Tu Maumauaʻi Faasaga i Togafiti a Satani

“Ia oofu outou i ofutau atoatoa mai le Atua, ina ia outou mafaia ona tetee atu i togafiti [Eleni, “gaoioiga faaʻoleʻole”] a le tiapolo.”—EFESO 6:11.

1. O le ā le faamaoniga i le i ai o Satani o loo aumaia e ala i tofotofoga o Iesu?

PE E i ai moni Satani? Ua finau mai nisi faapea i le Tusi Paia, o “Satani,” ua na ona faasino i le leaga o loo i totonu o le tagata. Ua latou faafitia lona i ai o se mea faiola. A e o le ā ua taʻu mai e le Tusi Paia ia i tatou? Ua faaalia i faamatalaga o le Tala Lelei a Mataio ma Luka faapea e faatolu ona faaosoosoina tuusao lava Iesu Keriso e Satani, ma sa teena o ia e Iesu i ia taimi taitasi, i lona faaaogāina o le Tusi Paia. Ai se ā na tali atu ai Iesu ia te ia mai Tusitusiga Eperu? Auā foi na sau Satani ia Iesu i se auala na ia faatatauseseina ai ia lava Tusitusiga ina ia agasala ai o ia ma lē taulau ai o ia o le Alo o le Atua, le Fanau folafolaina.—Mataio 4:1-11; Luka 4:1-13.

2. E faapefea ona tatou iloa faapea sa lē na o ni manatu i le mafaufau o Iesu ana faafetaiaʻiga ma Satani?

² E manino lava, sa lē na o ni manatu i le mafaufau o Iesu, o ia o le tagata lelei atoatoa, i nei fetaiaʻiga. (Eperu 4:15; 7:26) Sa faafetaiaʻia o ia e le peresona lava lea sa avea ma malosi i tua o le gata i Etena, lona lava uso a agelu muamua o lē ua āutausagā o fouvale ma ua aliai mai nei i lumāmea ina ia taofia le faataunuuina o le Kenese 3:15. Sa manao Satani ina ia gausia le faamaoni o le Fanau folafolaina. E poto tele i ana gaoioiga faaoleole, o lea, na matuā tetee atu ai Iesu i Lē faaosooso. O le ā le uiga faaalia o Satani? “Ua faauma e le tiapolo le tofotofoga uma, ona alu ese ai lea ia te ia seia i se aso.” E manino lava, sa leʻi tuumuli mai Iesu ia te ia lava! Na ita tele Satani, ona alu ese ai lea nai ia te ia, ma “faauta foi, ua o mai agelu ma auauna mai ia [Iesu].”—Luka 4:13; Mataio 4:11.

3. O le ā ua fai mai ai le tasi tusitala o tala faasolopito e uiga i le i ai o le Tiapolo i le Faa-Kerisiano?

³ Na faaopoopo mai ma le talafeagai se tasi tusitala o tala faasolopito: “O le faafitia o le i ai o le Tiapolo ma lona tulaga tāua i le Faa-Kerisiano o le faasagatau atu lea i aʻoaʻoga a le au aposetolo atoa ma le atiina aʻe o le tala faasolopito o le aʻoaʻoga faa-Kerisiano. Talu ai o le faamatalaina o le Faa-Kerisiano i upu e ese ai na i lo o nei upu, e matuā leai lava se uiga i le faaletino, e matuā lē talafeagai i le tulaga faalemafaufau ona finau atu mo se Faa-Kerisiano e le o aofia ai le Tiapolo. Afai e leai se Tiapolo, ia semanu ua leva lava ona mate ma sese le Faa-Kerisiano i se manatu autū mai lava i le amataga.”a Ua aumaia e lena faaiuga se luʻi mo tagata uma i le lalolagi i aso nei. O e iloa ea le i ai o se fili lē vaaia o lē ua alu atu nei e faatoilaloina le pule silisili a le Atua ma le faamaoni o le tagata?

Faailoaga Moni o Satani

4. Na faapefea ona avea se mea faiola agaga lelei atoatoa ma Satani?

⁴ O Satani o se mea faiola agaga malosi, sa foafoaina e le Atua i le amataga o se agelu, o se atalii agaga sa tuuina atu i ai le avanoa e tu atu ai i luma o le lotoa faalelagi o Ieova. (Iopu 1:6) A e peitai, sa faatinoina e Satani i lona lava loto malie e tetee atu i le Atua; faatasi ai ma le poto e taufaaoleole sa ia taʻitaʻiina ai Eva, ma e ala ia te ia [Eva] o Atamu ina ia lē usiusitai ma oo ai i le oti. (2 Korinito 11:3) I lea, ua avea ai o ia ma Satani, o lona uiga o le “Fili”—o le tetee mai”—o se fouvale, o se temoni, o le fasioti tagata, ma o le pepelo. (Ioane 8:44) Maeu le talafeagai o upu a Paulo faapea “auā o Satani lava, ua liua o ia e ia ma agelu o le malamalama,” ma i le mea moni o ia o le ‘pule o le pouliuli o lenei lalolagi’! (2 Korinito 6:14; 11:14; Efeso 6:12) E ala i le faatosinaina o isi agelu ia fouvale, na ia taʻitaʻieseina ai i latou mai le malamalama o le Atua i lona lava pouliuli. Na avea ai o ia ma “alii o temoni.” Na faaalia foi o ia e Iesu o le “alii o le lalolagi nei.” Ua iloa tino lava, ina ia avea o se pule, e tatau ona i ai o ia o se peresona agaga na foafoaina.—Mataio 9:34; 12:24-28; Ioane 16:11.

5. O le ā le manino ua faailoa mai ai Satani i Tusitusiga Kerisiano Eleni?

⁵ Ona e seāseā lava ona taʻua Satani i Tusitusiga Eperu, a e ua matuā faaalialia o ia i Tusitusiga Kerisiano Eleni—ua faatele ona taʻua o lea, e faa 36 taimi ua tatou fetaiai ai ma le igoa o Satani, a e faa 33 taimi le upu Tiapolo. (Tagai i le Comprehensive Concordance of the New World Translation of the Holy Scriptures.) E iloa foi o ia i isi igoa po o ta’u. O le lua o nei ta’u na faaaogāina e Ioane i le Faaaliga 12:9: “Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma.”—Tagai foi i le Mataio 12:24-27; 2 Korinito 6:14, 15.

6. O le ā le uiga o le upu “Tiapolo”?

⁶ I inei i le Faaaliga o loo aliali mai ai le upu Eleni di·aʹbo·los, ua faaliliuina i le “Tiapolo [Tevolo].” E tusa ai ma le tagata poto Eleni o J. H. Thayer, o lona uiga faaletino “o se tagata pepelo, tautuuaʻi, taufaaleaga.” (Faatusatusa le 1 Timoteo 3:11; 2 Timoteo 3:3, Kingdom Interlinear.) Ua faamatalaina e W. E. Vine le Tiapolo o le “fili taufaaoleole o le Atua ma tagata.”b

7. Ai se ā ua mafai ai ona taulai atu taumafaiga a Satani i tagata o Ieova?

⁷ E lē o nofo faasamasamanoa le Fili sili. (1 Peteru 5:8) Atonu o le pogai lena ua fai mai ai se faataoto, “E maua e le Tiapolo galuega mo e nonofo faasamasamanoa.” Ua alu atu o ia e faatoilalo Kerisiano faamaoni uma. (2 Timoteo 3:12) Ma ua uaʻi tasi atu nei o ia i tagata o Ieova i le na o le tasi lava o le mafuaaga faigofie—auā ua uma ona ia faatoilaloina le isi vaega atoa o le lalolagi i lana pule! (1 Ioane 5:19) O le lalolagi i aso nei, o le lalolagi a Satani. O ia o lona pule ma lona atua, e tusa lava pe iloa e tagata pe leai. (Ioane 12:31; 2 Korinito 4:4) O le iuga la, o le a ia faia se taumafaiga mulimuli e faaaogā ai gaoioiga poto ma le taufaaoleole uma po o ni fautuaga ina ia mafai ai ona faatoilaloina tagata o Ieova, pe taitoatasi po o se faapotopotoga foi. Seʻi o tatou suesueina nisi o auala o loo ia faagaoioia.—Mareko 4:14, 15; Luka 8:12.

Gaoioiga Iloagata ma le Faaʻoleʻole a Satani

8. Faatasi ai ma ā avanoa atonu o loo galue ai Satani faasaga ia i tatou?

⁸ E umi se taimi sa iloilo ma suesue ai e Satani tulaga tau i le mafaufau faaletagata, ina ia iloa ai le natura o le tagata ma ona uiga na fanau mai ma ia ma ona uiga vaivai. Na te iloa lelei lava pe faapefea ona taalo i o tatou vaivaiga ma o tatou loto mimita. O lea, o le ā le tulaga pe afai e iloa e lou fili ou vaivaiga a e e te lē iloa e oe lava? O lona uiga la e le o faaauupegaina oe e puipuia oe lava, ona e te lē o iloa nai avanoa na e i lou ofutau faaleagaga. (1 Korinito 10:12; Eperu 12:12, 13) Maeu le talafeagai o upu a le fatu solo Sikotilani: ‘E ana i ai se malosi i le meaalofa na tuuina mai ia i tatou tatou te iloa ai i tatou lava e pei ona iloa ai i tatou e isi! O le a faasaolotoina ai i tatou mai le faia o mea sese valea.’

9. O le ā atonu o le a avea o se iuga lē fiafia pe afai e lē taulau ona tatou iloiloina i tatou ma faia ni suiga?

⁹ O tatou faanaunau ea e vaai ia i tatou lava e pei ona vaai mai isi ia i tatou—a e maise lava e pei ona silasila mai le Atua po o le vaai mai foi o Satani ia i tatou? O le mea lena e manaomia ai lo tatou faamaoni e suesue ifo i tatou lava ma fuafua lelei le uiga ma le manaoga e faia ai se suiga. E faigofie ona faaseseina i tatou lava. (Iakopo 1:23, 24) Paga ona o nisi taimi tatou te lē iloa ai po o tatou faia le mea tonu e tusa ma a tatou gaoioiga! (Faatusatusa le 1 Samuelu 15:13-15, 20, 21, 24.) Ma e ese le faigofie o le faapea atu, “Ia, ua e iloa lelei lava e leai se tasi e lelei atoatoa!” O le mea tonu lava lena ua iloa e Satani, ma ua ia faaaogā o tatou le lelei atoatoa. (2 Samuelu 11:2-27) Paga le faanoanoa pe a oo ina faamatuā tagata ma oo ina iloa faapea ona o le pule sauā, le leai o ni faalogona totino, ma le auala faalealofa sa feutagai ai se tasi ma isi i le tele o tausaga, a ua oo nei ina avea ma se tasi ua leai ni uo; pe iloa ane foi e itiiti lava po o le leai foi o se mea na faia e se tasi e faafiafia ai isi tagata. Atonu ua taʻitaʻiina ma le iloagata i tatou e Satani i le olaga e faaaogāina ai o tatou uiga manatu faapito na tatou fananau mai ma i tatou e faatauasoina ai i tatou. Ua lē taulau ai ona tatou puea le uiga o le finagalo moni o Keriso—alofa, tiga alofa ma le agalelei.—1 Ioane 4:8, 11, 20.

10. O ā fesili atonu e mafai ona tatou fesili ifo ai ia i tatou lava, ma ai se ā?

¹⁰ O le mea lea, ina ia mafai ona tetee atu ia Satani, e tatau lava ona tatou suesue ifo ia i tatou. Pe o i ai sou vaivaiga e mafai ona faaaogā po o loo faaaogā nei e Satani? O i ai ea sou faafitauli tau i le mafaufau ma faalogona? E tatau ea ona faamuamua pea oe? Pe o le mimita o lou uiga lilo lea e uunaia ai oe? Pe ua avea le fuā, le matauʻa po o le manao tele i tupe ma mea e suia ai ou uiga? Pe o ia te oe le ita ma le loto leaga? Pe o ia te oe se uiga le fia faauo ma le lē fiafia i le loto faamaoni? Pe e te matuā ilitata pe a avatu ni fautuaga po o ni faitioga ia te oe? Pe e te inoino ma teena fautuaga? Afai tatou te iloa i tatou lava, e mafai la ona tatou fofoina na faafitauli, tau lava ina ia tatou loto maulalo. Auā a le faia lea, ua tatou tuu atu la i tatou lava ia Satani.—1 Timoteo 3:6, 7; Eperu 12:7, 11; 1 Peteru 5:6-8.

11. E ala i ā auala poto faalilo atonu o le ā taumafai ai Satani e faavaivaia lo tatou itu faaleagaga?

¹¹ E mafai foi e Satani ona faavaivaia lemū lo tatou itu faaleagaga, i se auala lilo faaoleole. Atonu ua ia i tatou sina faagaulemalie e uiga i auala o loo faia ai mea i totonu o le faapotopotoga po o le faalapotopotoga foi. A e masani lava e lē o ia i tatou mea moni uma, a e ua faigofie lava ona tatou oso e fai se faaiuga. Afai la e vaivai lo tatou faiā ma Ieova, ua na o sina laasaga lava tatou te oo ai i le faia o ni manatu lē mautinoa ma ni masalosaloga e uiga i le upu moni. Atonu o le a sailia e nisi ni auala e faamaonia ai i latou lava ina ia aloese ai mai tiute tauave o loo mulimuli mai ai i le upu moni. O le taimi lea e tuu ai loa e Satani le lē faamaoni ma le faalata i o latou loto. Ona lē pine ai lea a e avea i latou o ni tagata ua faatoilaloina e le aposetasi, ma o le a olioli ai Satani.—Luka 22:3-6; Ioane 13:2, 27; 2 Ioane 9-11.

12. (a) Ua faapefea ona faamalosia nisi e Satani? (e) Ua faapefea ona maileia e Satani le toatele i le faia o amioga le mamā?

¹² O isi ua matuā faamalosia e Satani ua le gata ina latou faia agasala mamafa ua tatau ai ona tuuesea a e ua oo lava ina mulimuli ane faia ni pepelo ma ni faiga taufaasese e faavalea ai toeaina o le faapotopotoga. E pei o Anania ma Safaira, latou te manatu e mafai ona latou olegia agelu atoa ma le agaga paia o le Atua. (Galuega 5:1-10) E faitau afe ua paʻūū atu i le mailei a Satani, i ni nai tausaga na seʻi faatoa mavae atu, i le faia o amioga le mamā. Ua iloa lelei e le Tiapolo o faanaunauga o le tagata tau i feusuaiga e matuā malolosi tele, ma e ala i lana faiga o mea i le lalolagi ua ia faamatilatila ai, faaliliuese, ma faauiga sese ai le itu i le faia o feusuaiga. (Numera 25:1-3) Atonu o le a tofotofoina Kerisiano talavou e lei faaipoipo i le faia o le faitaaga ma isi lava feusuaiga sese. (Faataoto 7:6-23) Afai e faataga e Kerisiano ua faaipoipo o latou loto ma mafaufau e evaeva solo, o le a faigofie lava ona latou paʻūū atu i le faia o gaoioiga lē faamaoni, ua faalataina ai le tane po o le avā a se tasi ua uma ona faia i ai le tautinoga e faamaoni.—1 Korinito 6:18; 7:1-5; Eperu 13:4.

13. (a) E mafai faapefea e televise ona faafoliga o tatou mafaufauga? (e) E mafai faapefea ona tatou tetee i so o sea taaʻiga?

¹³ O loo tatou mau i se lalolagi ua matuā taatele ai i so o se mea le pepelo, taufaasese, ma le ita e tupu ai le sauā. Ua matuā faaaogā e Satani i se tulaga atoatoa le malosi e tuu atu i nei mafaufauga vaivai. O ata faasolo i televise po o ata faatatau i faiga faaleituaiga o loo faagaoioia e tagata popoto e faatosina ai ē o loo nonofo toalua i se olaga e faasese ai e le tasi le isi. Afai tatou te faataga lena ituaiga o manatu e faaaafia i tatou, ona mafai lea ona vave ona tatou lolo atu i agasala “laiti” ia e avea o se amataga itiiti mo ni mea “tetele.” O fautuaga poto ailililo a Satani e faigofie lava ona faaofi lemu mai i o tatou mafaufau i ni auala le tuusaʻo. E mafai faapefea ona tatou tetee atu i na faatosinaga? Aua lava neʻi faatagaina “se mea e mautu ai le tiapolo,” e pei ona faatonu mai ai Paulo. O le uiga foi o lena mea, ia pulea tagata o ē faataga e o atu i lou fale e ala i televise. Pe e lē tatau ea ona tatou inoino i le faaofi atu o faiga sauā, amioga le mamā, tagata fai upu masoā o ē aumaia mea oona i totonu o ō tatou fale?—Efeso 4:23-32.

E Mafai Faapefea ona Tatou Teena Satani ma Tumau i le Faamaoni i le Atua?

14. O le ā le filifiliga maumauaʻi sautualua e manaomia ina ia mafai ai ona tetee atu ia Satani, ma o le ā e manaomia e lenei mea?

¹⁴ Ona o le i ai o sea fili sili ona malosi atu i lo o le tagata o loo fealuai solo faasaga ia i tatou o mea faiola tagata lē lelei atoatoa, e mafai la faapefea ona tatou tausia lo tatou faamaoni? O loo maua le ki i upu a Iakopo: “O le mea lea ia outou gauai ai i le Atua; ia outou tetee atu i le tiapolo, ona sola ese ai lea o ia ia te outou.” (Iakopo 4:7) Ia matau, e lua uiga o le fautuaga a Iakopo. A o tatou tetee atu i le Tiapolo ma lona loto, e tatau ona tatou gauai atu i le finagalo o le Atua. E aofia ai i lena mea le alofa i le finagalo o le Atua ma le inoino i le loto o Satani. (Roma 12:9) O lea, ua fai mai ai Iakopo: “Ia outou faalatalata atu i le Atua, ona faalatalata mai lea o ia ia te outou. Tagata agasala e, ina fafano ia o outou lima, o outou e faalotolotolua e, ina faamamā ia o outou loto.” (Iakopo 4:8) Ioe, i lo tatou tetee atu ia Satani, e leai se avanoa e faalotolotolua ai i le faia o filifiliga. E lē tatau ona tatou tuuina lo tatou faamaoni i se tulaga lamatia i lo tatou vaai atu ua lata tele atu i tatou i tuaoi o le vavaeeseina mai le amio leaga. E tatau lava ona tatou matuā “ʻinoʻino i mea leaga.”—Salamo 97:10.

15. Ai se ā e tatau ai ona i ai le “ofutau atoatoa mai le Atua”? Faataʻitaʻi.

¹⁵ O se fautuaga mataina e tetee atu ai ia Satani o loo maua i le Efeso mataupu e 6. O le ā ua fai mai ai Paulo i le pe faapefea ona tatou tetee atu i le “taufaaoleole,” “faufauga leaga,” po o “taumafaiga lilo” a Satani? (Efeso 6:11, Phillips, New International Version, The Jerusalem Bible) “Ia oofu outou i ofutau atoatoa mai le Atua,” ua fautua mai ai o ia. O le faaupuga “ofutau atoatoa” ua lē tuua ai se avanoa mo se uiga faatamala agaʻi i le Faa-Kerisiano, e sili atu i se fitafita Roma e lē mafai ona faatamala pe a oo i le taimi e sauni ai mo le taua. O le ā faapefea ona feagai ai le fitafita pe a sauniunia o ia i le ofutau atoatoa a e leai se talita ma se pulou tau? Atonu e mafai ona manatu o ia faapea, ‘E matuā telē lena talita, ma e matuā mamafa tele foi le pulou tau. E mamafa tele, ou te lē manaomia ia mea.’ Seʻi manatunatu i le tulaga—o se fitafita Roma ua faaauupegaina mo le taua a e leai ni auupega autu e puipuia ai o ia.—Efeso 6:16, 17.

16. (a) E tatau faapefea ona tatou mulimuli i le faaaʻoaʻoga a Iesu i le faaaogāina o la tatou “pelu”? (e) E mafai faapefea ona tausia le leoleoina o i tatou faasaga i “u fanafana mu” a Satani, ma faatasi ai ma ā iuga?

¹⁶ Seʻi manatunatu foi i se fitafita a e leai sana pelu. O “le pelu a le Agaga” o se puipuiga lelei lea, e pei ona faaaogāina e taia ese ai auupega na o loo aumaia e Satani faasaga i le Kerisiano. E tatau lava ona sauniuni la tatou “pelu” i taimi uma. O le a mafai ona faia faapena pe afai tatou te lē tuulafoaiina a tatou suesuega totino ma suesuega faaleaiga. A e muamua lava, o lenei “pelu . . . o le afioga lea a le Atua” o la tatou mea faigaluega e tetee pe oso atu ai. Sa faaaogā e Iesu i nei auala uma e lua. (Mataio 4:6, 7, 10; 22:41-46) O lea, e tatau foi ona faapena i tatou. E tatau ona faamaai pea lo tatou talisapaia o le upu moni. E lē mafai ona tausia lo tatou faaleagaga e faavae i nai mea na tatou aʻoaʻoina mo ni nai uluai masina po o tausaga foi i le upu moni. Afai tatou te lē faafouina pea faataamilosaga faaleagaga o ō tatou mafaufau, o le a oo ina puaoa la tatou vaaiga faaleagaga. O lo tatou maelega mo le tapuaiga moni ia Ieova, o le a oo ina faaitiitia. O le a oo ina tatou vaivai faaleagaga. O le a oo ina lē toe mafai ona tatou tetee atu i osofaiga mai aiga, uo, aumea, ma tagata aposetate o e atonu o loo faaamuamu mai i o tatou talitonuga. Peitai, o le a faasaoina i tatou e le Atua mai le Tiapolo ma ana “u fanafana mu” pe afai e tausia pea ona faaauupegaina i tatou i le “ofutau atoatoa mai le Atua.”—Isaia 35:3, 4.

17, 18. O ai o tatou tau faasaga i ai, ma e mafai faapefea ona tatou manumalo ai?

¹⁷ Ioe, sa faamamafa e Paulo le matautia o loo aafia i le taua faa-Kerisiano ina ua ia tusi: “Auā tatou te le o tau ma fili faaletagata, a e o loo tau faasaga i malosi faalelagi, faasaga i faipule silisili ma alii sili o le lalolagi pouliuli, atoa ma fili agaga leaga o i le lagi.” (Efeso 6:12, The New English Bible) E mafai faapefea e i tatou o ni tagata faatauvaa ma le vaivai ona manumalo i sea taua lē tutusa? Ua taʻua soo e Paulo lona manatu: “O le mea lea ia outou tago ai i ofutau atoatoa mai le Atua, ina ia outou mafaia ona tetee atu pe a oo i le aso vale, pe a uma ona outou faia o mea uma, tou te tutumau ai lava.” (Efeso 6:13) O le faaupuga autu pe fai ma ki o le: “Pe a uma ona outou faia o mea uma.” I lenei, ua lē toe i ai foi se avanoa mo se Kerisiano faalotolotolua pe solomuli.—1 Ioane 2:15-17.

¹⁸ O le mea lea, seʻi o tatou tutū maumauaʻi ai i le upu moni, ia alolofa i le amiotonu a Ieova, ia talaʻia le tala lelei o le filemu, ia taofi mau ma le faatuatua malosi i le faaolataga ua aumaia e Ieova e ala ia Keriso Iesu, a o tatou faalagolago atu i le Afioga a le Atua o le autu o lo tatou ola. (Efeso 6:14-17) Ia manatua, e manatu mai le Atua ia i tatou ma o le a fesoasoani ina ia tatou manumalo i o tatou tofotofoga ma popolega e oo mai ia i tatou i le faiga o mea a Satani. Tau ina ia tatou utagia uma lenei lapataiga: “Ia outou faautauta, ia outou mataala, ona o le ua fai outou mona fili, o le tiapolo lea, o loo fealualuai o ia e pei o se leona tagi, ua saili se tasi e ʻaina e ia.” Ioe, “ia outou tetee atu ia te ia, ma ia mausali outou i le faatuatua.”—1 Peteru 5:6-9.

19. (a) O le ā le isi sauniuniga atili e tatau ona tatou faaaogā ina ia mafai ai ona tetee Satani? (e) O le ā o le a tupu ia Satani i le iuga?

¹⁹ Seʻi aua neʻi galo ia i tatou le faaopoopoga tāua a Paulo i le “ofutau.” Ua ia faapea mai: “Ia outou tatalo i le Agaga i aso uma lava i talotaloga ma faatoga uma; ia outou mataala pea lava i lenei lava mea, ma matuā tausisi i le faatoga mo tagata paia uma lava.” (Efeso 6:18) O lo tatou fili lē vaaia e matuā malosi tele o lea e manaomia ai “talotaloga ma faatoga uma.” O lea, maeu la le faamaoni ma le eseese e tatau ona faia ai o a tatou tatalo! E tāua tele lo tatou faalagolago atoatoa ia Ieova pe afai tatou te mananao ina ia tatou manumalo i le taua ma tausia le faamaoni. Ua na o ia e mafai ai ona foai mai pea “le matuā tele o le mana,” e mafai ai ona tatou tetee atu pea i lo tatou Fili sauā. Maeu se faamafanafanaga i le iloa faapea ua toeitiiti nei ona tuuina lea o lo tatou Fili sili i le to e le gata, ma mulimuli ane faaumatia e faavavau!—2 Korinito 4:7; Faaaliga 20:1-3, 10.

[Faaopoopoga i lalo]

E Mafai ona E Taliina?

◻ E faapefea ona tatou iloa o Satani o se peresona moni?

◻ Ai se ā ua fetaui lelei ai isi igoa ma taʻu ia Satani?

◻ O le ā le iloiloga totino atonu o le a fesoasoani ia i tatou e tetee atu ai i osofaiga poto a Satani?

◻ O le ā le fautuaga o le a fesoasoani e manumalo ai ia Satani, ma ai se ā?

[Ata i le itulau 15]

O se tasi auala e tetee atu ai i taaʻiga a Satani, o le faauo, ia loto fesoasoani, ma agaalofa

[Ata i le itulau 16]

E tatau ona tatou leoleo faasaga i le avea e pei o Anania ma Safaira o ē na gauai atu ia Satani

[Ata i le itulau 17]

Ina ia tetee atu i mea faatonutonu alu mamao a Satani, e lē mafai lava ona tatou lafoaia so o se vaega o lo tatou ofutau faaleagaga