Po o le Tauva o le Ki Lea i le Manuia?

“E LEAI se mea e sili atu ona tāua na i lo o le manumalo.” I aso nei, e toatele tagata ua ola e tusa ma nei upu, e masani ona manatu i ai e faapea o upu a se faiaoga o le lakapi i Amerika, o Vince Lombardi. Ua aufaatasi atu nei atunuu sa avea muamua ma Komunisi i le viiviia o le mataupu autū e faatatau i tauvaga. I le faaofiina atu o tauvaga i a latou faiga tautamaoaiga, na faapea mai ai, o le mea manaomia lea ina ia mauoa ai. I atunuu i Sasaʻe, e toatele mātua ua uunaia a latou fanau ina ia faatava i isi ma aauina atu i latou i ni aʻoga faapitoa e aʻoaʻoina ai i auala patino ina ia pasi ai i suega ulufale. O mātua sa manatu mamafa i lenei mataupu, ua talitonu e faapea, o le ulufale atu i se aʻoga taualoa, o le ki lea i le lumanai manuia.

Ua talitonu mausali le toatele e faapea, o tauvaga, o le ki lea i le manumalo. E tusa ai ma lo latou talitonuga, ua agaigai i luma tagata e ala i tauvaga. Na faapea mai le 65.9 pasene o sui maualuluga o faalapotopotoga autū na suesueina e le Pulega Aoao o Faalapotopotoga Tau Tamaoaiga i Iapani e faapea: “O tauvaga mo le agaigai i luma, o le puna lea o le manumalo o faalapotopotoga i Iapani.” Ma e foliga mai ua manuia kamupani a Iapani mo sina vaitaimi. Ae peitai, po o le tauva ea o le ki moni lea i le manumalo?

Pe Tauia Moni Tauvaga?

O tagata o ē tauva faasaga i isi, ua latou faaalia se uiga manatu faapito e faapea, o aʻu e muamua. E fiafia i latou pe a iu leaga taumafaiga a isi, i le manatu faapea o le a avea lea ma iuga lelei i a latou lava taumafaiga. Mo lo latou lava lelei manatu faapito, atonu latou te faaaogāina ai ni auala e faatiga ai i isi. O fea o le a iu i ai na taumafaiga mo le manuia e ala i ni tauvaga? O Yasuo, o lē na tuuina atu o ia lava i se tauvaga ona o le fia avea ai o ia ma tagata tāua i lana kamupani, ua manatua ona ala tuai ma faapea mai: “I le faatumuina i le agaga fia tauva ma manatu i tulaga maualuluga, sa ou faatusatusaina ai aʻu lava ma isi tagata, ma oo ai ia te aʻu se lagona faapea e sili aʻu. Ae ina ua siitia na tagata i ni tulaga e maualuluga atu i lo o aʻu, sa ou faitio ma tomumu i aso uma e uiga i ē o pulea le kamupani. Sa leai ni aʻu uō e tusa ai ma le uiga moni o le upu.”

O le agaga fia tauva, e mafai foi ona iu ai i le oti faafuasei. E faapefea? Ua faafesootai atu e le nusipepa Iapani o le Mainichi Daily News le karoshi, po o le oti ona o le soona galue, i le ituaiga A o amioga. O le ituaiga A ua faamatalaina ai se ituaiga o amioga e fesootai lelei ma mafatiaga o le mafaufau ona o le soona faaalu o le taimi i le faia o tauvaga ma le felosiai. Na faafesootai atu e fomai Amerika e suesueina le maʻi fatu o Friedman ma Rosenman le ituaiga o amioga-A i le maʻi fatu. Ioe, o se agaga fia tauva, e mafai ona iu i le oti.

O le tauva i nofoaga o galuega e mafai ona iu ai i isi faaletonu o le tino ma le mafaufau. O se tasi o faaaoaoga, o Keinosuke, o lē sa avea ma faatauoloa faamoemoeina i se tasi o kamupani tele e faatau ai taavale i Iapani. Sa ia faatuina se matātia e ala i lona faatauina atu o taavale e 1,250. Sa faavaaina lona ata ma tautau i le potu sa faaaogā e fai ai fono a le komiti o faatonu i le nofoaga autū o le kamupani. E ui lava sa leʻi manao o ia e faaaogā ana aumea i le galuega e fai ma auala e maua ai le siitaga, ae sa uunaia pea o ia e le kamupani ina ia tauva. O le iuga, i totonu o le tausaga e tasi, na maua ai o ia i le kanesa o le puta. I lena lava tausaga, e toʻa 15 sui maualuluga o lana kamupani na taofia i le falemai, ma e toatasi na pule i lona ola.

I le aiga, e iai foi le uiga lava lea o le fia pei o Simi, le fia tauva atu i tuaoi, ua uunaia ai tagata e faia pea ni tauvaga faalialia e lē muta mai o a latou mea faitino o le olaga e ala i le felosiai. (1 Ioane 2:16) O lenei faiga, e na o tagata faipisinisi lava e aogā i ai, auā e maua ai le tele o tupe a le au faatauoa o le lalolagi.—Faatusatusa i le Faaaliga 18:11.

E ui lava o le losilosi ma le fia tauva e ono fuaina mai ai tulaga lelei i galuega, ae e lē lētioa ona matauina e le Tupu o Solomona e faapea: “Ua ou iloa galuega tiga uma ma galuega manuia uma, o le felosiai o le tasi ma le isi; o le mea faatauvaa lava lea ma le ʻai a le matagi.” (Failauga 4:4, NW) O lea la, e mafai faapefea ona tatou tausia le filemu o le mafaufau a o ola ai i lenei sosaiete fia tauva? Ina ia maua le tali, seʻi o tatou tilofaia muamua po o fea na amata mai ai lea manatu o le fia tauva.