E Alofa Ieova i Ē Foai ma le Loto Fiafia
“Ia taitoatasi ma foai e pei ona filifili i lona loto; aua ma le tiga, aua foi ma le faatauanauina; auā e alofa le Atua i le ua foai ma le loto [fiafia].”—2 KORINITO 9:7.
1. Ua faapefea ona avea le Atua ma Keriso o ni ē e foai ma le loto fiafia?
SA AVEA Ieova o lē na uluai foai ma le loto fiafia. Na ia foaiina atu ma le olioli le ola i lona Alo pele e toatasi ma sa ia faaaogāina o ia e foafoaina ai agelu atoa ma le fanau a tagata. (Faataoto 8:30, 31; Kolose 1:13-17) Ua foaiina mai e le Atua ia i tatou le ola ma le mānava ma mea uma lava, e aofia ai uaga mai le lagi ma fuata o tau, ua faatumuina ai o tatou loto i le fiafia. (Galuega 14:17; 17:25) O le mea moni, o le Atua ma lona Alo, o Iesu Keriso, o ni ē e foai ma le loto fiafia. Ua la foai mai ma le fiafia faatasi ma le agaga o le lē manatu faapito. Ona ua alofa tele mai Ieova i le lalolagi o le fanau a tagata na “ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.” Ma na ‘foaiina mai ma le lē mataofiofia e Iesu lona solu o se togiola e sui aʻi le toatele.’—Ioane 3:16; Mataio 20:28.
2. E tusa ai ma Paulo, o le ā le ituaiga o foai e alofa i ai le Atua?
2 O le mea lea, e ao ai i auauna a le Atua ma Keriso ona avea o ni ē foai ma le loto fiafia. Sa faalaeiauina lea foai i le tusi lona lua a le aposetolo o Paulo i Kerisiano i Korinito, lea na tusia e tusa o le 55 T.A. Atonu e faatatau i foai tauofo ma meaalofa tau tupe a le tagata lava ia sa faia faapitoa e fesoasoani ai i Kerisiano matitiva i Ierusalema ma Iutaia, na faapea mai ai Paulo: “Ia taitoatasi ma foai e pei ona filifili i lona loto; aua ma le tiga, aua foi ma le faatauanauina; auā e alofa le Atua i le ua foai ma le loto [fiafia].” (2 Korinito 9:7; Roma 15:26; 1 Korinito 16:1, 2; Kalatia 2:10) Ua faapefea ona tali atu tagata o le Atua i avanoa latou te foai atu ai? Ma o le ā e mafai ona tatou aʻoaʻoina mai i le fautuaga a Paulo e uiga i le foai atu?
Uunaia e Loto Naunau
3. O le ā le tele na lagolagoina ai e tagata Isaraelu le fausiaina o le fale fetafai mo le tapuaiga ia Ieova?
3 Ua uunaia e loto naunau tagata o le Atua ina ia foaiina atu i latou lava ma a latou mea totino e lagolagoina ai le fuafuaga tauatua. Mo se faataʻitaʻiga, sa lagolagoina ma le fiafia e tagata Isaraelu i ona po o Mose le fausiaina o le fale fetafai mo le tapuaiga ia Ieova. Na uunaia e loto o nisi fafine i latou ina ia milo fulufulu o ʻoti, ae o nisi tamaloloa sa galulue o ni tufuga tusiata. Sa foaiina atu ma le loto fiafia e tagata auro, ario, laau, o ie lino, ma isi mea o ni tauofo ‘faameaalofa mo Ieova.’ (Esoto 35:4-35) Ona o lo latou matamau tele ‘sa matuā lava ai mea mo galuega uma lava, ma ua totoe.’—Esoto 36:4-7.
4. Faatasi ma le ā le uiga na foai atu ai Tavita ma isi i le malumalu?
4 I senituri mulimuli ane, na matuā foai atu ai le Tupu o Tavita agaʻi i le malumalu o Ieova lea sa tatau ona fausia e lona atalii o Solomona. Ona ‘sa fiafia Tavita i le fale o le Atua,’ na ia foaiina atu ai lana ‘oloa faapitoa’ o auro ma siliva. Sa faatumuina e alii, o matai ma isi o latou lima i se meaalofa mo Ieova. Faatasi ma le ā le iʻuga? Ioe, “ona fiafia lava lea o le nuu, auā na foai ma le loto, auā na latou foai ma le fiafia ma le loto atoatoa ia Ieova”! (1 Nofoaiga a Tupu 29:3-9) Sa avea i latou o ni ē foai ma le loto fiafia.
5. Sa faapefea ona lagolagoina e tagata Isaraelu le tapuaiga moni i le gasologa o senituri?
5 I le faagasologa o senituri, na faaeaina ai tagata Isaraelu e lagolagoina le fale fetafai, o malumalu na fausiaina mulimuli, ma auaunaga faafaitaulaga ma sa Levī na iai. Mo se faaaʻoaʻoga i ona po o Neemia, na amanaia ai e tagata Iutaia o ē na filifili e faia ni meaalofa ina ia tausia ai le tapuaiga mamā, faapea e lē tatau ona latou tuulafoaia le fale o le Atua. (Neemia 10:32-39) E faapena foi i aso nei, ua faia ma le loto fiafia e Molimau a Ieova foai faameaalofa e fausiaina ai ma tausia ai nofoaga e fai ai sauniga ma ia lagolagoina ai le tapuaiga moni.
6. Aumai ni faaaʻoaʻoga o foai ma le loto fiafia na faia e Kerisiano.
6 Sa avea uluai Kerisiano o ni ē foai ma le loto fiafia. Mo se faataʻitaʻiga, sa faia e Kaio ‘se galuega faamaoni’ i lona talimalo lelei ia i latou sa femalagaaʻi ona o manaoga o le Malo, e pei foi ona faasalafa atu e Molimau a Ieova le talimalo lelei i ovasia femalagaaʻi ia ua aauina atu nei e le Watch Tower Bible and Tract Society. (3 Ioane 5-8) E alu ai ni tupe ina ia mafai ona malaga atu nei uso i faapotopotoga ma ia faasalafa atu ia i latou le talimalo lelei, peitai, maeu le aogā faaleagaga o lenei itu!—Roma 1:11, 12.
7. Sa faapefea ona faaaogā e tagata Filipi a latou mea totino?
7 Ua faaaogāina e faapotopotoga atoa a latou mea faitino e lagolagoina ai manaoga o le Malo. Mo se faataʻitaʻiga, na faapea atu Paulo i tagata talitonu i Filipi: “Auā foi a o i Tesalonia aʻu, na outou avatu mea na ou mativa ai, ua atu tasi, ma le atu lua foi. E le ina ua ou saili se mea alofa, a ou te saili le fua e atili ai ona taʻuleleia ai outou.” (Filipi 4:15-17) Sa foai atu ma le loto fiafia tagata Filipi, ae o ā mea moni ua faapogaia ai lena foai ma le loto fiafia?
O le ā ua Uunaia le Foai ma le Loto Fiafia?
8. E faapefea ona e faamaonia faapea e uunaia e le agaga o le Atua tagata o le Atua ina ia avea ma ē foai ma le loto fiafia?
8 Ua uunaia e le agaga paia, po o le mana galue o Ieova, ona tagata e avea ma ē foai ma le loto fiafia. Ina ua matitiva Kerisiano Iutaia, sa uunaia e le agaga o le Atua isi tagata talitonu e fesoasoani atu ia i latou i mea faitino. Ina ia faalaeiauina Kerisiano i Korinito e faia le mea e sili, i le saunia o na meaalofa, na otooto atu ai e Paulo le faaaʻoaʻoga a faapotopotoga i Maketonia. E ui ina sa oo i tagata talitonu i Maketonia sauaga ma le mativa, ae sa latou faaalia le alofa faaleuso e ala i le foai atu e sili i mea latou te mafaia. Na oo lava foi ina latou talosaga atu mo le faaeaga o le foai atu! (2 Korinito 8:1-5) E lē faalagolago le finagalo o le Atua i na o meaalofa a ē tamaoaiga. (Iakopo 2:5) Ua avea pea ana auauna tuuina atu o ē matitiva ma lagolagosua autū i le faatupeina o le galuega talaʻi o le Malo. (Mataio 24:14) E ui i lea, latou te lē mafatia ona o lo latou limafoai, auā ua lē misia ona tausia e le Atua manaoga o ona tagata i lenei galuega, ma o le malosi o loo uunaia ai lona faaauau pea ma le faateleina, o lona agaga.
9. Ua faapefea ona fesootai le faatuatua, le poto, ma le alofa i le foai ma le loto fiafia?
9 Ua faapogaia le foai ma le loto fiafia e le faatuatua, le poto, ma le alofa. Na taʻua e Paulo: “E pei ona faulai o mea uma ia te outou [tagata Korinito], o le faatuatua, ma le upu, ma le poto, ma le filigā uma, atoa ma lo outou alofa mai ia te i matou, ia faapea foi ona faulai ia te outou o lenei mea alofa. E le saʻu upu poloai lenei ou te fai atu ai, a ona o le filigā o isi, e tofotofo foi pe moni lo outou alofa.” (2 Korinito 8:7, 8) O le foai atu i le finagalo o Ieova, ae maise lava pe afai e utiuti le tamaoaiga o lē e foai atu, e manaomia ai le faatuatua i sauniuniga a le Atua i le lumanai. Ua mananao Kerisiano o ē ua tumu i le poto ina ia auauna mo le fuafuaga a Ieova, ma ua faaaogāina ma le loto fiafia e i latou o ē ua tumu i le alofa mo ia ma ona tagata a latou mea totino e faalauteleina ai lona finagalo.
10. Aiseā e mafai ai ona faapea atu, o le faaaʻoaʻoga a Iesu ua uunaia ai Kerisiano e foai atu ma le loto fiafia?
10 Ua uunaia Kerisiano e le faaaʻoaʻoga a Iesu ina ia foai ma le loto fiafia. Ina ua maeʻa ona ia timaʻia tagata Korinito e foai atu ona o le alofa, na faapea mai Paulo: “Ua outou iloa le alofa tunoa o lo tatou Alii o Iesu Keriso, sa tamaoaiga ia, a ua faamativaina ona o outou, ina ia faatamaoaigaina outou i lona mativa.” (2 Korinito 8:9) E ui ina sili lona tamaoaiga faalelagi na i lo o se isi atalii o le Atua, ae na faamaualaloina e Iesu ia lava mai nei mea uma ae ola i se olaga faaletagata. (Filipi 2:5-8) Peitai, i le faamativaina i lenei auala lē manatu faapito, na saosaolaumea ai Iesu i le faapaiaina o le suafa o Ieova ma tuuina atu ai lona ola o se taulaga togiola mo le manuia o tagata o ē o le a taliaina. I le ōgatasi ma le faaaʻoaʻoga a Iesu, pe lē ao ai ea ona tatou foai atu ma le loto fiafia e fesoasoani ai i isi ma saosaolaumea ai i le faapaiaina o le suafa o Ieova?
11, 12. E mafai faapefea e se fuafuaga lelei ona avea ai i tatou ma ē foai ma le loto fiafia?
11 O se fuafuaga lelei e mafai ai ona foai atu ma le loto fiafia. Na taʻu atu e Paulo i tagata Korinito: “O le aso muamua o lea vaisapati ma lea vaisapati, ia outou taitasi ma tuu ane ai ni ana mea, ia faatatau mea e teu ma lona manuia ina neʻi faia ni aotelega pe a ou alu atu.” (1 Korinito 16:1, 2) I se auala faalilolilo ma faatauofo faapena, e lelei ai ia i latou o loo mananao e faia ni meaalofa mo le faalauteleina o le galuega o le Malo i aso nei, ona faataatia ese sina vaega o a latou tupe maua mo lena fuafuaga. O le iʻuga o lea fuafuaga lelei, ua mafai ai e Molimau taitoatasi, o aiga, ma faapotopotoga ona fai meaalofa i le faaauilumaina o le tapuaiga moni.
12 O le faataunuuina o fuafuaga ina ia foai atu o le a faafiafiaina ai i tatou. E pei ona fetalai Iesu, “e sili le [fiafia] o le na te foai atu, i le [fiafia] o le na te talia mai.” (Galuega 20:35) O lea na mafai ai ona faateleina e tagata Korinito lo latou olioli i le mulimuli i le fautuaga a Paulo ina ia faatinoina la latou fuafuaga ua atoa le tausaga ina ia auina atu ni tupe i Ierusalema. Na ia faapea atu, “e talileleia lea, e tusa ma mea ua ia te ia, a e le tusa ma mea e le o ia te ia.” Pe a faia e se tasi ni meaalofa e tusa ma mea ua ia te ia, e ao ona matuā faatāuaina. Afai tatou te faalagolago i le Atua, e mafai ona ia vaevaetonuina mea ina ia matamau ai i latou o loo tele mea, ae aua le faamāumauina, ma i latou e laiti a latou mea e lē o sologa lelei ua faaitiitia ai lo latou malosi ma le tomai ina ia auauna ai ia te ia.—2 Korinito 8:10-15.
Le Taulimaina Faaeteete o Foai
13. Aiseā na mafai ai e tagata Korinito ona tuu atu le mautinoa i le faatonutonuina e Paulo o meaalofa?
13 O Paulo sa faatonutonuina le faatatauga o meaalofa ina ia mafai ai e tagata talitonu o loo matitiva ona olioli i le fesoasoani faaletino ma auai atili ma le maelega i le galuega talaʻi, ae leʻi toesea lava e ia po o isi foi tagata ni tupe mo la latou auaunaga. (2 Korinito 8:16-24; 12:17, 18) Sa galue Paulo ina ia tausia ai ona lava manaoga faaletino na i lo o le faaee atu o avega mamafa tau tupe i so o se tasi o le faapotopotoga. (1 Korinito 4:12; 2 Tesalonia 3:8) O le mea lea, ina ua avatu ai meaalofa ia te ia, sa faatuatuaina e tagata Korinito na meaalofa i se auauna maufaatuatuaina, ma le galue mamafa a le Atua.
14. E faatatau i le faaaogāina o meaalofa, o le ā le talaaga ua maua e le Watch Tower Society?
14 Talu mai le tuufaatasia o le Watch Tower Bible and Tract Society i le 1884, sa iai i ē foai atu ni faamaoniga faapea o se faatonutonuga maufaatuatuaina lea mo meaalofa uma lava ua faatuatuaina atu i ai mo le galuega o le Malo o Ieova. Ina ia ōgatusa ma lona fuafuaga, ua tauivi ai le Sosaiete e faatumuina le manaoga e sili ona tāua o tagata uma, le manaoga mo mea faaleagaga. Ua faia lenei mea e ala i lomiga faale-Tusi Paia ma faatonuga i le auala e maua ai le faaolataga. I aso nei, ua faatelevaveina e Ieova le aoaoina o ē pei ni mamoe i lana faalapotopotoga ua faalauteleina, ma o lana faamanuiaga i le faaaogāina ma le atamai o meaalofa i le galuega talaʻi o le Malo o se faailoga manino lea o le taliaina e le Atua. (Isaia 60:8, 22) Tatou te mautinoa o le a faaauau pea ona ia uunaia loto o ē foai ma le loto fiafia.
15. Aiseā ua taʻua ai e lenei mekasini meaalofa i lea taimi ma lea taimi?
15 Ua faaaogāina e le Sosaiete mai lea taimi i lea taimi ni avanoa o lenei mekasini e fagufagu atu ai i ona tagata faitau lo latou faaeaga o le faia o meaalofa tauofo i le galuega talaʻi o le Malo i le lalolagi aoao. E lē o se aogā tupe lenei mea, peitai, o se faamanatu atu lea i tagata uma o loo naunau e lagolagoina le ‘galuega paia o le tala lelei’ a o faaʻoaina i latou e le Atua. (Roma 15:16; 3 Ioane 2) O loo faaaogāina e le Sosaiete tupe uma lava ua faameaalofa mai i se auala e sili ona faaeteete e faalauiloa ai le suafa o Ieova ma le Malo. Ua taliaina ma aloaia ma le loto faafetai meaalofa uma, ma ua faaaogāina e faasalalau atu ai le tala lelei o le Malo o le Atua. Mo se faaaʻoaʻoga, e ala i nei meaalofa ua faatumauina ai pea le galuega faamisionare i le tele o atunuu, ma ua tausia ai ma faateteleina fale lomitusi e matuā tāua mo le tufatufaina atu o le poto faale-Tusi Paia. E lē gata i lena, ua faaaogāina meaalofa mo le galuega i le lalolagi aoao, e totogia ai le tau mo le gaosia o Tusi Paia ma lomiga e faavae i le Tusi Paia atoa ma kaseti puʻe leo ma vitiō. I na auala ua faaauilumaina ai manaoga o le Malo e ē foai ma le loto fiafia.
Aua le Faatauanauina
16. E ui ina toaitiiti Molimau a Ieova e mauʻoa faaletino, ae aiseā e talisapaia ai a latou meaalofa?
16 E toaitiiti lava Molimau a Ieova e mauʻoa faaletino. E ui ina atonu latou te foaiina atu ni tupe ua fai faatatau e faaauiluma ai manaoga o le Malo, ae e faitaulia lava a latou meaalofa. Ina ua silasila atu Iesu i se fafine mativa ua oti lana tane o ia lafo ni tupe iti se lua e itiiti le aogā i totonu o le pusa e tuu ai tupe mo le malumalu, na ia fetalai atu: “O mea a lenei fafine mativa ua oti lana tane ua lafo i ai, ua sili lea i a latou uma. Auā o i latou uma [isi tagata o loo foai], ua latou lafo atu i taulaga a le Atua nisi mea mai a latou mea ua tele; a o ia ua mativa, ua lafo e ia ana mea uma e ola ai sa ia te ia.” (Luka 21:1-4) E ui ina sa laitiiti lana meaalofa, ae sa avea o ia o sē foai ma le loto fiafia—ma sa talisapaia lana meaalofa.
17, 18. O le ā le autū o upu a Paulo i le 2 Korinito 9:7, ma o le ā ua faaalia e le upu Eleni ua faaliliuina o le ‘loto fiafia’?
17 E tusa ai ma le galuega fesoasoani mo Kerisiano Iutaia, na faapea mai Paulo: “Ia taitoatasi ma foai e pei ona filifili i lona loto; aua ma le tiga, aua foi ma le faatauanauina; auā e alofa le Atua i le ua foai ma le loto [fiafia].” (2 Korinito 9:7) Atonu o loo faasino atu le aposetolo i se vaega o le Faataoto 22:8 i le faaliliuga a le Septuagint, lea e faapea mai: “E faamanuia e le Atua lē e foai ma le loto fiafia; ma o le a ia foaiina atu pea mea e manaomia mo lana galuega.” (The Septuagint Bible, sa faaliliuina e Charles Thomson) Na suia e Paulo le upu “faamanuia” i le “alofa,” peitai o loo iai so la sootaga, auā o le seleselega o faamanuiaga e mai le alofa o le Atua.
18 O lē e foai ma le loto fiafia e fiafia moni lava e foai atu. Ioe, e mafua mai le upu “soona olioli” mai le upu Eleni ua faaliliuina ‘loto fiafia’ i le 2 Korinito 9:7! Ina ua maeʻa ona faasino atu lenei mea, na faapea mai le tagata sikolasipi o R. C. H. Lenski: “E alofa le Atua i lē foai ma le loto malie, olioli, ma fiafia, . . . [o lē] ua faatumuina lona faatuatua i le fiafia pe a fesagaʻi o ia ma se isi avanoa e foai atu ai.” O se tagata e iai sea agaga olioli na te lē foai atu ma le tigā pe faatauanauina, ae ua iai lona loto i ana mea e foai atu. Po o faapena lou loto fiafia e uiga i le foai atu e lagolagoina ai manaoga o le Malo?
19. Sa faapefea ona faia e uluai Kerisiano meaalofa?
19 Sa leʻi faasoloina atu e uluai Kerisiano ni ipu e ao ai tupe pe faia le sefuluai e ala i le foaiina atu o le tasi vae sefulu o a latou tupe maua mo fuafuaga faalelotu. Na i lo lena, sa tauofo atoatoa a latou meaalofa. Na tusia e Tetuliano, o lē sa faaliliuina i le Faa-Kerisiano e tusa o le 190 T.A.: “E ui ina iai la matou pusa e tuu ai tupe, ae ua lē faia aʻe lea i ni tupe e faatau mai ai le faaolataga, e pei ona faia e se lotu ua iai lona taui. E faatasi i le masina, ona tuu e tagata taitoatasi sina meaalofa itiiti, pe a ia manao ai; ae seʻi vagana ua ia malie i ai, ma pe afai na te mafaia; auā e lē faatauanauina; ae tauofo mea uma.”—Apology Mataupu XXXIX.
20, 21. O le ā na fai mai ai se uluai lomiga o lenei mekasini e uiga i le faaeaga o le lagolagoina o le finagalo o le Atua i tulaga tau tupe, ma ua faatatauina faapefea e oo foi i le taimi lenei? (e) O le ā e tupu pe a tatou faapaiaina Ieova i a tatou ʻoa?
20 Ua avea pea foai faameaalofa ma masani a auauna a Ieova i aso nei. Peitai, i nisi taimi, ua lē faaaogā atoatoa ai e nisi lo latou faaeaga o le lagolagoina o le finagalo o le Atua e ala i le faia o foai. Mo se faataʻitaʻiga, ia Fepuari 1883, sa taʻua ai e lenei mekasini e faapea: “O loo tauaveina e nisi le tele naʻuā o avega mamafa [tau tupe] mo isi, ua mafua ai ona faaitiitia o latou malosi e foai atu ai tupe ona o le ova galulue ma le gaseā, ma o lea ua faaitiitia ai lo latou aogā; ma e lē gata i lea, ae o i latou o ē . . . e lē o malamalama atoatoa i le tulaga, ua latou misia le avanoa e mauaina ai faamanuiaga ona o le lē lava o le matamau e foai atu ai tupe.”
21 A o gasolo ane le motu o tagata e toatele i le faalapotopotoga a Ieova i aso nei, ma a o faalauteleina le galuega a le Atua i Europa i Sasae ma isi nofoaga sa faasaina ai muamua, o loo iai pea se manaoga faateleina mo le faalauteleina o fale lomitusi ma isi fale. E tatau ona gaosia atili nisi Tusi Paia ma isi lomiga. E tele galuega faatiokarate o loo faagasolo; peitai, e mafai ona sili atu le vave agaʻigaʻi i luma o nisi galuega pe afai e lava ma totoe tupe o loo iai. O le mea moni, tatou te faatuatua faapea o le a saunia e le Atua le mea o loo manaomia, ma ua tatou iloa faapea o i latou e ‘faapaiaina Ieova i a latou ʻoa’ o le a faamanuiaina. (Faataoto 3:9, 10) Ioe, “o le ua tele ana e lulu, e tele foi ana e selesele mai.” O le a ‘faaʻoaina i tatou e Ieova mo ituaiga uma lava o limafoai,’ ma o lo tatou foai atu ma le loto fiafia o le a faapogaia ai le toatele e faafetai atu ma vivii atu ia te ia.—2 Korinito 9:6-14.
Faaalia Lou Loto Faafetai mo Meaalofa a le Atua
22, 23. (a) O le ā le meaalofa foai fua e lē mafaamatalaina a le Atua? (e) Ona o lo tatou talisapaia o meaalofa a le Atua, o le ā e ao ona tatou faia?
22 Sa faapea mai Paulo lava ia, ina ua uunaia e le loto faafetai: “Faafetai i le Atua i lana mea foai fua e le mafaamatalaina.” (2 Korinito 9:15) I le saunia ‘o se taulaga togisala’ mo agasala a Kerisiano faauuina atoa ma i latou o le lalolagi, ua avea ai Iesu o le faavae ma auala mo le meaalofa foai fua e lē mafaamatalaina a Ieova. (1 Ioane 2:1, 2) O lena meaalofa “o le alofa tunoa o le Atua ua matuā tele” lea ua ia faaalia mai i ona tagata i le lalolagi e ala ia Iesu Keriso, ma o le a iʻu lea i lo latou faaolataga ma i le mamalu ma le taʻumamāina o Ieova.—2 Korinito 9:14.
23 E avatu la tatou faafetai ia Ieova mo lana meaalofa foai fua e lē mafaamatalaina ma le tele o isi meaalofa faaleagaga ma faaletino i ona tagata. Ioe, e matuā ofoofogia le agalelei o lo tatou Tamā faalelagi ua faapea ai ona sili mamao atu i le faaaliga o malosi faaletagata, ma e mautinoa e ao ona uunaia ai i tatou ina ia avea ma ē foai atu ma le loto fiafia! O lea la, faatasi ma le talisapaia mai le loto, talosia ia tatou faia mea uma tatou te mafaia e faaauiluma ai le finagalo o lo tatou Atua matamau, o Ieova, o lē silisili ma o lē na uluai foai ma le loto fiafia!
O E Manatua?
◻ Ua uunaia e le loto naunau tagata o Ieova e faia le ā?
◻ O le ā e faapogaia ai le foai ma le loto fiafia?
◻ O faapefea ona faaaogā e le Watch Tower Society meaalofa uma ua ia mauaina?
◻ O le ā le ituaiga o foai e alofa i ai le Atua, ma e ao faapefea ona tatou faaalia lo tatou loto faafetai mo le tele o Ana meaalofa?
[Ata i le itulau 15]
Ina ua fausia le fale fetafai, sa galulue mamafa tagata Isaraelu ma sa saunia ai meaalofa ma le limafoai mo Ieova
[Ata i le itulau 18]
O meaalofa e pei o le meaalofa a le fafine mativa ua oti lana tane, e talisapaia ma e faitaulia