Le Fafine i le Vaipuna

Ina ua mavae sina taimi talu ona uma le Paseka, na toe foʻi ai Iesu ma ona soo i Kalilaia e ui atu i Samaria. E latalata i le aai o Sukara, na mālōlō ai Iesu i se nofoaga e taʻua o le vaipuna o Iakopo. A o mālōlō o ia, na ō ona soo i le aai e faatau mai ni meaʻai.

Na alu atu se fafine i le vaipuna e asu mai ni vai. Na faapea atu Iesu iā te ia: “Aumai sina vai seʻi oʻu inu ai.” Na tali mai le fafine: ʻAiseā ua e talanoa mai ai iā te aʻu? O aʻu o se fafine Samaria. E lē talanoa tagata Iutaia ma tagata Samaria.’ Na faapea atu Iesu: ʻAna e iloa aʻu, semanū ua e ōle mai mo se vai ona ou avatu ai lea iā te oe o le vai o le ola.’ Na fesili le fafine: ʻO le ā le uiga o lau faamatalaga? E leai sau pakete.’ Na tali atu Iesu: ʻO i latou uma e feinu i le vai ou te foaʻiina atu, e lē toe fia inu lava o ia.’ Na faapea mai le fafine: “Lau susuga e, aumai ia iā te aʻu lenā vai.”

Ona faapea atu lea o Iesu iā te ia: ʻIa alu e aumai lau tane.’ Na tali mai le fafine: “E leai saʻu tane.” Na fai atu Iesu: ʻUa saʻo lau tali. Auā e toʻalima au tane sa iai, ma o le tamāloa o loo lua nonofo nei, e lē o sau tane.’ Na faapea mai le fafine: ʻUa ou iloa o oe o se perofeta. E talitonu oʻu tagata e mafai ona tapuaʻi i le Atua i lenei mauga, ae na faapea mai tagata Iutaia e na o Ierusalema e mafai ona matou tapuaʻi ai. Ou te talitonu pe a maliu mai le Mesia, o le a ia aʻoaʻo i matou i le auala e tapuaʻi ai.’ Ona faailoa atu lea e Iesu o se mea e na te leʻi taʻuina lava i se tasi: ʻO aʻu o le Mesia.’

Na alu atu faavave le fafine i lona aai ma faapea atu i tagata Samaria: ʻOu te talitonu ua ou maua le Mesia. E na te iloa mea uma e faatatau iā te aʻu. Ō mai e vaai iā te ia.’ Ona latou mulimuli atu lea i le fafine seʻia oo i le vaipuna, ma faalogologo ai a o aʻoaʻo mai Iesu.

Na valaaulia e tagata Samaria Iesu ina ia nofo i lo latou aai. E lua aso na aʻoaʻo ai Iesu i inā, ma e toʻatele tagata na faatuatua iā te ia. Na latou fai atu i le fafine Samaria: ʻUa matou faalogo i lenei tagata, ma ua matou iloa ai o ia moni lava o le faaola o le lalolagi.’