Faamaʻi​—Auala e Faaitiitia ai Aafiaga

I aso taʻitasi, e tauivi ai lou tino ma ni fili e lē vaaia ae e mataʻutia o latou aafiaga. O siama ma vairusi e oo i totonu o le tino, e lamatia ai lou soifua mālōlōina.a Atonu e te lē iloaina na tauiviga ona o loo faatamaʻia na siama e le malosi o le tino lea e tetee atu i faamaʻi, a o leʻi oo i le taimi e aliaʻe mai ai āuga o se faamaʻi. Peitaʻi o nisi taimi, e sili atu ona malolosi siama. O lea, e manaʻomia ai ona e faaaogāina fualaau ma isi togafitiga e tetee atu ai i na siama.

I le faitau afe o tausaga, e leʻi iloa e tagata le mataʻutia o siama ninii po o isi siama. Ae i le senituri lona 19, na faamautinoa mai ai e saienitisi le fesootaʻiga o siama ma faamaʻi, ma ua mafai ai ona tatou lava saunia e puipuia i tatou lava. Ua mafai e i latou e suʻesuʻeina vailaau ona aveesea pe faaitiitia aafiaga o nisi faamaʻi pipisi, e pei o le tane susu ma le maʻi pipili. Peitaʻi talu ai nei, ua amata ona toe pipisi isi faamaʻi e pei o le fiva samasama ma le dengue. Aiseā? Seʻi o tatou iloiloina nisi o vala:

• I tausaga taʻitasi, e faimalaga le faitau miliona o tagata i le lalolagi aoao ma e masani ona feaveaʻi ai siama e faapogaia ai faamaʻi. Na taʻua i se mataupu mai i le Clinical Infectious Diseases, “o faamaʻi pipisi mataʻutia uma” e mafai ona feaveaʻi e tagata faimalaga.

• O nisi siama ua lē toe ila i fualaau. Ua taʻua e le Faalapotopotoga o le Soifua Mālōlōina i le Lalolagi: “Ua faasolo atu le lalolagi i le vaitaimi ua lē mafai ai e fualaau ona toe tineia faamaʻi . . . ia sa mafai ona aveesea e fualaau.”

• O fetauaʻiga a atunuu ma le mativa, ua masani ona faigatā ai taumafaiga a malo e pulea le pipisi atu o faamaʻi.

• O le toʻatele o tagata e lē tele so latou iloa i auala e puipuia ai mai i faamaʻi.

E ui i nei tulaga, ae e tele mea e mafai ona e faia e puipuia ai oe ma lou aiga. O le a faailoa mai i le mataupu o loo mulimuli mai, e tusa pe e te nofo i se atunuu tauatiaʻe, e mafai ona e faaaogā auala faigofie ma aogā e puipuia ai oe mai i faamaʻi.