Le Lautele Ofoofogia o le Lelei o le Atua

E LELEI le Atua! Ua faafia ona e faalogo i lena faaupuga pe sa oo lava foi ina e faia e oe lava? Ae pe sa e toe manatunatu ea i le tulaga atoa o le lautele o le lelei o le Atua ona o oe? O lena manatunatuga loloto ua faalolotoina ai lo tatou talisapaia o le ituaiga o Atua o loo tatou tapuai atu i ai.

Ae peitai, muamua lava, e manaomia ona tatou malamalama po o le ā le lelei. O le mea moni, o le lelei, o le uiga lea o le lelei e faafeagai ma le leaga. Ae o le lelei e sili atu na i lo o lena. O se uiga e tiotio. O se tagata lelei na te faia le lelei. Ma o le Atua, ona o lona lelei, ua ia faia ai le tele o mea lelei mo i tatou lea ua mafana ai o tatou loto ia te ia.

O le faasologa lautele o le lelei o le Atua ua vaaia i ana fetalaiga ia Mose i le vao o Sinai. I inā, na ia folafola ai i lana auauna faamaoni: “Ou te faaui atu loʻu lelei uma i ou luma.” I le faataunuuina o lena folafolaga ma i le faaaogāina o lona lava suafa, ua fetalai atili ai le Atua: “O Ieova, o Ieova, o le Atua alofa mutimutivale ma le alofa fua, e telegese lona toasa, a e tele le alofa ma le faamaoni; o lē tausi le alofa e oo atu i afe o tupulaga; o lē faamagalo foi i le amioletonu ma le solitulafono ma le agasala, a e le faasaoina lava e ia o e agasala.”—Esoto 33:19; 34:6, 7.

O le mea lea, o le lelei o le Atua e aofia ai lona alofa mutimutivale faapea ma lona alofa fua, lona alofa agalelei, ma lona faamaoni. I le faaopoopo atu i ai, o lona lelei ua vaaia i le tulaga faapea e “telegese lona toasa,” e onosai. Ae peitai, e lē o le uiga o lena mea faapea ua pei o ia o se matua e soona faamagalo naʻuā, i le faatagaina o le agasala e faaauau pea e faavavau e aunoa ma le taofia. “E le faasaoina lava e ia o e agasala” mai le faasalaina o tagata agasala lē salamō. O se Atua lelei, na te lē mafai ona faatagaina le amioleaga e faia e aunoa ma le taofia.

Le Anoanoai o le Lelei o le Atua

Seʻi iloilo nei, nisi o auala ua faaalia ai e le Atua lona lelei. Ina ia amata ai, sa lelei o ia i tagata ina ua ia uluai foafoaina le lalolagi. Na te leʻi tau ina saunia o ni nai mea matuā manaomia ia lava mo le olaga o le tagata. Na i lo o lea, na ia tuuina atu le tele o le ʻoa i lo tatou paneta ina ia faia ai ia fiafia moni le olaga. Na ia tuuina mai le matalasi eseese o meaʻai ma mea inu. Na ia faia ituaiga ofoofogia o manu vaefa ma manu felelei, ma na ia foafoaina fugalaau ua faaopoopo atu ai le lanu ma le matagofie i o tatou siosiomaga. E faaopoopo atu i ai, na ia faia le tele o ituaiga o vaaiga eseese, e faafiafia ai la tatou vaai. Ioe, o taimi uma tatou te vaai ai i le la goto malualii po o le matagofie uigaese o faaputugaao, ua tatou vaaia ai faamaoniga o le lelei o le Atua!

Ina ua ia foafoaina le tamaloa ma le fafine, sa toe vaaia ai foi le lelei o le Atua. Na ia tuuina atu ia Atamu ma Eva ni tino soifua maloloina ma le lelei atoatoa, ma tuu i laua i le faatoaga o Etena. Ona ia tuuina atu lea ia i laua se tofiga fiafia ma o se luʻi: “Ia tumu ai le lalolagi, ia faatoilalo i ai.” O lea, na ia faataatia ai i o la luma le faamoemoe o le olioli i le ola e faavavau i le lalolagi parataiso faatasi ai ma le toatele o a la fanau. (Kenese 1:26-28; 2:7-9) Maeu se meaalofa matagofie mo le faaipoipoga a le uluai ulugalii faaletagata!

E ui lava ina ua fouvale Atamu ma Eva, ae sa leʻi tuulafoaia atoatoa ai e le Atua i laua. I lena itu, ana fai na ia faasalaina loa i laua i le oti faafuasei, semanū la ua na ona ia faia ai loa o le mea ua tonu. Ae peitai, sa lelei o ia i le ulugalii agasala sa iai i inā. Na ia faatagaina i laua e ola pea mo sina taimi ma ia iai ni a la fanau.—Kenese 5:1-5.

Ae lē gata i lea, ua faaauau pea le lelei o le Atua agaʻi i le fanau a tagata ua paʻūū talu mai lea taimi. E pei ona fai mai le Tupu o Tavita: “O loo agalelei mai Ieova i mea uma, o lona alofa mutimuti vale foi ua i ana mea uma na fai.” (Salamo 145:9) Ua ia saunia le anoanoai o mea ina ia mafai ai ona faaauau pea le olaga faaletagata i lona nofoaga totino, le lalolagi. Na fetalai atu Iesu i tagata Iutaia o ona aso: “O lo outou Tamā o i le lagi, . . . na te faaoso i lona la i e ua amio leaga atoa ma e ua amio lelei; ua ia faatotō ifo foi le ua i e ua amiotonu, atoa ma e ua amioletonu.” (Mataio 5:45) So o se fia taumafa po o se oge ua tutupu mai e lē ona ua lē taulau ona saunia e le Atua mea mo le fanau a tagata. Ua faapea ona o le iʻuvale, faiga sauā, ma le lē agavaa o tagata.

Ua faatagaina foi e le Atua le fanau a tagata e suesueina ʻoa o minerale o le lalolagi, ma ua lē natia mai foi ia i latou se fua o le malamalamaga o le lagi vavaloloa ma fausaga faaletino o faia aʻe ai mea. E moni, e lelei Ieova i le fanau a tagata, e ui lava ua faapea mai ma le faamaualuga le toatele e leai se Atua, ma ua faaaogāseseina e isi lona lelei mo ni itu manatu faapito, ua oo lava i le tulaga ua latou sauāina ai uso a tagata.—Salamo 14:1.

Le Lelei o le Atua i Ē Talitonu

Ae peitai, afai ua lelei le Atua i le fanau lautele a tagata, o ana feutagaʻiga la ma ē talitonu ua mafanafana moni ai le loto. Ina ia amata ai, ina ua uluai fouvale Atamu ma Eva, na valoia e le Atua faapea o le a aliaʻi mai se “fanau” o lē o le a na foia mulimuli ane āuga leaga o le la agasala. (Kenese 3:15) A o faagasolo taimi, o le toatele o fanau a Atamu sa tapuai atu ma le faamaoni i le Atua e ui lava i o latou lē lelei atoatoa, ma o lenei uluai valoaga na avatu ai ia i latou le faamoemoe o se lumanai e sili atu ona lelei. O se tasi o nei tagata tapuai faamaoni, o Aperaamo, o lē na oo lava ina taʻua “o le uo a Ieova.”—Iakopo 2:23, NW.

Na folafola e le Atua ia Aperaamo faapea o lana fanau o le a tutupu mai ai ni nuu se tele ma faapea o le gafa autū o lana fanau o le a ʻaināina le nuu o Kanana. I le faataunuuina o lenei mea, na mulimuli ane ai faamaopoopoina tagata Isaraelu, le fanau a Aperaamo, e avea o se nuu. (Kenese 17:3-8; Esoto 19:6) Sa toe lelei foi le Atua i lenei nuu fou, i le laveaiina o i latou mai i le nofo pologa i Aikupito, i le puipuia o i latou i le vao, i le saunia mo i latou o se au tulafono ma le tofi faaositaulaga, ma i le iʻuga na tuuina atu ai ia i latou le laufanua lafulemū o Kanana e avea ma o latou tofi.

Mulimuli ane, na avea Isaraelu ma malo, ma na tofia e Ieova le tupu faaletagata lona tolu mo i latou, o Solomona, ina ia fausia le malumalu i Ierusalema e avea o le nofoaga ogatotonu o le lalolagi mo Lana tapuaiga. Ina ua maeʻa ona fausia le malumalu, sa faia se sauniga mataʻina o le faaulufaleina ma se tausamiga e olioli ai. Ina ua mavae lea, ua faapea mai le faamaumauga, o tagata Isaraelu “ua latou faamanuia atu foi i le tupu, ma latou o i o latou fale ie ma le olioli ma le loto fiafia, ona o mea lelei uma na faia e Ieova.” (1 Tupu 8:66) Sa iai foi isi sauniga na matuā faatumuina ai loto o tagata Isaraelu ona o le lelei o le Atua ia i latou.

Ae peitai, e faanoanoa ai, ona latou te leʻi talisapaia pea lo latou faaeaga o le avea ma ē tapuai a le Atua moni e toatasi. Mulimuli ane, na oo ina lē faamaoni Isaraelu i le avea o se nuu e tasi, ma i le 607 T.L.M., na faatagaina ai e Ieova i latou ina ia aveese atu faatagataotaua i Papelonia. E pei ona fetalai le Atua ia Mose, ona o Lona matuā lelei “e le faasaoina lava e ia le agasala” mai le faasalaina.—Esoto 34:7.

Ae peitai, ina ua mavae le 70 tausaga, ona toe aumaia lea ma le agalelei e le Atua se vaega totoe faamaoni o Isaraelu i lo latou lava laueleele. O le ā na uunaia ai o ia e faia faapea? O lona lelei. Na tusi faavaloaga Ieremia e uiga i le toe foi mai o tagata Isaraelu mai Papelonia: “E o mai foi i latou ma latou alalaga fiafia i le mea maualuga o Siona, latou te gasolo ane i mea lelei a Ieova.” Sa faaauau le perofeta: “E malie foi loʻu nuu i aʻu mea lelei, o loo fetalai mai ai Ieova.”—Ieremia 31:12, 14.

Mulimuli ane, na afio mai Iesu i le lalolagi ma faamaonia e avea o le “fanau” na valoia i lena valoaga na fofogaina atu i tuā i Etena. (Kenese 3:15) Ua faapea mai le Tusi Paia: “Ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” (Ioane 3:16) O le maliu o Iesu na saunia ai se togiola e faatau mai ai le fanau a tagata mai le agasala ma toe faafoisia i latou i le lelei atoatoa. O lea, i le iʻuga, o le a aveesea ai āuga leaga o le agasala a Atamu. E pei ona sa tusi atu Paulo i Roma: “Faapei ona avea ma agasala o le toatele i le le anaana o le tagata e toatasi, e faapea foi ona avea ma amiotonu o le toatele i le anaana o le toatasi.” (Roma 5:19) Faafetai i le lelei o le Atua, ona ua iai ai i le taimi nei i tagata loto saʻo le faamoemoe o le mauaina o le ola e faavavau. Ua oo lava ina mafai ona avea i latou ma uo a le Atua, e pei ona sa faia e Aperaamo.

Ua faaauau pea ona faaalia le lelei e le Atua e oo mai lava i aso nei ia i latou o ē tapuai ia te ia. Ua ia avatu fautuaga e ala i le Tusi Paia e fesoasoani ia i latou i le taulimaina o o latou faafitauli. (Salamo 119:105) Ua ia ofoina atu le meaalofa foai fua o lona agaga e fesoasoani ai ia i latou ia ausia ana ausiaga amiotonu. Ma ua ia faaalia ana fuafuaga, ina ia vaavaai atu ai i luma Kerisiano moni i se lalolagi fou amiotonu o le a aumaia i totonu pe a mavae atu lenei lalolagi tuai. (Faataoto 4:18; 2 Peteru 3:13) Ua mautinoa e Kerisiano e uiga i na mea ona, talu ai o le lelei o le Atua, ua ia faaalia ai na mea i totonu o lana Afioga lē masese.—2 Timoteo 3:16.

Ioe, o le talanoaina o le lelei o le Atua e mautinoa le faamafanafana ai o o tatou loto agaʻi ia te ia. Ae ua ia lagā ai foi se fesili:

O le ā le Tele o le a E Maua ai Aogā mai le Lelei o le Atua?

O le mea moni, po o ai lava oe, ua uma ona e maua aogā mai le lelei o le Atua. Ua e manava, ua e ʻai, ua e inu, ua e olioli i le ola—o meaalofa uma ia mai le Atua. Ae pe o e maua aogā i le tulaga atoatoa e mafai ai? Ia manatua, sa faatapulaaina le lelei o le Atua ia Atamu ma Eva ina ua uma ona la agasala. Ua faapena foi, o le a ia faatapulaaina lana foai ia i tatou seʻi vaganā ua tatou tali atu i le auala saʻo i lona agalelei. E mafai faapefea ona tatou faia o lenei mea?

Na tatalo le faisalamo: “Ia e aʻoaʻo mai ia te au i le faautauta lelei ma le poto; auā ua ou faamaoni i au poloaiga.” (Salamo 119:66) E tatau foi ona avea lena o a tatou tatalo. Ona o le Atua e lelei, e manaomia ai ona tatou aʻoaʻo ina ia lelei e pei o ia. Na uunai mai Paulo: “Ia faaaʻoaʻo outou i le Atua, faapei o le fanau pele.”—Efeso 5:1.

Tatou te faia lenei mea, muamua e ala i le suesueina o le Tusi Paia ina ia iloa po o le ā le lelei. Ona tatou talosaga atu lea mo le fesoasoani a le Atua ina ia atiina aʻe ai lenei uiga. O le lelei o se fua o le agaga, faatasi ai ma le ‘alofa, olioli, filemu, onosai, mataalofa, . . . faamaoni, agamalu, [ma le] pulea o oe lava.’ (Kalatia 5:22, 23) E mafai ona tatou atiina aʻe nei uiga uma lava e ala i le faalagolago atu i le agaga o le Atua, suesueina le Tusi Paia lena na faagaeeina e le Atua, tatalo atu ia te ia mo le fesoasoani, ma auaufaatasi ma Kerisiano e faapena o latou mafaufau.—Salamo 1:1-3; 1 Tesalonia 5:17; Eperu 10:24, 25.

Ua faapea mai foi le Tusi Paia: “Ona ua taʻua le tele o lou lelei ua latou taʻutaʻu atu ai, ma ona o lau amiotonu o le a latou alalaga atu ai ma le olioli.” (Salamo 145:7, NW) Ioe, ua faatalitalia i tatou e le Atua e taʻu atu i isi e uiga i lona lelei. E tatau ona tatou tautala atu ma le saoloto e uiga i lo tatou Tamā faalelagi.

I le faaiʻuga, e lē tatau ai ona tatou masalosalo i le lelei o le Atua. E moni, e faamagalo e Ieova tagata agasala. Sa mautinoa e le Tupu o Tavita o le a talileleia mai lana tatalo: “Aua e te manatua aʻu agasala ina ou taulealea, ma oʻu solitulafono; a e tusa ma lou alofa ia e manatua mai aʻu, Ieova e, ona o lou agalelei.” (Salamo 25:7) Pe o le uiga o lena mea faapea e mafai ona tatou faatagaina i tatou e faia agasala i le faatalitalia ma le mautinoa o le faamagaloga a le Atua? E leai lava. Ia manatua, o le uiga o le lelei o le Atua faapea “e le faasaoina lava e ia o e agasala” mai le faasalaina i tagata agasala lē salamō.

Olioli i le Lelei o le Atua

Pe a tatou tofo atoatoa i le lelei o le Atua, maeu le mafanafana o o tatou loto agaʻi ia te ia! Ua faalaeiauina i tatou ina ia mulimuli i le apoapoaiga lelei a le aposetolo o Paulo: “Ia faaauau ona outou savavali faapei o le fanau o le malamalama, auā o le fua o le malamalama e aofia ai ituaiga uma o le lelei ma le amiotonu ma le upu moni.”—Efeso 5:8, 9, NW.

I aso uma lava, tatou te iloa ai e uiga i le manatu alofa mai o le Atua mo i tatou. E oo lava i lalo o tulaga aupito sili ona faigata, tatou te iloa ai na te lē tuulafoaia i latou o ē alolofa ia te ia. Ioe, ua tatou tofo i le maualuga o le filemu o le mafaufau o le faisalamo: “E mautinoa o le a mulimuli mai ia te aʻu le lelei ma le alofa agalelei i aso uma o loʻu ola; ma o le a ou nofo foi i le fale o Ieova i aso e tele lava.”—Salamo 23:6, NW.