Ua Toe Faafoisia le Suafa o le Atua

“UA TOETOE lava 60 tausaga talu ona taumafai e tuu le suafa o le Atua, o ‘JHWH,’ o lē e lē gata o le Atua o Iutaia ae o le Atua foi o Kerisiano, i le tulaga na uluai tuu ai e se tusiata.” O le faamatalaga lena a se nusipepa Siamani o le Schwarzwälder Bote o le toe faafoisia o le suafa o le Atua i luma o se fale tele e fai ai faafiafiaga i Horb, i Siamani i saute. Ae aiseā na aveesea ai le suafa?

Ua lipotia mai e le nusipepa faapea, sa valiina fafo o le fale i ata o ni vaaiga sa teuteuina ai luma. Sa aofia ai ma le Tetakalamatone, o mataitusi Eperu e fa na sipelaina ai le suafa o le Atua.

Ua faaauau mai le nusipepa, “O lenei suafa, o ‘Ieova’ po o se mea tali tutusa faapena i le faa-Siamani, e sili atu i le 6,000 taimi ona taʻua i le Tusi Paia. E lē o manino le faaleoga saʻo ona o le gagana Eperu tusitusia sa faia aʻe i na o konesane. O vaueli sa faaopoopo i ai e le tagata faitau.”

Ae peitai, i le 1934 na filifili ai sui o le Vaega Faa-Nasi faapea o le Tetakalamatone e “lē talafeagai ma manatu faaonaponei” ma i lea e ao ai ona tapēina. E fiafia lava ona ua toe faafoisia nei le Tetakalamatone. Ua faapea mai le nusipepa: “I aso nei ua avea ai le teuteuina o luma o le [maota tele] i vaaiga faatalafaasolopito, o talita tautupu, ma ata o tagata, ‘o le’ vaaiga e matamata i ai i Horb.”