Po o Faamalieina e Lotu Ou Manaoga?

O LE ea, vai, meaai, ma fale—o mea nei ua lauiloa i le lalolagi aoao e faapea o mea e manaomia e tagata. A aunoa ma nei mea, o le a lua fesagai ma le mativa ma le oti. Ae peitai, i aso lava la ua leva, sa tatai atu ai e Mose o lē na taimua i le nuu o Isaraelu, manatu i se isi manaoga faaletagata, se manaoga e sili atu ona tāua na i lo o meaai po o vai. Na faapea mai Mose: “E le na o mea e ʻai e ola ai tagata, a o mea uma e tūlei mai i le fofoga o Ieova e ola ai tagata.”—Teuteronome 8:3.

E ala i nei upu ofoofogia, na faaalia ai e Mose le tāua o le faamalieina o o tatou manaoga faalelotu po o le faaleagaga. Sa ia faaalia ai o ō tatou lava ola, e faalagolago i le faamalieina o na manaoga! I le 40 tausaga o taamilo i le vao, sa ola moni lava tagata Isaraelu i ‘afioga e tulei mai i le fofoga o Ieova.’ Sa faasaoina i latou mai mea na semanū e oti ai. I le poloaiga a le Atua, na paʻū faavavega mai ai i le lagi se meaai na taʻua o le manai. Sa puna mai vai mai le papa e faamalie ai lo latou galala. Ae sa faia foi e le Atua isi mea e sili atu, na i lo o le na ona tausia o o latou manaoga faaletino. Na faapea mai Mose: “E faapei o se tagata ona aoai i lona atalii, e faapea lava ona aoai o Ieova lou Atua ia te oe.”—Teuteronome 8:4, 5; Esoto 16:31, 32; 17:5, 6.

Sa leʻi tuua tagata Isaraelu e saili e i latou lava po o le ā e saʻo a o le ā e sese, e tusa ai o amioga ma faiga faalelotu. Sa latou maua taiala mai le Atua lava ia. Na ia tuuina atu ia i latou le Tulafono e ala ia Mose, o se taiala mataina faaletulafono sa faaauivi mai ai se fua o meaai mo le soifua malōlōina, se tulafono maumauai mo le tumamā, faapea ma amioga aogā ma mataupu silisili faalelotu. Ona o lena, na siitia ai e le Atua le soifua malōlōina ma le lelei faaleagaga o tagata Isaraelu. Sa latou ola ‘i afioga mai le fofoga o Ieova.’

O lea, sa tutasi ai lava tagata Isaraelu mai isi atunuu. I aso o Mose, sa pule ai Aikupito o se malo malosi o le lalolagi. Sa o se nuu mapo lotu tele. Fai mai le World Book Encyclopedia: “Sa talitonu tagata Aikupito anamua e faapea, o atua eseese (atua ma atua fafine) sa taaina vala uma o le natura ma gaoioiga uma a tagata. O le mea lea, sa latou tapuai ai i le tele o atua eseese. . . . I aai ma taulaga taitasi i Aikupito, e tapuaia ai e tagata o latou lava atua faapitoa e faaopoopo atu i atua sili.”

Pe sa faamalieina e nei tapuaiga i atua e tele manaoga faaleagaga o tagata Aikupito? E leai. Sa avea Aikupito ma nuu na lilofia i faiga faataulaitu ma feusuaiga paʻū maulalo. E matuā mamao ese lava mai le faaleleia ai o le olaga ma le soifua malōlōina, o le auala na ola ai tagata Aikupito, na iu ai i “maʻi leaga.” (Teuteronome 7:15) E lē lētioa lava la ona tautala ma le inoino le Tusi Paia e uiga i atua o Aikupito, ma taʻua i latou o “mea inosia.”—Esekielu 20:7, 8.

E faapena foi le tulaga o loo iai i aso nei. O le toatele o tagata ua iai sina vaega o nisi o ituaiga o faatuatuaga faalotu; e toaitiiti nisi e faapea mai e lē talitonu i le Atua. E manino lava la, i le tulaga lautele, ua lē taulau ona faamalieina e lotu manaoga faaleagaga o tagata. Pe ana faapea e ola moni tagata i “afioga uma e tūlei mai le fofoga o Ieova,” po o le a iai ea faafitauli o taua, faailogalanu, oge, ma le lē ma taofia o le mativa o iai nei? O le mea moni e leai! E tusa lava pe o lea le tulaga, e toaitiiti lava tagata ua manatu e suia a latou lotu. Ioe, o nisi e lē o tāitāi lava ona mananao e talanoa i lotu pe uai atu i manatu fou faalotu!

Mo se faaaoaoga, na taʻu atu e se tamaloa mai Ghana, i Aferika i Sisifo, i se faifeau Kerisiano e faapea: “Ou te talitonu, ua faailoa mai e le Atua ia lava ia i tatou o tagata Aferika e ala i a tatou faitaulaga mamalu o tane ma fafine, e pei lava ona ia faaalia o ia lava i tagata Iutaia e ala i a latou perofeta. Ae e faanoanoa, ona ua lē taulau ona iloa e nisi o i tatou o tagata Aferika a tatou lava faitaulaga, ae ua talanoa pea e uiga ia Iesu, Muhammad, ma isi.”

I le tele o sosaiete faaleaganuu i Aferika, ua vaai i le Faa-Kerisiano e faapea o se lotu a tagata papaʻe—o se faiga fou na faaofi atu, lea ua sili atu ona afaina ai na i lo o le maua ai o se lelei. Ae po o lea faaulumalo o le a fesoasoani po o le taofia ai o au taumafaiga ia faamalieina ou manaoga faaleagaga? Fai mai se alagaupu faa-Aferika: “E lē mafai ona fufui uma ou lima e lua i totonu o se ipu meaai ona ua e fia ʻai tele.” O lena masani pe a ʻai, e lē manaia ma e mataʻutia—ae maise lava pe afai e te lē o iloa po o le ā o i totonu o le ipu! Ae, o le toatele lava ua filifilia a latou lotu, e lē faavae i se iloiloga totoʻa o manatu, ae e faavae i faalogona ootia ma uputuu faaleaiga.

O le tapuaiga e faamalieina ou manaoga faaleagaga, e ao ona avea ‘o se auaunaga paia faatasi ma le uunaiga malosi o lou mafaufau.’ (Roma 12:1, NW) E tatau ona avea o se filifiliga poto ma atamai. O lea, seʻi o tatou iloiloina le mataupu e uiga i le filifilia o le lotu a se tasi mai le vaaiga faa-Aferika. Ae peitai, o le mataupu o loo mulimuli mai, o le a avea o se mea e fiafia i ai le au faitau i so o se nofoaga.

[Ata i le itulau 3]

Sa faailoa mai e Mose le tāua o le faamalieina o o tatou manaoga faaleagaga

[Ata i le itulau 4]

O mea na tofo i ai tagata Aferika mai misionare a Kerisinetoma, ua taofia ai nisi mai le manatunatu i le Tusi Paia