Leo Talafeagai

AFAI e lē lava le leo manaʻomia i se failauga, e ono amata ai ona tulemomoe nisi i le aofia. Afai e matuā leo lemū lava se tagata talaʻi i le faiva i le fanua, atonu o le a lē uaʻi mai iā te ia le tagata e ona le fale. I sauniga pe a lē talafeagai le malosi o le leo e avatu ai tali a le aofia, o le a lē maua e i latou i le aofia faalaeiauga manaʻomia. (Epe. 10:24, 25) I le isi itu, afai e sesē le taimi e leotele ai le failauga, o le a oo ina lē mautonu le aofia—e oo lava ina faasoesa.—Faata. 27:14.

Amanaʻia Lau Aofia. O ai o loo e talanoa atu i ai? i se tagata e toʻatasi? i se aiga? i se vaega toʻalaiti o loo feiloaʻi mo le auaunaga i le fanua? i le faapotopotoga atoa? i se tauaofiaga toʻatele? E manino mai o le leo e talafeagai i le tasi vaega e lē fetaui i le isi vaega.

I tulaga eseese, ua talanoa atu ai auauna a le Atua i aofia tetele. I le faaulufaleina o le malumalu i Ierusalema i aso o Solomona, sa leai se mea e faaleotele leo. Sa tū la Solomona i se tulaga maualuga ma faamanuia “leo tele” atu i tagata. (1 Tu. 8:55; 2 No. 6:13) I ni senituri mulimuli ane, ina ua mavae le liligiina ifo o le agaga paia i le Penetekoso i le 33 T.A., sa faapotopoto atu ai i se vaega toʻaitiiti o Kerisiano i Ierusalema se motu o tagata e toʻatele—o nisi sa fiafia, o isi sa tauemu. I le faaalia o le atamai talafeagai, sa “tulai [ai Peteru] . . . ma leo tele.” (Galu. 2:14) Sa tuuina atu se molimau malosi.

E faapefea ona e iloa ua talafeagai le malosi o se leo o loo e faaaogāina ma le tulaga o loo iai? O se tasi o mea e sili ona lelei e iloa ai, o le tali mai lea a le aofia. Afai e te mātauina nisi o le aofia o loo taumafai e faalogo mai, e ao ona e taumafai malosi e fetuunaʻi lou leo.

Pe e tatou te talanoa atu i se tagata e toʻatasi pe i se vaega, e atamai le amanaʻia po o ai o fai aʻe ai le aofia. Afai o iai se tasi e lē lelei le faalogo, atonu e manaʻomia ona sii i luga lou leo. Peitaʻi o le ʻeʻē o le a lē fiafia ai iā te oe tagata o ē ua faifai mālie ona ua matutua. E ono manatu i ai o se faailoga o le lē faaaloalo. I nisi aganuu, o le leotele naʻuā e manatu i ai o se faamaoniga o le ita po o le lē onosai o se tagata.

Amanaʻia Leo o Loo Faalavelave Mai. Pe a e auai i le faiva i le fanua, o mea tutupu e tulaʻi mai e mautinoa lava le aafia ai o le leo manaʻomia e avatu ai se molimau. Atonu e te feagai ma le paʻō mai o taavale, o tamaiti vaogatā, o le ōu o taʻifau, musika leotetele, po o se televise o loo matuā faaleotele. I le isi itu, i nofoaga e felataʻi ai aiga, atonu o le a matamuli le tagata e ona le fale pe a e soona leotele ma tosina uma mai ai tuaoi.

O uso e faia lauga i le faapotopotoga pe i tauaofiaga e ao foʻi ona faafetaiaʻia le tele o mea e tulaʻi mai. O le talanoa atu i se aofia i fafo e matuā ese lava mai le faia o se lauga i totonu o se maota, lea e lelei ai le faalogo. I Amerika Latina na faia ai e ni misionare se toʻalua se lauga i le lautele i le poletito o le fale o se tagata fiafia a o faapāpā mai fanapepa i se malae e latalata ane atoa ma se toa sa vivini faalausosoo e lē mamao ese!

A o faagasolo se lauga, e ono tupu se mea e manaʻomia ai a lē o le mānava seʻi uma le faalavelave mai po o le sii foʻi i luga o le leo. O se faaaʻoaʻoga, afai e fai se sauniga i se fale e ato i apa, afai e timu faafuaseʻi e ono lē faigofie ai la ona lagona e le aofia le failauga. E mafai foʻi ona faalavelave mai le tagi a se tamaitiiti po o tagata e tuai mai. Faamasani e faafetaiaʻia mea e faalavelave mai ina ia aogā atoatoa ai i lau aofia mea o loo e tauaaoina atu.

E aogā masini faaleotele leo pe afai e maua, peitaʻi e lē aveesea ai le manaʻoga o le sii i luga o le leo o le failauga pe a tulaʻi mai mea e manaʻomia ai. I nisi nofoaga e pē faalausosoo ai le paoa, e ao i failauga ona faaauau a latou lauga e aunoa ma se maikorofoni.

Manatunatu i le Mataupu o Loo Talanoaina. E iai foʻi le fesootaʻiga i mea e faatatau i ai lau mataupu ma le ituaiga leo e te manaʻomia. Afai e manaʻomia e le mataupu le faamalosi, aua la le faavaivaiina le taulimaga e ala i le tautala atu i se leo lemū. Mo se faaaʻoaʻoga, afai o e faitauina ni taʻusalaina mai i le Tusi Paia, e ao la ona malosi lou leo na i lo le leo e faitau ai le fautuaga i le faaalia o le alofa. Fetuunaʻi lou leo i le mataupu, ae faaeteete aua le faia i se auala e uaʻi mai ai manatu iā te oe.

Manatunatu i Lou Sini. Afai e te manaʻo e faagaeetia lau aofia i galuega maelega, e ono manaʻomia la ona e faaaogā se leo malosi. Afai e te manaʻo e sui o latou manatunatuga, aua la le tataʻieseina i latou e ala i le soona leotele naʻuā. Afai o loo e taumafai malosi e faamāfanafana atu, e masani lava e sili ona lelei se leo lemū.

Le Faaaogāina Lelei o le Leotele.Pe a e taumafai e faauaʻi mai se tagata o loo pisi tele, e manaʻomia la ona e leotele. E iloa lelei e mātua le mea lenei, latou te leo tetele ai la pe a valaau atu i a latou fanau pe a oo i le taimi e lava ai le taaalo ae ō mai i le fale. E ono talafeagai foʻi le leotele pe a faatoʻafilemuina e se taʻitaʻifono se sauniga a le faapotopotoga po o se fonotaga. A o auai tagata talaʻi i le faiva i le fanua, e latou te ono valaau e faafeiloaʻi atu a o faalatalata atu i tagata o loo galulue i fafo.

E tusa lava foʻi po ua uaʻi mai le tagata iā te oe, e tāua le faaauau ona faaaogā pea se leo talafeagai. Afai e lē malosi le leo, e ono foliga atu ai la e faapea e lē lava sauniuniga a le failauga po o le leai foʻi o se mautinoa i le mataupu.

Pe afai e avatu ai se faatonuga, o le leotele la e mafai ona uunaʻia ai tagata e gaoioi. (Galu. 14:9, 10) E faapena foʻi i se faatonuga e leotele ona fai atu, e ono taofia ai se puapuaga. I Filipi na taumafai ai se pule o le falepuipui e fasioti o ia lava ona o lona manatu ua sosola ana pagota. “Ua alaga Paulo ma le leo tele, ua faapea atu, ‘Aua neʻi faia e oe se mea e leaga ai oe; auā o iinei i matou uma lava.’” O lenā mea na taofia ai le pule i le ola na semanū e tupu. Ona molimau atu lea o Paulo ma Sila i le pule o le falepuipui ma lona aiga, ma na latou taliaina uma le upu moni.—Galu. 16:27-33.

Le Auala e Faaleleia ai Lou Leo. O nisi tagata e manaʻomia ni taumafaiga faaopoopo ina ia faamasani ai i le auala e faaaogā ai le leo talafeagai. E ono lē lava le leo e tautala ai se tagata ona e vaivai lona leo. Peitaʻi, a fai taumafaiga e mafai ona faaleleia, e ui lava atonu e tumau pea le vaivai o lona leo. Ia uaʻi atu i lau mānava ma le auala e te tū ai. Faataʻitaʻi le nofo ma le tū saʻo. Fālō i tua ou tauʻau, ma mānava umi. Ia faamautinoa ua oo lelei lau mānava i le pito i lalo o ou māmā. O le lelei ona pulea o le ʻea lea e maua mai i le māmā, e mafai ai ona faatonutonuina lou leo pe a tautala.

O isi, o le faafitauli o le leo tetele naʻuā pe a latou tautatala. Atonu o se masaniga na māfua mai ona e latou te galulue i fafo pe i se siʻomaga e pisa tele. I le isi itu, atonu na latou soifua mai i se vaipanoa e leo tetele tagata ma o se tulaga masani le tele o mea e faasalavei ai le tautala. O le iʻuga la, ua latou manatu na pau lava le auala e auai ai i se talanoaga o le talanoa leotele lea na i lo isi. A o faasolosolo ina latou utagia le fautuaga a le Tusi Paia ina ia oofu i latou i “le alofa mutimuti vale, ma le agalelei, ma le loto maulalo, ma le agamalu, ma le onosai,” o le a latou faia fetuutuunaʻiga i le leo latou te faaaogāina pe a talanoa ma isi.—Kolo. 3:12.

O le lelei o sauniuniga, le poto masani e maua mai i le auai e lē aunoa i le auaunaga i le fanua, atoa ai ma le tatalo iā Ieova, o le a fesoasoani ai iā te oe ina ia e tautala i se leo talafeagai. Pe e te talanoa atu mai i le pulelaa pe i se isi i le faiva i le fanua, taumafai malosi e taulaʻi atu ou manatu i le auala e mafai ona fesoasoani ai i le isi tagata e ala i lona faalogo mai i mea o loo e fai atu ai.—Faata. 18:21.