Tusi o le Tusi Paia Numera 57—Filemoni

Lē na Tusia: Paulo

Nofoaga na Tusia Ai: Roma

Māeʻa Ona Tusia: Pe tusa o le 60–61 T.A.

E MATUĀ naunau Kerisiano i aso nei i le tusi lenei a Paulo o loo faaalia ai le alofa ma le faautaga mamao. E lē gata o le tusi pito i puupuu lea na tusia e le “aposetolo o nuu ese,” ae i le Tusi Paia atoa e na o le Ioane Lona Lua ma Lona Tolu e itiiti ifo i lo le tusi lenei. E lē gata i lenā, e na o le pau lea o le tusi a Paulo na tusia mo “se tagata e toʻatasi,” lea e leʻi avatua faapitoa i se faapotopotoga po o se ovasia, ae na tusi atu i se tagata se toʻatasi, ma sa faailoa atu ai se faafitauli faapitoa na manaʻo Paulo e talanoa ai ma lenei uso Kerisiano o Filemoni, lea e foliga e tamaoaiga ma sa nofo i Ferukia le aai o Kolose, i le ogatotonu o Asia Itiiti.—Roma 11:13.

² O loo faaali ai ma le manino lava le fuafuaga o le tusi: I le taimi na uluaʻi faafalepuipuiina ai o ia i Roma (59-61 T.A.), na iā Paulo se saʻolotoga tele e talaʻia ai le Malo o le Atua. Na aofia ai iā i latou na faalogo i lana talaʻiga, ia Onesemo, o se auauna lea na sola ese mai i le aiga o Filemoni le uō a Paulo. O le iʻuga, na avea Onesemo ma Kerisiano, ma na filifili ai Paulo, ma sa malie foʻi i ai Onesemo, e toe foʻi iā Filemoni. O le taimi foʻi lea na tusi atu ai Paulo i faapotopotoga i Efeso ma Kolose. I nei tusi uma e lua, na ia avatu ai se fautuaga lelei i pologa Kerisiano ma o latou matai i le auala talafeagai latou te feutagaʻi ai. (Efe. 6:5-9; Kolo. 3:22–4:1) Ae sili atu i lenā, na tusi atu e Paulo le tusi iā Filemoni ina ia ʻaiʻoi atu e uiga iā Onesemo. O se tusi na tusia e ia lava—e lē o se mea e masani ona faia e Paulo. (File. 19) O lona lava tusiaina o le tusi na fesoasoani tele lea ina ia talia ai lana ʻaiʻoiga.

³ E foliga mai atonu na tusia le tusi pe ā o le 60-61 T.A., a o talaʻi ai Paulo i Roma i se umi na mafai ai ona ia faaliulotuina nisi. E lē gata i lenā, i le fuaiupu e 22 sa ia taʻua ai lona faamoemoe ia tatalaina o ia mai le falepuipui, lea e tatou te ono manatu ai na tusia lenei tusi i se taimi ina ua mavae lona faafalepuipuiina. E aliali mai o nei tusi e tolu, o le tusi mo Filemoni, ma tusi e lua mo faapotopotoga i Efeso ma Kolose, na auina atu e Tuiko ma Onesemo.—Efe. 6:21, 22; Kolo. 4:7-9.

⁴ Ua faamaonia le tusiaina e Paulo o le Filemoni i le fuaiupu muamua lea o loo taʻua ai lona igoa. O le mea foʻi lenā na taʻua e Origen ma Tetuliano.a E lagolagoina foʻi le moni aʻiaʻi o le tusi, ona o loo lisiina faatasi ma isi tusi a Paulo i le manusikulipi o le Muritorian Fragment o le senituri lona lua T.A.

LE POGAI E AOGĀ AI

⁷ E pei ona taʻua i lenei tusi, e leʻi talaʻia e Paulo se “evagelia faaletagata,” e taumafai ai e aveesea le faiga o mea na iai ma ona faatulagaga, e pei o le avea o se tasi ma pologa. E leʻi aiā Paulo e faasaʻoloto Kerisiano na avea ma pologa, nai lo lenā, na ia toe auina atu Onesemo le pologa lea na sola ese mai i lona matai o Filemoni, i se malaga e pe ā ma le 900 maila mai Roma i Kolose. Na tausisi atu pea Paulo i lona tofiga tāua o se aposetolo, ma tumau mausalī pea i lona tofiga mai le Atua e ‘talaʻi atu le malo o le Atua ma aʻoaʻo atu mea e uiga i le Alii o Iesu Keriso.’—Galu. 28:31; File. 8, 9.

⁸ Ua faailoa mai e le tusi iā Filemoni le alofa ma le autasi lea sa iai i le va o Kerisiano o le uluaʻi senituri. Ua tatou iloa ai, i uluaʻi Kerisiano sa taʻua e le tasi le isi o se “uso” ma se “tuafafine.” (File. 2, 20) E lē gata i lenā, ua faaalia ai mo Kerisiano i aso nei le faatatauga aogā o mataupu silisili i le va o uso Kerisiano. O mea na faia e Paulo, ua tatou aʻoaʻoina ai le faailoaga o le alofa faaleuso, le faaaloalo mo feutagaʻiga e tusa ai ma tulafono ma meatotino a isi, le faautautaga loloto, ma le loto maulalo. Nai lo le taumafai e faamalosia Filemoni e faamagalo Onesemo e ala i le faaaogāina o lana pule o se ovasia taʻimua i le faapotopotoga Kerisiano, na ʻaiʻoi atu ma le loto maulalo Paulo iā te ia, e faavae i le alofa faa-Kerisiano ma la laʻua faauōga. E mafai e ovasia i aso nei ona maua aogā mai le faautautaga poto na iā Paulo i le auala na talosaga atu ai iā Filemoni.

⁹ E mautinoa na faatalitalia e Paulo le taliaina e Filemoni o lana talosaga, ma o le faia faapea e Filemoni o le a avea ma faatatauga aogā o fetalaiga a Iesu o loo taʻua i le Mataio 6:14 ma upu a Paulo i le Efeso 4:32. Ua faatalitalia foʻi Kerisiano i aso nei ina ia agalelei ma faamagalo atu i sesē o o latou uso. Pe afai na mafai e Filemoni ona faamagalo sana pologa o lē sa iai lana aiā faaletulafono e faileaga ai o ia e tusa ma lona manaʻo, e tatau la i Kerisiano i aso nei ona mafai ona faamagalo se uso ua sesē—o se gaoioiga e lē faigatā ona fai.

¹⁰ Na faamaonia le fesoasoani o le agaga o Ieova i le tusiaina o lenei tusi iā Filemoni. Ua faaalia lea i le auala mataʻina na taulimaina ai e Paulo lea faafitauli tugā. Sa faamaonia i uiga alofa faaleuso, le tigā alofa, ma le maufaatuatuaina o se uso Kerisiano lea na faaalia e Paulo. Ua faaalia i mea moni o le tusi iā Filemoni, e pei o isi foʻi tusi o le Tusi Paia, ua aʻoaʻoina mai ai mataupu silisili faa-Kerisiano, le faamalosia o le autasi faa-Kerisiano, ma faaalia ai le alofa ma le talitonuina lea o loo olaola i le “ʻaupaia,” o ē o loo faamoemoe i le Malo o le Atua ma o loo latou faaalia mai le alofa agalelei o Ieova.—Filemoni Fuai. 5.

[Faaopoopoga i lalo]