Fanau Iesu i le Fale o Manu

PE E te iloa o ai lenei pepe laitiiti? Ioe, o Iesu. Faatoa fanau lava o ia i le fale o manu. O loo faataatia e Maria Iesu i le mea e teu ai mea ai mo asini ma isi mea ola e aai ai. Ae ai se ā ua i ai i inei Maria ma Iosefa faatasi ma manu? E le o se nofoaga lea e tatau ona fanau mai ai se pepe, a ea?

E leai. Ae o le mafuaaga lenei: O le pule o Roma o Kaisara Aokuso, na ia faia se tulafono e tatau i tagata uma ona toe foi i o latou aai na fananau ai ina ia tusia o latou igoa i se tusi. Na fanau Iosefa i Peteleema. Ae ina ua la taunuu atu ma Maria, sa leai se potu ma avanoa mo i laua. O lea sa tatau ai ona la o i inei e faatasi ma mea ola. Ma i le aso lava lena na fanaua ai e Maria Iesu! Ae e pei ona e vaai atu i ai, o loo manuia lava o ia.

Pe e mafai ona e iloa atu leoleo mamoe o loo o mai e vaai Iesu? Sa i ai i latou i le vao i le po e tausi mamoe, ma na susulu se malamalama faataamilo i a i latou. O se agelu! Na fefefe le au leoleo mamoe. Ae na faapea atu le agelu: ‘Aua tou te fefefe! O loo i a te aʻu se tala lelei mo outou. O le asō, i Peteleema, ua fanau ai Keriso le Alii. O le a ia faaolaina tagata! O le a tou mauaina o ia o taʻui i le ie o taatia i le fale o manu.’ Ona faafuasei lea ona o mai agelu e toatele ma vivii i le Atua. Ona faataalise lea o le au leoleo mamoe e saili Iesu, ma ua latou mauaina nei o ia.

Pe e te iloa ai se ā ua faapitoa ai Iesu? Pe e te iloa o ai moni o ia? Manatua, o le tala muamua o lenei tusi na taʻua ai le Atalii muamua o le Atua. O lenei Atalii na galulue o ia ma Ieova i le faia o le lagi ma le lalolagi ma isi mea uma. Ia, o Iesu la lena!

Ioe, na aumaia e Ieova le ola o lona Alo mai le lagi ma tuu i totonu o Maria. O le taimi lena na amata ai ona tupu le pepe i totonu iā te ia e pei o isi pepe i totonu o o latou tinā. Ae o le pepe lenei o le Alo o le Atua. Mulimuli ane, ona fanau ai lea o Iesu i inei i le fale o manu i Peteleema. Pe e mafai ona e iloa nei ai se ā na fiafia tele ai agelu e taʻu atu i tagata ua fanau mai Iesu?