Tauaofiaga o “Aʻoaʻoga Mai le Atua” i Aitiope—O se Taimi o le Olioli Faapitoa

E LĒ o se uluai tauaofiaga itumalo saoloto lenei a Aitiope, ae o se tauaofiaga na matuā faapitoa. Talu ona maua le faatagaga faaletulafono ia Novema 11, 1991, o le faatolu ai lea ona tauaofia Molimau a Ieova i le malae taalo e aupito telē i le atunuu, le City Stadium, e tu i le ogatotonu o Addis Ababa. Ona sa lē maua se avanoa o lenei malae i le Aso Sa i le amataga, ma sa lē mafai ona maua se isi nofoaga e lava le telē, o lea na faaofi faatasi uma ai le polokalama i aso e tolu, mai le Aso Tofi e oo i le Aso Toonai, Ianuari 13-15, 1994.

Sa faatumuina nei aso e tolu i le olioli ona sa lē gata i le matagofie o le lagi lelei o le tau, ae faapea foi ma le faamalamalamaina faaleagaga faatasi ma aogā atoatoa o “Aʻoaʻoga Mai le Atua.” I le matagofie o le teuteuina faataamilo o le pulelaa i fugalaau, na tu matilatila mai ai le matua o lena tauaofiaga na tusia i le gagana Amharic.

Ae o le ā na ala ai ona faapitoa le tauaofiaga? Faatasi ma le polokalama tāua, na taulai atu foi manatu ma lagona o tagata uma i lo tatou auuso fealofani faavaomalo, ma le faaalia manino mai o le faamanuiaga a le Atua i ona tagata e ala i le faatuputeleina o le Malo. E tusa ma le 270 sui usufono mai atunuu eseese e 16 na auai, e oo lava ia Djibouti ma Yemen. E sili atu i le ʻafa na ō mai mai atunuu mālūlū o Europa ma Amerika i Mātū. Na aofia ai i le au asiasi sui e toalua mai le Vaega Pule o Molimau a Ieova, o Lloyd Barry ma Daniel Sydlik.

O le aganuu talimalo a Aitiope faatasi ma le loto alolofa i o latou uso na asiasi ane, na iu ai i le olioli tele ma na foia ai le faafitauli tau i gagana. O feiloaiga, sa lē na ona lūlū lima, ae sa taʻi faaono ona fusifusi ma feasogi! E toatele tagata asiasi na faitau e uiga i le galuega o le Malo i Aitiope, ma sa iloa ai e faapea, o o latou uso i Aitiope, o ni ē na tausisi i le faamaoni ina ua tofotofoina, ma sa tutumau e ui ina faafalepuipui ma oo iai isi ituaiga o sauāga.a Ae sa maofa sui usufono na asiasi ane ina ua vaaia le toatele o tagata talavou o faaalia le laumata fiafia ma le faaaloalo lea ua tauāu ina mou atu i isi atunuu i aso nei. E toatele tuafafine Aitiope sa laei o latou ofu papaʻe faaleaganuu sa matagofie ona teuteuina i kolosē, lea na faaopoopo atu i le agaga moni o le tausamiga.

O le papatisoga i le Aso Faraile, o se mea na matuā faafiafiaina ai. O se solo umi o sui fou e 530 na papatisoina, e mai le taʻi 10 e oo i le 80 tausaga, ma sa faasolosolo i se laina umi na oo i le ʻafa o le malae taalo. O se aofaiga e matuā toatele na i lo o le mea na faatalitalia—e sili atu i le toʻa 1 le tagata mo le toʻa 7 Molimau i le atunuu. Maeu se faamaoniga o le faamanuiaga a Ieova i ona tagata i ina! Sa tele loimata o le olioli i lenei vaaiga, lea na fusia faatasi i pesega mālie a sui usufono e toʻa 40 mai Italia. E toatele na manatunatu i upu faavaloaga i le Isaia 60:5: “Ona e vaai lea, ma e olioli; e polepole oe, ma fiafia tele lou loto; auā e liua ia te oe le oa o le sami; e oo mai ia te oe le oloa o nuu ese.”

Mafuaaga Faapitoa mo le Olioli

Sa faatāuaina atili le faamanuiaga a Ieova i le Aso Faraile, ina ua toe taʻua i faatalanoaga le amataga itiiti o le galuega o le Malo. O nei faatalanoaga, sa faia e se vaega o uluai misionare o ē na auauna muamua ai i inā, na amata mai i le 1950 ma agaʻi mai ai, ma i le 1970 ma agai mai ai. E sili atu i le 8,000 na faalogologo ia Ray Casson, John Kamphuis ma Haywood Ward o faamatala la latou galuega o le aʻoaʻoina o le Tusi Paia, na amata ia Setema 14, 1950, ina ua latou taunuu i Addis Ababa. Sa manaomia e le malo na pule i lena taimi ina ia latou maelega i le aʻoaʻoina o le poto lautele. O lea na latou faatuina ai i le ogatotonu o le taulaga se aʻoga mo le aʻoaʻoina o tagata matutua, e faatomua ai mataupu eseese. Ae i o latou taimi paganoa, na saili ai e nei misionare ni avanoa e taulai atu i le faaauilumaina o aʻoaʻoga tauatua. Sa latou tauivi ina ia aʻoaʻoina le gagana Amharic, o se gagana lavelave e 250 mataitusi o le alafapeta. Pe tusa ma le ono masina na mavae, ae faatoʻā mafai ona latou taulau i le amataina o la latou uluai suesuega faale-Tusi Paia i le aiga. Pe tusa ma le 43 tausaga mulimuli ane, na latou feiloai ai i le auala ma tagata, o ē na manatua pea nei tagata na avea muamua ma o latou faiaʻoga. I le tauaofiaga la, sa latou olioli ai ina ua toe aufaatasi ma le toatele o a latou uluai tagata aʻoga o le Tusi Paia o ē ua matuā malolosi i le faatuatua, ma na latou faafeiloai atu i latou i a latou fanau ma fanau a a latou fanau faaleagaga.—1 Tesalonia 2:19, 20.

Sa umi se taimi o patipati lenei aofia olioli ma faalogologo lelei, e lē gata i faatalanoaga o uluai misionare, ae faapea foi ma lipoti ma alofaaga na aumaia e sui usufono mai atunuu ese—o Peretania, Kanata, Siamani, Isaraelu, Italia, Kenya, le atu Nitalani, ma le Iunaite Setete. Na toe faailogaina ai foi i lenei mea le auuso fealofani o tagata o le Atua i le lalolagi aoao. O lauga autū na fofogaina e uso faauuina mai le Vaega Pule, faapea foi ma a latou tatalo mai le loto, na matuā paʻia ai loto o le aofia. Na mafai e tagata talavou sa i le malae mataaga ona iloa ua pei i latou o tagata na faatinoina le tala e faatatau i talavou o ē na manatua Lē na faia i latou, ma na faatinoina le tala i se uiga moni ma le olaola. E faaopoopo i tusi fou na tatalaina i le gagana faa-Peretania, o tusi fou e tolu na tatalaina i le gagana Amharic na faatupuina ai le matuā fiafia tele.b

I le taimi o le mālōlōga ma i isi taimi, sa maua ai ni avanoa lelei e faamasani ai i le toatele o tagata faapelepeleina. O se faataʻitaʻiga, i le laina i luma, sa nofo ai le tagata talaʻi aupito matua o Aitiope ma sona tootoo, o ia lea o Tulu Mekuria. I le tausaga ua mavae, na papatisoina ai o ia e avea o se tasi o Molimau a Ieova ina ua 113 ona tausaga. I lenei tauaofiaga, sa olioli ai o ia e vaaia lana avā ua 80 tausaga le matua o mulimuli i lana faaaoaoga, i le avea foi ma ona tuafafine faaleagaga. Sa avea lona auai i le polokalama atoa ma mea na faagaeetia ai le au talavou. O se tasi o i latou na o Yohanes Gorems, o lē i le 16 o ona tausaga, a o aʻoga pea, sa auauna o se tagata talaʻi, ma ua fa tausaga o paeonia sauatoa. O ia ma isi paeonia o loo i tausaga aʻooga, pe laiti ifo, ua aʻoaʻoina e faaaogā tatau le taimi, e ala i le molimau atu i taeao po a o ō atu i le aʻoga, po o le taimi foi o le malologa ma i le foi atu i le aiga pe a tuua le aʻoga.

Maeu ni Faaaoaoga o le Faamaoni!

E faitau selau i le aofia na faafalepuipuiina, ma faia i ai faiga sauā i lalo o pulega a malo na muamua. Ua manatua e Mandefro Yifru le lima tausaga faapena i le falepuipui, ae ua olioli nei o ia e auauna i Addis Ababa i le ofisa fou faatoʻā faatuina, lea e vaavaaia faaliliuga, lomiaina o tusi, ma le aauina atu i vaa. O le tasi tama talavou o loo la auauna faatasi, o Zecarias Eshetu, sa leʻi faavaivai i lona faamaoni i le valu tausaga ua mavae, ina ua fasiotia lona tamā a o i le falepuipui mo le tolu tausaga ona o le solitu faa-Kerisiano. O Zecarias, o se tasi o le fanau e toalima, sa sefulu ona tausaga ina ua faafalepuipuiina lona tamā. O Meswat Girma ma lona tuafafine, o Yoalan, ua latalata i le taʻiluasefulu o la tausaga ma o loo aoʻoga pea, e na o ata lava la te manatua ai lo la tamā ona sa laiti i laua ina ua faafuasei ona fasiotia o ia ona o lona solitu. Sa faagaeeina i laua ona o lona faamaoni, ma o loo auauna uma i laua o ni paeonia sauatoa, e pei ona sa faia e lo la tamā a o leʻi maliu.

O le isi tausi faamaoni, o Tamirat Yadette, o loo auauna nei o se paeonia faapito i se vaega matagofie o Rift Valley. Ona o lona solitu faa-Kerisiano, na ia faaalu ai le tolu tausaga i falepuipui eseese e fitu, i nisi taimi sa loka ai o ia i filifili, ma sasaina faamoʻamoʻa. Peitai, i le falepuipui, sa ia fesoasoani ai i ni tagata e sili atu i le sefululua e avea ma tagatanuu o le Malo o le Atua.

O Tesfu Temelso, o loo auauna nei o se ovasia matagaluega, e faa 17 ona faafalepuipuiina o ia i le taimi a o auauna o se paeonia faapito. O loo iai ni mailaila i lona tino mai ni sasa, ae ua fiafia o ia i le vaai atu ua iai ni faapotopotoga i nofoaga sa muai tofia i ai o ia. E toatele uso ma tuafafine mai le Faapotopotoga i Akaki na puapuagatia i falepuipui ma faiga sauā, ae ua tupu aʻe nei le faapotopotoga e sili atu i le selau le au talaʻi. Ua latou fausia le uluai Maota o le Malo o Molimau a Ieova i Aitiope. Mai le taulaga e igoa ia Dese, o se taulaga matagofie i le vaai e tusa ma le 200 maila [po o le 300 kilomitaa] i mātū o le laumua, na ō mai ai se vaega e toalima o ē na fesagai ma le oti, ma na vāai i le maliu o se uso mai lena lava nuu ona o faiga sauā na faia i ai. Na faamatala e se toeaina na faatasi ma i latou, o Maseresha Kasa e faapea, sa tumau pea o ia i le ono tausaga sa iai i le falepuipui, e lē ona sa i ai o ia i se tulaga faapitoa, ae i le na o lona aʻoaʻoina lava e faalagolago ia Ieova. —Roma 8:35-39; faatusatusa i le Galuega 8:1.

Talu ai nei lava, na faaalia ai foi e nisi lo latou faamaoni i lalo o tofotofoga. O se vaega e toatele na ō mai i le tauaofiaga mai se nuu tuaoi, o i inā na taofia ai le tuuina atu o le puipuiga a leoleo i Molimau, taofia pepa malaga, pepa faaipoipo, togafitiga faafomai, ma galuega, ona o lo latou solitu. Ina o vevela le taua e latalata i Mesewa, o se taulaga o vaa i Eritrean i le Sami Ulaula, na nonofo ai mo le fa masina le faapotopotoga atoa e 39, e aofia ai ma tamaiti i lalo o se auala laupapa maulalo i le toafa, ina ia sao mai ai i le tuʻiina i pomu o ō latou fale e le faiga malo lea na pule muamua. I lenei nofoaga vevela ma le faaogea, sa avea le talanoaina o la latou mau i aso taitasi ma isi sauniga ma mea na avatu ai ia i latou le malosi tele ma pipii vavalalata atu ai ia Ieova, ma faapea foi i le tasi ma le isi. O tuafafine paeonia faapitoa e toalua, o loo auauna e latalata i le mata o le vaitafe o le Blue Nile, na sao mai ni faamataʻuga ma faalumaina na faapogaia e le Lotu Orthodox, na maumauai lenei toalua, ma na la vāai i nisi o suesuega faale-Tusi Paia o faatinoina lo latou tuuina atu i le papatisoga i lena tauaofiaga i Addis Ababa.

Na faamatala e se tasi uso lona tofotofoga a o nofo mamao ona o se galuega i le ogatotonu o se vaega naumati o Ogaden, e lē mamao mai Somalia. Na tumau lona ola faaleagaga e ala i le talaʻi atu ma i le faia o sauniga ma tagata loto naunau, e aofia ai fomai i le falemai, o ē na maua aogā i aʻoaʻoga mai le Atua, ma ua aʻoaʻo atu nei foi i isi. O se tasi faaaoaoga lelei o le tausisi i le faamaoni, o se paeonia faapito i Addis Ababa, o lē i le 1992, na sasa faamoʻamoʻaina e se kegi o tagata faatuputupu leaga na faapogaia e patele o le Lotu Orthodox, ma tuua ai o ia ua tali oti. Ae fiafia lava, ona sa toe malosi o ia ma o loo faaauau pea ona auauna ai i lena lava oganuu. O lona laumata ʻataʻata na faaalia ai e lē o iai pea sona loto tiga. Mo ia la, atoa ma isi uma na tofotofoina faapea ma ē fou, o lena Tauaofiaga o “Aʻoaʻoga Mai le Atua,” sa avea o se tausamiga olioli faaleagaga.

Sa sologa lelei le faamaopoopoina o le tauaofiaga, na manatu ai le au asiasi e faapea, o le au tauofo na aafia ai, sa tele ni tausaga o le poto masani. O le mea moni, na vave ona latou agaigai i luma i le lua tausaga ua mavae. Na peiseai ua vave tele ona faaiuina le tauaofiaga e tolu aso. O le tumutumuga o ē na auai i le Aso Toonai, e 9,556. Sa lelei ni tala na faia e le televise a le atunuu, leitio, ma nusipepa e uiga i le tauaofiaga. Sa mafai e tagata uma ona iloa e faapea, sa faatamaoaigaina faaleagaga e Ieova ona tagata. I le tauaofiaga, sa aofia ai le faitau afe o tagata loto naunau o ē na amata ona maua ai aogā i “Aʻoaʻoga Mai le Atua.” Ua tatalaina se oganuu tele o le galuega mo Molimau a Ieova i lenei atunuu e tusa ma le 50 miliona lona faitau aofai, ma o le tauaofiaga na faalaeiau ai i tagata ina ia finafinau e faaaogā tatau le taimi o totoe o lenei faiga o mea e fesoasoani atu ai i ē loto faamaoni ia maua foi aogā i aʻoaʻoga mai le Atua.

[Faaopoopoga i lalo]

[Ata i le itulau 23]

Addis Ababa, Ianuari 13-15, 1994

[Ata i le itulau 24]

O se vaega o paeonia i Addis Ababa (taumatau); o ē tausisi i le faamaoni na faafalepuipuiina uma lava (i lalo); o se Molimau ua 113 ona tausaga ma lona faletua