Pusa Fesili

◼ O ai e gafa ma le faamamāina o le Maota o le Malo?

O se Maota o le Malo e mamā ma foliga manaia mai e atagia atu ai le matagofie o le feʻau o loo tatou talaʻia. (Faatusatusa i le 1 Peteru 2:12.) O le tausia o le maota ia lelei ma mamā e tāua, ma e mafai e tagata uma ona faia se sao ina ia faatumauina. E lē tatau ona tatou faatalitalia na o ni nai tagata e tauaveina lenei avega atoa. O le mea masani lava, e faamaopoopo galuega faamamā i vaega taʻitasi o Suʻesuʻega Tautusi a le Faapotopotoga, lea e taʻimua ai le faisuʻesuʻega po o lona fesoasoani i lena galuega. I maota ia e sili atu i le tasi le faapotopotoga e faatasitasi ai, o le a faamaopoopo e toeaina lena mataupu ina ia faia se sao o faapotopotoga uma i le tausia o le maota.

E faapefea ona tatou tausia lelei lenei tiute tauave? E tatau ona iai se faasologa faifai pea mo le faamamāina o le Maota o le Malo. E ao ona iai mea e manaʻomia ma meafaigaluega mo le faaaogāina i le faamamāina. E ao ona faapipii se lisi o mea e manaʻomia ona fai i se mea e mafai ona iloa e tagata o le a galulue e avea o se taʻiala. Atonu e iai ni lisi se lua, o le tasi mo le faamamāina lea e masani ona fai pe a maeʻa sauniga taʻitasi (pe a o leʻi amataina le sauniga mo maota e taalaelae) ma le isi mo le faamamāina atoa o mea uma i vaiaso taʻitasi. E tatau i le faisuʻesuʻega ona faatulaga se aso ma le taimi mo le faamamāina atoa o mea uma e talafeagai mo i latou uma ua faatulaga e auai. E tatau foʻi ona tausia pea lava pea le laufanua, o fugālaau, ma laau. E lē tatau ona paepae ni lapisi i ala savali ma le mea e paka ai taavale. I tausaga taʻitasi e moomia ai le faia o se galuega faapitoa tau faamamā, atonu pe a o leʻi faia le Faamanatuga. E ono aofia ai i lenei galuega le fufuluina o faamalama ma puipui, tāina o le kapeta, ma le faamamāina foʻi o ʻiefaamalama.

O le mea moni, e mafai e i tatou uma ona faamāmā le avega e ala i le lē lafoaʻia o pulukamu po o lapisi i totonu po o fafo o le maota. E lē lelei ona faʻigaelo i le faleese pe a maeʻa ona faaaogā, ae ia tuu i se tulaga mamā mo le isi tagata e alu atu i ai. Ia faaeteete ma ʻalofia le faaleagaina o meafaigaluega po o le faaleagaina o meafale. Ia vaai ni pisipisia i le kapeta, ni nofoa ua malepe, faafitauli tau palama, ni matāuila ua pāpā, ma nisi lava mea ua faalētonu, ma ia lipoti vave atu na mea i le uso o loo gafa ma le faaleleia o le Maota o le Malo.

Seʻi tatou naunau uma e faia la tatou vaega. O le a avea ai le maota ma fale e sili ona matagofie o le tapuaʻiga ma faaesea ai i tatou o ni tagata mamā e āva ia Ieova le Atua.—1 Pete. 1:16.