Finau Paulo ma Palato i le Toetu

SA tusi le aposetolo o Paulo e uiga i le toetu lea o loo taʻua i le 1 Korinito 15:35-58 ma le 2 Korinito 5:1-10. I lona faia faapea, pe sa ia mulimuli ea i manatu o Palato ma le au faifilosofia Eleni faapea e lē mafai ona oti o le solu, pe sa ōgatasi lava o ia ma le aʻoaʻoga a Iesu ma le Tusi Paia atoa?

Ua aumaia se tali manino i le tamaʻi tusi Immortality of the Soul or Resurrection of the Individual: St. Paul’s View with Special Reference to Plato, na tusia i le 1974 ma na faamalosia e le akiepikopo o le Lotu Orthodox Eleni o Amerika i Matu ma Saute. Ina ua uma ona talanoaina le uiga o le toetu i mau o loo taʻua i luga ma le taaʻiga a Eleni i lena taimi, ona faia ai lea e le tusitala le faaiʻuga o loo mulimuli mai.

“Ua aʻoaʻo e Palato faapea o le solu e faaauau pea e lē muta, ma e iai pea e faavavau, e ese mai le tino. O le uiga o le solu ia Palato o se mea e ola pea i totonu o se isi mea ma e lē mafai ona oti . . . Sa leʻi aʻoaʻoina e Sagato Paulo se manatu faapena pe faapea mai na ia faia faapea . . .

“E leʻi manatu tele le Aposetolo o Paulo i le lē mafai ona oti o le psyche po o le agaga e faapea o ni vaega mavaevae ma e matuā eseese lava, ae o le toe faatūina mai o le solu, le agaga ma le tino atoa o le tagata e pei ona toe faatūina mai o Keriso. O le talitonuga o Paulo i le toe faatūina mai o le tino, e lē aafia ai fua le toe faaolaina o tino oti mai tuugamau.

“O lana aʻoaʻoga e uiga i le toe faatūina mai o se tino, masalo e sili atu ona faaupuina faapea, o le faaliliuina, toe foafoaina, ma le toe tuu faatasia e ala i le mana o le Atua, o le autasi atoa o le tagata, le tagata lava e tasi, uiga lava e tasi, o mafaufauga ma faalogona o le tagata moni lava faaletino. O lo tatou toe faatutūina i le lumanai, o le a faia e lē tusa ma o tatou tulaga faalenatura, ae o se meaalofa mamalu mai le Atua.”

Ioe, o le lē mafai ona oti, e lē o se tofi tuufaasolo lea e mafai ona maua e so o se tagata. Na i lo o lea, o se taui ma o se meaalofa tautele mai ia Ieova e ala i lo tatou Alii o Iesu Keriso mo i latou o ē o faia aʻe ai le faapotopotoga faauuina o Kerisiano.—1 Korinito 15:20, 57; Filipi 3:14.

[Ata i le itulau 9]

Le faifilosofia Eleni o Palato

[Ē Ana le Ata]

Ata a le Vatican Museum