LESONA 26

E Faapefea Ona Matou Fesoasoani e Tausia Lelei a Matou Maota mo Sauniga?

O ni Molimau a Ieova o loo faamamā la latou Maota mo Sauniga i Estonia — Estonia

O ni Molimau a Ieova o loo faamamā la latou Maota mo Sauniga i Zimbabwe — Zimbabwe

O se tasi o Molimau a Ieova o loo ia faaleleia nisi o mea i se Maota mo Sauniga i Mongolia — Mongolia

O se tasi o Molimau a Ieova o loo valiina se Maota mo Sauniga i Puerto Rico — Puerto Rico

O Maota mo Sauniga uma a Molimau a Ieova o loo tauaveina ai le suafa paia o le Atua. O lea la, e matou te manatu o le aufaatasi i le tausia pea o le mamā o le maota, faamatagofie ma toe faafou i sona tulaga lelei, o se faaeaga ma o se vaega tāua o la matou tapuaʻiga paia. E mafai ona fai se sao o tagata uma.

Tauofo e fai nisi o galuega faamamā pe a uma le sauniga. Pe a māeʻa sauniga taʻitasi, e faia ma le fiafia e uso ma tuafāfine sina galuega faamamā i le Maota mo Sauniga. E faatasi i le vaiaso ona fai se galuega e faamamā atoa ai mea uma. O se toeaina po o se auauna o le faiva e vaaia le galuega, e masani lava ona mulimuli i se lisi o mea e tatau ona fai. E fuafua i le manaʻoga, e tauofo nisi e salu, solo le fola, tafi le pefu, faatulaga lelei nofoa, faamamā ma faamanogi falelētaʻua, solo faamalama ma fāʻata, tiaʻi lapisi, pe faamamā ma tausia lelei le fanua ma fafo o le maota. E faatasi i le tausaga ona fai se galuega tele tuufaatasi mo le faamamāina o totonu ma fafo. E ala i le faaaofia ai o a matou fanau mo nisi o tiute, ua matou aʻoaʻoina ai i latou ia faaaloalo i lo matou nofoaga mo le tapuaʻiga.—Failauga 5:1.

Fesoasoani i le faaleleia o so o se mea o loo manaʻomia. I tausaga taʻitasi, e faia ai se iloiloga māeʻaeʻa o le Maota mo Sauniga, i totonu ma fafo. E tusa ai ma lenei iloiloga, e faia ai e lē aunoa se galuega o le tausia lelei ma siaki pea o le Maota ina ia tumau pea ona lelei, e fesoasoani e ʻalofia ai tupe faaalu e lē manaʻomia. (2 Nofoaiga a Tupu 24:13; 34:10) O se Maota mo Sauniga e mamā ma tausia lelei, o se nofoaga tāua lea e tapuaʻi atu ai i lo matou Atua. E ala i le faia o se sao i lenei galuega, e faaalia ai o loo matou faalatalata atu iā Ieova ma e tāua i o matou loto le nofoaga mo le tapuaʻiga. (Salamo 122:1) O lenei vala o se taaʻiga lelei i tagata o le vaipanoa.—2 Korinito 6:3.

Aiseā e lē tatau ai ona matou faatamala i le nofoaga mo la matou tapuaʻiga?
O ā faatulagaga ua faia ina ia tausisia ai pea le mamā o le Maota mo Sauniga?