Afifio mai i Tauaofiaga Itumalo “O Ē Faasusulu atu le Malamalama”

O LE uluai aso o aso faalefoafoaga na vaaia ai le foafoaina o le malamalama i le lalolagi. Ua tatou faitau ai faapea, na fetalai atu Ieova le Atua: “Ia malamalama.” Ma “ona malamalama ai lea.” (Kenese 1:3) Ua ōgatusa lena ma le mea na tusi ai le aposetolo o Ioane: “O le malamalama lava le Atua, a e leai lava se pouliuli o ia te ia.”—1 Ioane 1:5.

Talu ai ona e autasi le Alo o le Atua ma lona Tamā, e lē o se mea la e ofo ai le faapea mai o Iesu i se tasi taimi: “O aʻu o le malamalama o le lalolagi.” (Ioane 9:5) E mafai ona tatou ō ese mai i le pouliuli ma oo atu i le malamalama e ala i le tuu atu o le faatuatua ia Ieova le Atua ma i lona Alo. Sa molimau mai foi Iesu: “Ua ou sau o le malamalama i le lalolagi, ina ia le tumau pea i le pouliuli se tasi e faatuatua mai ia te au.” (Ioane 12:46) O le mea lea, na faapea atu ai ma le tonu Iesu Keriso e uiga i ona soʻo moni: “O outou, o le malamalama o le lalolagi outou. . . . Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.”—Mataio 5:14, 16.

Maeu se faamanuiaga i le mauaina o le upu moni, le malamalamaga o le Afioga a le Atua e pei ona faamanino mai e le “auauna faamaoni ma le mafaufau”! (Mataio 24:45-47) E lē o toe avea o se mealilo ia i tatou le talitonu i le Tolutasi; e lē toe faafenuminumiaiina foi i tatou i le pe aiseā ua faataga ai pea e se Atua alofa e ou le malosi uma lava le amio leaga ma le sauā ina ia iai pea; tatou te lē toe masalosalo foi e tusa ai ma le tulaga o tagata ua maliliu. Ua aumaia e le malamalama ia i tatou le faamoemoe, le faamoemoe i le Malo. Ua na faaalia mai ia i tatou maeu se Atua ofoofogia e iai Lē na Foafoaina Mea. O le malamalama o le upu moni ua na aumaia ia i tatou se fuafuaga i le olaga, ina ia auauna mo le uluai fuafuaga na ala ai ona faia i tatou, ina ia faamamaluina Lē na Faia i tatou, o Ieova le Atua. Tatou te faia lenei mea e ala i le avea o i tatou ma ē tauave le malamalama. O le avea ma ē tauave le malamalama o se tofiga mamalu ma o se faaeaga, ae o se tiute tauave matuiā foi. Ina ia faataunuuina lelei lena tiute tauave, e manaomia ona tatou faaaogā fesoasoani uma lava ua saunia e Ieova. O lea, maeu le fetaui ona faaigoaina a tatou tauaofiaga itumalo o le 1992 o Tauaofiaga Itumalo “O Ē Faasusulu atu le Malamalama”!

Ina ia faaleleia uma o tatou tomai ma lo tatou talisapaia o la tatou vaega i le avea o ni ē faasusulu atu le malamalama, o le a tatou mananao la e auai e lē itiiti mai i se tasi o nei tauaofiaga, ia iai mo le pese e amata ai ma nonofo ai pea seia oo i le tatalo faaiʻu. Ma o le a tatou mananao e uaʻi totoʻa atu i mea uma o le a folasia mai i le pulelaa, pe i lauga, faatalanoaga, tala i mea tutupu, po o se tala. O le faia o faamaumauga o le a lē gata e aumaia ai ia i tatou se mea e mafai ona toe tapa atu i ai mulimuli ane ina ia faafouina ai o tatou mafaufau, ae o le a fesoasoani tele ia i tatou e uaʻi atu i mea o loo folasia mai. Ioe, o le a tatou mananao a o faagasolo le polokalama atoa o le tauaofiaga, ina ia ‘uaʻi atu la tatou faalogologo.’—Luka 8:18.

Nofoaga mo Tauaofiaga Itumalo i le 1992 i le Gagana Faa-Samoa

AMERIKA SAMOA:

Aokuso 14-16, 1992. Community College, Mapusaga, Amerika Samoa.

SAMOA I SISIFO:

Setema 25-27, 1992. Apia Park, Gymnasium, Apia, Samoa i Sisifo.

NIU SILA:

Novema 27-29, 1992. Eden Park, Reimers Ave, Kingsland, Aukilani, Niu Sila.