Le Filifilia o Upu

O UPU o ni meafaigaluega malolosi mo fesootaʻiga. Peitaʻi ina ia mafai e a tatou upu ona faataunuuina se fuafuaga patino, e manaʻomia ona tatou filifilia ma le faaeteete. O se upu atonu e talafeagai i se tasi tulaga e ono iai se aafiaga leaga pe a ese le tulaga o loo iai. Afai e sesē ona faaaogāina, e ono avea se faaupuga mālie ‘o se upu e faatigā ai.’ O le faaaogāina o faaupuga faapena e ono māfua i le lē mafaufau lelei, e aliali mai ai le leai o se amanaʻiaina o isi. O nisi faaupuga e uigalua, o se tasi o na uiga atonu e faaita tagata ma vaai maulalo ai i isi. (Faata. 12:18; 15:1) I le isi itu, “o le upu lelei”—se upu e momoli atu ai le faalaeiauga—e avatu ai le fiafia i le loto o lē o loo fai atu i ai. (Faata. 12:25) O le mauaina o upu saʻo e alu ai taumafaiga, e oo lava i se tagata atamai. Ua taʻu mai iā i tatou e le Tusi Paia e uiga iā Solomona e faapea, na ia amanaʻia le manaʻoga e saʻili atu mo “upu e faafiafia aʻi” ma ‘upu tonu o le upu moni.’—Fai. 12:10.

I nisi gagana, e iai faaupuga patino e faaaogā pe a talanoa atu iā i latou ua matutua po o i latou e i tulaga pule, ae e ese faaupuga e faaaogā pe a talanoa atu i se tasi lua te tupulaga po o i latou e laiti ifo. O le lē amanaʻia o na tulaga e manatu i ai o le lē faaaloalo. O se tulaga lē talafeagai foʻi le faatatau atu i se tagata lava ia o ni faaupuga faaaloalo ua tuuesea e se aganuu mo isi. I le mataupu e faatatau i le faaalia o le ava, ua faataatia e le Tusi Paia se tulaga maualuga na i lo tapulaa e manaʻomia e se tulafono po o se aganuu foʻi. O loo uunaʻia Kerisiano ina ia “ava i tagata uma.” (1 Pete. 2:17) O i latou e faia lenei mea mai le loto, latou te talanoa atu i tagata po o le ā lava le matua i se auala e faaalia ai le faaaloalo.

E mautinoa lava, e tautatala le toʻatele o tagata o ē e lē o ni Kerisiano i gagana lē faaaloalo ma matagā. E latou te ono manatu o le tautatala faapena e avatu ai le faamamafaga i mea o latou fai atu ai. Ia, pe ua na ona atagia mai ai foʻi o lo latou lē mauupu. Afai sa masani ona faaaogā e se tasi lenā ituaiga tautala a o ia leʻi aʻoaʻoina ala o Ieova, e ono faafaigatā la iā te ia ona toe taofia lea masaniga. Ae ui i lea, o se mea e mafai ona fai. E mafai ona fesoasoani le agaga o le Atua i se tasi e suia le auala e tautala ai. Peitaʻi, e ao i le tagata lava ia ona lotomalie e faia se lisi o upu e tumu i upu lelei—upu e taʻu atu ai mea e logolelei, upu e ati aʻe ai—ona faaaogā loa lea i taimi uma.—Roma 12:2; Efe. 4:29; Kolo. 3:8.

Gagana e Faigofie Ona Malamalama Ai. O le manaʻoga autū i le lelei o le tautala o le faigofie lea ona malamalama. (1 Kori. 14:9) Afai e lē malamalama moni lava lau aofia i upu o loo e faaaogāina, i o latou manatu e pei oe o se tagata o loo tautala i se gagana ese.

O nisi upu e iai uiga patino i tagata o se matātā faapitoa. Atonu o na upu latou te faaaogāina i aso uma. Peitaʻi a sesē le tulaga e te faaaogāina ai na upu e ono faalētonu ai lou tomai e fesootaʻi ai. E lē gata i lenā, e ui lava o faaupuga masani o loo e faaaogā, afai e te taulaʻi atu i ni auʻiliʻiliga laiti e aunoa ma se māfuaaga, e ono faigofie lava ona uaʻi atu manatu o lau ʻaufaalogologo i isi mataupu.

O se failauga e magafagafa na te filifilia upu e malamalama uma ai, e oo lava iā i latou e lē lelei aʻoaʻoga. I le faaaʻoaʻo atu iā Ieova, na te faaalia le magafagafa mo “le tagata maulalo.” (Iopu 34:19, NW) Pe afai e filifili le failauga e faaaogā se upu e lē masani ai, e ao la ona faaaogā faatasi ma ni faaupuga faigofie ina ia manino ai le uiga.

E sili atu ona uigā upu faigofie e lelei ona filifilia e faamanino ai manatu. O fuaiupu pupuu ma faaupuga faigofie e malamalama gofie i ai. E mafai ona tovā i ni fuaiupu uumi ina ia aua ai neʻi faalavelaveina ai le taulimaga. Peitaʻi mo manatu e faapitoa lava ona e manaʻo i lau aofia ina ia manatua, filifili upu e faigofie ma fuaiupu e tuu saʻo.

Ia Fesuisuiaʻi ma ia Saʻo Faaupuga. E fau ma soloi upu lelei. Na i lo le faaaogāina o le faaupuga lava e tasi i tulaga uma, fesuisuiaʻi upu e faaaogā. O le faia faapea e lē gata o le a manaia ai lau talanoa ae o le a uigā foʻi. E faapefea ona e faateleina lau lisi o upu?

Pe a e faitau, faailoga so o se upu e te lē malamalama lelei i lona uiga, ona suʻe lea i se lomifefiloi pe afai e maua i lau gagana. Filifili ni nai upu faapena e te lē masani ai, ona fai lea o se taumafaiga naunautaʻi e faaaogā pe a talafeagai ai. Ia faamautinoa ua saʻo le faaleoina ma ia faaaogā i se tulaga o le a faigofie ai ona malamalama na i lo le na ona tosina i ai o manatu. O le faateleina o lau lisi o upu o le a mafai ai ona fesuisuiaʻi lau tautala. Ae e manaʻomia ona faaeteete—afai e sesē ona faaleo pe sesē ona faaaogā ni upu, e ono manatu ai isi e faapea e lē o malamalama le tagata i mea o ia tautala i ai.

O la tatou fuafuaga i le faateleina o le lisi o upu, o le taʻuina atu lea o se mataupu, ae lē o le faaofo ai o la tatou ʻaufaalogologo. O le tautala i upu lavelave ma le uumi e ono uaʻi atu ai manatu i le failauga. O lo tatou faanaunauga o le taʻu atu o faamatalaga aogā ma fai ia logo lelei iā i latou o loo faalogologo i ai. Ia manatua le faataoto a le Tusi Paia: “O laulaufaiva o e popoto e faafiafia tagata i le poto.” (Faata. 15:2) O le faaaogāina o upu lelei, o upu talafeagai e faigofie ona malamalama i ai, e fesoasoani lea i le avea o a tatou talanoaga ma mea e faafouina ma faagaeeina ai, na i lo le pē ma lē manaia i se faalogo.

A o e faateleina lau lisi o upu, uaʻi atu ma le faaeteete i le faaaogāina o upu saʻo. Atonu e talitutusa le uiga o ni upu se lua, peitaʻi e iai sina eseesega laʻitiiti pe a faaaogā i se isi tulaga e ese atu. Afai e te mātauina le tulaga lenei, o le a mafai ai la ona e faaleleia le manino o lau tautala ma ʻalofia ai le faaitaina o lau aofia. Ia faalogologo lelei i tagata o ē e lelei a latou tautala. O nisi lomifefiloi e lisi i lalo ifo o upu taʻitasi ia isi upu e fesootaʻi i ai (o upu e taitutusa uiga ae e lē tutusapau) faapena foʻi ma o latou tuufaafeagai (upu e tai tuufaafeagai uiga). O le faia faapea e lē gata o le a iai se fesuiaʻiga i faaupuga mo le manatu lava e tasi, ae o le a iai foʻi sona uiga e ese laʻitiiti mai lava. E aogā tele le faiga lenei pe a e saʻilia se upu saʻo mo se tulaga faapitoa. A o leʻi faaopoopoina se upu i lau lisi o upu, faamautinoa ua e iloa lona uiga, le auala e faaleo ai, ma o fea le taimi e faaaogā ai.

O faaupuga e patino e sili atu ona manino lona uiga na i lo o faaupuga e lautele lona uiga. E ono faapea mai se failauga: “I le taimi lenā, e toʻatele tagata na mamaʻi.” Pe faapea mai foʻi: “I ni nai masina lava talu le Taua Lona Lua a le Lalolagi, tusa e 21,000,000 tagata na maliliu i le fulū Sepania.” E matuā telē se eseesega i le faamalamalama lelei e le failauga o le uiga o lana faamatalaga “i le taimi lenā,” “e toʻatele tagata,” ma le “na mamaʻi”! O lou tautala atu i lenei auala e manaʻomia ai lou silafiaina o mea moni e fesootaʻi i lau mataupu atoa ai ma le filifilia ma le faaeteete o upu.

O le faaaogāina foʻi o upu saʻo e fesoasoani iā te oe ina ia manino le manatu e aunoa ma le faataamilo. O le tele o upu e lē manino ai manatu. A faafaigofie o le a lē faigatā ai i isi ona maua ma taofi mea moni tāua. E fesoasoani e faailoa atu ai le poto saʻo. Sa matilatila le aʻoaʻo atu a Iesu Keriso ona o le faigofie o le gagana. Ia aʻoaʻo mai iā Iesu. (Tagaʻi i faaaʻoaʻoga o loo faamauina i le Mataio 5:3-12 ma le Mareko 10:17-21.) Ia faataʻitaʻi ona e talanoa manino atu i le faaaogāina o upu ua filifilia lelei.

O Upu e Faaoo Atu ai le Malosi, Faalogona, ma se Ata Manino. A o e faateleina lau lisi o upu, manatunatu e lē gata i upu fou ae faapea foʻi ma upu e iai uiga patino. Iloilo mo se faataʻitaʻiga, ia veape e faamatalaina ai le malosi; o upu faamatala e maua ai se ata manino; ma faaupuga e faaalia ai le māfana, o loo iai se lagona agalelei, pe faaoo atu ai se lotonaunau.

O loo tumu le Tusi Paia i faaaʻoaʻoga o gagana uigā faapena. E ala i le perofeta o Amosa, na pulunaunau mai Ieova e faapea: “Saili i le lelei, a e le o le leaga . . . ʻInoʻino i le leaga, a e loto atu i le lelei.” (Amo. 5:14, 15) Na faalauiloa atu e le perofeta o Samuelu i le tupu o Saulo e faapea: “Ua saeia e Ieova le malo o Isaraelu nai ia te oe i lenei aso.” (1 Samu. 15:28) Ina ua fetalai atu iā Esekielu, na faaaogā e Ieova se gagana e faigatā ona faagaloina, i lona tulei atu e faapea: “Aua ua muaulu malō, ma loto maaa le aiga uma o Isaraelu.” (Eseki. 3:7) I le faamamafaina o le matuiā o mea sesē a Isaraelu, na fesili atu Ieova e faapea: “Pe faoa e le tagata mea a le Atua? a o outou, ua outou faoa aʻu mea.” (Mala. 3:8) I le faamatalaina o le tofotofoina o le faatuatua i Papelonia, sa manino le lipotia mai e Tanielu e faapea “ona tumu ai lea o Nepukanesa i le ita tele” ona e leʻi tapuaʻi Sataraka, Mesako, ma Apeteniko i lana tupua, o lea na ia faatonu ai ina ia fusifusia i latou ma lafoina i “le ogaumu e mu ai le afi.” I le fesoasoani mai iā i tatou ina ia malamalama i le aasa tele o le afi, fai mai le lipoti a Tanielu na faatonu e le tupu ona tagata ina ia “faaaasa le ogaumu, ia faafitu ona sili i le ua masani ai ona tafuina”—o le aasa tele o le ogaumu na iʻu ai ina feoti tagata a le tupu ina ua latou latalata atu i le ogaumu. (Tani. 3:19-22) I le talanoa atu i tagata i Ierusalema i nai aso a o lumanaʻi lona maliu, na fetalai atu Iesu ma lagona loloto e faapea: “Ua tele lava oʻu manao e faapotopoto i lau fanau, e pei o le moa ona ofaofatai i lana toloai i lalo i ona apaau a e lei mafafai outou. Faauta, ua tuua lo outou fale, e faatafunaina.”—Mata. 23:37, 38.

O upu e filifili faalelei e mafai ona faaoo atu ai vaaiga manino faalemafaufau i lau ʻaufaalogologo. Afai e te faaaogā upu e talafeagai i lagona, o le a mafai e lau ʻaufaalogologo ona “vaai” ma “paʻi atu” i mea o loo e taʻua, “tofo” ma “sogisogi” i taumafa o loo e faasino atu i ai, ma “lagonaina” leo o loo e faamatalaina atoa ma tagata o loo e taʻua. O le a matuā uaʻi atoatoa mai le aofia i mea o loo e taʻua auā na e fesoasoani i ai ina ia ola mai nei mea i o latou mafaufau.

O upu e manino le faaooina atu ai o manatu e mafai ona faapogaia ai tagata e featai pe fetagisi. E mafai ona latou faagaeeina le faamoemoe, e faamalosia ai le tagata lotomafatia i se faanaunauga ia ola ma faagaeeina ai iā te ia le alofa i Lē na Foafoaina o ia. Ua matuā aafia lava tagata i le lalolagi i le faamoemoe o loo taʻu mai e upu o loo i vaega o le Tusi Paia e pei o le Salamo 37:10, 11, 34; Ioane 3:16; ma le Faaaliga 21:4, 5.

A o e faitauina le Tusi Paia ma lomiga a “le auauna faamaoni ma le mafaufau,” o le a e mātauina ai le anoano o upu ma fasi fuaiupu eseese. (Mata. 24:45) Aua le tau ina faitau ona faagalogalo lea. Filifili ni upu e te fiafia i ai, ona taumafai lea e faaaogā i lau tautala i aso faisoo.

Tautalaga e Tusa ma Tulafono o le Kalama. E mātauina e nisi tagata le lē fetaui i taimi uma o la latou tautala ma tulafono o le kalama. O le ā la e mafai ona latou fai i lenei mea?

Afai o lenā lava e te aʻoga, faaaogā lelei le avanoa i le taimi lenei e aʻoaʻo ai ia lelei le kalama atoa ma le filifilia ma le faaeteete o upu. Afai e te lē malamalama i se māfuaaga o se tulafono patino tau i le kalama, fesili i lou faiaʻoga. Aua neʻi aʻoaʻoina tau o sina vaega o le kalama e te manatu o loo manaʻomia. O loo iā te oe le faanaunauga e lē o i isi tamaiti aʻoga. E te manaʻo ia avea oe ma faifeʻau uigā o le tala lelei.

Faapefea pe afai ua e matua ma ua e soifua aʻe ma tautala i se gagana e ese i le gagana o loo e faaaogāina nei? Ia pe faapea foʻi e leʻi iai se avanoa e faateleina ai au aʻoaʻoga i lau lava gagana. Aua le lotovaivai ai. Na i lo lenā, fai taumafaiga faamaoni ina ia faaleleia, ona o le tala lelei. O le tele o mea ua tatou iloa e uiga i le kalama e tatou te aʻoaʻoina e ala i le faalogo i le tautatala a isi. O lea la, faalogologo lelei pe a fai lauga a failauga ua iai le poto masani. Pe a e faitauina le Tusi Paia ma lomiga e faavae i le Tusi Paia, ia manatu mamafa i le auala e faatulaga ai fuaiupu, o upu o loo faaaogā faatasi, atoa ma tulaga o loo faaaogā ai. Faataʻitaʻi lau tautala i nei faaaʻoaʻoga lelei.

E ono faaaogā e tagata lauiloa i faafiafiaga ma tagata pese lauiloa ia faaupuga ma ituaiga tautala e feteenaʻi ma le faaaogāina saʻo o le kalama. E tau faataʻitaʻi atu tagata iā i latou na. E masani i tagata e faatauina fualaau faasāina atoa ma isi o ē o loo ola i ni olaga solitulafono po o le lē mamā tau amio, ona iai a latou lava faaupuga mo talanoaga, e faaaogāina ai upu ma faauigaga e matuā ese lava mai i uiga e masani ai. E lē o se mea atamai i Kerisiano ona faataʻitaʻi i ia ituaiga tagata. A tatou faataʻitaʻi i ai o le a mātaulia faatasi ai i tatou ma ia tagata o le lalolagi ma o latou auala o ola ai.—Ioa. 17:16.

Ia fai ma masani le faaaogā o le tautala lelei i aso uma. Afai e te faataga ona e faatalalē i lau tautala i talanoaga i aso faisoo, aua la e te faatalitalia o le a lelei lau tautala i ni tulaga faapitoa. Peitaʻi afai e lelei ona e faaaogā le tautala i tulaga e masani ai o le soifuaga, o le a faigofie ma avea o se mea e masani ai pe a e tū atu i luga o le pulelaa po o le molimau atu foʻi i isi e uiga i le upu moni.