Pe ua na o le Faaipoipoga ea le Ki i le Fiafiaga?
“Ua saʻoloto o ia e nofotane i le ua loto i ai, tau lava i le ua i le Alii. A e afai e nofo fua pea ia, e sili lona [fiafia].”—1 KORINITO 7:39, 40.
1. Ua faapefea ona faamatalaina Ieova i le Tusi Paia, ma o le ā ua ia faia mo ana foafoaga?
O IEOVA o ia o le ‘Atua fiafia.’ (1 Timoteo 1:11) Ona o ia o Lē na Saunia le Anoanoai o ‘mea lelei uma ma meaalofa lelei atoatoa,’ ua ia foaiina mai ai i ana foafoaga atamamai uma—o tagata ma agaga—mea tonu lava na latou te manaomia ina ia fiafia ai i lana auaunaga. (Iakopo 1:17) O le mea lea, ua avea ai le olo faasoloatoa a se manu lele, le taaloalo fiafia a se lavilavi, po o le oso faatū a se mumua ma faamaoniga e iloa ai, na foafoaina manu e Ieova ina ia fiafia i le olaga, i o latou nofoaga taitasi. E sili atu i lena, ua taʻua foi e le faisalamo i se solo e faapea, “ua lauolaola laau o Ieova, o arasi o Lepanona na totōina e ia.”—Salamo 104:16.
2. (a) O le ā e faaalia ai sa maua e Iesu le fiafiaga i le faia o le finagalo o lona Tamā? (e) O ā mafuaaga mo le fiafiaga sa maua e soʻo o Iesu?
2 O Iesu Keriso, e ‘matuā tusa lava o ia ma le Atua.’ (Eperu 1:3) E lē o se mea la e ofo ai, le ao ona taʻua o Iesu o ‘le Alii e toatasi ma e fiafia.’ (1 Timoteo 6:15) Ua ia saunia mo i tatou se faaaʻoaʻoga matagofie i le faia o le finagalo o Ieova, o se itu e sili atu ona faamalieina ai ma mauaina ai le fiafiaga moni, na i lo o meaʻai. Ua faailoa mai foi e Iesu ia i tatou e faapea, e mafai ona maua le fiafiaga e ala i le gaoioi ma le mataʻu i le Atua, o lona uiga, i le faaaloalo loloto ma le mataʻu atoatoa, neʻi faia se mea e lē fiafia ai o Ia. (Salamo 40:8; Isaia 11:3; Ioane 4:34) Ina ua toe foi mai le au soʻo e toʻa 70 “ma le olioli” ina ua maʻea se malaga taamilo i le talaʻiga o le Malo, ‘sa matuā fiafia lava i le agaga paia’ Iesu. Ina ua uma ona faaleoina atu lona olioli i lona Tamā i le tatalo, ona ia liliu atu ai lea i ona soʻo ma faapea atu: “Amuia mata ua iloa mea tou te iloa; auā ou te fai atu ia te outou, e toatele perofeta ma tupu na fia matamata i nei mea ua outou iloa, a ua latou le iloa lava; na latou fia faalogo foi i nei mea ua outou faalogo ai, a e lei faalogo ai lava.”—Luka 10:17-24.
Mafuaaga e Tatau ai ona Fiafia
3. O ā nisi mafuaaga mo le mauaina o le fiafiaga?
3 Pe e lē ao ea ona fiafia o tatou mata e iloa mea ua tatou vaaia i le faataunuuga o le Afioga a Ieova ma ana fuafuaga i lenei taimi o le iʻuga? E lē sili atu ea ona tatou olioli ona ua tatou malamalama i valoaga sa lē mafai ona faamatalaina e perofeta ma tupu faamaoni e pei o Isaia, Tanielu, ma Tavita? Tatou te lē naunau ea e auauna i le Atua fiafia, o Ieova, i lalo o le taʻitaʻiga a le Alii fiafia, lo tatou Tupu o Iesu Keriso? O le mea moni o loo tatou faia faapena!
4, 5. (a) Ina ia fiafia pea i le auaunaga ia Ieova, o le ā e tatau ona alofia? (e) O ā nisi mea e saosaolaumea i le fiafiaga, ma o le ā le fesili ua lagā ai?
4 Peitai afai tatou te mananao e tumau i le fiafia i le auaunaga a le Atua, e lē tatau la ona faavae o tatou manaoga mo le fiafiaga i le taimi nei i manatu faalelalolagi. Auā e faigofie i na mea ona puaoa ai o tatou mafaufauga ona o loo aofia ai le tamaoaiga faaletino, le faaalialia vale o le olaga, ma mea faapena. So o se “fiafiaga” lava e faavae i na mea, o le a lē umi, ona e talu ai o le a mavae atu lenei lalolagi.—1 Ioane 2:15-17.
5 Ua iloa e le toatele o auauna tuuina atu a Ieova e faapea, o le mauaina o sini faalelalolagi, e lē aumaia ai le fiafiaga moni. Na o lo tatou Tamā faalelagi lava e mafai ona saunia mea faaleagaga ma mea faaletino mo le fiafiaga moni o ana auauna. Maeu lo tatou loto faafetai mo meaʻai faaleagaga ua ia saunia mo i tatou e ala i “le auauna faamaoni ma le mafaufau”! (Mataio 24:45-47) Tatou te faafetai foi mo meaʻai faaletino ma isi mea faitino ua tatou maua mai i aao alofa o le Atua. E lē gata i lena, ua iai foi le meaalofa ofoofogia o le faaipoipoga, atoa ma fiafiaga e fesootai i ai o le olaga i le aiga. E lētioa la a faaleoina moomooga o le loto o Naomi mo avā a lana fanau tama ua maliliu, i upu nei e faapea: “Ia foai mai e Ieova [se meaalofa] ia te oulua ina ia maua e oulua le mapusaga taitoatasi i le aiga o lana tane.” (Ruta 1:9) O le faaipoipoga la, o le ki lea e mafai ona mauaina ai le fiafiaga tele. Peitai, pe ua na o le faaipoipoga ea le ki e mafai ona mauaina ai se olaga fiafia? E manaomia faapitoa lava e ē talavou ona iloilo totoʻa, pe faamata o le tulaga lena o loo i ai.
6. E tusa ai ma le Kenese, o le ā le fuafuaga autū o le faatulagaga o le faaipoipoga?
6 Ua faapea mai le Tusi Paia i le faamatalaina o le amataga o le faaipoipoga: “Ona faia lea e le Atua o le tagata i lona faatusa, o le faatusa o le Atua na ia faia ai o ia; na faia e ia o i laua o le tane ma le fafine. Ua faamanuia foi e le Atua ia te i laua, ma ua fetalai atu le Atua ia te i laua, Ia fanafanau ia, ma ia uluola, ma ia tumu ai le lalolagi, ia faatoilalo i ai.” (Kenese 1:27, 28) Ina ua faavae e Ieova le faaipoipoga, sa faaaogāina ai Atamu ina ia aumaia atili ai ni foafoaga faaletagata, ma faapea ona faalautele atu ai le aiga faaletagata. Peitai, e tele nisi mea e aofia ai i le faaipoipoga na i lo o lena mea.
“Tau Lava i Le ua i le Alii”
7. O le ā le mea manaomia i faaipoipoga sa matuā faataunuuina lava e se tasi o augātamā faatuatua?
7 Ona o Ieova le Atua o ia o le Amataga o le faaipoipoga, tatou te faatalitalia ai o ia na te faataatiaina mai ni tapulaa mo faaipoipoga, e iʻu ai i le fiafiaga o ana auauna. I ona po o augātamā faatuatua, sa matuā lē fautuaina ai lava le faaipoipo atu ia i latou e lē tapuai ia Ieova. Na faatautoina e Aperaamo lana auauna o Elisara i luma o Ieova e faapea, o le a ia lē aumaia se avā mo Isaako le atalii o le augātamā faatuatua mai tagata o Kanana. Sa malaga mamao atu Elisara ona o le mulimuli tuʻi i faatonuga a Aperaamo, ina ia maua mai ai ‘le fafine ua tofia e Ieova mo le atalii o lona matai.’ (Kenese 24:3, 44) O lea na faaipoipo ai Isaako ia Repeka. Ina ua filifilia e lo la alo o Esau ni avā mai tagata faapaupau o sā Hetī, sa avea na fafine ma “faatiga loto ia Isaako ma Repeka.”—Kenese 26:34, 35; 27:46; 28:1, 8.
8. O le ā le faasāsāaga na faaee atu e le feagaiga o le Tulafono i faaipoipoga, ma aiseā?
8 I lalo o le feagaiga o le Tulafono, sa faasāina ai le faaipoipo atu i tane po o fafine o nuu iloga o Kanana. Sa poloaia e Ieova lona nuu e faapea: “Aua le fetaiai gafa ma i latou, aua le avatu lou afafine mā lona atalii, aua foi neʻi e au mai lona afafine mā lou atalii; auā e faaliliueseina e ia lou atalii, ia le mulimuli mai ia te au, a e auauna i atua ese; ona tupu ai lea o le toasa o Ieova ia te outou, ma vave faaumatia ai oe.”—Teuteronome 7:3, 4.
9. O le ā le fautuaga i faaipoipoga ua aumaia e le Tusi Paia i Kerisiano?
9 E lē o se mea la e ofo ai ona o na faasāsāaga i le faaipoipo atu ia i latou e lē tapuai ia Ieova, e ao foi ona faatatauina i totonu o le faapotopotoga Kerisiano. Na apoapoai atu le aposetolo o Paulo i ana aumea talitonu e faapea: “Aua tou te amo faalegatasi ma e le talitonu; auā pe faapefea ona faatasi o le amiotonu ma le amio leaga? Pe faapefea foi ona mafuta o le malamalama ma le pouliuli? Pe faapefea foi ona loto gatasi o Keriso ma Pelialo? Pe faapefea foi ona tofusia faatasi o lē talitonu ma le ua le talitonu?” (2 Korinito 6:14, 15) E mafai ona faatatauina lena fautuaga i ni auala eseese, ma ae maise lava le faaipoipoga. Fai mai le faatonuga maʻoti a Paulo i auauna tuuina atu uma lava a Ieova, e ao ona latou manatunatu ina ia faaipoipo e “tau lava i le ua i le Alii.”—1 Korinito 7:39, faamatalaga i lalo.
A lē Mafai ona Faaipoipo “i le ua i le Alii”
10. O le ā ua faia e le toatele o Kerisiano e leʻi faaipoipo, ma o le ā le fesili ua lagā ai?
10 E toatele Kerisiano e leʻi faaipoipo ua filifili e mulimuli i le faaaʻoaʻoga a Iesu Keriso e ala i le atiina aʻe o le meaalofa o le nofofua. Ma, ona o le lē mafai foi ona maua i lenei taimi o se paaga e mataʻu i le Atua ma faaipoipo ai “i le ua i le Alii,” ua toatele ai Kerisiano faamaoni ua latou faalagolago ia Ieova ma tumau ai pea i le nofofua, na i lo o le faaipoipo atu i se tasi e lē talitonu. Ua fuaina mai ia i latou e le agaga o le Atua, fua e pei o le olioli, filemu, faamaoni, ma le pulea totino, e mafai ai ona latou tumau i le mamā a o nofofua. (Kalatia 5:22, 23) E aofia ai ia i latou o loo faafetaiaia ma le manuia lenei tofotofoga o le tuutoina i le Atua, le toatele o nai o tatou tuafāfine Kerisiano, o ē tatou te faaaloalo loloto i ai. I le tele o atunuu, e sili atu ai lo latou toatele na i lo o uso, ma o le mea lea ua maoaʻe ai lo latou sao i le galuega talaʻi. Ioe, ‘ua tulei mai le afioga a Ieova lava ia; o fafine o loo talaʻiina atu le tala lelei o se au e toatele.’ (Salamo 68:11) O le mea moni, o le toatele o auauna a Ieova e leʻi faaipoipoina o itupa uma e lua, o loo tausisi pea i le faamaoni, ona o lo latou ‘faalagolago ia Ieova ma o latou loto atoa, ma ua ia faatonutonuina ai o latou ala.’ (Faataoto 3:5, 6) Ae pe e mautinoa ea o fiafia i latou o ē e lē o mafai ona faaipoipo i lenei taimi “i le Alii”?
11. O le ā e mafai ona mautinoa e Kerisiano o ē tumau i le nofofua ona o le faaaloalo mo mataupu silisili a le Tusi Paia?
11 Tau lava ina tatou manatua, o i tatou o ni Molimau a le Atua fiafia, o Ieova, o loo auauna i lalo o le Alii fiafia, o Iesu Keriso. O lea, afai o lo tatou faaaloalo mo faasāsāaga ua faataatitia manino mai i le Tusi Paia, ua uunaia ai i tatou e tumau i le nofofua ona o le lē maua o se paaga faaipoipo “i le Alii,” pe talafeagai ai ea la ona manatu e faapea o le a tuua i tatou e le Atua ma Keriso ia lē fiafia? E mautinoa e leai. O lea, e tatau ai ona tatou faaiʻua faapea, e mafai ona fiafia Kerisiano a o iai i le tulaga e leʻi faaipoipoina. E tusa lava pe tatou te faaipoipo pe nofofua, e mafai e Ieova ona faafiafiaina moni i tatou.
Le Ki i le Fiafiaga Moni
12. O le ā ua faaalia e le tulaga o agelu lē usiusitai e uiga i le faaipoipoga?
12 O le faaipoipoga, e lē na o le pau lea o le ki i le fiafiaga mo auauna uma a le Atua. Ia fai mo se faaaʻoaʻoga, o agelu. A o leʻi oo mai le Lolo, na faatupuina aʻe ai e nisi o agelu ni tuʻinanauga e lē masani ai foafoaga faaleagaga, sa lē malilie i latou i lenei faasāsāaga e uiga i le faaipoipoga, ma liu tino tagata ai ina ia mafai ai ona faiavā i fafine. Ona ua ō ese nei agelu ae “tuua e i latou le mea sa latou nonofo ai, ua taofia [ai i latou e le Atua] i noanoataga e faavavau i lalo o le pogisa, seia oo i le faamasinoga o le aso tele.” (Iuta 6; Kenese 6:1, 2) E manino mai ai la, sa leʻi fuafuaina lava e le Atua agelu ina ia faaipoipo. O lea, sa lē mafai ai ona avea le faaipoipoga e fai ma ki i lo latou fiafiaga.
13. Aiseā ua fiafia ai le au agelu paia, ma o le ā ua faaalia ai i lenei mea mo auauna uma a le Atua?
13 E ui i lea, o loo fiafia agelu o ē faamaoni. Na faavaeina e Ieova le lalolagi “ina o pepese faatasi fetu o le taeao ma alalaga fiafia atalii [faaagelu] o le Atua.” (Iopu 38:7, The New Jerusalem Bible) Aiseā ua fiafia ai le au agelu paia? Talu ai ona o loo latou gauai atu pea ia Ieova le Atua, ma “faalogo i lona siufofoga” ina ia mafai ai ona faatinoina. Latou te fiafia e “faia lona finagalo.” (Salamo 103:20, 21, faamatalaga i lalo) Ioe, o le fiafiaga o le au agelu paia e maua mai lea i le auauna ma le faamaoni ia Ieova. O le ki foi lena i le fiafiaga moni mo tagata. Ona o lena itu, o le ā lē toe faaipoipo ai Kerisiano faauuina o ē o loo auauna fiafia i le Atua o ni tagata faaipoipoina i le taimi lenei, pe a toe faatutūina i le olaga faalelagi, peitai o le a fiafia i latou e pei o foafoaga agaga i le faia o le finagalo o le Atua. O lea la, e tusa lava pe faaipoipo pe nofofua, e mafai ona fiafia auauna faamaoni uma lava a Ieova, ona o le faavae moni mo le fiafiaga, o le auaunaga lea ma le faamaoni i Lē na Foafoaina Mea.
Le Mea e “Sili ona Lelei i Atalii ma Afafine”
14. O le ā le folafolaga faavaloaga sa tuuina atu i eunuka na matataʻu i le Atua i Isaraelu anamua, ma aiseā atonu e foliga mai ai o se mea ese lena tulaga?
14 E tusa foi pe e lē faaipoipo se Kerisiano faamaoni, e mafai lava e le Atua ona faamautinoaina lona fiafiaga. E mafai ona maua le faalaeiauga mai upu nei sa faaleoina atu faavaloaga i eunuka i Isaraelu anamua: “O loo faapea ona fetalai mai o Ieova i eunuka o e tausi i oʻu sapati, ma latou mananao i mea ou te loto i ai, ma latou taofi mau i laʻu feagaiga; ou te avatu ia te i latou lava i loʻu [maota] ma totonu o oʻu pa, o le faailoga ma le igoa e sili ona lelei i atalii ma afafine; ou te avatu ia te ia le igoa e faavavau e le aveeseina lava.” (Isaia 56:4, 5) Atonu tatou te faapea, na folafola atu i na tagata se avā ma ni fanau ina ia faatumauina ai pea o latou igoa. Peitai, sa folafolaina atu ia te i latou se mea e “sili ona lelei i atalii ma afafine”—se igoa e faavavau i totonu o le maota o Ieova.
15. O le ā atonu e mafai ona taʻua e uiga i le faataunuuga o le Isaia 56:4, 5?
15 Afai e manatunatu i na eunuka o se ata faavaloaga e aofia ai le “Isaraelu [a] le Atua,” ua faaataina ai ia i latou ē faauuina o ē mauaina ni nofoaga e faavavau i totonu o le maota faaleagaga, po o le malumalu o Ieova. (Kalatia 6:16) E lē taumatea, o le a iai se faatatauga moni o lenei valoaga i eunuka sa matataʻu i le Atua i Isaraelu anamua o ē o le a toe faatutūina. Afai latou te talia le taulaga togiola a Keriso ma faaauau pea ona faia o mea e finagalo malie i ai Ieova, o le a latou mauina ai la se “igoa e faavavau e le aveeseina lava” i le lalolagi fou a le Atua. E mafai foi ona faatatauina lenei ia i latou o “isi mamoe” i lenei taimi o le iʻuga, o ē ua taumamao mai faaipoipoga ma le avea ma mātua, ina ia tuutoina atoatoa atu ai i latou lava i le auaunaga ia Ieova. (Ioane 10:16) Atonu e maliliu nisi o i latou ae leʻi faaipoipo ma e leai ni fanau. Ae afai latou te faamaoni, o le a latou mauaina la i le toetutū se mea e “sili ona lelei i lo atalii ma afafine”—o se igoa “e le aveeseina lava” i le faiga fou o mea.
E lē na o le Faaipoipoga le Ki i le Fiafiaga
16. Aiseā e faapea atu ai, e lē mafai e le faaipoipoga ona aumaia le fiafiaga i taimi uma?
16 Ua manatu nisi faapea e matuā fesootai lava le fiafiaga ma le faaipoipoga. Peitai, e tatau ona taʻutino atu, e oo lava i auauna a Ieova i aso nei, ua lē o aumaia ai e le faaipoipoga le fiafiaga i taimi uma. E foia ai nisi o faafitauli peitai e masani lava ona mafua ai isi faafitauli e faigata atu ona faafetaiaia, na i lo o faafitauli ua oo i tagata nofofua. Na faapea mai Paulo, o le faaipoipoga e aumaia ai “puapuaga i le tino.” (1 Korinito 7:28) E iai taimi e “popole” ai ma ‘fevaeaiina’ ai le loto o le tagata ua faaipoipo. E masani lava ona ia iloa le faigata o le “auauna lelei . . . i le Alii ma le loto le fetosoaiina.”—1 Korinito 7:33-35.
17, 18. (a) O le ā ua lipotia mai e nisi o ovasia femalagaai? (e) O le ā le fautuaga na aumaia e Paulo, ma aiseā e aogā ai ona faatatauina?
17 O le faaipoipoga ma le nofofua o ni meaalofa uma mai le Atua. (Ruta 1:9; Mataio 19:10-12) Peitai, ina ia taulau i so o se tasi o na mea, e matuā tāua le manatunatu i ai faatasi ma le tatalo. Ua lipotia mai e ovasia femalagaai e faapea, o le toatele o Molimau e faaipoipo a o laiti, ua oo ina avea ma mātua ae latou te leʻi sauni e tauaveina avega tauave e aumaia ai. O nisi o ia faaipoipoga ua malepelepe. Ae o loo fesagai pea isi ulugalii ma o latou faafitauli, peitai ua lē aumaia ai e a latou faaipoipoga le fiafiaga ia i latou. E pei ona tusia e se tagata Peretania na te faatinoina tala o William Congreve e faapea, o i latou e vave ona faaipoipo “atonu e umi se taimi e salamō ai.”
18 Ua lipotia mai foi e ovasia matagaluega e faapea, ua mumusu nisi uso talavou e talosaga atu mo le auaunaga i Peteli po o le ofo atu mo le Aʻoga e Toleniina ai mo le Faiva, ona o le manaoga ina ia nofofua pea mo sina taimi. Peitai, fai mai le fautuaga a Paulo, e ao i se tasi ona aua lē faaipoipo a o leʻi “matua lava ia,” o lona uiga, ia faatali seʻia faaitiitia le malolosi o uunaiga tau feusuaiga i le amataga. (1 Korinito 7:36-38) O tausaga e faaaluina e ola ai o se tagata matua nofofua, e maua ai e se tagata le poto masani ma le malamalama tautele, e tuua ai o ia i se tulaga e sili ona lelei mo le filifilia o se paaga faaipoipo po o le iloiloina ma le faaeteete o le faaiʻuga ina ia tumau i le nofofua.
19. E mafai faapefea ona tatou manatu i mataupu pe afai e lē o iai moni so tatou manaoga mo le faaipoipoga?
19 Ua mavae atu i nisi o i tatou le tulaga talavou, ma le malolosi o ona uunaiga tau feusuaiga. Atonu tatou te manatunatu i lea taimi ma lea taimi i faamanuiaga o le faaipoipoga, ae o loo iai moni lava ia i tatou le meaalofa o le nofofua. Atonu foi o loo silafia e Ieova o loo tatou auauna atu ma le uigā ia te ia i le tulaga nofofua ma e lē o iai se manaoga moni e faaipoipo ai, lea atonu e manaomia ai ona tatou faamaamulu mai nisi o faaeaga i lana auaunaga. Afai e lē o avea le faaipoipoga o se manaoga totino, po ua lē faamanuiaina foi i tatou i se paaga, atonu la o loo iai se isi mea o teuina e le Atua mo i tatou. O lea, tau ina ia tatou faaalia pea le faatuatua o le a ia saunia mea tatou te manaomia. E maua le fiafiaga e sili atu mai le taliaina ma le agamalu o mea e foliga mai o le finagalo lea o le Atua mo i tatou, e pei foi ona faia e uso Iutaia, sa ‘faalologo ma vivii atu i le Atua’ ina ua latou iloa ua ia foaiina mai i tagata o Nuu Ese le salamō ina ia mafai ai ona latou maua le ola.—Galuega 11:1-18.
20. (a) O le ā le fautuaga e uiga i le nofofua ua aumaia i inei mo talavou Kerisiano? (e) O le ā le manatu faavae o loo moni pea e uiga i le fiafiaga?
20 O lea la, e mafai ona avea le faaipoipoga o se ki i le fiafiaga, e ui i lea, e mafai foi ona iʻu i faafitauli. Ae e tasi le mea ua mautinoa: O le faaipoipoga ua lē na o lea le ki e maua ai le fiafiaga. E tatau ona iloiloina mea uma lava, o le mea lea e atamai ai, ae maise lava i talavou Kerisiano, ona taumafai e nofofua mo ni nai tausaga. E mafai ona faaaogā lelei na tausaga e auauna ai ia Ieova ma agaʻigaʻi ai i luma faaleagaga. Peitai, e ui i tausaga po o le agaʻigaʻi i luma faaleagaga, ae o loo moni pea lenei manatu faavae ia i latou uma lava ua tuuina atu ma le lē mataofiofia i le Atua: E maua le fiafiaga moni e ala i le auauna ma le faamaoni ia Ieova.
E Faapefea ona E Tali Mai?
◻ Aiseā e fiafia ai auauna a Ieova?
◻ Aiseā ua lē avea ai le faaipoipoga ma ki i le fiafiaga e sili atu?
◻ I le filifiliga o se paaga faaipoipo, o le ā ua manaomia mai i tagata o Ieova?
◻ Aiseā e tatau ai ona talitonu faapea e mafai ona fiafia Kerisiano o ē nofofua pea?
◻ O le ā e tatau ona taʻutino atu e uiga i le faaipoipoga ma le fiafiaga?