Tagata Talavou o Ē Auauna i le Atua

PE E TE manatu o se mea e lē masani ai le faaaluina e ni tagata talavou lelei ni o latou taimi, e aunoa ma se totogi, ina ia ō atu ai i lou fale ma talanoa atu e uiga i le Atua? Pe o se mea e foliga mai e ofo ai, i lenei tupulaga ua tupu tele ai le lē talitonu, faapea o tamaiti ua aufaatasi ma o latou mātua i le talanoa atu i isi e uiga i folafolaga ofoofogia a le Tusi Paia i se lumanai fiafia?a

I le tele o le sili atu i le 60,000 o faapotopotoga a Molimau a Ieova i le lalolagi atoa, o le a e maua ai le toatele o tagata talavou. Latou te lē o atu i se aʻoga Aso Sa faalevaiaso po o se vasega e aʻoaʻo ai talitonuga eseese. Na i lo o lea, o nei tagata laiti latou te maua mai ai aogā ma e oo lava i le auai i sauniga a le faapotopotoga. O tagata laiti e mafai ona latou ofo atu ni tali faigofie. O ē e leʻi atoa le taʻi sefulutolu o tausaga latou te fai se sao i le Aʻoga o le Faiva Faatiokarate. E toatele tagata talavou ua taʻi sefulu ma ona tupu tausaga latou te faaaluina vaitaimi o tuuaga a aʻoga e fesoasoani atu ai i o latou tuaoi e aʻoaʻo e uiga i le Atua ma ana folafolaga ofoofogia mo le lumanai.

E leai lava se mea fou e uiga i gaoioiga a na talavou. Ua taʻu mai e le Tusi Paia e uiga i tane ma fafine talavou faamaoni faapea foi ma talavou ma tamaiti laiti, o ē ua latou faataatia ni faaaʻoaʻoga mataʻina i le auauna atu i le Atua.

Na valoia e le tusi o le Tusi Paia o le Salamo se “aufaatasiga o tane talavou,” e avea o se mea e malōlō ai ma ua faatoateleina e pei o le “sau,” i le auaunaga faaleatua. Ua taʻua ai foi e uiga i “taulelea” ma “teine” o loo vivii atu i le suafa o le Atua. (Salamo 110:3, NW; 148:12, 13) E faapena foi, o nisi o tagata talavou sa iai faatasi ma i latou na iai ina ua liligi ifo le agaga paia o le Atua i ē talitonu i le aso Penetekoso 33 T.A. I lena aso pe a ma le 3,000 na talia le Afioga a le Atua ma na papatisoina. Na faapea mai le aposetolo o Peteru o lenei mea na tupu e maofa ai sa o le faataunuuga o le valoaga a Ioelu: “Ona perofeta mai lea o outou atalii ma o outou afafine, e iloa faaaliga e o outou taulelea, e fai miti foi o outou toeaina.”—Galuega 2:4-8, 16, 17, 41.

O isi faaaʻoaʻoga faale-Tusi Paia o tagata o ē na auauna ia Ieova le Atua i lo latou talavou e aofia ai Samuelu, le Tupu o Tavita amiotonu, o perofeta lauiloa a le Tusi Paia o Ieremia ma Tanielu, faapea foi ma Timoteo faamaoni. I lenei lomiga o loo iai ni mataupu se tolu e feagai lelei lava ma nisi o nei faaaʻoaʻoga faale-Tusi Paia. O le a e iloa ai mai i nei mataupu le pogai na uigā ai i talavou, faapea foi ma tagata matutua le auaunaga i le Atua ma le pogai na faaalu ai le tele o o latou taimi e fesoasoani atu ai i o latou tuaoi ina ia faia lea lava mea.

[Faaopoopoga i lalo]