Faaaogāina o se Auivi o le Lauga

E TOʻATELE tagata e faapopoleina i le manatu o le talanoa atu mai i se auivi. E sili atu ona latou toʻafimālie pe a tusia uma i se pepa faamatalaga o le a latou taʻua po o le tauloto foʻi.

Peitaʻi, o le mea moni lava ia, e tatou te tautatala i aso uma e aunoa ma se manusikulipi. E tatou te faia faapea i talanoaga ma aiga ma uō. E tatou te faia faapea pe a auai i le faiva i le fanua. E tatou te faia foʻi pe a ofo atu tatalo e sau mai le loto, o sau lava tatalo ia pe tatalo foʻi mo se vaega.

Pe a e tauaaoina se lauga, pe e iai se eseesega pe a e faaaogā se manusikulipi po o se auivi? E ui e mafai ona fesoasoani pe a faitau mai i se manusikulipi ua saunia ina ia faamautinoa ai le saʻo lelei ma le faaaogāina o faaupuga na filifilia, ae e lē matuā pāʻia atoatoa ai le loto. Pe a e faitauina e sili atu i ni nai fuaiupu, o le a tele ina e faaaogā le saosaoa o le tautala ma le fesuiaʻiga o le leo lea e ese mai i lau lava talanoa e masani ai. Afai o le a tele lou uaʻi atu i au faamaumauga na i lo lau ʻaufaalogologo, e toʻatele e ono lē faalogologo totoʻa mai e pei o le tulaga e ono iai pe ana latou mātau mai o loo e manatu moni lava iā i latou ma fetuunaʻi lau mataupu ina ia fetaui ma o latou tulaga. Ina ia faagaeeina moni ai i se lauga, e sili ona lelei se taulimaga e lē faavaeina i le upu i le upu.

Ua fuafuaina le Aʻoga o le Faiva Faatiokarate ina ia fesoasoani iā i tatou i le soifuaga i aso uma. Pe a tatou feiloaʻi ma uō, tatou te lē faaaogāina se fasi pepa e faitau atu ai o tatou manatu iā i latou ina ia faamautinoa ua saʻo faaupuga. I le auaunaga i le fanua, tatou te lē ō ma ave se manusikulipi e faitau, ona o le popole ina neʻi o tatou lē manatuaina nisi o manatu tatou te mananaʻo e fetufaaʻi ai ma tagata. Pe a faataʻitaʻia i le aʻoga le auala e molimau atu ai i tulaga faapena, faamasani ona tautala i se tulaga e pei lava ona masani ai. Pe a lelei sauniuniga, o le a e iloaina e faapea o se auivi, i le mafaufau pe e tusia i se pepa, e masani lava ua lava lenā e faamanatu atu ai iā te oe ia manatu autū e te manaʻo e talanoaina. Peitaʻi e faapefea ona e ati aʻe le mautinoa lea e manaʻomia ina ia faaaogāina ai?

Ia Faatulaga Ou Manatu. Ina ia mafai ona faaaogā se auivi pe a tautala, e manaʻomia ona faatulaga ou manatu. E lē o le uiga o lenei mea faapea ia filifili upu ua e fuafua e faaaogā. O lona uiga moni lava o le manatunatu muamua a o leʻi tautala.

I le soifuaga i aso faisoo, o le tagata e vave gaoioi e aunoa ma le mafaufau, e masani lava ona tautala i mea e mulimuli ane toe salamō ai ae ua le aogā ua masaa le ipu vai. O le isi tagata a tautala e fetāaʻi solo faalou lē magā, e osooso solo mai i lea manatu i lea manatu. O tulaga uma nei e mafai ona faafoeina lelei e ala i le mānava ae faatulaga se auivi faigofie i lou mafaufau a o leʻi amata ona e talanoa. Ia tuu i lou manatu lou sini, filifili laasaga e manaʻomia ona e uia ina ia faataunuuina ai, ona amata loa lea ona tautala.

Po o e sauniuni ea mo le auaunaga i le fanua? Faaalu se taimi e lē gata e faamaopoopo ai lau ato talaʻi ae e faatulaga ai foʻi ou manatu. Afai e te filifili e faaaogā se faatomuaga se tasi o loo fautuaina mai i La Tatou Faiva o le Malo, ia faaalu sina taimi e faitau ai ina ia manino i lou mafaufau ia manatu autū. Ia taʻua manatu autū i se fuaiupu po o ni fuaiupu pupuu se lua. Ia fetuunaʻi mai faaupuga ina ia pei o ni au lava faaupuga, atoa ai ma tulaga o mea i lau oganuu. O le a e mātauina le aogā pe a iai se auivi i le mafaufau. O ā mea e ono aofia ai? (1) I le avea ai o se faatomuaga, e te ono taʻua se mea o loo faapopoleina ai le toʻatele o tagata i lau oganuu. Ia valaaulia le tagata e ona le fale e fai mai sona manatu. (2) Ia manatunatu i se mea patino e mafai ona fetufaaʻi ai i le mataupu, e aofia ai se mau se tasi pe lua o loo faaalia ai le mea ua folafola mai e le Atua o le a fai ina ia aumaia ai le mapusaga. Pe a e maua le avanoa, faamamafa atu e faapea o le a faia e Ieova lenei mea e ala i lona Malo, lana pulega faalelagi. (3) Ia faalaeiau le tagata e fai se gaoioiga e faavae i mea sa lua talanoaina. E te ono ofo atu ni lomiga ma/po o se suʻesuʻega faale-Tusi Paia ma fai ni fuafuaga mautū ina ia faaauau ai le talanoaga.

Na pau lava le ituaiga auivi e te ono manaʻomia i taulimaga faapena o se auivi i le mafaufau. Afai e te manaʻo e tagaʻi i se auivi tusia a o leʻi faia lau fale muamua, e ao la i le auivi ona aofia ai tau lava o ni nai upu mo lau faatomuaga, se faailoaga o se mau se tasi pe lua, ma ni nai faamaumauga pupuu o mea e te manaʻo e faaaofia i au upu faaiʻu. O sauniuniga atoa ai ma le faaaogā o se auivi faapena e ʻalofia ai lo tatou tautatala faaumiumi, e fesoasoani iā i tatou e faaoo atu ai se feʻau manino lea o le a faigofie ona manatua.

Afai e iai ni fesili po o ni teteega e masani ona tulaʻi mai i lau oganuu, atonu e lelei pe a fai se suʻesuʻega loloto i le mataupu. O le tulaga masani, na pau lava le mea e te manaʻomia o ni manatu faavae se lua pe tolu faatasi ai ma ni mau e lagolagoina ai manatu. E ono maua le auivi tonu lava lea e te manaʻomia i “Mataupu Faale-Tusi Paia mo Talanoaga” po o ulutala o loo olaola tetele i le Reasoning From the Scriptures. E te ono maua se manatu sii talafeagai mai i se isi lomiga e te manaʻo e faaaofia ai. Tusi i lalo se auivi faigofie faatasi ai ma le manatu sii, ona tuufaatasi lea ma au mea e faaaogā i le auaunaga i le fanua. Afai e lāgā mai e le tagata e ona le fale ia le fesili po o le manatu faatautee, faailoa atu i ai lou fiafia i le avanoa ua maua e taʻu atu ai māfuaaga o lou talitonuga. (1 Pete. 3:15) Faaaogā le auivi e faavae ai lau tali e tuu atu.

Pe afai o lea o le a e tatalo e fai oe ma sui o le tou aiga, se vaega o le suʻesuʻega tautusi, po o le faapotopotoga, e tāua foʻi le faatulaga o ou manatu. E tusa ai o le Luka 11:2-4, na avatu e Iesu i ona soo se auivi faigofie mo tatalo uigā. I le faapaiaina o le malumalu i Ierusalema, sa tatalo ai Solomona mo se taimi umi. E manino mai sa ia muaʻi mafaufau i le mataupu. Sa ia faauaʻi muamua atu manatu iā Ieova ma Lana folafolaga iā Tavita; ona sosoo ai lea ma le malumalu; ona auauaʻi ai lea, o tulaga patino ma vaega o tagata. (1 Tu. 8:22-53) E mafai ona tatou maua aogā mai nei faaaʻoaʻoga.

Ia Faafaigofie le Auivi o Lau Lauga. Pe o fuafua ea e faaaogā lau auivi pe a fai se lauga? O le ā le tele o mea e faaaofia ai?

Manatua o se auivi e fuafua e fesoasoani iā te oe ina ia e manatua ai manatu. E te ono manatu faapea e aogā le tusia o ni nai fuaiupu e faaaogā i lau faatomuaga. Peitaʻi a uma lenā, ia taulaʻi atu i manatu, na i lo o upu. Afai e te tusia i lalo na manatu i ni fuaiupu, e lelei pe a faapupuu fuaiupu. E ao ona matilatila mai i lau auivi nai manatu autū na o loo e fuafua e faalauteleina. E mafai ona fai le mea lenei e ala i le tusia i mataʻitusi lapopoʻa, vase lalo o manatu, pe sui se lanu e tusia ai. I lalo o manatu autū, ia lisi ai manatu e te manaʻo e faaaogā pe a talanoaina. Ia tusi ai ni mau e te fuafua e faitau. E sili ona lelei le faitau saʻo lava o le mau mai i le Tuai Paia. Faailoga ni faaaʻoaʻoga po o tala faatusa e te manaʻo e faaaogā. Atonu foʻi o loo iā te oe se manatu sii mai tagata o le lalolagi e talafeagai i ai. Ia lava le tele o au faamaumauga ina ia maʻoti mai mea moni ia e te manaʻo e faailoa atu. E faigofie foʻi ona faaaogā le auivi pe a saunia lelei.

O isi latou te faaaogāina auivi e patino lava. E ono aofia ai i se auivi na o ni nai upu lava, ni nai faailoaga o mau ia o le a sii tauloto mai e le failauga, ma ni tusitusiga po o ni ata e fesoasoani iā te ia e manatua ai manatu. I nei faamaumauga faigofie, e mafai ai e le failauga ona taulimaina lana mataupu i se faatulagaga saʻo ma se uiga faatalanoa. O le fuafuaga lenā o le lesona lenei.

I itulau e 39 e oo i le 42 o le tusi lenei, e te maua ai le talanoaga “Faia o se Auivi o le Lauga.” E aogā tele pe a e faitauina le mataupu lenā a o e galue i le suʻesuʻega lenei, “Faaaogāina o se Auivi o le Lauga.”

Le Auala e Faaaogā ai le Auivi. Peitaʻi o lou sini lea ua iai nei, e lē na o le tau ina saunia o lau talanoaga lea ua faatulaga o se auivi. E ao foʻi ona uigā le auala e faaaogāina ai le auivi.

O le laasaga muamua i le faaaogāina o lau auivi o sauniuniga mo le taulimaga. Tagaʻi i le matua, faitau manatu autū taʻitasi, ma faamautinoa ua e iloa le fesootaʻiga o manatu autū taʻitasi i le matua. Mātau le taimi e mafai ona talanoaina ai manatu autū taʻitasi. Toe foʻi i tua ma suʻesuʻe le manatu autū muamua. Ia autalu ia faamatalaga, o mau, tala faatusa, ma faaaʻoaʻoga o loo e fuafua e faaaogā e talanoaina ai lenā manatu. Ia autalu ma toe autalu le mataupu seʻi oo ina manino i lou mafaufau lenā vaega o lau lauga. Fai le mea lava lenā e tasi i isi manatu autū taʻitasi. Iloilo po o ā ni manatu e ono tuu ese, pe a talafeagai, ina ia aua ai neʻi ova taimi. A uma lenā ona autalu loa lea o le lauga atoa. Ia uaʻi atu i manatu, ae lē o upu. Aua le taulotoina le lauga.

Pe a e tauaaoina lau lauga, e ao ona mafai ona e faatumauina se fesootaʻiga ma lau aofia e ala i lau vaai. Pe a uma ona faitau se mau, e ao lava ona mafai ona e faamatalaina le mau mai le faaaogāina o lau Tusi Paia ae aunoa ma lou toe vaai i au faamaumauga. E faapena foʻi, pe a e faaaogāina se tala faatusa, faamatala atu e pei ona e faia i au uō na i lo le faitau atu mai i au faamaumauga. A o e tautala atu, aua e te vaai i au faamaumauga mo fuaiupu taʻitasi uma lava. Ia tautala atu mai i le loto, ona e pāʻia ai lea o loto o i latou o faalogologo mai iā te oe.

A oo loa ina e maua le tomai i le talanoa atu i se auivi, o le a e laasia la se laasaga e sili ona tāua i le agaʻi i luma i le avea ma failauga uigā i le lautele.