Auauna ma le Faalapotopotoga e Sili ona Agaigai i Luma

E PEI ONA FAAMATALAINA E ROBERT HATZFELD

I aso nei, e toatele nauā tagata e ki a latou televise i se masini laitiiti (remote control) e matamata ai i tala fou i le po i ni ata felanulanuai, ma ua lē manatu i ai e faapea o se mea uiga ese. Ae, e foliga mai ia te aʻu e pei lava o se mea na tupu ananafi, ina o 12 ou tausaga, sa ou matamata ai ma le maofa i se ata o se tagata e sili atu ona telē na i lo o le tagata, ma sa tautala mai o ia!

ATONU e te manatu e faapea, e lē tāua lena tala. Ae o le mea moni, sa foliga mai ia te aʻu o se vavega faaonaponei, pe a fua atu i tuā i le 1915, i uluai taimi o ata e lē lanu ma e lē tāutala. Sa faaali mai ai se tagata malualii e fai sana ʻava ma na faapea mai: “O le Photo-Drama of Creation, ua saunia e le I.B.S.A., le Sosaiete Faavaomalo o Tagata Aʻoga o le Tusi Paia.” Mo le lua itula na sosoo ai, na faaali mai ai ia i matou le tala faale-Tusi Paia. O lana feau faale-Tusi Paia, sa matuā manino ma faalaeiauina ai. Peitai, o le ata tifaga gaoioi, ma na tovā mai i ni ata felanulanuai e lē gaoioi, na ō mai faatasi ma se lauga na uai moni i ai loʻu mafaufau.

Ou te leʻi iloaina i lena taimi, ae ona o loʻu maelega faatalavou mo lena poto tāua i le gaosiga o mea, sa o le amataga lea o se galuega mo loʻu olaga atoa faatasi ma le faalapotopotoga aupito sili ona agaigai i luma i le lalolagi.

Uluai Tausaga

I le 1891, na sau ai loʻu tamā mai Dillenburg, i Siamani, ma nofo i le nofoaga o tagata Siamani i Allegheny, Pennsylvania, i le Iunaite Setete. Mulimuli ane, na la feiloai ai i inā ma se teine mai se aiga Siamani, ma sa la faaipoipo ai loa. Na ou fanau ia Iulai 7, 1903, ma sa ou ola aʻe e iloa tautala i le faa-Siamani ma le faa-Peretania. A o leʻi amataina le Taua Muamua a le Lalolagi i le 1914, na maliliu uma ai oʻu mātua i le faamaʻi na avea ma mala, o le fatafata vaivai, ma tuua ai aʻu ua mātua oti. I le taimi lava lena, na maliu ai foi le tamā o loʻu tinā i le maʻi e pē le tino.

O le tuafafine laitiiti o loʻu tamā o Minna Boemer, na ia aveina aʻu ma le agalelei i lona aiga. Na faapea mai o ia “E toalima laʻu fanau, ae atonu e lelei pe a iai ma se isi toatasi.” E ui sa ou misia oʻu mātua, ae sa tausia lelei aʻu e Aunty Minna.

O le tuafafine o loʻu tamā, o se tagata ua leva ona iai i le Faapotopotoga o Tagata Aʻoga o le Tusi Paia (po o Molimau a Ieova e pei ona taʻua ai i aso nei) i Allegheny. A o leʻi oo i le 1909, o le faapotopotoga foi lena sa auai atu i ai le Uso o C. T. Russell, o lē sa avea i lena taimi ma peresetene o le Sosaiete o le Olo Matamata. Sa ave aʻu e Aunty Minna i sauniga. E ui lava sa leʻi faia e lo matou aiga se taumafaiga tuufaatasi e suesue pe talaʻi i lena taimi, ae so o se mea lava sa matou faalogo ai i sauniga, sa matou tufaina atu lē fuafuaina i tagata na matou iloa.

Ia o le vaitaimi lena na faatumuina ai aʻu i le maofa ona o le ata o le “Photo-Drama.” Ona sa ou naunau i mea tau masini, o lea na ou tosina atu ai i le poto fou i mea tau i le pueina o ata ma leo i le taimi e tasi, e pei ona sa faia i le pueina o ata e faavave ai ona mātala se fugalaau. I le pei ona sa faia i le Photo-Drama, sa o se mea na ou matua fiafia ai!

I le 1916, na oo ia i matou le faanoanoa tele ona o le maliu o le Uso o Russell. Talu ai ona sa matou nonofo i Allegheny, na matou aufaatasi atu ai i lona falelauasiga i le Carnegie Hall. O le fale lenei na faia ai se felafolafoaiga a le Uso o Russell ma E. L. Eaton i le 1903. Sa ou faalogo i tala e uiga i lenei faifeau Metotisi Episikopo o lē na ia luʻia C. T. Russell mo se felafolafoaiga e ono aso, i le faamoemoe e faalumaina le atamai faale-Tusi Paia o le Uso o Russell. Ae na i lo lena, fai mai, na ‘tapē ai e Russell le aʻoaʻoga i le afi i seoli.’ O Sara Kaelin, o se faifeau faataimiatoa e lauiloa i Pittsburgh, sa ia iloa lelei le aiga o Russell. I le taimi o le tanuga, sa ia vaaia ai Maria Russell o tuu ni fugalaau i le pusa maliu faatasi ma sina faaaliga puupuu, “Mo Laʻu Tane Pele.” E ui lava ina sa tele ni tausaga e lē o toe nonofo ma Russell, ae sa iloa pea e Maria o ia o lana tane.

A o mavae atu tausaga, sa ou maua ai ni avanoa se tele e aʻoaʻoina ai le tomai i mea tau masini lea o le a aogā i laʻu galuega i le lumanai. O le tuagane matua o loʻu tinā o lē na tausia faaletulafono aʻu, o se tagata sa faia konekalate tau i faugāfale. I taimi o aʻu tuuaga mai laʻu aʻoga, na te faafaigaluegaina ai aʻu faatasi ma ana tagata faigaluega faaeletise, e tasuiina le uaeaina o fale sa faaaogāina ai muamua molī kesi i molī eletise. I le 1918 na fausia ai e tamaiti o la matou aʻoga se masini meataalo e ave ai feau faauaealesi. Matou te feiloai i afiafi e suesue ma faataitai a matou suesuega i mea faaeletise ma maneta. I le 1926 na ma filifili ai ma saʻu uo e tuliloa se faanaunauga faatalavou—e galulue i vaa ma malaga taamilo i le lalolagi. Na tusia o ma igoa i le aʻoga a le Faalapotopotoga Tau i Leitiō a Amerika mo ni tagata e faagaoioia leitiō e feaveai ai feau faauaealesi.

Se Olaga Fou i Peteli

O le aʻoga tau i leitiō lea sa ma auai, sa i totonu o le Aai o Niu Ioka, o lea, sa ou faimalaga ai e sopoia le vaitafe i le alu atu i Brooklyn mo sauniga a Tagata Aʻoga o le Tusi Paia, lea sa faia i se potu i le Malumalu tuai o le Masonic. I tuā i inā, sa na o le tasi le faapotopotoga i lena vaipanoa atoa o le aai autū o Niu Ioka. Ina ua iloa e uso mai Peteli (le nofoaga autū o le aiga o Tagata Aʻoga o le Tusi Paia) e faapea o loo oʻu aʻoga mo se laisene e faia ai se pisinisi tau i faasalalauga i le leitiō, na faapea mai i latou: “O le ā le mea e te alu ai i le sami? E iai sa matou faleualesi faasalalau i inei ma o loo manaomia sē na te faagaoioia.” Sa latou valaaulia aʻu ou te alu atu i le ofisa mo se faatalanoaga. Ou te leʻi iloa lava se mea e uiga i Peteli, pau lava le mea na ou iloa, o le nofoaga autū o Tagata Aʻoga o le Tusi Paia.

Sa faatalanoa aʻu e uso ma fautua mai e sili ona faauma laʻu aʻoga ina ia maua soʻu laisene, ona ou alu atu loa lea i Peteli. Ina ua uma ona faauuina aʻu, na i lo o le alu atu i se vaa e malaga atu ai i le sami vavaloloa, sa tapena ni nai oʻu lavalava ma alu atu i le nofoa afi i Peteli. E ui lava sa tuuina atu aʻu ia Ieova ma auai i le galuega talaʻi mo le tele o tausaga, ae sa leʻi papatisoina aʻu seʻia oo ia Tesema 1926, i le faatoa lua vaiaso talu ona ou taunuu i Peteli. O se mea masani lava lea i na vaitaimi.

Faatasi ma sui e 150 o le aiga, sa tumutumu ai Peteli i na aso. Sa taitoafa uso i le potu e tasi. Sa leʻi pine ae ou masani i le toatele o i latou, ona sa matou aai, galulue, ma momoe faatasi i le fale e tasi, ma o le mea moni, sa matou auai uma i le faapotopotoga lea sa iai i le Aai o Niu Ioka. Sa faaumaina le Fale fou o Peteli i le 124 Columbia Heights i le 1927, ma sa mafai ai ona matou nonofo e taitoalua i le potu.

I le 1927, na tatalaina ai le fale gaosi mea fou i le 117 Adams Street. Sa ou fesoasoani e tapena atu mea mai le fale gaosi mea tuai i le 55 Concord Street. E faaopoopo atu i masini mo faasalalauga i le leitiō, ae i le fale gaosi mea, sa iai lifi, masini lomitusi, masini tā lavalava, ogaumu kesi—afai sa i ai ni uaea eletise e faaletonu, sa ou galue ai.

O lea, o Peteli, sa sili atu na i lo o se fale gaosi mea. I le saunia o tusi uma, sāvali uma, mekasini uma, sa faia ai se sao o le anoanoai o auauna loto maulalo, ma galulue mamafa. Sa lē ō atu i latou e saili ni galuega e taʻutaʻua ai i le lalolagi. Na i lo o lea, e pau lava le mea sa latou mananao i ai, o le faia lea o le galuega a le Alii—ma e tele lava galuega sa tatau ona faia!

Auaufaatasi ma le Uso o Rutherford

Sa tele ni aogā na ou maua mai le faaeaga o le galulue faatasi ma Joseph F. Rutherford, le peresetene lona lua o le Sosaiete. Sa o ia o se tagata tinoese, e sili atu i le ono futu (183 senitimita) le maualuga, e lē puta, ae fuaitino lelei. O le toatele lava o uso talavou i Peteli e pei e fefefe ia te ia, ona latou te leʻi iloaina lelei o ia. E toaga o ia e suesue, ma saunia mataupu tusia.

E i ai foi uiga mālie o le Uso o Rutherford. Sa iai ni tuafafine matutua se toalua i le aiga Peteli, o ē sa iai mai lava i le taimi o le Uso o Russell. E matuā faamamapo lava ma talitonu e faapea, e lē saʻo le soona taliē leo tetele pe a iai se mea mālie. I nisi taimi, i le taimi o le ʻaiga i le afiafi, e faamatala ai e le Uso o Rutherford se tala mālie e toē uma ai tagata, ae e feita ai nei tuafāfine e toalua. Ae peitai, sa masani foi ona ia faamaite ni talanoaga uigā faale-Tusi Paia i le taimi o taumafataga.

E poto foi le Uso o Rutherford e kuka ma e fiafia tele o ia e saunia taumafataga mo ni uo. I se tasi taimi, na salalau solo ai ni ponaivi moa ina o tipiina e le au kuka i Peteli ni moa. Sa ia laalaa atu i le umukuka ma faasino atu ia i latou le auala saʻo e tipi ai moa. Sa lē manao o ia e maua ni nutiga ponaivi i lana meaai!

Sa masani ona ma galulue ma le Uso o Rutherford i ni galuega e leʻi fuafuaina, e pei o le galulue i lo matou fale ualesi faasalalau, le WBBR, po o lona potu e fai ai ana suesuega i Staten Island. O ia o se tagata e ese le agalelei ma e faatino lava mea sa ia talaʻiina atu. Na te leʻi faatalitalia le faia e isi o mea na te lē o faia. E lē pei o taʻitaʻi o le tele o isi faalapotopotoga faalelotu, o le Uso o Rutherford o se tagata e sili ona maualuga lona tulaga faaleagaga ma tau amio. Sa manino lava lona ola mo le Malo o Ieova.

Taimi Faigata Tau Tupe

I ni nai tausaga talu ona ou taunuu i Peteli, na ulu atu ai le lalolagi i le Mafatiaga Aupito Sili tau tamaoaiga. Na paʻū le tulaga tau tupe o maketi, ma sa faigata foi ma le tau o le soifuaga. Sa seāseā ona maua ni galuega, ma sa lē lava tupe maua. Sa faagaoioia Peteli e ala i meaalofa tauofo, ma sa faamautinoa pea e Ieova ua lava mea e faagaoioia ai le galuega. E leai lava se taimi na faapea ai ua leai ni a matou meaai, e ui lava atonu e lē o mea uma na sa manaomia e tagata taitoatasi. Sa matou ola ma le matuā faaeteete i le mea na mafaia e tusa ai ma tulaga tau tupe, ma sa fesoasoani mai uso e lē o i Peteli i mea faitino pe afai sa latou gafatia.

I le 1932, na maliu ai le Uso o Robert Martin, le ovasia faamaoni o la matou fale gaosi mea. Sa tofia ai loa Nathan Knorr ua lua sefulufitu ona tausaga e suitulaga ia te ia. O ia o se tagata talavou e tomai i so o se mea. Ou te lē o manatua pe sa iai se tasi na faafaigata ona talia o ia e avea ma ovasia o le fale gaosi mea. Na i ai foi isi uso faamaoni e pei o John Kurzen, George Kelly, Doug Galbraith, Ralph Leffler, ma Ed Becker—o ē uma e pele na matou galulue faatasi, sa tuutoina atu ma le lē taofiofia o latou tomai i le auaunaga o le Malo.—Faatusatusa le Esoto 35:34, 35.

Galue i le Leitiō

O le autū sili lava, ona sa tuutoina la tatou faalapotopotoga i le faasalalauina atu o le tala lelei i so o se auala lava sa mafai ona maua. Sa manaomia ona iloa e le lalolagi uma e uiga i le Malo, ae na o ni nai afe i matou o Molimau. O pōpōfou na o le poto i mea tau i leitiō ina ua mavae o le Taua Muamua a le Lalolagi. Ae peitai, sa iai i uso le tofā mamao e faapea, o le auala lenei o fesootaiga na saunia e Ieova i lena taimi. O lea, i le 1923 sa latou faatuina ai loa se fale leitio mo faasalalauga, le WBBR i Staten Island, o se tasi o taulaga e lima o le Aai o Niu Ioka.

I nisi taimi, sa na o aʻu lava le tagata faigaluega i le fale ualesi. Sa ou nofo ai i inā i Staten Island, ae sa ou malaga atu mo le tolu itula i le vaa ma le nofoa afi i le fale gaosi mea i Brooklyn e faia galuega faaeletise po o le faaleleia o masini. Ina ia mafai ona galueaina e i matou lava lo matou fale leitio, sa matou faatuina ai se afi suauu e faagaoioia ai le fale ualesi. Sa iai foi o matou lava vaieli ma se togalaau ʻaina i Staten Island, e maua mai ai meaai mo le aufaigaluega toaitiiti i inā, faapea foi ma sui o le aiga Peteli i Brooklyn.

Ona o tiute tauave i le galuega i le fale leitio, sa faatapulaa ai loʻu auai i sauniga ma le auaunaga i le fanua seʻi oo ina taunuu mai nisi fesoasoani mulimuli ane. Sa matuā leai lava se taimi mo ni aufaatasiga fiafia po o ni tafaoga i faaiuga o vaiaso, seʻi vagana ai a matou malologa faaletausaga. Sa fesili mai se tasi ia te aʻu: “Ona o le matuā tumu o lau faasologa, pe e te lē o mafaufau ai e tuua Peteli?” Ma le faamaoni lava, sa ou faapea atu: “E leai.” O se faaeaga ma o se mea e olioli ai le nofo ma galulue faatasi ma le toatele o uso ma tuafafine tuutoina. Ma e iai pea lava galuega e manaomia ona faia, ma ni atiina aʻe fou e faia.

Sa matou saunia ma faasalalau i le leitio ni tala fale-Tusi Paia e faagaeetia ai. Ona sa leai ni auala faapitoa e puʻe ai tala, o lea sa matou taumafai ai e faia a matou lava auala. Sa matou gaosia se masini e mafai ona toe faia ai le leo o se savili mālū, po o se afā matautia. O leo o ipu popo sa faapaoo e pei o le paoo o vae o solofanua i luga o auala maamaā. O tala taitasi sa matuā mataʻina lo latou faagaoioiga. Ma sa faalogologo i ai tagata. I na aso, sa tau leai ni mea e faatosina ese ai, e toatele lava tagata sa nonofo ma faalogologo lelei i le leitiō.

I le faagasologa o tausaga mai le 1920 ma tausaga amata o le 1930, na faia muamua ai e le Sosaiete se talafaasolopito tau i fesootaiga i leitiō, i le toe faafesootaia faatasi o le anoanoai o fale leitio mo le faasalalauina o se polokalama e tasi. I lea faiga, na ausia ai e le tala lelei o le Malo le faitau miliona o tagata i le lalolagi aoao.

Le Laau Tautala

I le taurotoaiga o tausaga o le 1930 ma tausaga amata o le 1940, sa matou fuafuaina ai ma fausia ni masini laau tautala e faasalalau ai lauga, ma isi masini pue leo. I se masini faapitoa e tipi ai mea, sa matou tipiina ai ni pese lapotopoto faapitoa mai faʻata ua faalamolemoleina i le polesi e maua mai i lagomeli. Ona matou iloiloina lea ma le faaeteete pese lapotopoto taitasi i lalo o se faʻata e faalapopoa ai mea e faamautinoa ai e leai se taʻe o iai. Afai sa iai ni faaletonu, sa tatau la ona toe pueina lea pese, ma sa tatau foi ona toe tipiina se isi pese lapotopoto. Sa matou aauina atu loa pese lapotopoto ua uma ona faalamolemoleina i le polesi i se kamupanī pue leo, o i inā na saunia ai le laau tautala ma pese lapotopoto ua uma ona pueina.

O se tasi o mea fiafia na tupu o lea ou te manatuaina lelei, o le lauga lea a le Uso o Rutherford i le 1933 sa faaulutalaina e faapea, “Āuga o le Tausaga Paia mo le Filemu ma le Manuia.” Sa faalauiloa mai e le pope e faapea, ia avea lena tausaga ma “tausaga paia,” ma e ala i faasalalauga i le leitio ma laau tautala, na matou faaalialia ai lena faalauiloaga e faapea e leai se mea paia e maua mai ai. Ma i le iuga, na maua ai e Hitila le pule i lena tausaga ona o le lagolagosua a le Lotu Katoliko, o lea, na mou atu ai so o se faamoemoe mo le filemu.

I le Iunaite Setete, na faavaeina ai le faalapotopotoga, le Catholic Action, e faataunuuina le mea sa manao i ai le lotu. Sa latou tuu o latou lava tagata i komiti o faatonu o nusipepa autū, mekasini, ma ē lomiaina tusi. Sa latou faaofi atu i latou lava i faiga faapolotiki ma faamataʻu mai ai le tapunia o so o se fale faasalalau o loo faasalalauina ai a tatou lesona faale-Tusi Paia. E toatele Molimau na tuli solo e ni vaega faatupu faalavelave a le Catholic Action, ae maise lava i New Jersey na latalata ane. O ni aso fiafia na aso!

Galuega e Olioli ai i le Fanua

I le taurotoaiga o tausaga mai le 1950, na ausia ai e se muāau ua faatuputeleina o tagata talaʻi o le Malo le sili atu ona toatele o tagata i o latou aiga. Sa faamaonia le sili mamao atu ona aogā o lenei auala na i lo o le leitiō, e fesoasoani atu ai i tagata ia malamalama i upu moni o le Tusi Paia. O lea, i le 1957 na filifili ai loa e faatau atu le WBBR ae tuu saʻo atu a tatou ala manuia i le faalauteleina o le galuega faamisionare i isi atunuu.

I le 1955, na tofia ai aʻu i le Faapotopotoga i Bedford i Brooklyn, o inā sa ou faia ai e lē aunoa le Suesuega o le Olomatamata. Sa auina atu foi aʻu e le Sosaiete e avea o se failauga faimalaga i le itu i mātū o Niu Ioka, Pennsylvania, Connecticut, ma New Jersey. Ina ua tofia aʻu i le Faapotopotoga i Bedford, sa ou faapea ifo ia te aʻu lava, ‘Ua sili atu nei i le 50 oʻu tausaga. E sili ai ona lelei mo aʻu le faia nei o se sao tele i le mea ou te mafaia i le auaunaga i le fanua. Ina neʻi meanē ua ou maua i le maʻi gugu i ou suilapalapa mulimuli ane, ona ou lē fiafia ai lea.’

Ina ua mavae nei tausaga uma sa ou galue ai i le masini mo le faasalalauina atu o fatu o le Malo e ala i le leitiō, sa ou iloa ai e faapea, o se fiafiaga moni le totō tuusaʻo ma faasūsū fatu o upu moni o le Tusi Paia i tagata. Sa ou matuā olioli i le galulue faatasi ma le faapotopotoga. E eseese tagata na latou tausia aʻu ma faatoʻafilemu e pei lava o loo i le aiga moni. O nisi o na tamaiti laiti, ua avea nei ma tagata matutua, o loo latou valaau pea aʻu o grandpa. Mo le 30 tausaga, sa matou fiafia faatasi ai i le faiva i le fanua, seia oo ina lē toe mafai e oʻu vae ona savali pe aʻe i le faasitepu pe malaga foi i auala i lalo o le eleele. I le 1985, na siitia atu ai aʻu i le Faapotopotoga i Brooklyn Heights, lea e faia tonu lava a latou sauniga i Peteli.

A o olioli le faalapotopotoga a Ieova i se faatelega sili, ae sa faaeaina totino ai aʻu e vaai atu i lana faamanuiaga i le galuega i atunuu ese a o oʻu auai i tauaofiaga tetele a Molimau a Ieova i atunuu mamao. O le mea sili, o le mafai lea ona ou faimalaga atu i le lalolagi! I tausaga amata o le 1950, na amata ai e nisi o i matou i Peteli ona ō atu e matamata i vaaiga eseese i Lonetona, Pale, Roma, Nuremberg, ma Copenhagen. Sa matou malaga i vaalele sa avea muamua ma vaalele e ave ai pomu a ua faaliliuina e fai ma vaalele laʻu pasese, vaa, ma nofoa afi. O le mea moni, sa lasi le vaaiga a o malaga atu, ae o vaaiga aupito sili i lo mea uma lava na faafiafiaina ai aʻu, o le muāau o o matou uso pele, talimalō. O le sefulu tausaga mulimuli ane, na faia ai foi ni malaga i Atunuu i Sasaʻe, toe ō atu foi i Europa i Sisifo, ma talu ai nei, na ō atu ai i Europa i Sasaʻe. O tauaofiaga matagofie i Polani, Siamani, ma Sekosolovakia, o se mea sa maofa ai. Maeu le faatuputeleina o lo tatou aiga faatiokarate talu mai le taimi na uluai avea ai aʻu o sona vaega!

Taitaiga Tauatua

O mea sa foliga mai o ni nai laasaga laiti na faia e le faalapotopotoga, na liua mulimuli ane i ni laasaga e matuā tetelē. A o matou galulue i le faia o atiina aʻe fou, na o ni nai mea faigaluega na fesoasoani ia i matou i le faia o le galuega talaʻi, o ai na ia iloa o le a iai se faatelega uiga ese? Sa matou agai i luma i le faatuatua, e tali atu ai i le taitaiga a Ieova.

Sa leʻi fefe lenei faalapotopotoga agaigai i luma e faaaogā le poto fou faaonaponei ua mafai ona maua, po o le faia o sona lava fale gaosi mea e fesoasoani ai i le tausiga o le galuega i le lalolagi aoao. I le tele o auala na faaaogāina e faaauiluma ai le faalauiloaina atu o le Malo, o le talaʻiga mai lea fale i lea fale, le faaaogāina o le leitiō, molimau atu e ala i laau tautala na faasalalau atu ai lauga, ma se polokalama o le faia o suesuega faale-Tusi Paia i aiga o tagata. O le faatuina o la tatou lava fale lomitusi i uluai tausaga ma i le faaaogāina nei o komepiuta ma isi masini lomitusi faaonaponei i le tele o gagana, e lē o se mea e manatu māmā i ai. O le Aʻoga Faale-Tusi Paia a le Olomatamata i Kiliata, le Aʻoga o le Faiva Faatiokarate, ma tauaofiaga e lē aunoa, sa faia uma lava se vaega i le avatua o le viiga ia Ieova le Atua ma lona Alo. O se faaeaga mo aʻu le vaai totino ma faia se sao i nei mea uma.

Ua ou iloa manino e faapea, ua maua e le faalapotopotoga o loo taitaiina e le agaga o Ieova i inei i le lalolagi taiala i le mea e ao ona faia ma e faapefea ona faia. O lana faalapotopotoga atoa i le vateatea aoao, vaaia ma le lē vaaia, e galulue faatasi.

Ou te leʻi faanoanoa i le lafoaia o aʻu fuafuaga a o talavou e folau i le sami. Ioe, auā o le atiina aʻe e sili ona fiafia ai ma sili ona uigā i le lalolagi, o loo faia i inei lava, i le faalapotopotoga a Ieova! O lea o laʻu malaga agai i le ala “ua valaauina ai aʻu mai lugā” ua faailogaina i le tele nauā o le olioli ma faamanuiaga, a e leai ni faanoanoaga.—Filipi 3:13, 14.

Ou te taʻu atu pea i tagata talavou ina ia manatua le 1914—o le Salamo 19:14, lea ua faapea mai: “Ia mālie foi ia te oe upu a loʻu gutu, ma mafaufauga o loʻu loto, Ieova e, loʻu papa ma le na te togiolaina aʻu.” Tatou te mananao e faamalie le finagalo o Ieova i mea uma lava ma tatalo e pei ona faia e Tavita: “Ieova e, ia e faailoa mai ia te au ou ala; ia e aʻoaʻo mai ia te au i ou magāala. Ia e taʻitaʻi mai ia te au i le mea moni mai ia te oe, ma aʻoaʻo mai ia te au, auā o oe o le Atua o loʻu olataga; ou te faatalitali atu ia te oe i le aso atoa.” (Salamo 25:4, 5) E matuā uigā tele na upu. O le manatuaina o na upu, e mafai ona fesoasoani ia i tatou e tausisia le auala saʻo, ma ui ai, i le ō faatasi ma le faalapotopotoga agaʻigaʻi i luma a Ieova.

[Ata i le itulau 23]

Sa fiafia le Uso o Rutherford e sauniuni taumafataga mo ni uo

[Ata i le itulau 25]

Robert Hatzfeld i le faafoeina o le fale ualesi le WBBR

[Ata i le itulau 26]

Se ata lata mai nei o le Uso o Hatzfeld