Faamalologa i la le Faatuatua—Pe mai le Atua?

SA FESILI ATU Iesu i se tagata ua 38 tausaga talu ona maʻi: “E te fia malolo ea?” Ana faapea o oe o le tamāloa lenei, pe o le a e lē tali atu ea ma le naunautai ioe? Na fetalai atu Iesu ia te ia: “Ina tu ia i luga, ave ia lou moega, ma ia e savali.” O ā āuga o na upu? “Ona malolo loa lea o le tagata; ua ave lona moega, ma ua savali.”—Ioane 5:5-9.

O lenei faiga o faamalologa tauatua sa na o le tasi o le tele na faia e Iesu i le taimi o lana faiva i le lalolagi. (Mataio 11:4, 5) Ua faapea mai le au faamalolo i la le faatuatua i aso nei, o loo faia pea e le Atua na ituaiga o faamalologa, ma o loo lagolagoina e le faitau afe o ē ua molimau mai na faamaloloina e i latou.

Eseesega Matuā Tāua

Na faaalia e se suʻesuʻega o le Tusi Paia ni eseesega matuā tāua i le va o faamalologa o loo lipotia mai i le Tusi Paia ma ia na lipotia mai e le au faamalolo i la le faatuatua i aso nei. Mo se faaaʻoaʻoga, o Iesu ma ona soʻo, sa leʻi tuuina atu i ai ni totogi mo a latou faamalologa. “Ua maua fua e outou, ia outou foaifuaina atu,” na aʻoaʻo atu ai Iesu. (Mataio 10:8) I lea na latou mulimuli atu ai i le faaaʻoaʻoga na faataatia e Elisaia, o lē na teena se meaalofa mai le tagata e igoa ia Naamanu o lē na faamaloloina e Elisaia lona lepela. (2 Tupu 5:1, 14-16) O le mea lea, pe a tapā e le au faamalolo i la le faatuatua ni totogi mo a latou auaunaga, ua latou solia la lenei faaaʻoaʻoga faale-Tusi Paia

E aogā foi ona matau faapea o faamalologa na faia i taimi o le Tusi Paia sa lē gata ina vave ona faia a e sa mo sina taimi puupuu. Ina ua iloa atu e le aposetolo o Peteru se tagata “ua pipili talu ina fanau mai,” ona fai atu lea o ia i le tagata: “O le suafa o Iesu Keriso o le Nasareta, ina tu ai ia i luga, ma savali.” Ua faaalia i le faamatalaga faapea: “Ona faamalosia loa lea vae ma ponaponāvae [o le tamaloa pipili]. Ua oso ia i luga ma tu, ua savali foi.” (Galuega 3:1-8) Faitau e oe lava isi faaaʻoaʻoga i le Galuega 5:15, 16 ma le 14:8-10.

A e peitai, o faamalologa a le au faamalolo i la le faatuatua i aso nei, e masani lava ona alu ni aso, vaiaso, po o ni masina faatoʻā aogā! E aogā foi ona matau le mea moni faapea, e naunau lava le au faamalolo e taulaʻi atu i maʻi ua lē gaoioi se vaega o le tino, e pei o le tauaso, pē le tino, po o le tutuli—faamaʻi na e i ai i isi taimi mafuaaga faalemafaufau. Ua matauina e le fomaʻi tipitipi o Paul Brand: “Pe afai ua lē masalosalomia le mea moni o le faaletonu o se totoga—mumutu vae, mata po o le toʻulu o le laulu—e seāseā lava ona faia i ai ni vavega.” A e peitai, na faamalolo e Iesu “maʻi uma, ma maʻi tiga uma,” e aofia ai ma ni faaletonu tau totoga e mautinoa lava na mafua ona o le tulaga faalenatura, e pei o le lima ua gase.—Mataio 9:35; Mareko 3:3-5.

‘E Leai Sou Faatuatua!’

E faanoanoa, o le toatele o tagata e matuā mamaʻi lava o loo auai i ‘tauiviga mo ni faamalologa,’ ua na ona foi atu ai i aiga ua mamaʻi e pei ona i ai muamua. Ua faamatala mai e le au faamalolo i la le faatuatua e uiga i lea lē taulau i lo latou faapea mai, ‘E leai so latou faatuatua!’ Peitai, o lenei mea ua foliga mai o le tau faasese i tagata. E pei ona matauina ai e Dr. William Nolen: “E lē pei o se fomaʻi masani, e lē taitai ona tauaveina e le fomaʻi faataulaitu le avega tauave pe a lē taulau ana faamalologa. E tatau lava ona ou taʻu saʻo atu faapea ou te manao ia ia te aʻu le aiā ou te faia ai se faamolemolega faapena pe a ma feiloai ma se tagata maʻi o lē ua lē mafai ona ou faamaloloina.”

E oo lava i perofeta a le Atua, o Iesu, e oo foi i soʻo o Iesu sa leʻi i ai lava se manaoga e fai atu ai se faamolemolega faapea sa lē mafai ona faamaloloina se tagata maʻi ona ua leai sona faatuatua. E moni, o le leai o se faatuatua atonu ua faatapulaaina ai le aofaiga o tagata na ō mai ina ia faamaloloina. A o i latou sa ō mai, na faamaloloina atoatoa i latou uma!—Mareko 6:5, 6.

O le mea moni, i nisi itu o tagata sa manino lava le leai o se faatuatua sa faamaloloina. Mo se faaaʻoaʻoga, o Naamanu le pule i ʻau a Suria, sa lē talitonu atoa e mafai ona faamaloloina o ia mai lona lepela i le auala na faasino atu ia te ia e le perofeta o Elisaia. A e e leʻi faapea mai seia oo ina ua faatoʻā uma ona faamaloloina o ia: “Faauta mai, ua ou iloa nei e leai se atua i le lalolagi uma, ua na o i Isaraelu lava. (2 Tupu 5:11-13, 15) O lea ua matuā lē taulau lava faamolemolega vaivai a le au faamalolo i la le faatuatua.

Faamalologa—O se Meaalofa ua Mavae ese atu

A e pe e lē moni ea faapea sa taatele meaalofa faavavega o faamalologa i totonu o uluai Kerisiano? (1 Korinito 12:9) Ioe, a e sa i ai mafuaaga lelei mo vavega sa faia i le taimi lena. Sa avea le nuu o Isaraelu faaletino ma tagata filifila o le Atua mo le meleniuma ma le ʻafa; a e i le uluai senituri T.A., na lafoaia ai Isaraelu ona o le leai o sona faatuatua ma na suia ai i le faapotopotoga fou Kerisiano. Sa manaomia e na uluai Kerisiano se fesoasoani e sili atu ona malosi ina ia faamalosia ai lo latou faatuatua ma ia avatu ai se faamaoniga i le lalolagi i fafo faapea sa lagolagoina i latou e Ieova le Atua.

O lea, o meaalofa faavavega, e aofia ai ma le faamalologa, na tuuina atu i le faapotopotoga Kerisiano pei se pepe. Sa avea lenei mea e pei o se faailoga i tagata lē talitonu ma sa avea foi o se auala e atiina aʻe ai le faatuatua o ē ua talitonu. (1 Korinito 14:22) A e peitai, i le toe itiiti lua afe tausaga mulimull ane, ua lē toe pepe ai le faa-Kerisiano. (Faatusatusa le 1 Korinito 13:9-13.) Ua leva lava ona uma ona lomia le Tusi Paia ma ua faasalalauina atu nei i le faitau miliona o kopi. O lea la ua faigofie ai i Kerisiano moni i aso nei ona tataʻi tagata lē talitonu i ona itulau e lagolagoina ai le mea o latou aʻoaʻoina. Ua lē o toe manaomia nei la le faaalia o le faia o ni vavega.

Na faamautinoa atili mai e Paulo e faapea o meaalofa sili ona malosi na i lo le faanatura o le a “faaleaogaina lea.” (1 Korinito 13:8) Sa tuu atu i isi na meaalofa i le na o le tuu saʻo atu e aposetolo o Keriso Iesu po o i lo latou faatasi ai. (Galuega 8:18-20; 10:44-46; 19:6) Ina ua mavae le maliu o aposetolo, ona taofia foi lea ma le faia o ni faaaliga faavavega.

Ua matauina e le Cyclopedia of Biblical, Theological, and Ecclesiastical Literature a McClintock ma Strong (TusI VI, itulau 320) e faapea ua o se tulaga “lē mafaatusatusalia faapea talu mai le uluai selau tausaga talu le maliu o le au aposetolo, sa itiiti ai pe sa leai foi se mea na tatou faalogo ai i le faia o ni vavega e uluai Kerisiano.”

Le Pogai ia Faaeteete ai

Na lapatai mai Iesu Keriso faapea o le a oo mai le taimi e toatele ai o le a faapea mai ia te ia: “Le Alii e, le Alii e, matou te lei perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele?” Ma o lea na taʻu atu ai e Iesu ia i latou: “Ou te lei iloa lava outou; ina o ese ia outou ia te au, o outou o e fai amio leaga.” (Mataio 7:22, 23) O le ā la le mafuaaga o le pei o latou foliga mai o loo manuia i le faia o “vavega e tele” pe afai e lē o le agaga o le Atua o loo faatino ai?

I nisi itu, e foliga mai e aafia ai le tau faasese tuusaʻo. Mo se faaaʻoaʻoga, na lipotia mai e The Herald, o se nusipepa a Zimbabwe, e uiga i ni tagata se toatolu na faalauiloa atu e se tagata faamalolo taʻtaʻua i la le faatuatua faapea ua faamaloloina. Na faailoa mai lea mea e le nusipepa e faapea o se tau faasese: “O loo tumau pea ona lē mafai ona tautala pe faalogo le tasi tamaitiiti; o le isi tamaitiiti e leʻi tuuli pe gugu; ma o se fafine, o lē e na ona tutuli, o loo tumau pea ona tutuli.”

I nisi taimi, e foliga mai e i ai ni āuga, e pei o le vailaau pepelo e faaaogā ina ia manatu le tagata maʻi ua faamaloloina lona tino, e tuu atu e le tagata faamalolo i la le faatuatua i lē o loo pagatia. I nisi itu—a e maise lava pe a umi se taimi e faatali ai ona faatoʻā aliaʻi mai lea o ni āuga o le faamalologa—e foliga mai ua aafia ai le malosi faalenatura o le tino lava ia e faamalolo ai. I le tusi Science and the Paranormal, ua faapea mai ai Dr. William Nolen “e tusa ma le 80 pasene o tagata mamaʻi o ē ō mai i se [fomaʻi masani] e i ai ni o latou maʻi e ono mafai lava ona togafitia—o lona uiga, o maʻi o le a toe malolosi mai ai e aunoa ma se isi fesoasoani.” O le mea lea, i le faagasologa o taimi, ua faigofie ai lava ona viiviia le tagata faamalolo i la le faatuatua ona o le faamalologa.

O le mea mulimuli, ua lapatai mai le Tusi Paia faapea “o Satani lava, ua liua o ia e ia ma agelu o le malamalama” i sana taumafaiga e faasese ai. (2 Korinito 11:14) I le 2 Tesalonia 2:9, 10, na faamatala atili mai ai e Paulo: “O lona sau foo [o lē amio leaga] e pei o le galuega a Satani, i le mana uma, [“o ituaiga o vavega uma,” The Jerusalem Bible] ma faailoga, ma vavega pepelo, ma faasese uma o le amio leaga i ē a fano.” O lea ia faaeteete! O faamalologa i la le faatuatua e masani ona aafia ai malosi faatemoni! “Ou te lē manao ina ia tofusia outou ma temoni,” na lapatai mai ai Paulo. “Tou te le mafaia ona feinu i le ipu a Ieova ma le ipu a temoni.”—1 Korinito 10:20, 21, NW

Pe a Maʻi se Kerisiano

E moni, pe a maʻi se tasi, atonu o le a foliga mai o se avanoa e faatosina ai se faamalologa faavavega. E ui i lea, ia matau le uso sa galulue faatasi ma le aposetolo o Paulo o Epaferoti sa maʻi tigaina lava o ia na toetoe lava a oti ai. (Filipi 2:25-27) Sa faapena foi ona mafatia le aumea vavalalata a Paulo o Timoteo i lona “maʻi e tupu soo.” (1 Timoteo 5:23) Peitai sa leʻi faamalolo faavavegaina e Paulo se tasi o nei tamaloloa. Ma pe a manaomia foi e Paulo lava ia se togafitiga faafomaʻi, atonu sa ia faaaogāina le auaunaga a Luka, “le fomai pele,” o lē sa la malaga faatasi.—Kolose 4:14.

E faapena foi aso i nei, e mafai e se Kerisiano ua maʻi ona saili atu i le fesoasoani a se fomaʻi agavaa po o se isi e agavaa i togafitiga, a e aloese mai ai i sina taumafaiga e maua faamalologa e faagaeeina e temoni po o tagata e faafoliga mai e iloa ni mea faafomaʻi a e leai, ua taatele i le tele o atunuu i aso nei. E mafai foi ona ia tatalo mo le atamai e feagai ai ma le maʻi, a e lē mo se togafitiga faavavega. (Iakopo 1:5) E mafai foi ona ia augani atu ina ia “lagolago ane Ieova ia te ia i le taotoga o lona maʻi.”—Salamo 41:3.

Ioe, e mafai ona avea o se mea e sili ona loto vaivai ai pe a lē mafai e faasaienisi faafomaʻi ona faamalolo se maʻi patino. A e ui i lea, tusa lava pe maʻi se Kerisiano, e tatau ona ia tauivi ina ia “mautinoa i mea sili ona tāua,” aua le faatagaina le popole i le soifua maloloina e punitia ai atoatoa popolega faaleagaga. (Filipi 1:10, NW) E mafai ona ia faaolaolaina o ia lava i le faamoemoe o le ola i lalo o le Malo o le Atua lea o le a “le fai mai foi se tasi ua mau ai, Ou te maʻi.”—Isaia 33:24; 65:17-19.

E moni, o lenei faamoemoe i se lalolagi fou amiotonu e matuā sili atu ona tāua na i lo o folafolaga gaogao a le au faamalolo i la le faatuatua. Manatu ia Peteru, o se tamaloa tauaso e nofo i Akumadan, i Ghana E 26 tausaga sa ia faaaluina i lotu eseese e faamalolo ai i la le faatuatua i le faamoemoega faapea o le a faamaloloina ai lona tauaso. A e peitai o leʻi i ai lava sē faamalolo i la le faatuatua na mafai ona faapupulaina ai ona mata. Ona faafeiloai atu lea i ai ni Molimau a Ieova a o ia auai pea i le lotu faamalolo i la le faatuatua.

Na faamatala atu e Molimau mai le Tusi Paia faapea, i lalo o le Malo o le Atua, o le a atoatoa ona faamaloloina ai tiga uma o le tino ma le mafaufau. O lenei mea na tatalaina ai mata o le mafaufau o Peteru ma ua malamalama ai. Ina ua faatumuina i le tailsapaia o upu moni ofoofogia mai le Tusi Paia, na avea ai loa o ia ma sē faalaulioa sauatoa o le Malo o le Atua ma auauna ai faapena mo le sili atu i le tolu tausaga! O loo ia vaavaai atu i luma i le taimi o le a “faapupulaina ai lea [o] mata o e tauaso, e faalogoa foi taliga o e tutuli,” i le itu faaletino.—Isaia 35:5, 6.

Faatasi ai ma le fesoasoani a le Afioga a le Atua, ua saoloto faapena le faitau afe o isi sa tuu sese atu lo latou faamoemoe i tagata faamalolo i la le faatuatua.

[Ata i le itulau 5]

E seāseā ona mafai ona faamalolo e le au faamalolo i la le faatuatua tagata e i ai o latou faafitauli tau i totoga.

[Ata i le itulau 7]

O se Kerisiano o lē o loo maʻi e tatalo atu mo se malosi e tumau ai. E vaavaai atu foi o ia i luma i le lalolagi fou, lea o le a “le fai mai foi se tasi ua mau ai, Ou te maʻi.”