LESONA 10
E Faapefea Ona E Maua Aogā Mai i Sauniga a Molimau a Ieova?
Pe na valaaulia muamua oe i se sauniga a Molimau a Ieova? Pe afai e te leʻi auai muamua i se sauniga, atonu la o le a e lagona sina popole pe a e auai mo le taimi muamua. Atonu e te fesili ifo: ʻO ā mea e faia i nei sauniga? Aiseā e tāua ai? Aiseā e tatau ai ona ou auai?’ O lenei lesona, o le a e iloa ai pe faapefea i le auaufaatasi ma isi i sauniga, ona fesoasoani iā te oe e vavalalata atu ai i le Atua, ma maua ai aogā.
1. O le ā le māfuaaga sili ona tāua e faatasitasi ai ma isi?
Mātau pe na faapefea ona faailoa mai e se tasi o tusitala o le Tusi Paia, le māfuaaga tāua e faatasitasi ai ma isi: “Ou te vivii atu iā Ieova i totonu o le faapotopotoga tele.” (Salamo 26:12) O le māfuaaga foʻi lenā o le faatasitasi o Molimau a Ieova i aso nei, ma maua ai le olioli. I le lalolagi aoao, e latou te faapotopoto faatasi i vaiaso taʻitasi e tapuaʻi i le Atua, usu viiga ma tatalo. I nisi taimi i tausaga taʻitasi e latou te auai ai i faatasiga tetele mo le tapuaʻiga.
2. O le ā o le a e aʻoaʻoina mai i a matou sauniga?
I a matou sauniga, e matou te aʻoaʻo atu le Afioga a le Atua ma “faamatala atu i se auala faigofie ma manino le uiga.” (Faitau le Neemia 8:8.) Pe a e auai ai, o le a aʻoaʻoina ai oe e faatatau iā Ieova ma ona uiga matagofie. A o faasolo ina e iloa lona alofa mo oe, o le a atili ai ona e vavalalata atu iā te ia. O le a e iloa ai foʻi le auala e fesoasoani mai ai iā te oe, ina ia e maua se olaga faamalieina.—Isaia 48:17, 18.
3. E faapefea ona e maua aogā mai le faatasitasi ma isi i a matou sauniga?
Ua faatonuina i tatou e Ieova e faapea: “Ia tatou manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou.” (Eperu 10:24, 25) I a matou sauniga, o le a e feiloaʻi ai i tagata e manatu mamafa moni i isi, ma i latou e naunau e aʻoaʻo atili e faatatau i le Atua e pei o oe. E latou te fefaalaeiauaʻi i manatu mai le Tusi Paia. (Faitau le Roma 1:11, 12.) O le a e maua foʻi le avanoa e faamasani ai i le ʻau nofofua ma i latou ua faaipoipo, o ē o loo maua pea le fiafia e ui i faafitauli. O nisi na o māfuaaga e finagalo ai Ieova e matou te faatasitasi e lē aunoa!
SAʻILIʻILI ATILI
Iloilo po o ā mea e faia i sauniga a Molimau a Ieova, ma pe aiseā e tāua ai le faia o tatou taumafaiga ina ia auai i na sauniga.
4. Sauniga a Molimau a Ieova
Sa faapotopoto e lē aunoa Kerisiano i le uluaʻi senituri ina ia tapuaʻi iā Ieova. (Roma 16:3-5) Faitau le Kolose 3:16, ona talanoa lea i le fesili lenei:
O ā mea na fai i tapuaʻiga a uluaʻi Kerisiano iā Ieova?
I aso nei, e faapotopoto foʻi e lē aunoa Molimau a Ieova i a latou Maota mo Sauniga. Ina ia iloa mea e fai i a latou sauniga, faaali le VITIŌ, ona tagaʻi lea i le ata o se faapotopotoga o loo fai le latou sauniga ma talanoa i fesili nei:
O ā ni mea na e mātauina e tutusa ai mea o loo faia i le Maota mo Sauniga, ma faamatalaga o loo i le Kolose 3:16?
Na iai se vaega na e mātauina i le vitiō po o le ata, e te fiafia ai e faatatau i sauniga?
Faitau le 2 Korinito 9:7, ona talanoa lea i le fesili lenei:
Aiseā e lē aoina ai e Molimau a Ieova ni peleti i a latou sauniga?
Iloilo faatasi ma lou faiaʻoga mataupu o le isi sauniga e sosoo ai.
O le ā se vaega o le sauniga e sili ona e fiafia i ai, pe aogā foʻi iā te oe?
E te silafia?
E mafai ona e maua nofoaga ma taimi o sauniga i so o se vaega o le lalolagi i luga o le jw.org.
A. E fai i a matou sauniga lauga, toleniga mo le talaʻiga ma le aʻoaʻo atu, ma faaali ai vitiō. E amata ma faaiʻu i le pese ma le tatalo
E. E iai isi vaega o le sauniga e manaʻomia ai ni sao o le aofia
I. E mafai ona auai ai soo se tasi—aiga, o ē nofofua, tagata matutua ma fanau
O. E lē totogia a matou sauniga. E lē aoina e Molimau a Ieova ni tupe po ni peleti
5. E manaʻomia taumafaiga ina ia auai ai i sauniga
Seʻi iloilo le faaaʻoaʻoga a le aiga o Iesu. Ina ia latou auai i se tausamiga faaletausaga, e latou te savavali pe ā o le 60 maila i auala maugā mai Nasareta i Ierusalema. Faitau le Luka 2:39-42, ona talanoa lea i fesili nei:
Pe na manaʻomia ni taumafaiga ina ia malaga ai i Ierusalema?
Aiseā e ono manaʻomia ai ona e faia ni taumafaiga malolosi, ina ia auai ai i sauniga?
Pe e aogā lou auai i sauniga e ui e faigatā? Aiseā?
Ua taʻua i le Tusi Paia, e tāua tele le faapotopoto faatasi e tapuaʻi iā Ieova. Faitau le Eperu 10:24, 25, ona talanoa lea i le fesili lenei:
Aiseā e tatau ai ona tatou auai i sauniga e lē aunoa?
UA FAAPEA MAI NISI: “E lē tau manaʻomia ona faatasitasi ma isi. E mafai a ona faitau le Tusi Paia ma nofo i le fale.”
O le ā se mau po o se faaaʻoaʻoga faale-Tusi Paia o loo faailoa mai ai le finagalo o Ieova e faatatau i lenā manatu?
AOTELEGA
O le auai i sauniga o le a fesoasoani iā te oe e aʻoaʻo atili ai e faatatau iā Ieova, faamalosia ai le lua faauōga ma ia, ma tapuaʻi atu ai iā te ia faatasi ma isi.
Fesili Autalu
Aiseā ua faalaeiauina ai tatou e Ieova ia faapotopoto faatasi?
O le ā o le a e aʻoaʻoina mai i sauniga a Molimau a Ieova?
O ā nisi aogā e te maua mai le auai i sauniga?
MANATU FAAOPOOPO
Ae faapefea pe a e lagona le popole e auai i a matou sauniga? Iloilo pe na faapefea e se tamāloa na manatu faapena, ona maua le fiafia e auai i sauniga.
Na faapefea ona maua e se tama talavou le fiafia i sauniga, ma o le ā na ia faia ina ia auai ai pea e lē aunoa?
Iloilo manatu o isi e faatatau i sauniga.
“Aiseā e Auai ai i Sauniga i se Maota mo Sauniga?” (Mataupu i le jw.org)
Na faapefea ona suia le olaga o se tasi na avea ma sui o se kegi, ina ua auai i se sauniga a Molimau a Ieova?
“Ou te Alu ma Ave Laʻu Fana i Taimi Uma” (Le Olomatamata, Iulai 1, 2014)