Sa Ou Faamaualaloina Aʻu Lava ae Maua ai le Fiafiaga

I LE 1970, ua 23 oʻu tausaga ma ua ou oo i le loto fefete. Sa ou faigaluega o se ofisa sili mo fefaatauaiga i se kamupani taavale i Ivrea, i Italia. Na ou taumafai malosi ina ia ou pei o isi tagata taʻutaʻua. Peitai sa ou matuā loto mafatia ma tuulafoaia. Aiseā?

O le tele o taimi o laʻu tane, e faaalu i fale kalapu e pelē ai ma ana uō, ae tuu mai ai na o aʻu e amoina le tele o avega tauave a le aiga. Sa amata ona faaleagaina la ma faiā. E oo lava i ni nai mea laiti ua ma feupuai ai. O le iʻuga, na oo ina faatumulia loʻu loto i le masalosalo.

Sa oo ina ou manatu, ‘E leai lava se isi o alofa moni ia te oe. E na ona latou mananao lava e faaaogā oe.’ Sa ou fai ifo foi ia te aʻu lava: ‘E lē o toe soifua le Atua, auā ana fai o soifua, semanū na te lē faatagaina le tele o mafatiaga ma le amioleaga. O le olaga ua na o se tausinioga i le oti.’ Sa ou lē malamalama pe aiseā ua ou manatu ai faapea.

Amataga o Suiga

I se tasi aso i le 1977, na tuʻituʻi mai ai ni Molimau a Ieova se toalua i loʻu faitotoa. Na talia i laʻua e laʻu tane o Giancarlo e ō mai i totonu, ona latou ō atu lea ma talanoa i le potu malōlō. Sa iai i lona faamoemoe ina ia avea nei tagata o ni ē talitonu i le evolusione e pei o ia, peitai, o tagata nei na suia ona mafaufauga!

E leʻi umi ae amata foi ona suia le olaga o Giancarlo. Sa oo ina lava lona onosai, sa tele lona taimi e uaʻi mai ai ia te aʻu ma la ma tama teine. Sa ia taumafai e talanoa mai ia te aʻu i mea sa ia aʻoaʻoina, peitai sa faifai pea ona ou faamutaina le talanoaga i se tulaga inainā.

I se tasi la aso ina ua toe asiasi mai Molimau, sa ou saofai ane ai loa ma matuā faalogologo i ai. Na la talanoa mai e uiga i le iʻuga o lenei faiga o mea ma le Malo o le Atua, le lalolagi Parataiso, ma le toetutū mai o ē ua maliliu. Sa ou matuā teʻi! Na leʻi toe mafai ona ou moe i isi po e tolu na sosoo ai! Sa ou manao ia iloa atili, ae o loʻu faamaualuga na taofia mai ai aʻu i le fesili atu i laʻu tane. Ona oo lea i le tasi aso, na fai mai ma le maumaututū laʻu tane ia te aʻu: “O le asō o le a e faalogo mai ai. O le a ou taliina uma au fesili.” Ona ia sasaa mai loa lea ia te aʻu o upu moni uma o le Tusi Paia.

Na taʻu mai e Giancarlo ia te aʻu faapea o Ieova o le suafa lea o Lē na Foafoaina Mea, o Lona uiga autū o le alofa, na Ia auina mai Lona Alo e fai ma togiola ina ia tatou maua ai le ola e faavavau, ma pe a mavae le faaumatiaga o ē amioleaga ia Amaketo, o le a toe faatutū mai e Iesu Keriso ē e feoti i totonu o lana Pulega o le Afe Tausaga. Na ia taʻu mai faapea o ē toe tutū o le a oo ina lelei atoatoa i le mafaufau ma le tino ma o le a latou mauaina le avanoa e ola ai e faavavau i le lalolagi Parataiso.

I le aso na sosoo ai, sa ma ō faatasi ai loa mo le uluai taimi ma laʻu tane i le Maota o le Malo. Ina ua uma sa ou fai atu ia te ia: “E ese le fealofani o nei tagata. Ua ou manao ia faaauau pea ona ou sau i inei auā e ese lo latou fiafia.” Sa amata ona ou auai e lē aunoa i sauniga, ma sa faia foi saʻu suesuega faale-Tusi Paia. Sa ou mafaufau loloto i mea na ou aʻoaʻoina ma e leʻi umi ae ou mautinoa loa ua ou mauaina tagata moni o le Atua. I le 1979 na ma faaalia faatasi ai ma laʻu tane lo ma tuuina atu ia Ieova e ala i le papatisoga.

Le Faiva Faataimi Atoa

I se fonotaga matagaluega mulimuli ane i lena tausaga, sa faia ai se lauga na faalaeiauina ai le galuega talaʻi faataimi atoa. Sa uunaia ai aʻu ina ia faia lena auaunaga, ma sa ou tuu atu le mataupu ia Ieova i le tatalo. Ae teʻi ua ou maʻi tō, ma tutaʻia ai loa aʻu fuafuaga. I le isi fa tausaga na sosoo ai, ua iai la ma fanau e toatolu. O le toalua o i latou sa iai ni mea na tutupu na oo ai i ni tulaga lē atoatoa o la tino sa lamatia ai o la ola. Ae faafetai, ona i nei tulaga eseese, sa toe atoa lo la malosi.

Ua oo nei ina ou lagona ua lē tatau lava ona ou toe faatuatuai i aʻu fuafuaga mo le faiva faataimi atoa. Na ou lafoai laʻu galuega faalelalolagi ae matuā uaʻi lelei atu i oʻu avega tauave o se avā ma o se tinā. Sa ma fuafua ma laʻu tane e lava o ia e faigaluega e maua mai ai sa matou tupe, o lona uiga ua tuu ese uma isi mea e lē matuā manaomia. Peitai, sa ʻoa le faamanuia a Ieova ia i matou, sa lē taitai ona tuulafoai mai i matou ina ia mativa pe lē tagolima.

I le 1984, a o leʻi leva talu ona papatiso la ma tama teine ua 15 ona tausaga, ae amata loa lana faiva faataimi atoa o se paeonia. O le taimi foi lena na tofia ai laʻu tane o se toeaina. Ae faapefea aʻu? Ona sa ou lagona e leʻi oo i loʻu taimi e paeonia ai, sa ou faataatia ai loa se sini ina ia ausia itula e 30 i le masina i le galuega talaʻi. Sa ou ausia ma ou faapea ifo ai ia te aʻu lava: ‘Lelei tele! Ua tele se mea ua e faia.’

E ui i lea, ua toe avea foi le faamaualuga ma oʻu faafitauli. (Faataoto 16:18) O loʻu lava manatu, o lea na lelei aʻu galuega sa fai, ma e lē manaomia la nisi agaʻigaʻi i luma faaleagaga. Na faasolo ina faaitiitia loʻu tulaga faaleagaga, ma na oo lava ina mou atu oʻu uiga lelei ia sa iai. Ona aumaia lea ia te aʻu o le aʻoaʻiga sa ou manaomia.

I le 1985 sa ma talimalo ai i ni ovasia faimalaga se toalua faatasi ma a la avā, a o faia la latou asiasiga faavaitaimi i la matou faapotopotoga. I le matauina o nei Kerisiano loto maulalo, ma o latou faataulagaina totino, sa matuā faapogaia ai aʻu ina ia mafaufau loloto i vala eseese. Sa faia ni aʻu sailiiliga i le mataupu o le loto maulalo, e faaaogā ai lomiga a le Sosaiete o le Olo Matamata. Sa ou manatunatu i le loto maulalo sili ua faaalia e Ieova i ana feutagaiga ma i tatou o tagata agasala. (Salamo 18:35) Sa ou iloa ai e tatau ona suia oʻu mafaufauga.

Sa ou ole atu ia Ieova ina ia fesoasoani mai ia te aʻu e atiina aʻe le loto maulalo e auauna ai ia te ia i le auala o ia finagalo ai, ma ia taʻitaʻia aʻu i le faaaogāina o meaalofa ua ou maua ina ia viia ai o ia. Sa ou faatumuina se talosaga mo le auaunaga faapaeonia, ma ia Mati 1989, na amata ai loa ona ou auauna ia te ia i le faiva faataimi atoa.

Ua mafai nei ona ou faapea atu ua ou matuā fiafia lava, ma o le faamaualaloina o aʻu lava ua saosaolaumea lea i loʻu fiafiaga. Ua ou mauaina se pogai moni mo le ola—o le fesoasoani atu lea i ē o iai le manaoga ina ia latou iloa o Ieova, le Atua moni, e lē o mamao ese mai ia i latou o ē saili atu ia te ia.—E pei ona faamatalaina e Vera Brandolini.