ma mūmū tainifo (gingivitis). E iloa ua maua se tasi i le gingivitis pe afai e tafegofie mai le toto i tainifo. E oo lava i le fufulu, faamamā, po o le siakiina foʻi o tainifo e toto ai lava, ae i nisi taimi e teʻi lava ua toto.
Pe a faasolo atu ina ogaoga tele le faamaʻi, ona taʻua loa lea o le periodontitis. O le taimi lea, ua amata ona faaleagaina vaega uma o loo pipii ai ou nifo, e pei o ponaivi ma aano o nifo. O le vaega lenei o le faamaʻi e lē vave aliaʻe ni ona āuga seʻiloga ua matuā tugā lava. O nisi faailoga e iloa ai ua maua i le periodontitis o le amata lea ona maluelue nifo, faasolo ina toʻulu, valavala, leaga le manava, ma amata ona see ese tainifo mai nifo ma foliga uumi ai ma tafetotoi.
Le Pogai ma Aafiaga o le Faamaʻi o Tainifo
E iai isi māfuaaga e faatuputeleina ai lamatiaga o le faamaʻi o tainifo. O siama e māfua mai i meaʻai ma isi mea lea e sosolo i luga o nifo (dental plaque) e masani ona faaleagaina ai tainifo. Pe afai e lē aveesea nei siama o le a fulafula ai tainifo ma faasolo ina āva ai nifo mai tainifo, ma iʻu ina sao atu i ai le siama. Pe a ola siama i inā ona faaleagaina ai lea o ponaivi ma aano o tainifo. O siama lea e sosolo i nifo ma pipii i tainifo, e mafai ona malō ma taʻua ai o le calculus po o le tartar. E lē faigofie ona aveesea siama ua malō ona ua pipii mau i tainifo. O lea, o le a faaauau ai ona matuā faaleagaina e siama tainifo.
O isi vala e faateteleina ai le faamaʻi o tainifo o le lē lelei ona tausia o oloa, o vailaau ma fualaau faafomaʻi ua aafia ai sela o le tino e puipuia mai i faamaʻi, popole, maʻi suka, inu tele i le ʻava malosi, ulaula tapaa ma suiga o le tino pe a maua foʻi i le maʻitaga.
E iai foʻi isi aafiaga e oo iā te oe ona o le faamaʻi o tainifo. Pe a tigā lou fofoga pe e toʻulu ou oloa o le a lē mafai ona faamalū lelei au mea taumafa. E ono aafia ai foʻi lau tautala ma ou foliga vaaia. Ua faaalia atili foʻi i suʻesuʻega e aafia le soifua mālōlōina o se tasi pe a faalētonu ona oloa.
Iloaina ua Maua i le Faamaʻi o Tainifo ma le Togafitiga
E faapefea ona iloa ua e maua i le faamaʻi o tainifo? Atonu ua e mātauina nisi o āuga pei ona taʻua i lenei mataupu. Pe afai o lea, o se auala atamai le vaai o se fomaʻi nifo lelei, e mafai ona siakiina le tulaga o iai ou tainifo.
Pe e mafai ona togafitia le faamaʻi o tainifo? E mafai ona togafitia i le tauamatamataga o le faamaʻi. Pe afai ua faaleagaina ponaivi ma aano (periodontitis), o le mea e tatau ona fai o le vave taofia lea o le sosolo o le faamaʻi. E faaaogā e fomaʻi nifo meafaigaluega faapitoa e mafai ona aveesea ai le siama faatoʻā sosolo (plaque), ma le siama ua malō ma pipii i nifo (calculus).
E tusa lava pe e lē lelei ni togafitiga faafomaʻi nifo i le mea e te alaala ai, ae o le faaitiitia o le aafia i nei faamaʻi lea e faaleagaina ai nifo, o le puipuia lea o ou oloa. O le tausia lelei e lē aunoa e le tagata lava ia o ona oloa, o le puipuiga sili lea o oe mai i le aafia i faamaʻi o tainifo.