Mataupu 18
E Manaomia ona Tatou Faatino le Amioatua i Aiga
1. (a) O ā suiga ua faia e le toatele o tagata, ina ua maeʻa ona aʻoaʻoina tapulaa a Ieova mo faaipoipoga? (e) Peitai o ā isi mea e sili atu e aofia ai i se olaga faaleaiga Kerisiano?
E AOFIA i upu moni faamafanafana loto ua uma ona tatou aʻoaʻoina i a tatou suesuega faale-Tusi Paia, o upu moni ia e fesootai i faaipoipoga ma le olaga i le aiga. Ua oo ina tatou iloa ai, o Ieova o le Amataga o le faaipoipoga ma iloa ai foi i le Tusi Paia lona saunia o se taiala aupito sili ona lelei mo aiga. O le iuga o lena taitaiga, e toatele tagata ua lafoaia se olaga o amioga lē tatau faaleituaiga ae lesitala lelei a latou faaipoipoga, o se mea e faamālō ai. Peitai e sili atu e manaomia i le olaga i se aiga Kerisiano na i lo lena. E aofia ai foi o tatou manatu i le faamautuina o le fusi o le faaipoipoga, le faataunuuga o a tatou avega tauave i le aiga, ma le auala tatou te feagai ai ma isi sui o le aiga.—Efe. 5:33–6:4.
2. (a) Po o faatatauina e tagata uma i aiga mea ua latou iloa mai le Tusi Paia? (e) Ua faapefea ona faamamafa e Iesu ma Paulo le tāua o le faia faapea?
2 E faitau miliona ua latou iloa faamatalaga a le Tusi Paia e faatatau i nei mataupu. Peitai pe a latou fesagai ma faafitauli i o latou lava aiga, latou te lē faatatauina ia mea. Ae faapefea i tatou? E mautinoa e leai se tasi o i tatou e fia pei o i latou ia sa taʻusalaina e Iesu ona ua latou faauiga sese le poloaiga a le Atua lea na manaomia ai fanau ia āva i o latou mātua, i le faapea mai ua lava ā le tau ina fai o se faiga faalelotu. (Mata. 15:4-9) Tatou te lē mananao e avea ma tagata o ē o iai se ituaiga o amioatua ae lē taulau ona faatinoina i “lo latou lava aiga.” Na i lo lea, e ao ona tatou mananao e folasia le amioatua moni, o “le oloa tele lava lea.”—1 Timo. 5:4; 6:6; 2 Timo. 3:5.
O LE Ā LE UMI E TUMAU AI LE FAAIPOIPOGA?
3. (a) O le ā le mea ua tupu i le tele o faaipoipoga, ae o le ā e tatau ona tatou maumauai e fai? (e) Faaaogā lau Tusi Paia e tali ai fesili ua lisiina i luga e faatatau i le faatumauina o le faaipoipoga.
3 O se mea ua matauina le tuputupu aʻe o le matuā maaleale o fusi o le faaipoipoga. O nisi paaga na faatasia mo le 20, 30 po o le 40 tausaga ua filifili nei e toe amata se “olaga fou” ma se isi tagata. E faapea foi ona lē toe avea o se mea ese i le faalogo le teteʻa o ni ulugalii talavou ae faatoʻā mavae ni nai masina o le faaipoipoga. E tusa lava po o ā mea o loo faia e isi, ae i le avea ma ē tapuai ia Ieova e tatau ona ia i tatou le faanaunauga e faafiafia le Atua. O ā fa a lana Afioga e faatatau i lenei tulaga?
Pe a faaipoipo se taulealea ma se tamaitai, o le ā le umi e tatau ona la faatalitalia e nonofo faatasi ai? (Roma 7:2, 3; Mare. 10:6-9)
E na o le ā le faavae e tasi mo tatalaga faaipoipoga e talia e le Atua? (Mata. 19:3-9; 5:31, 32)
O le ā le mamafa i le finagalo o Ieova o tatalaga faaipoipoga e lē faatagaina e lana Afioga? (Mala. 2:13-16)
Po o fautuaina e le Tusi Paia teteaga o se auala e foia ai faafitauli tau faaipoipoga? (1 Kori. 7:10-13)
4. E ui i aega faaonaponei, ae aisea ua tumau ai nisi faaipoipoga?
4 Aisea ua tumau ai nisi faaipoipoga, a o isi—e oo lava i ē faapea mai o Kerisiano—ua taape? E masani lava o se tasi o ki tāua o le faatali seʻi matutua uma le toalua ona faaipoipo lea. E tāua foi le mauaina o se paaga o sē fetufaai ōna faanaunauga ma le tasi ma o sē e mafai ona talanoaina ma le saoloto mataupu. Ae sili ona tāua o se tagata o lē e faatinoina le amioatua moni. Afai e alofa moni se tagata ia Ieova ma mautinoa e saʻo Ona ala, o le a iai la se faavae maufaatuatuaina mo le faafoeina o faafitauli e mapuna aʻe. (Sala. 119:97, 104; Faata. 22:19) O le a lē faavaivaia le faaipoipoga a sea tagata i le manatu faapea, afai e lē sologa lelei, e mafai lava ona ia faia se teteaga pe tatala le faaipoipoga. O le a ia lē tāpā vaivaiga o lana paaga o se faamolemolega mo le alofia o ona lava avega tauave. Na i lo lea, o le a ia aʻoaʻo ia fesagai ma faafitauli o le olaga ma sailia ni vaifofo aogā.
5. (a) E faapefea ona aafia ai le faamaoni ia Ieova? (e) E tusa lava pe fesagai ma faigata matautia, ae o ā aogā e mafai ona maua mai le taofi mau i tapulaa a Ieova?
5 Ua tatou iloa lelei e finau le Tiapolo faapea a oo ia i tatou mafatiaga totino, o le a tatou faagaloina loa ala o Ieova ma faaiua ai faapea e sili ona filifilia lava e i tatou le mea ua lelei ma le mea e leaga. Peitai e lē faapena tagata o ē faamaoni ia Ieova. (Iopu 2:4, 5; Faata. 27:11) O le toatele anoanoai o Molimau a Ieova na oo i ai sauaga mai paaga lē talitonu e leʻi solofuaina a latou tautoga o le faaipoipoga. (Mata. 5:37) O nisi, ina ua mavae ni nai tausaga, na oo i ai le olioli ona ua faatasia ma a latou paaga i le auaunaga ia Ieova. (1 Kori. 7:16; 1 Pete. 3:1, 2) A o isi, o ē e leʻi faaalia lava e a latou paaga se fia liliu mai po o ē ua lafoaia e a latou paaga ona o le taofi mau i lo latou faatuatua—ua iloa foi e i latou nei lo latou manuia faaoaina i le taofi mau i tapulaa a Ieova. I le ā le auala? O o latou tulaga ua aʻoaʻoina ai i latou e tosina vavalalata ia Ieova. Ua aʻoaʻoina i latou e faaatagia uiga faaleatua e tusa lava pe aafia ai i toatuga. O i latou o tagata ua faamaonia i o latou olaga le malosi o le amioatua.—Sala. 55:22; Iako. 1:2-4; 2 Pete. 1:5, 6.
IA TAITOATASI MA FAIA LANA VAEGA
6. Ina ia taulau se faaipoipoga, o le ā le faatatauga e tatau ona faaaloalogia?
6 E moni, e sili atu e manaomia na i lo le nonofo faatasi ina ia taulau moni se faaipoipoga. O se manaoga faavae o le faaaloalo lea a sui taitasi o le aiga mo le faatulagaga a Ieova o le tulaga ulu. E saosaolaumea lea i le maopoopo lelei ma se faalogona saogalemu i le aiga.—1 Kori. 11:3; Tito 2:4, 5. Faata. 1:8, 9; 31:10, 28.
7. E ao faapefea ona faagaoioia le tulaga ulu i le aiga?
7 E faapefea ona faagaoioia lena tulaga ulu? I se auala e faaatagia ai uiga o Iesu Keriso. Ua mausali Iesu i le tausisia o ala o Ieova; e fiafia o ia i le amiotonu ae inoino i le amioleaga. (Epe. 1:8, 9) E loloto foi lona alofa i lana faapotopotoga, saunia faasinoga manaomia ma tausi i ai. E lē faamaualuga, e magafagafa o ia, e “agamalu ma loto maulalo,” ma o i latou e i lalo o lona tulaga ulu ‘latou te maua le malologa mo o latou agaga.’ (Mata. 11:28, 29; Efe. 5:25-33) A feagai se tane, o ia foi o se tamā, ma lona auaiga i sea auala, e manino ai o loo ia gauai ia Keriso, o lē na faataatiaina le faaaoaoga lelei atoatoa o le amioatua. O le mea moni, e ao foi i tinā Kerisiano ona faaatagia ia lava uiga i le feagai ai ma a latou fanau.
8. (a) I nisi aiga, aisea atonu e foliga mai ai e lē o maua e auala faa-Kerisiano iuga manaomia? (e) O le ā e ao ona tatou faia pe a fesagai ma sea tulaga?
8 Ae peitai, ona o le lē lelei atoatoa faaletagata, e ono mapuna aʻe faafitauli. Atonu ua leva ona mauaa i nisi se faalogona tiga i faasinoga mai isi a o leʻi amata ona faatatauina e se tasi o le aiga mataupu silisili o le Tusi Paia. Atonu foi e foliga mai e lē o maua e talosaga agalelei ma se uiga alofa ni iuga lelei. Ua tatou iloa o loo fai mai le Tusi Paia faapea ia tuu ese “le lotoa, ma le ita, ma le leo tele, ma le upu leaga.” (Efe. 4:31) Ae afai e aliali mai e na o le pau lea o le mea e malamalama ai nisi tagata, o le ā e tatau ona fai? Ia, na faapefea ona gaoioi Iesu i lalo o omiga fitā? E leʻi faataitai o ia ia i latou o ē tau faamataʻu ma faatuaupua. Na i lo lea, na ia tuu atu ia lava i lona Tamā, ma faalagolago ia te ia. (1 Pete. 2:22, 23) E faapea foi, pe a aliae ni tulaga faigata i le aiga, tatou te faaalia atu le amioatua pe a tatou liliu atu ia Ieova, ma tatalo mo lana fesoasoani, na i lo le faaui ane o ala o le lalolagi.—Faata. 3:5-7.
9. Na i lo le suesue masei, o ā auala ua aʻoaʻoina e le toatele o tane Kerisiano e faaaogā?
9 E lē faafuasei ona oo mai ni suiga uma, peitai e aogā moni lava fautuaga a le Tusi Paia. Ua iloa e le toatele o tane o ē sa soona faitio soo i masei o a latou avā e faapea, na amata faaleleiga ina ua faateleina lo latou lava sapaitalia atoatoa o feutagaiga a Keriso mo lana faapotopotoga. O lena faapotopotoga ua lē o faia aʻe i ni tagata lelei atoatoa. E ui i lea e alofa Iesu i le faapotopotoga, na ia faataatia i ai le faaaoaoga saʻo, na oo foi ina foai atu lona soifua e sui ai, ma faaaogāina le Tusi Paia o se auala e fesoasoani ai e faaleleia le faapotopotoga ina ia iu atoatoa i lona fiafia. (Efe. 5:25-27; 1 Pete. 2:21) Ua faalaeiauina e lana faaaoaoga le toatele o tane Kerisiano ia galulue i le saunia o se faaaoaoga lelei ma ofoina atu se fesoasoani alofa totino e faaleleia ai. O auala faapena e fua mai ai ni iuga e sili ona lelei na i lo le suesue masei ma le ita po o le musu e tautala.
10. (a) I ā auala atonu o loo faafaigata ai i se tane, o ia foi o se tamā—e oo lava i lē ua tautino mai o se Kerisiano—le olaga mo isi i lona aiga? (e) O le ā e ono faia e faaleleia ai lea tulaga?
10 O le mea moni, atonu o ni sese o le tane po o le tamā ua aliae ai faafitauli i le aiga. E faapefea pe afai na te lē amanaia manaoga tau faalogona ootia o lona aiga pe lē taimua moni i le faatulagaina o talanoaga faale-Tusi Paia a le aiga ma isi gaoioiga? Ua iloa e nisi aiga āuga lelei ina ua maeʻa ni talanoaga fefaaaliai ma le faaaloalo o le faafitauli. (Faata. 15:22; 16:23; 31:26) Ae tusa lava pe lē o iuga uma ia sa faatalitalia, ae mafai lava e tagata taitoatasi ona faia se sao tāua i le faaleleia o siomaga faaleaiga e ala i le atiina aʻe totino o fua o le agaga ma faaalia le manatu alofa ma le magafagafa i isi sui o le aiga. O le a oo mai se faaleleiga, e lē i le faatalitalia o le isi tagata e faia se mea, ae i le faia lelei o la tatou lava vaega, e faaalia ai o loo tatou faatinoina totino le amioatua i le aiga.—Kolo. 3:18-20, 23, 24.
LE MEA E AUMAIA AI TALI
11, 12. (a) O ā sauniuniga ua faia e Ieova e fesoasoani ai ia i tatou i faafitauli i le olaga faaleaiga? (e) Ina ia maua aogā atoatoa, o le ā ua fautuaina i tatou e faia?
11 E anoanoai punavai ua liliu atu i ai tagata mo fautuaga i a latou mataupufai faaleaiga. Peitai ua tatou iloa o loo iai i le Afioga a le Atua timaiga aupito sili ona lelei, ma tatou te faafetai ai ona e ala i lana faalapotopotoga vaaia ua ia fesoasoani ai ia i tatou ina ia faatatauina. Po o e mauaina atoatoa ea aogā mai lena fesoasoani?—Sala. 119:129, 130; Mika 4:2.
12 E faaopoopo i le auai i sauniga a le faapotopotoga, po o faaavanoa pea ni tou taimi mo suesuega faale-Tusi Paia a le aiga? O aiga o loo faia faapea e lē aunoa i vaiaso taitasi ona autasia i la latou tapuaiga. Ua faaoaina lo latou olaga faaleaiga a o latou talanoaina faatatauga o le Afioga a le Atua i o latou lava tulaga.—Faatusatusa i le Teuteronome 11:18-21.
13. (a) Afai e iai ni a tatou fesili i mataupu patino tau i faaipoipoga po o aiga, o fea e masani ona tatou maua ai le fesoasoani manaomia? (e) O le ā e ao ona atagia i faaiuga uma tatou te faia?
13 Atonu o iai ni fesili i mataupu patino tau i faaipoipoga po o le aiga o mamafa ia te oe. Mo se faaaoaoga, e faapefea le faia o se aiga fuafuaina? Pe talafeagai mo Kerisiano le taotoga e taofia le fanau tama? Faamata e talafeagai le faia o se faapautama pe afai e foliga mai o le a fanau mai se pepe e lē atoatoa? Pe e iai ni tapulaa i le ituaiga o feusuaiga faaleulugalii e tatau i le va o le tane ma le avā? Afai e faaalia e se talavou i ona tausaga mai le 13 i le 19 na o sina naunau i mea faaleagaga, o le ā le tele e ao ona faatonu ai ina ia auai faatasi o ia ma le aiga i le tapuaiga? E lē masalomia le iai o sou taofi i nei mataupu taitasi. Peitai pe mafai ona e taliina e faavae i mataupu silisili o le Tusi Paia? Ua uma ona talanoaina nei fesili taitasi i Le Olomatamata. Ia faamasani e faaaogā faasino tusi ua maua e suʻe ai ia mataupu. Afai e leai ni au lomiga tuai o loo faasino i ai le faasino tusi, siaki le faaputugatusi i le Maota o le Malo. Aua le faatalitalia faapea ua lava le Ioe po o le Leai i fesili uma. Auā i nisi taimi e tatau ona e filifili—na o oe pe ma lau paaga. Peitai ia aʻoaʻo e faia faaiuga e atagia ai lou alofa mo Ieova ma sui o lou aiga. Ia faia faaiuga e faamaonia ai lou naunau moni e matuā faamalieina le Atua. Afai e te faia faapea, o le a manino ai ia Ieova ma isi o ē latou te iloa lelei oe, e te faatinoina moni le amioatua e lē gata i le lautele ae i lou lava foi aiga.—Efe. 5:10; Roma 14:19.
Talanoaga Autalu
● E aafia faapefea le faamaoni ia Ieova i le faamaoni o se tasi i lana tautoga o le faaipoipoga?
● Pe a i lalo o omiga mai faafitauli faaleaiga, o le ā e fesoasoani ia i tatou e faia le mea e finagalo malie i ai Ieova?
● E tusa lava pe sese isi i le aiga, o le ā e mafai ona tatou faia e faaleleia ai lea tulaga?