Tapuaiga ia Satani i o Tatou Aso
E LĒ TAUMATEA le manao o Satani ia tapuaia o ia. Ina ua ia faaosoosoina Iesu, na ia ofo atu e avatua ia te ia se taui tele i le na o le faia lava o le mea e tasi: “Pe afai e te faapaū ma ifo mai ia te au.” (Mataio 4:9) O le mea moni lava, sa teena e Iesu, a e sa leʻi mulimuli ai tagata uma i lana faaaʻoaʻoga. Ua matuā salalau atu le tapuaiga ia Satani i lo tatou lalolagi i aso nei.
Mo se faaaʻoaʻoga, i Kanata, e faia ai e le nusipepa The Calgary Herald se faasologa o mataupu i lalo o le ulutala “Soʻo o le Tiapolo.” Na sii mai e le nusipepa le lipoti o suesuega a leoleo faapea: “Na ou iloa mai le faatalanoaina o tagata, faapea e matuā lē faapitoa ai faiga faa-Satani i se vaega faapitoa e tasi i le sosaiete faaletagata. O le tomai na aoaoina mai e le Calgary Police Service ma le Royal Canadian Mounted Police ua faaalia ai faapea i Calgary lava ia e foliga mai e maua le 5,000 o i latou o loo faia faiga a Satani.”
Ua faaalia i lipoti a isi nusipepa faapea o le tapuaiga ia Satani, i faiga eseese, ua salalau atu i le Iunaite Setete ma Europa. E oo lava i leoleo, ua faaalia lo latou naunau i faiga faa-Satani. Ai se ā? Auā i le tele lava o itu ua latou maua ai fesootaiga i le va o solitulafono ma faiga faasatani. Na faapea mai le leoleo na seʻi faatoʻā taʻua talu ai nei: “O le mea o matou feutagai nei, ua o se lotu ma ni tagata o e talitonu i ai e pei ona talitonu o isi i le Faa-Kerisiano, Faa-Iutaia po o le Isalame. O le mea o loo tou vaaia nei e lē o solitulafono ona o le faasaoina o solitulafono, a e o solitulafono ona o le lotu.”
O se tasi o faaaʻoaʻoga mataʻina sa o le fasiotia o tagata e le ituaiga o Manson i Kalefonia i tuā i le 1969. E tusa ai ma le polofesa o tala faasolopito o Jeffrey Russell, “sa faapea mai o Manson sa o ia o Keriso ma Satani foi. . . . Na faasalalau mai e le soʻo o Manson o Tex Watson e faapea, ina ua ia alu atu e fasioti Sharon Tate, ‘O aʻu o le tiapolo; ua ou sau i inei e fai le galuega a le tiapolo.” Peitai e lē masani ai ona faaalialia faapena faiga faa-Satani e pei o lenei.
Faitogafiti Faataulaitu, Faiga Faaagaga, ma le Saili i Agaga o Ē ua Oti
O le mea moni, o le tapuaiga ia Satani e lē faatapulaaina i le na o le taʻua ai o le igoa o Satani. Na lapatai mai le aposetolo o Paulo: “O mea ua fāsia e nuu ese, ua fāsia e i latou mo temoni.” (1 Korinito 10:20) Ma o le tapuaiga i temoni, e tutusa lava ma le tapuaiga ia Satani, talu ai o loo taʻua Satani o le “alii foi o temoni.” (Mareko 3:22) O ā mea ua faia e “nuu” e iloa ai o le tapuaiga i temoni, po o le tapuaiga a Satani? Ua aumaia e afioga a le Atua ia Isaraelu ni faaaʻoaʻoga mo i tatou: “Aua neʻi iloa ia te oe . . . o se faitogafiti faataulāitu, o se iite i ao o le lagi, po o se saili faailoga, po o se taulāitu, po o se ʻapele, po o se fesili atu i aitu, po o se ua i ai le aitu vavalo, po o se saili atu i e ua oti. Auā e inosia e Ieova i latou uma o e faia na mea.”—Teuteronome 18:10-12.
O lea, ua lapataia i tatou faasaga i taulaga i le toto ma le fesootai atu i agaga ua faia e faitaulaga faataulaitu i Pasili pe faia foi e tagata tutulī ma tagata sisiva o Haiti. Ma ua lapataia foi faapena i tatou faasaga i faiga a Santeria ia ua faia e ni tagata Kiupa na faaaunuua i le Iunaite Setete. Ua lapataia foi i tatou faasaga i tagata faataulaitu o ē na fai mai e mafai ona latou faafesootai tagata oti ina ia faagaee ai le mataʻu i tagata ola.—Faatusatusa le 1 Samuelu 28:3-20.
E matuā taatele tagata faitogafiti faataulaitu i vaega eseese o Aferika. I Aferika i Saute, mo se faaaʻoaʻoga, e matuā malolosi tele mana i foma’i faataulaitu, ma e matuā talitonu tele i ai tagata. Na lipotia mai i nusipepa ni mea na tutupu talu ai nei faapea, sa susunu e ni tagata faatupu faalavelave tagata ola o ē sa molia i le faatupuina o ni uila e taia ai tagata o le nuu! Sa tuuaʻia pepelo e fomaʻi faataulaitu o le nuu tagata ua lavevea fua a e leai ni sala ona o nei faiga “lē faanatura” ma i lea na saisaia ai i latou i ni laau ina ia susunuina. O lena talitonuga i faiga faatemoni ma faataulaitu o le tapuai lava lena i temoni.
A e peitai, e lē na o Aferika e i ai fomaʻi faataulaitu. I le 1985, sa tuuina atu ai e le Faamasinoga Itumalo o le Itumalo o Virginia i Sasae ia Herbert D. Dettmer, o lē sa faafalepuipuia i se nofoaga e vaavaaia ai i Virginia, U.S.A, le aiā e faataga ai le avatu o lavalava ma mea ina ia mafai ai ona fai lana lotu i totonu o le fale puipui. Ma o le ā lana lotu? E tusa ai ma faamaumauga a le faamasinoga, sa avea o ia ma sui “o le Lotu Wicca (e lauiloa o le fai mea faataulaitu).” O le iuga, sa ia Dettmer le aiā tatau faaletulafono e faaaogā ai le teiō, masima mai le sami, po o le masima e leʻi tuu i ai se vailaau; molī gao; mea manogi; o se uati tatagi; ma le ofu talaloa paʻepaʻe e fai ai le tapuaiga.
Ioe, e tusa ai ma faasinoga, e matuā salalau tele i le itu i Sisifo faiga faataulaitu. Na lipotia mai e le nusipepa Peretania o le Manchester Guardian Weekly e faapea: “I le lima tausaga ua mavae, sa i ai ni manatu faapea e 60,000 ni fomaʻi taulaitu sa i ai i Peretania: i aso nei [1985] na fuafuaina e ni fomaʻi taulaitu le fuainumera ma iloa ai ua tupu aʻe i le 80,000. O le mekasini faalemasina a ē saili i fetu ma faiga faalilolilo, o le Prediction, o lona faatatauga e tusa ma le 32,000 kopi ua faasalalauina.”
Faiga Faa-Satani ma Musika
Ua tataʻi atu e le tusi a Polofesa Russell le Mephistopheles—The Devil in the Modern World o tatou manatu i se tasi auala o loo faalauteleina atili ai fuafuaga a Satani. Ua ia tusi e faapea: “O le faaalia o faiga Faa-Satani na mou vave atu ina ua mavae tausaga o le 1970, peitai o mea o loo faagaoioi ai aganuu Faa-Satani o loo faaauau pea seia oo atu i tausaga o le 1980 i musika ‘soona feei’ o musika faatopetope e sisiva ai ua taʻua o [rock music] ua fuafuaina faapitoa e ōle atu ai i le igoa o le Tiapolo ma tuu atu ai le matuā faaaloalo i uiga sauā faa-Satani, i vailaau faasaina, i le auleaga, i le loto vaivai, i le soonafai o oe lava, le sauā, le pisa ma le fenuminumiai, ma le leai o se olioli.”—O upu faasisipa o a matou ia.
Atonu e lē manatu mamafa i ai le au faimusika o ē na latou tuuina i totonu o ā latou musika mea faa-Satani. Atonu pe sa na ona latou taumafai e faateʻi pe o le fia lauiloa i se tulaga ese. A e peitai ane, ua matuā aafia malosi ai ni tagata e vaivai o latou loto. Ua matauina e Polofesa Russell faapea “o le soona faamamafa o manatu e leai se uiga e faia ai mea leaga, ua oo ai ni āuga leaga i mafaufau vaivai ma valelea. O se tasi iuga, ona o le fefe ua soona faanatinati ai e fai le solitulafono e aunoa ma se faaeteete, e aofia ai ma le faaleagaina o tamaiti faapea foi ma le sauā i manu.”
Sa i ai se mea na tupu talu ai nei na faateia ai tagata o Niu Ioka. E tusa ai ma le lipoti a se nusipepa, o se tama e 14 tausaga na “uluitinoina e Satani,” na ia fasiotia lona tinā, ma toe pule i lona lava ola. Na taʻua e se faufautua a se aiga Kanata, e pei ona lipotia mai i le mekasini o le Maclean’s faapea, o le aofaiga faatuputupulaia o tamaiti talavou ua faalavelavea o ē ua latou tautino mai o loo faia “mea faasatani, e masani lava ona auaufaatasi ma vailaau faasaina ma le mea e pito sili ona omia ai o le matalasi o musika malolosi eseese [heavy metal rock music].”
E Lē na o se Tifiga
O se tifiga ua vave tele lona salalau atu i le Iunaite Setete i le taimi nei ua taʻua o le alāleo. E masani lava ona totogi atu e tagata ni nai taʻi selau talā ina ia auai i nei sauniga o le “alāleo,” ua faapea mai, o se fafine faitogafiti faataulaitu, ua faapea mai (o alāleo e masani lava ona faia e fafine) o loo fesootai o ia ma le agaga o se tagata ua leva ona oti. I le tulaga o se alāleo, na lipotia mai e le nusipepa faapea, e masani lava ona “faaauala atu sauniga faavaitaimi i satelite o televise ua faafesootai vave atu i le faitau afe o tagata i aai pe tusa ma le afa taseni.” O lenei gaoioiga ua faaalia ai le lē usiusitai i le fautuaga a le Tusi Paia ina ia aloese mai ē fai togafiti faataulaitu, ma ē popoto e vavalo mo mea tutupu i le lumanai. I lea, o sea ituaiga o tapuaiga e mafai ona faaalia mai o se tapuaiga faatemoni. Ma o loo faavae i le pepelo faasatani e pei o faiga faaagaga uma faapea, e lē mafai ona oti le solu o le tagata.—Failauga 9:5; Esekielu 18:4, 20.
Taaʻiga a le Tiapolo i se Lalolagi Tumu i le Inoino
O le tulaga tumu i le mataʻu o le fanau a tagata i lenei 20 senituri, ua tatou to manatu ai pe e lē o matuā mamao tele le oo atu o taaʻiga a Satani. Sa paʻia e Polofesa Russell lenei tulaga ina ua ia taʻua: “I le taimi nei, ona o le oona o mea tau faaniukelea ua fuafuaina ai pe tusa ma le faafitusefulu taimi le aofaiga manaomia e fasiotia ai mea faiola uma i luga o le lalolagi e i ai o latou ivitu, ua tatou sauniuni ai ma le ua maaʻa se taua o le a le maua ai e se tasi, se malo, po o ni talitonuga aogā, a e o le a faaumatia ai le faitau afe miliona i se oti matautia. O le ā le malosi o ona uunaia i tatou i lalo i se ala e masani pea ona sili atu ona matautia? Ia te ai ua ala ai ona faaumatia le paneta e mea tau faaniukelea? I le na o le malosi lava lena o lea sa i ai pea sona faanaunauga sauā ma le fia faaleaga i le amataga ina ia faaumatia le lalolagi.”
O ai, pe o le ā lena malosi? Ua aumaia e le polofesa lana lava tali i upu nei: “Sa faailoa maoti mai lava faapea o le Tiapolo o le agaga lena o loo saili e faamaonia lana tetee ma ia faaumatia le lalolagi a le Atua i le tele e mafai ai e lona mana. Faamata e le o le malosi lea e uunaia i tatou e faasalalau atu mea tau faaniukelea ua avea o le malosi lava lea e taumafai malosi e faaalialia o ia lava? I lenei vaitaimi aupito sili ona faigatā o mea tutupu i lo tatou paneta, ua lē mafai ai ona tatou faafitia le moni o lea mea.” E mautinoa lava le le o faafitia e Kerisiano lona i ai! Na faaalia e Iesu lava ia Satani o le faatosina sili o lenei lalolagi ina ua Ia taʻua o ia o le “alii [pule] o le lalolagi nei.” (Ioane 12:31) I le faamatalaina o uiga o mafaufauga o Satani i aso nei, ua faapea mai le tusi o Faaaliga “ua lotoa tele o ia, auā ua na iloa ua saasaa ona po.” (Faaaliga 12:12) I le faasino atu i le mea o loo taumafai Satani e faaiuina i o tatou aso, ua faapea mai lena lava tusi faapea o loo ia faaaogāina ni gaoioiga faatemoni ina ia aoaoina ai tupu o lenei lalolagi “e faapotopoto ia te i latou i le taua i le aso tele o le Atua e ona le Malosi uma lava.” (Faaaliga 16:14) E leai, e le mafai ona tatou pulea faatosinaga a Satani le Tiapolo pe a tatou taumafai e malamalama i le mafuaaga o auala valea ua faia e le lalolagi e faaumatia ai ia lava.
Ua taʻua e le aposetolo o Paulo o Satani “o le taʻitaʻi o le au faipule i le va nimonimo, o le agaga lea o loo matua galue nei i e ua faalogogata,” ma “o le atua o le lalolagi nei, [lenei faiga o mea].” (Efeso 2:2; 2 Korinito 4:4) E lē o se mea e ofo ai ona ua fesili le toatele pe o faiga matuā sili ona leaga o lenei tupulaga “malamalama” o le faasaienisi—o taua e lua a le lalolagi, taumafaiga aʻiaʻi a Europa ma Kampuchea e faaumatia tagata uma i totonu o latou tuaoi, o oge i Aferika ona o uunaiga faapolotiki, fevaevaeaiga matuiā i va o lotu ma atunuu i le lalolagi aoao, le ʻinoino, le fasioti tagata, le faapuapuagaina ona o le faiga o mea, le faatoilaloina o le fanau a tagata i faiga solitulafono o le faaaogāseseina o vailaau faasaina, o ni nai mea na ua taʻua—pe lē o le mulimuli ea lena i fuafuaga sili a se malosi sili ona leaga, o loo gauai atu i le tuliesea o le fanau a tagata mai le Atua ma atonu e oo ai lava i le pule o le kelope i lona lava ola.
O ai, la, Satani? O le ā ua ia matuā faia nei? O le ā se mea e mafai e i tatou taitoatasi ona faia i ai? Ua matou valaaulia oe ina ia iloiloina le talanoaina o nei fesili i mataupu e lua o loo mulimuli mai.
[Ata i le itulau 7]
Ua tuuesea musika faasatani, ma sailia e tagata o le Atua faafiafiaga mamā