AMATAINA O SE TALANOAGA
LESONA 5
Faautauta
Mataupu silisili: “Ia lē aunoa ona outou tautatala atu i upu e logolelei.”—Kolo. 4:6.
Mea na Faia e Paulo
1. Ia matamata le VITIŌ, pe faitau le Galuega 17:22, 23, ona manatunatu lea i fesili nei:
a. O ā ni faalogona o Paulo ina ua vaai atu i tū a lotu sesē na faia i Atenai?—Tagaʻi i le Galuega 17:16.
e. Na faapefea ona faaaogā ma le faautauta e Paulo talitonuga o tagata Atenai e faailoa atu ai le tala lelei, nai lo o le taʻusalaina o i latou?
O le ā e Tatou te Aʻoaʻoina Mai iā Paulo?
2. E sili atu ona fia faalogo mai tagata pe a filifili lelei a tatou upu, faapea le auala ma le taimi e fai atu ai.
Faaaʻoaʻo iā Paulo
3. Ia filifili ni upu faaoso naunau. O se faataʻitaʻiga, pe a talanoa i se tagata e lē o se Kerisiano, e ono manaʻomia ona fetuunaʻi le auala e te faailoa atu ai le Tusi Paia po o le auala foʻi e te talanoa ai e faatatau iā Iesu.
4. Aua le vave ona faasaʻoina le tagata. Ia tuu i ai le avanoa e faamatala mai ai ona manatu. Pe a ia taʻua se manatu e feteenaʻi ma aʻoaʻoga a le Tusi Paia, ia aua le finau atu. (Iako. 1:19) Pe a e faalogologo lelei, o le a e malamalama ai i ona talitonuga.—Faata. 20:5.
5. Ia ioe i manatu o le tagata ma faamālō i ai pe a talafeagai. Atonu i lona manatu e saʻo ona talitonuga faalelotu. Ia talanoa muamua i se mataupu e lua te ioe faatasi i ai, ona faasolosolo lea ona fesoasoani iā te ia ina ia malamalama i aʻoaʻoga a le Tusi Paia.