Faalauiloaina o le Tala Lelei i le “Aai o Tagata Polenisia” i Niu Sila

“O LE Aai Aupito Telē o Tagata Polenisia i le Lalolagi.” O le taʻu lena ua taʻua ai e nisi le aai aupito sili ona telē o Niu Sila, o Aukilani. Aiseā? Auā e lē gata o le nuu o tagata Polenisia moni lava latou o Niu Sila, o tagata Maori ia, ae talu ai foi ona o le faitau sefulu afe o isi tagata Polenisia o loo mau ai i inā. I tausaga na sei mavae atu, sa latou siitia ese mai Samoa i Sisifo, le Atu Kuki, Toga, Niuē, ma isi motu o le Pasefika. Ioe, ua sili atu nei ona toatele tagata Maori mai le Atu Kuki i Niu Sila na i lo o i latou o iai i motu uma o le Atu Kuki lava ia! E faapena foi i tagata Niuē o loo nonofo mau i Aukilani, ua matuā sili atu ona toatele na i lo tagata o loo nonofo i Niuē.

E ui lava ua siitia atu nei tagata o atu motu o le Pasefika i Aukilani ona o le mea muamua lava o tulaga tau tamaoaiga, ae e iai foi isi o latou manaoga e ao ona faamalieina. O le manaoga tāua i nei tagata e faavae i le Tusi Paia lo latou alofa, o o latou manaoga faaleagaga. (Mataio 5:3) I le iloa o lenei mea, ua faamuamua ai e Molimau a Ieova i Niu Sila se taumafaiga tele lava e folafola atu ai le “tala lelei o le malo” i nei tagata o atu motu. (Mataio 24:14) O le ā ua faia e tusa ai ma lenei mea, ma ua faapefea ona tali atu tagata o atu motu?

Ua Faia e Tagata Samoa se Agaʻigaʻi i Luma

O le faamatalaga na faia e se misionare i Samoa ua taʻu mai ai ia i tatou se mea e uiga i manatu o tagata o atu motu e faatatau i mea faaleagaga. “Pe a e muaʻi feiloai atu i se tagata i Niu Sila, o se tu masani le tuu fesili i ai e uiga i lana galuega masani,” ua ia faamatala mai ai. “I Samoa o le uluai fesili lava e fesili ai e masani ona fesootai ma le sootaga faalelotu o se tasi.” O le mea lea, e lē o se mea e ofo ai, ona o le matuā saosaoa o le vave faatuputeleina o faapotopotoga e tautatala i le gagana Samoa e lua o Molimau a Ieova i Aukilani, na i lo le tuufaatatau i faapotopotoga i Niu Sila.

Na faavaeina le uluai faapotopotoga Samoa i Aukilani i le 1977. Ona o le faatuputeleina na aumaia e le Atua, na faavaeina ai le faapotopotoga lona lua i le fitu tausaga mulimuli ane. (Faatusatusa 1 Korinito 3:6.) I nei faapotopotoga e lua, e 154 le aofai o ē faalauiloa le Malo, o le 12 o i latou o loo tiotio i le faiva faasauatoa. I se tasi o Aso Sa masani, e sili atu i le 275 tagata e auai i sauniga faavae i le Tusi Paia e faia i le Maota o le Malo.

E uigā manatu o uso ma tuafafine Samoa i lo latou faatuatuaga, e pei ona faamaonia i le maelega ma le maumauaʻi ua latou faaalia i la latou galuega talaʻi o le Malo ma le faia o soʻo. (Mataio 28:19, 20) Ua mafai ona faamaonia lenei i le mea na tupu i se tuafafine Samoa, lea o loo mulimuli mai:

I le faiva i lea fale ma lea fale, na feiloai ai le tuafafine ma se fafine o lē na faitio i lotu uma lava faapea e pepelo ma tapuni mai le faitotoa. I le lē mautonu ma ua leai se faamoemoe, sa tau mānatu ai le tuafafine po o le ā o le a ia fai. ‘E lē mafai ona ou tuua o ia e manatu faapea e tala pepelo Molimau a Ieova,’ sa ia manatu ai. O lea na ia filifili ai e tusia se feau puupuu i se fasi pepa ma tuu e faailoa atu ai. “Sa ou faamatala puupuu ai le faavae faale-Tusi Paia mo laʻu galuega ma fesili i ai pe mafai ona ia tuu mai se avanoa ia te aʻu e faamatala ai ia te ia le faamoemoe o loo ofoina mai e le Tusi Paia. Sa ou tusia ai foi ma le numera o laʻu telefoni.”

Ona faaauau lea o le faiva a le tuafafine, o le asiasi atu lea i isi aiga. Ina ua ia taunuu atu i le fale lona fa i le auala, sa tuuina atu ia te ia se feau mai se telefoni ina ia toe foi atu e vaai le fafine o lē na ia tapunia mai ma le ita le faitotoa i le taimi muamua. “Sa faatoese mai le fafine ona o lana uluai tali mai,” ua faamatala mai ai e le tuafafine, “ma na faaalia le talisapaia i le feau na ou tuua. Sa mulimuli ane faia se talanoaga fuatele mai, ma na faavae ai loa se suesuega faale-Tusi Paia.”

O se faamafanafanaloto foi le vaai atu i le faaalia o le agaga faataulagaina faamisionare e nisi o Molimau Samoa. O se tasi o uso sa siitia atu ma lona aiga mai Aukilani i Ueligitone i le 1981 e fesoasoani i se vaega toaitiiti o loo galulue i se vaega o tagata Samoa i inā. Mai i totonu o tagata talaʻi o le Malo e 11 i lena taimi, na tupu aʻe ai se faapotopotoga o le aofia e 47. “Ua matuā sili mamao atu ai taui ua maua na i lo taulaga,” na fai mai ai le uso. Talu ai nei, na tali atu ai o ia ma lona aiga i le ‘valaau faa-Maketonia’ ma ua toe siitia atu ai i Samoa i Sisifo. (Galuega 16:9, 10) O isi foi ua toe foi atu i o latou nofoaga sa iai muamua ma ua faia ai le galuega o le avea ma paeonia faapito, misionare, po o le auaunaga i Peteli.

Le Tali mai a Tagata Niuē

O loo agaʻi foi i luma le galuega talaʻi i tagata Niuē i Aukilani. Ua lipoti mai e le ovasia faimalaga e faapea: “I le faiva i lea fale ma lea fale, o se tu masani le valaaulia ina ia ulufale. E masani pea lava ona iai Tusi Paia a le aiga i le mea e faigofie ona maua ai, ma ua manatu i ai o se mea e masani ai le talanoaina o le Tusi Paia.”

Ua iai nei foi la se faapotopotoga tiotio o tagata Niuē i Aukilani. I le taimi o le asiasiga a le ovasia faimalaga i le tausaga ua mavae, sa mafai ai e tagata talaʻi o le Malo e 76 o loo auai ona faafeiloaia tagata e 127 i le lauga faavae i le Tusi Paia mo le lautele i le Aso Sa. Ma o loo iai se agaga lelei i uso ma tuafafine.

“O le asiasiga, ua manatu i ai o se vaiaso faapitoa o faalaeiauga mo tagata uma lava,” ua matauina ai e le ovasia faimalaga. “O taumafataga taitasi, o le matāfaioi lena a le faapotopotoga. Ma o taimi faapitoa na e laulauina atu ai mea taumafa faa-Niuē e pei o le takihi (o se taumafataga o esi, talo, ma le peepee ua afifi i se laufaʻi), o le pitako (o se faapapa e faia mai i talo, faʻi, ma manioka po o tapioka), ma le punu povi (po o le pisupo), i nisi taimi e ula ai ma faasino atu faapea e pei lava o se fasi [steak] povi aupito sili ona lelei i tagata o atu motu.”

Lomiga i Gagana Polenisia

Ina ia faamalieina manaoga faaleagaga o tagata Polenisia i Aukilani ma isi mea, ua fuafua ai e le Sosaiete o le Olo Matamata ina ia saunia ni lomiga faale-Tusi Paia i gagana a tagata Polenisia. Mo se faaaʻoaʻoga, o Le Olomatamata faa-Rarotoga, ma faa-Maori mai le Atu Kuki, ua lomia e faalua i masina taitasi. Ua maua lelei foi Le Olomatamata faa-Niuē i masina taitasi. O le tufatufaina atu o lomiga o Le Olomatamata faa-Rarotoga ma le faa-Niuē i le taimi nei ua tusa ma le 1,000 kopi i gagana taitasi, ma ni kopi se 900 o lomiga faa-Samoa ua faasalalau atu nei i Niu Sila.

E faaopoopo i Le Olomatamata, ua maua ai foi ni tusi ma polosiua i le tele o gagana eseese faa-Polenisia. O le tusi O Le Upu Moni E Taʻitaʻi Ai I Le Ola Faavavau, na lomia i le faa-Niuē i le 1989, o le uluai lomiga lea i lena gagana ua saunia ai se malamalamaga i aʻoaʻoga faavae o le Tusi Paia. O le tusi ua faapitoa lava lona aogā i tagata Maori mai le Atu Kuki (faa-Rarotoga), o le E Mafai ona E Ola e Faavavau i Parataiso i Le Lalolagi i lena gagana. O le mea lelei, ona o suesuega uma lava faale-Tusi Paia i aiga ua faia faatasi ma le fesoasoani a lena tusi. “I le molimau e uiga i le avea o le tusi o se fesoasoani uigā e aʻoaʻo atu ai,” ua matauina ai e se toeaina faapea, “o se sauniuniga talafeagai ua mafai ai ona amata auai mai tagata aʻoga i sauniga a le faapotopotoga.”

E faaopoopo i la latou galuega masani o le tufatufaina atu o nei lomiga i lea fale ma lea fale, ua tufaina atu ai foi e tagata o Ieova le tele o isi lomiga i le mea ua mafai ona taʻua o le molimau atu i maketi e faatau atu ai mea a tagata o atu motu. Ona o le matuā tupu tele aʻe o le aofaiga o tagata Polenisia i Aukilani i nai tausaga ua mavae atu, ua faateleina ai foi le tupu aʻe o maketi tetele e faapitoa lava i le faatauina atu ai o mea taumafa ma mea taulima a Atu Motu o le Pasefika mo se taimi lē tumau. Pe tusa ma le 25,000 le toatele o tagata e ō atu i na maketi i taeao o Aso Toonai. I le faaaogāina ma le poto o lenei avanoa, e ō atu ai Molimau ma talanoa atu ia i latou o ē ona mea o faatauina ma tagata faatau e uiga i le Malo o le Atua.

E ala i la latou faiva, ua mafai ai e Molimau a Ieova ona lūlū le anoanoaʻi o fatu o le Malo ma tufaina atu ni aofaiga tetele o lomiga faale-Tusi Paia i tagata Polenisia. Ua lipotia mai e le ofisa o le lālā o le Sosaiete o le Olo Matamata faapea i le tausaga faaleauaunaga o le 1990, sa aauina mai ai mai le falegaosimea le 23,928 lomiga i gagana a tagata Polenisia.

Olioli i le Laoʻai Faaleagaga e Tasi

I le iloa e uiga i o latou manaoga faaleagaga, e tuu ai e Molimau Polenisia i se tulaga sili ona maualuga le faamuamua i le auai i sauniga Kerisiano faalevaiaso i Maota o le Malo, atoa foi ma lo latou auai i a latou fonotaga ma tauaofiaga. (Eperu 10:23-25) I le Tauaofiaga Itumalo o le “Faamasinoga Tonu Tauatua” na faia i Aukilani ia Tesema 1988, sa faia ai polokalama eseese i le faa-Samoa, Niuē, ma Maori mai le Atu Kuki. O se mea tāua i le polokalama faa-Samoa o le tala faale-Tusi Paia, sa matuā matagofie ma aasa lona faatinoina. Sa faaalia ai foi e Molimau Niuē ma le Atu Kuki o loo nonofo i Aukilani o latou uiga talimalo faa-Kerisiano e ala i le avea o ni tagata talimalo lima foai i tagata na asiasi mai mai o latou lava atu motu moni. O le tauaofiaga sa faamaonia le avea o se sauniga mo se faigaʻai ma olioli ai i le laoʻai faaleagaga a Ieova. I le Tauaofiaga o le 1990 o le “Gagana Mamā” i Aukilani, o se tumutumuga e 503 sa auai i polokalama faa-Samoa.

O le tali atu ma le mautinoa i le feau o le Malo o se faaaliga manino lea faapea o tagata mai motu Polenisia o le Pasefika i Saute sa ‘faatalitali atu mo tulafono a Ieova.’ (Faatusatusa Isaia 42:4, 12.) O le iʻuga, ua latou auai ma le olioli i le faalauiloaina atu o le tala lelei i “le aai o Tagata Polenisia” i Niu Sila.