E te Manatua?

Pe ua e iloa ea le tāua i a te oe o lomiga talu ai nei o Le Olomatamata? Aisea la e lē tofotofo ai lou manatuaina o mea i fesili nei o loo sosoo mai:

▫ Aisea e asiasi atu ai pea Molimau a Ieova i ō latou tuaoi?

E fia maua e Molimau a Ieova faamanuiaga a le Atua e ala mai i le Malo folafolaina, ma ona o lo latou alofa i ō latou tuaoi, latou te mananao ai foi ia maua e ō latou tuaoi faamanuiaga lava ia. Ona o le mulimuli atu la i le faaaoaoga a Iesu, ua uunaia ai i latou e le alofa lē manatu faapito, ina ia asiasi atu i ō latou tuaoi. (Mataio 6:9, 10; 22:37-39)—8/15, itulau 8, 9.

▫ Aisea ua avea ai le talitonuga i le evolusione o se mataupu o le faatuatua?

E leʻi vāai saienitisi i ni suiga o le ola—e oo lava i ni suiga aogā—e aumaia ai nisi ituaiga o ola fou; ae ua mautinoa e ē o loo talitonu i le evolusione, o le auala patino lenei e mafai ai ona maua ni ituaiga o meafaiola fou. E leʻi vāai lava tagata o loo talitonu i le evolusione o tupu mai se ola mai se mea e leai se ola; ae maumauai lava lo latou taofi, o le auala lenei na amata ai le ola.—9/1, itulau 5.

▫ O le ā le auala sili ona lelei tatou te mafai ona foia ai le lotovaivai e ono oo mai ona o taofiofiga o le olaga?

Po o le ā lava lo tatou tulaga o iai, ae afai tatou te taulai atu i mea e mafai ona tatou faia na i lo o le faalotovaivaia ona o mea tatou te lē mafai ona faia, o le a avea le olaga ma mea e faamalieina ai le loto, ma o le a tatou olioli ai i le auaunaga a le Atua. (Salamo 126:5, 6)—9/1, itulau 28.

▫ O ā aogā o le loto faamagalo?

O le faamagaloina o isi e lelei ai faiā (Efeso 4:32); e maua ai le filemu e lē gata i le va ma uso ā tagata, ae o se filemu foi i totonu o le loto ma le mafaufau (Roma 14:19; Kolose 3:13-15); o le faamagalo atu i isi ua faaava ai le ala mo ā tatou lava agasala ina ia faamagaloina (Mataio 6:14); ae lē gata i lea, ua fesoasoani i a i tatou e manatua ai, tatou te manaomia foi e i tatou le faamagaloga. (Roma 3:23)—9/15, itulau 7.

▫ Ua faapefea ona aogā le faaaoaoga a le perofeta o Amosa i la tatou galuega talaʻi?

I le pei o Amosa, tatou te lē faafilogia pe suivaia le feau mai le Atua. Nai lo o lea, tatou te folafola atu le feau ma le usiusitai e tusa lava po o ā uiga e faaalia mai e ē o faalogologo i a i tatou.—9/15, itulau 17.

▫ O ā uiga o le Atua e ao ona tatou faataitai i ai?

O uiga matilatila e lua, o le tomai o Ieova e faamaopoopoina ai mea, ma lona fiafia. (1 Korinito 14:33; 1 Timoteo 1:11) O nei uiga o le Atua e paleni lelei, ina ia lē faasili aʻe ai le tasi uiga i lo le isi.—10/1, itulau 10.

▫ O ā nisi o laasaga mautinoa ua uia e mātua e fesoasoani ai i ā latou fanau ina ia auauna i a Ieova?

O le manatu e matuā tāua o le amata lea a o laiti lava. O uiga latou te matauina ma lesona e aʻoaʻoina i tausaga muʻa faatoʻā tauamatamata o le a aogā mo le olaga atoa. (Faataoto 22:6) E tāua le aʻoaʻoina o i latou ina ia usiusitai ma faaaloalo i a Ieova ma lana tapuaiga i sauniga uma. Ua aʻoaʻoina mātua ua taulau manuia ina ia matauina faanaunauga sese a ā latou fanau ma latou fesoasoani ai i ā latou fanau ina ia faasaʻoina na mea sese. (Faataoto 22:15) Ma le manatu mulimuli, ia vave ona amata faataatitia ni sini faaleagaga mo lau tamaitiiti, na te mafai ona ausia ma magafagafa i ai.—10/1, itulau 27-28.

▫ O le ā le vala tulaga ese o le faamagalo a Ieova e ao ona tatou taumafai e faataitai i ai?

O Ieova e faamagalo ma faagalo. (Ieremia 31:34) E faigata i tagata ona faia lenei mea. O le tāua o le faia faapea, lea sa faamamafa mai e Iesu e pei ona tusia i le Mataio 6:14, 15.—10/15, itulau 25-26.

▫ O ā mea e tolu e taofia ai lo tatou faaalia o le alofa mutimutivale?

Ona o lo tatou tulaga agasala faaletagata, e ono mauaa ai faalogona o le lotoleaga. Pe a tatou lotoleaga i se isi, o le a mafai la faapefea ona tatou faaalia atu le tele o le alofa mutimutivale i a te ia? O le iai po o le vaai i faiga sauā i se tulaga e lē talafeagai ai o le isi lea mea e taofia ai. E tele ai ina tatou lē lagona se alofa i puapuaga o isi. E lē gata i lea, o le tagata e manatu faapito mo ia lava e lē o iai foi se alofa mutimutivale. (1 Ioane 3:17)—11/1, itulau 19, 20.

▫ O ā lesona e mafai ona tatou aʻoaʻoina mai le tala a le Tusi Paia e uiga i a Iopu?

O le tala i a Iopu ua tatou nofouta atili ai i mailei a Satani, ma fesoasoani i a i tatou ia iloa le auala o loo fesootai ai le pule silisiliesee aoao a Ieova, ma le faamaoni o le tagata. I le pei o Iopu, e tatau ona tofotofoina ē uma lava e alolofa i le Atua. E mafai foi e i tatou ona onosai e pei o Iopu, e faamaonia atu ai le pepelo o Satani, ma tatou olioli ai i faamanuiaga i le Malo o le Atua.—11/15, itulau 20.

▫ E mafai faapefea e le toeaina o loo taimua i le fono a le ʻau toeaina ona faaalia lona amanaiaina o toeaina taitoatasi?

I so o se taimi e mafai ai, a o leʻi faia le fono, e lelei i le taitaifono o le au toeaina ona ia muai saunia se faasologa o mataupu e talanoaina ina ia lava le taimi mo isi toeaina e mafaufau lelei ai ma tatalo mo mataupu taitasi o loo i le faasologa. A o faia le fono a toeaina, o le a ia lē taumafai e faatulaga manatu o isi toeaina, ae na te faalaeiauina i latou ina ia faaalia le “lē mā e tautala atu” i mataupu o loo talanoaina. (1 Timoteo 3:13)—12/1, itulau 30.