Se Po ia Manatua

SE aso faailogaina pe ua silia i le 3,500 tausaga ua mavae, na faatonuina ai e Ieova le Atua tagata Isaraelu sa faapologaina i Aikupito e fasimate se tamai mamoe ma sausau lona toto i pou ma laau faalava o faitotoa o o latou fale. I lena lava po, na sopoloa ai e le agelu a le Atua fale ua faailogaina i lenei auala, ae fasiotia atalii ulumatua i aiga o tagata Aikupito uma. Ona faasaolotoina ai lea o tagata Isaraelu. Talu mai lena, i le faamanatuga faaletausaga o lena mea na tupu, ua faamanatuina ai e tagata Iutaia le Paseka.

I le taimi lava lea ina ua maeʻa ona faamanatuina e Iesu Keriso lana Paseka mulimuli ma ona aposetolo, na ia amataina ai se taumafataga o le a faamanatuina ai lona maliu faataulagaina. Na ia aao atu i ona aposetolo faamaoni le areto ma faapea atu: “Ina tago ia, ina aai; o loʻu tino lenei.” Ona ia tuu atu lea ia i latou se ipu uaina ma faapea atu: “Ina inu ia outou uma i ai; auā o loʻu toto lenei, o le toto o le feagaiga fou, ua faamaligiina mo tagata e toatele e faamagalo aʻi agasala.” Na toe fetalai foi Iesu: “Tou te faia le mea nei e fai ma faamanatuga ia te au.” (Mataio 26:26-28; Luka 22:19, 20) O lea na poloaiina e Iesu ona soʻo ina ia faia lenei faamanatuga o lona maliu.

E valaaulia ma le mafana e Molimau a Ieova oe, e faatasi ma i latou i le faamanatuina o lenei Faamanatuga o le maliu o Iesu. E mafai ona e auai i le Maota o le Malo e lata ane i lou aiga. Faafesootai atu Molimau i lou vaipanoa mo le taimi tonu ma le nofoaga. O le aso mo lena faamanatuga i le 1994, o le Aso Toonai, Mati 26, e tautu ai le uaina ma le areto pe a goto le la.