Fesili Mai le Au Faitau

Sa matou olioli i le suesueina o valoaga a Tanielu e pei ona faamatalaina mai i “Le Olomatamata.” Aisea la ua eseese ai aso mo le tolu ma le afa tausaga i le Faaaliga 11:3 mai le tusi “Revelation Climax”?

Ioe, o Le Olomatamata o Novema 1, 1993, na aumaia ai se fesuiaiga itiiti e tusa ai ma aso o le faataunuuga faaonaponei o le Faaaliga 11:3. Aisea?

Seʻi muamua ona tatou vaavaai i le Faaaliga 11:2, i lona faaiuga, o loo taʻua ai “masina e fagafulu ma le lua.” Tatou faaauau i le fuaiupu e 3: “Ou te tuuina atu foi i aʻu molimau e toalua, la te vavalo ai i aso e tasi le afe e lua selau ma le onogafulu, o oofu i laua i ie talatala.” O anafea e faatatau i ai lena valoaga?

Ia, ua leva lava ona iloa e Molimau a Ieova e faapea o lenei valoaga na faataunuuina i Kerisiano faauuina e le agaga ina ua iu “tausaga atofaina o nuu ese” (Taimi o Nuu Ese) i le 1914. (Luka 21:24, NW; 2 Korinito 1:21, 22) I le faia o se faamatalaga e uiga i lenei mea, ua faapea mai ai le tusi Revelation—Its Grand Climax at Hand!a (1988) i le itulau e 164: “Sa i ai se vaitaimi faailogaina e tolu ma le ʻafa tausaga, ona sa fetaui lelei lava mea faigata na tutupu i tagata o le Atua, ma mea tutupu ia e valoia i inei—e amata mai i le taimi ina ua pa le taua muamua a le lalolagi i le tau faaiuiuga o le 1914 ma faaauau ai e oo atu i le tau amataga o le 1918.”

Ia mātau o le aso o loo taʻua, “o le pa o le taua muamua a le lalolagi i le tau faaiuiuga o le 1914 [e oo] i le tau amataga o le 1918.” E talafeagai lelei lava lenei aso ma aso e masani ona taʻua, e pei o lea e taʻua i le tusi “Then Is Finished the Mystery of God,” itulau 261-264, (1969).b

Ae peitai, o loo taulai atu Le Olomatamata i valoaga i le Tanielu, o se tusi e faalua ona taʻua ai se vaitaimi e mafai ona faatusatusa ma lena na taʻua mulimuli ane i le Faaaliga—e 3 1/2 tausaga, po o le 42 masina. Ina ia faamaʻoti, ua faapea mai le Tanielu 7:25 o le a faapuapuagatiaina le au paia “mo le tausaga, ma tausaga, ma le vaeluagalemu o le tausaga,” po o le 3 1/2 taimi. Mulimuli ane, ua valoia e le Tanielu 12:7, NW: “se taimi atofaina, taimi atofaina ma le ʻafa,” po o le 3 1/2 taimi, lena o le a taualugaina pe a “uma foi ona faataapeapeina le malosi o le nuu paia.”

O lea, ua ia i tatou valoaga talafeagai e mafai ona tatou faatusatusa ma vaitaimi o i le Tanielu 7:25, Tanielu 12:7, ma le Faaaliga 11:2, 3, faapea foi ma le Faaaliga 13:5. Ua faaalia i a tatou lomiga e faapea o nei mea uma, na faataunuuina i le vaitaimi o le 1914-1918. Ae i le iloiloina taitasi o nei valoaga, e iai lava sina eseesega itiiti o aso na amata ai ma aso e faaiuina ai.

Ae peitai, na fesiligia e Le Olomatamata o Novema 1, 1993, e faapea: “Na faapefea ona faataunuuina uma nei valoaga tutusa?” Ioe, o valoaga e uiga i le 3 1/2 taimi ia o loo taʻua i le Tanielu 7:25, Tanielu 12:7, ma le Faaaliga 11:3, sa iloa “e tutusa uma nei valoaga.” I lea, o le a tutusa uma lava i lo latou amataga ma lo latou faaiuga.

E tusa ai ma le faaiuga, na faaalia i le mekasini le auala na taualugaina ai le faapuapuagatiaina o ē faauuina a le Atua (Tanielu 7:25) ia Iuni 1918 ina ua “faasalaina i moliaga sese mo se vaitaimi umi i le falepuipui J . F. Rutherford ma isi faatonu o le Sosaiete o le Olo Matamata ma Savali.” O lena mea na tupu e mautinoa lava ‘o le faaumaina o le faataapeapeina o le malosi o le nuu paia,’ e pei ona matauina i le Tanielu 12:7.

Pe a faitau agaʻi i tua e amata mai ia Iuni 1918 e tataʻi atu ai i tatou ia Tesema 1914 le amataga o le 3 1/2 taimi. I lena masina faaiu o le 1914, na aʻoaʻoina ai e i latou faauuina o i le lalolagi le matua autū mo le tausaga na sosoo ai [1915]: “ʻPe tou te mafaia ea ona inu i Laʻu ipu?’—Mataio 20:20-23. Na lapatai mai le mataupu na faasilasila mai ai e faapea: “O ai na te iloa, ae atonu o loo iai nisi tofotofoga faapitoa, le ipu o puapuaga po o le faalumaina mo soo faamaoni o le Tamai mamoe i le 1915!” E pei ona valoia i le Tanielu 7:25 mo lenei vaitaimi o le 3 1/2 taimi, ‘na mapuna aʻe ai le faataapeapeina ma faaauau ai faasaga i le au paia lava a Lē Silisili ese.’ Na matuā aafia atunuu i le Taua Muamua a le Lalolagi, sa faafaigofie ai ona latou faataunuuina faifaiga sese. O le faaiuga: O valoaga tutusa uma e tolu i le—Tanielu 7: 25, 12: 7, ma le Faaaliga 11: 3—na faataunuuina uma i le 3 1/2 tausaga, po o le 42 masina, mai ia Tesema 1914 e oo ia Iuni 1918.

Ua faamalamalamaina ai i lenei mea sina faasaʻoga itiiti e tusa ai ma le faataunuuga o le Faaaliga 11:3. O lenei fesuiaiga o se mea e mafai ona tatou manatua a o tatou suesueina ma faaaogā le tusi o le Revelation Climax i le lumanai.

[Faaopoopoga i lalo]