Aisea e Asiasi Soo Atu ai Molimau?

‘O LE la foi ua toe ō mai! Ae sa i inei foi i ia vaiaso na seʻi mavae atu!’ Po o le mea lena e i lou mafaufau pe a asiasi atu se Molimau a Ieova ia te oe? E faitau miliona tagata i aso nei o loo asiasi atu pea i ai Molimau a Ieova. Atonu e te fesili mai, Aisea e ō mai soo ai ae o la e iloa, o le toatele o tagata e tofu uma lava ma lotu, ia pe lē fiafia foi? E manaomia e lena fesili se tali.

O se Tiute Tauave i Luma o le Atua

Ua iloa e Molimau a Ieova mai le Tusi Paia e faapea, talu mai le 1914, le tausaga na amata ai le Taua Muamua a le Lalolagi, o mea tutupu i le lalolagi, na faataunuuina ai valoaga o le Tusi Paia faatatau i le iuga o lenei faiga o mea a le lalolagi, ma le pulega a le Malo o le Atua ua toeitiiti ona oo mai lea. Ua toetoe lava atoa le senituri o faiga sauā, le toto masaa, ma le feitagai, ma e foliga mai ua sili atu ai ona mamao ese le fanau a tagata, ma se vaifofo faapolotiki i ō latou faafitauli. O taua ma faiga taufaamatau o loo afaina ai pea le aiga faaletagata, o faamaoniga na o le lē mafai e pulega a tagata ona suia loto, mafaufau, ma uiga o tagata. Ua mauaa le feitagai ona o mea na tutupu i vaitaimi ua mavae o le talafaasolopito, ua tumau pea ona avea o se mea oona i fesootaiga i le va o tagata o atunuu eseese, lanu, ma vaega faalotu. E moni lena mea i vaipanoa e matuā mamao e pei o Aialani i Mātū, Afakanisitana, Aferika i Saute, nuu na avea muamua ma vaega o Iokasalavia, Initia, ma Sasaʻe Tutotonu. O le ā la le vaifofo tumau e tasi?

O le Ā ua Uunaia ai Molimau?

Ua iloa lelei e Molimau a Ieova e faapea, o le vaifofo a le Atua—o lona Malo folafolaina e pulea e Iesu Keriso—ua na o lea le vaifofo e aogā. Sa oo foi ina faaaofia ai e Iesu i lana tatalo faaaʻoaʻo lauiloa se olega mo le pulega a lena Malo e faapea: “O lenei, ia faapea outou ona tatalo, Lo matou Tama e, o i le lagi, ia paia lou suafa. Ia oo mai lou malo. Ia faia lou finagalo i le lalolagi, e pei ona faia i le lagi.” E talitonu Molimau e faapea, o lenei tatalo, ua talosaga moni atu ai mo le faalaa a le Atua i mataupu a tagata.—Mataio 6:9,10.

O lea, aisea ua lagona ai e Molimau a Ieova le manaomia ona ō atu pea mai lea fale i lea fale ina ia taumafai e momoli atu lena feau? Ona o poloaiga e lua na faamatilatila e Iesu: “E te alofa i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili. E faapena foi lona lua, E te alofa atu i lē lua te tuaoi, ia pei o oe lava ia te oe.”—Mataio 22:37-39.

E fia maua e Molimau faamanuiaga a le Atua, ma ona latou te alolofa i o latou tuaoi, latou te mananao ai ina ia maua foi e i latou lea faamanuiaga. O lea, i le mulimuli i le faaaoaoga a Iesu, ua uunaia ai i latou e lea alofa lē manatu faapito ina ia asiasi atu i o latou tuaoi. Latou te mananao e ofoina atu ia te i latou lena avanoa e iloa ai e uiga i le mea na folafolaina mai e “le Atua fiafia” mo le fanau a tagata usiusitai i se lalolagi ua faamamāina.—1 Timoteo 1:11, NW; 2 Peteru 3:13.

Sa talitonu le misionare Kerisiano o Pauro i folafolaga a le Atua ma o lea na ia tusia ai e faapea: “O aʻu o Pauro, o le auauna a le Atua, ma o le aposetolo a Iesu Keriso, ona o le faatuatua o e ua filifilia e le Atua, ma le iloa lelei o le upu moni e iu ai i le amio Atua, i le faamoemoe i le ola e faavavau, na folafolaina mai talu mai tausaga o le vavau e le Atua e le mafai ona tala pepelo.” Ioe, o le Atua o Lē “e le mafai ona tala pepelo,” na ia “folafolaina mai” le ola e faavavau ia i latou o ē saili ma le loto maulalo ina ia iloa ma auauna ia te ia.—Tito 1:1, 2; Sefanaia 2:3.

Pe Totogi Molimau?

I nisi taimi, e taʻutino mai ai e nisi e faapea, o la e totogi Molimau e tusa ai ma la latou faiva. Ae e matuā sese lena manatu! Ua latou faatāuaina upu a Pauro i le faapotopotoga i Korinito: “Auā o i matou nei, e le pei o le toatele o e o faafilogia le afioga a le Atua; a ua matou tautalatala atu mai le loto lelei, mai le Atua foi, o i luma o le Atua, o i matou ua ia Keriso.”—2 Korinito 2:17.

O nisi taʻitaʻi lotu e talaʻi ona o tupe, a lē ala i totogi mo a latou auaunaga faalelotu, ia po o le faaauiluma ai o faiga faapisinisi i a latou talaʻiga i televise. O le toatele o lotu, e iai faifeau e totogi.

O le eseesega, o Molimau e leai ni a latou faifeau totogi, ma e masani ona ofoina atu a latou lomiga faale-Tusi Paia e aunoa ma se tau i ē o saili faamaoni i le upu moni, e ui lava o le toatele o i latou nei ua faagaeetia e faia ni foai tauofo. O nei foai ua faaaogaina e faafetaiaia ai tupe faaalu o lenei galuega talaʻi i le lalolagi aoao. I le ogatasi ai ma le fautuaga a Iesu e faapea: “Ua maua fua e outou, ia outou foaifuaina atu,” e faaaogā fua e Molimau a latou alamanuia, e aofia ai le taimi ma le malosi, e tuutoina atu ai le faitau miliona o itula i tausaga taitasi i le auaunaga i le Atua. O lea, ua latou aʻoaʻoina ai tagata loto naunau mai lea fale i lea fale ma e ala i le faia o suesuega faale-Tusi Paia i aiga.—Mataio 10:8; 28:19, 20; Galuega 20:19, 20.

Ua faamaonia e mea moni e faapea, e leai se faanaunauga o Molimau a Ieova mo ni tupe pe a tuu atu i tagata taitoatasi, i a latou faapotopotoga, po o le Sosaiete o le Olo Matamata. E leai se tasi e maua se totogi i le alu atu mai lea fale i lea fale. Ae faapefea la ona faatupeina le galuega? E ala i foai tauofo mai tagata uma i le lalolagi aoao o ē talisapaia lea galuega. E lē aoina ni peleti.

Aafiaga o La Latou Molimau Atu

Pe iai se aafiaga o le faiva mai lea fale i lea fale ma le talaʻiga lē fuafuaina a Molimau i loto fuatiaifo o le toatele o tagata? O le tali mautinoa i lena fesili o le ioe, ua faamaonia lea i ala o faasalalauga. Ua taʻua Molimau a Ieova i polokalama o TV ma ata tifaga pe a tuʻituʻi atu se tasi i se faitotoa. Ua taʻua Molimau i ni ata komi. E matuā lauiloa la latou galuega maelega, o lea, ua faaaofia ai e nisi tagata fai ata komi i le lalolagi ni faamatalaga e uiga i Molimau a Ieova. Atonu e foliga mai o loo ulagia, ae masani lava ona faavae i se mea moni—e faapea e lauiloa Molimau i lo latou maumauai e talaʻi atu mai lea fale i lea fale.—Galuega 20:20.

I se tasi ata komi talu ai nei, na faaalia ai se tamaloa o aʻe atu i luga o se mauga e fesili atu i se “guru” (po o se failotu). Na ia faapea atu: “Taʻu mai ia te aʻu ni mea matagofie o le a tutupu!” O le ā le tali a le “guru”? “Seʻi o tatou vaai . . . O le a iai oge, faamaʻi, ma mafuie. O le a faapouliuligia le la, ma liua le masina i le toto.” Ona fesili atu lea o le tagata: “O le ā se tala lelei?” O lea na tali mai i ai le “guru”: “E soloiesea e le Atua loimata uma i o latou mata . . . e le toe iai se oti, po o se faanoanoa po o se tiga!” Na fesili atu le tagata asiasi: “E faapefea ona e iloa o na mea?” O le ā le tali? “E leai se tasi e mafai ona sola ese mai Molimau a Ieova!” Ma atonu e faapena foi ona moni i le tagata fai ata komi lava ia!

O le manatu tāua o lenei ata komi ma isi e pei o lena, ona e lē gata ina faaalia ai le maumauai o Molimau e asiasi atu, ae faapea foi ona autasi o la latou feau. I ni nai upu itiiti, ua aumaia ai e le fai ata komi se vaega autū o la latou molimau atu mai lea fale i lea fale ma le taʻua ai o mau o le Tusi Paia.—Faatusatusa i le Mataio 24:7, 29; Faaaliga 21:3, 4.

O le mea moni, ona e teena e le toatele o tagata la latou feau, e lē faapea e faalotovaivaia ai Molimau pe faaitiitia ai lo latou maelega. Na lapatai mai le aposetolo o Peteru e faapea: “E o mai i aso e gata ai o e tauemu, latou te savavali e tusa ma o latou lava tuʻinanau; e faapea mai foi i latou, O i fea o i ai le upu na folafolaina ai lona afio mai? auā talu ona momoe o le augātamā, ua tutumau pea o mea uma talu ona faatoa faia.” E ui i lenei mea, ae ona o le alofa, ua faaauau ai pea e Molimau ona asiasi atu i o latou tuaoi ma o le a faia faapea seia oo ina aumaia e le Atua se iuga i lenei faiga iuvale.—2 Peteru 3:3, 4.

Na fetalai Iesu e faapea, i aso e gata ai, e tatau ona muai talaʻiina ai le tala lelei. Mo se isi suesuega atili o le pogai ma le faapefea ona talaʻiina o le tala lelei, tagaʻi i mataupu e lua ia e mulimuli mai.—Mareko 13:10.

[Ata i le itulau 9]

E leai se vasega o faifeau o Molimau a Ieova e totogia—o tagata uma lava o ni faifeau e tauofo