“Ou te Leʻi Vaai Muamua i se Mea Faapea!”

I LE tausaga e 1993, na valaaulia ai le ofisa o le lālā o le Sosaiete o le Olo Matamata i Anitenitina ina ia auina mai se toaafe o se ʻau usufono i Santiago i Sili, mo se Tauaofiaga Itumalo e fa aso o “Aʻoaʻoga Mai le Atua” a Molimau a Ieova. O se taimi muamua lea na valaaulia ai Molimau mai Anitenitina e ō atu toatele faapea i se tauaofiaga i se atunuu ese.a O le ā le tali atu i le valaaulia? E silia i le 8,500 tusi talosaga na saputu ane, lea na filifilia ai le ʻau usufono e 1,039.

E 14 pasi na faatonuina e ave ai le malaga lenei i le mamao e 870 maila [1,400 kilomita] mai Buenos Aires agaʻi i Santiago. Na faafiafiaina le malaga e 26 itula na ō ai, i vaaiga matagofie i le ala. I le sopoiaina o Atumauga o Andes, na ui atu ai le ʻau usufono e latalata i Aconcagua, i le 22,834 futu [6,960 mita] o le tumutumuga maualuga i le Itu i Sisifo o lea ogamea. O le mea e sili ona manatuaina pea, o le ō ifo fepiopioai e faaifoifo atu agaʻi i Sili. Na matuā faamālō atu i avepasi i se pati tele mo lo latou faatautaia ma le tomai o le malaga i lea ogaeleele fita!

Ae o le vaaiga pito i sili ona matagofie na iai, o le tauaofiaga lava ia. I se lalolagi o le fetauai o mālō ma le fevesiai o faiga faailoga lanu, ae maeu le faafouina ai i le vaaia o le aufaatasi o se aofaiga tele o le aofia e 80,000 mai atunuu e 24 na auai—o se auuso moni lava faavaomalo! I le faatoʻā vāai i se aufaatasi faapea i le va o ē na tauaofia ai, na faaalia ai e nisi o avepasi le naunau e fia iloa atili e uiga i Molimau a Ieova. “Ou te leʻi vaai muamua lava i se mea faapea!” na fai mai ai ma le ofo se tasi o i latou.

[Faaopoopoga i lalo]