Fesuiaʻiga o le Leo

O LOU faaaogāina o faamamafaga faigofie o le uiga, e fesoasoani ai i se aofia e malamalama i mea o loo e fai atu ai. Peitaʻi pe a lelei ona e faaaogā ituaiga eseese o le telē ma le laʻitiiti, le saosaoa, ma le malosi o le leo, e ono faaosofia ai le fia faalogologo atili i lau lauga. E sili atu i lenā, e ono taʻu atu ai i lau aofia ou lagona e faatatau i mea o loo e fai atu ai. O ou uiga faaalia i le mataupu e mafai ona aafia ai o latou faalogona agaʻi i ai. O le auala lenā e oo i ai e tusa lava po o e talanoa atu mai i le pulelaa pe i se tagata i le faiva i le fanua.

O le leo o le tagata o se meafaigaluega ofoofogia lea, e mafai ona faia mea e tele. A saʻo ona faaaogā, e mafai ona ola ai se lauga, e pāʻia ai le loto, e faagaeetia ai faalogona, ma uunaʻia ai e gaoioi. Peitaʻi, e lē mafai ona fai le mea lenei i le tau lava ina faailoga o au faamaumauga ina ia iloa ai po o fea le vaega e fetuunaʻi ai le telē ma le laʻitiiti o le leo, e sui ai le saosaoa, pe fetuunaʻi ai le malosi o le leo. O le faia faapena o fesuiaʻiga, o le a lē lagonaina ai le leo i se tulaga e pei ona masani ai. Na i lo le ola ma felanulanuaʻi ai o lau taulimaga, e ono faapogaia ai le lē mautonu o lau aofia. O le saʻo ona faaaogāina o fesuiaʻiga o le leo e sau mai le loto.

Afai e atamai ona faaaogā, o le a lē faapogaia e fesuiaʻiga o le leo se uaʻi mai lē talafeagai i le failauga. Na i lo lenā, o le a fesoasoani i le aofia ina ia latou malamalama ai i le agaga moni o le mataupu o loo talanoaina.

Fetuutuunaʻi le Telē po o le Laʻitiiti o le Leo. O se tasi o faiga e faaeseese ai le auala e faaleo atu ai au faamatalaga o le fetuutuunaʻi lea o le telē po o le laʻitiiti o lou leo. Peitaʻi e lē tatau ona faauiga lenei mea i le tau lava ina avea o se masaniga le faaleotele pe faaleo laʻitiiti o le leo. O lenei faiga o le a sala ese ai mai le uiga o mea o loo e fai atu ai. Afai e sii soo i luga lou leo, e ono lē lelei ai i se faalogo.

E ao ona fua le talafeagai o le telē po o le laʻitiiti o lou leo i le mataupu. Pe e te faitauina se faatonuga faanatinati, e pei o lea e maua i le Faaaliga 14:6, 7 po o le Faaaliga 18:4, ia po o se faailoaga o se talitonuga malosi, e pei ona faamauina i le Esoto 14:13, 14, e fautuaina le talafeagai ona faaleotele o lou leo. E faapena foʻi la, pe a e faitauina se taʻusalaina malosi mai i le Tusi Paia, e pei o lea e maua i le Ieremia 25:27-38, o le fesuisuiaʻi o le telē po o le laʻitiiti o lou leo o le a faamatilatila ai nisi o faaupuga mai i isi faaupuga.

Ia amanaʻia foʻi lou sini. Po o e manaʻo e uunaʻia lau aofia ina ia gaoioi? Pe e te manaʻo e faamatilatila atu manatu autū o lau taulimaga? O se leo e matuā leotele atu, ae faaaogā ma le faautauta, e mafai ona fesoasoani e ausia ai nei sini. Ae peitaʻi o le tau lava ina sii i luga le telē o lou leo e ono lē ausia ai lou sini. E faapefea? O mea ia e te fai atu ai atonu e manaʻomia ai le māfana ma faalogona na i lo le sii i luga o le leo. O le a tatou talanoaina le mea lenei i le Suʻesuʻega e 11.

Pe a faaaogā ma le utaga mamao, e mafai e le faaleo laʻitiiti ona faapogaia ai le naunau mai. Peitaʻi e masani lava ona manaʻomia ai i lenā faiga se ituaiga o leo e matuā faamaʻoti atu a o taʻua mea ia o le a sosoo mai ai. O se leo laʻitiiti ae matuā faamaʻoti ona faaleoina e mafai ona faaaogā e faaoo atu ai faalogona popole po o le fefe. O le faaitiitia o le leo e ono mafai foʻi ona faaaogā e faailoa mai ai e faapea, o mea ia o loo e fai atu ai e itiiti se aogā pe a faatusatusa i manatu o loo siʻomia ai. Peitaʻi afai e te leo laʻitiiti lava i taimi uma, e ono faailoa atu ai e te lē o mautonu pe e leai sou mautinoa pe e leai foʻi sou fiafia moni i lau mataupu. E mautinoa lava la, o ni ituaiga o leo e fai lava sina vaivai e manaʻomia ona faaaogā ma le faautauta.

Sui le Saosaoa o Lou Leo. I le tautala i aso faisoo, e leai se faalētonu o le oso mai o upu a o tatou faamatala atu o tatou manatu. Afai tatou te lotopopole pe lotofiafia foʻi, e tele ina vave la tatou tautala. Afai tatou te mananaʻo i isi e manatua mea tonu lava tatou te fai atu ai, ona faalemu lea o la tatou tautala.

Peitaʻi, e lē toʻatele ni failauga fou e mafai ona latou fetuutuunaʻia le saosaoa o la latou tautala atu mai i le pulelaa. Aiseā? Ua uaʻi tele atu a latou sauniuniga i a latou faaupuga. Atonu o upu uma lava ua tusia i lalo. E ui lava e lē o fai atu se lauga i se manusikulipi, ae atonu ua toetoe lava tauloto upu. O le mea e iʻu i ai, o le a taulimaina e tai pei o se solo faamatalaga uma o loo e taʻua. O le faamasani e lauga atu mai i se auivi o le a fesoasoani e faaleleia ai lenei vaivaiga.

ʻAlofia le faafuaseʻi lava ona faasaoasaoa lau tautala e tai pei o se pusi ua faafuaseʻi ona oso ese pe a vaai atu i se taʻifau. Ma aua lava neʻi vave lau tautala ina nei āfaina ai le faaleoina o au upu.

Ina ia mafai ona faaeseese le saosaoa o lau tautala, aua le tau lava ina faatopetope ma faagesegese i vaega na e masani ona mālōlō ai. O se ituaiga o taulimaga faapena o le a lē faamamaluina ai le mataupu o loo e tauaaoina. E ao ona fetuunaʻi suiga o le saosaoa i le mataupu o loo e fai atu ai, o faalogona o loo e manaʻo e faaoo atu, atoa ai ma lou sini. Tauaao lau lauga i se saosaoa talafeagai. Ina ia faailoa atu le fiafia po o le popole, ia faavavevave le tautala, e pei lava ona e faia ai i le soifuaga i aso faisoo. O le mea lava lea e fai pe a taʻua manatu e lē tāua naʻuā, po o le toe faamatala foʻi o tala na e lē tāua tele ni mea na tutupu ai. O le a fesoasoani le faiga lenei ina ia mafai ai ona faaeseese auala e faaleo atu ai manatu ma fesoasoani ai ina ia lē avea le mataupu o le lauga o se mea ua matuā matuiā lava. I le isi itu, o manatu e sili ona tāua, o manatu autū ma tumutumuga i taulimaga e masani lava e manaʻomia ai le faagesegese o lau tautala.

Fesuisuiaʻi le Malosi o Lou Leo. Seʻi manatunatu i se tagata ua itula pe sili atu o ia tāina se mea fai musika. I lenā taimi atoa, e na o le tasi lava le nota o loo ia tāina—na muamua faaleotele, ona faifai mālie ifo lea, o nisi taimi ua faasaoasaoa, ona toe faagesegese lea. E mafai ona fesuisuiaʻi i le faaleotele, faaleo laʻitiiti, ma fesuisuiaʻi le saosaoa, ae afai e lē mafai ona fesuisuiaʻi le malosi o le leo (pitch), e lē matuā mālie la le “musika” i le faalogo. E faapena foʻi pe a lē fesuisuiaʻia le malosi o o tatou leo, o le a lē fia faalogo mai foʻi se isi i o tatou leo.

E ao ona manatua o suiga i le malosi o le leo e lē tutusapau o latou aafiaga i gagana uma. I se gagana e fesuisuiaʻi ituaiga o leo e faaaogā ai (tonal), e pei o le faa-Saina, o le fesuiaʻi o le malosi o le leo (pitch) e ono suia ai le uiga o se upu. Ae ui i lea, e oo lava foʻi i se gagana faapena, e iai mea e mafai e se tagata ona fai ina ia atili ai ona tele ni fesuisuiaʻiga i le faaleoina atu o ana faamatalaga. E mafai ona galue ina ia faaleleia le mamao e oo i ai le lagonaina o lona leo, a o faatumauina pea le tulaga e tatau ona iai ituaiga o leo eseese. Ona mafai lea ona faamalosi pe afai o ni ituaiga o leo e maualuga pe faavaivai pe afai o ni ituaiga o leo e maualalo.

E oo foʻi i gagana e taotasi lava le ituaiga o leo e faaaogā ai, o le fesuiaʻiga i le malosi o le leo e ono faailoa atu ai ni manatu eseese. O se faaaʻoaʻoga, o le faamalosi teisi o le leo ma ia faaleotele, o faiga na e mafai ona faaaogā e faamamafa ai le uiga o se manatu o loo taʻua. Ia po o se suiga i le malosi o le leo e ono faailoa atu ai le telē po o le laʻitiiti o se mea, po o le mamao foʻi pe latalata. O le sii i luga o le malosi o le leo i le faaiʻuga o se fuaiupu e ono faaalia ai o se fesili o loo fai atu. O nisi gagana e ono manaʻomia ai le faapaʻū ifo o le malosi o le leo.

O le fiafia ma le aasa e mafai ona faaalia i le sii i luga o le leo. (I se gagana e fesuisuiaʻi ituaiga o leo e faaaogā ai (tonal), e ono manaʻomia le fesuisuiaʻi o le maualuga o le leo.) O le faanoanoa ma le popole e ono laʻitiiti ai le malosi o le leo. (Pe i se gagana e fesuisuiaʻi ai le ituaiga o leo e faaaogā, e tau lē fesuisuiaʻi tele le leo.) O faalogona o loo taʻua i inei e mafai ona fesoasoani i le failauga ina ia pāʻia le loto. Afai e te manaʻo e faaali atu na faalogona, aua la le tau lava ina taʻua upu. Faaaogā lou leo i se auala e faaalia ai e te lagonaina foʻi faalogona na.

Faataatia se Faavae. O fea la le taimi e amata ai fesuiaʻiga o le leo? Pe a filifilia le mataupu o lau lauga. Afai e na o manatu faatutū lava e te faaaofia ai ia pe na o timaʻiga foʻi, o le a lē tele la se avanoa e fesuisuiaʻi ai lau taulimaga. O lea la ia iloilo lelei lau auivi, ma faamautinoa ua iā te oe mea e manaʻomia ina ia manino ai ma aogā lau taulimaga.

Seʻi faapea a o faagasolo lau lauga, ua e manaʻo e faamalosi atili ona ua fai si pē laʻitiiti o lau taulimaga. O le ā le mea e fai? Sui le auala o lau taulimaga. E faapefea? O se tasi o auala o le tatala o le Tusi Paia, valaaulia le aofia e tatala a latou Tusi Paia, ma faitau se mau na i lo le na ona tautala. Ia po o le faafesili foʻi ona fai atu se faamatalaga, ma ia mānava e mālōlō ina ia faamamafa ai le manatu. Tuu i ai se tala faatusa faigofie. O nisi nei o mea e fai e failauga ua iai le poto masani. Ae po o le ā lava le mea e te faia, e mafai ona e faaaogā manatu lava na pe a sauniunia lau mataupu.

E mafai ona faapea atu o le fesuiaʻiga o le leo o se mea e faamanogi manaia ai se lauga. Afai e saʻo le fesuiaʻiga o le leo e faaaogā ma saʻo foʻi le telē e faaaogā ai, o le a maua atoatoa ai aogā o lau mataupu ma avea o se lauga e fiafia i ai lau aofia.