Fesili Mai le Au Faitau

O ai tagata Filisitia ia o loo taʻua i le Tusi Paia?

Ua masani ona taʻua e le Tusi Paia tagata Filisitia, o ē na nonofo i Kanana i le taimi na nofoia ai e tagata anamua o le Atua ia le Nuu Folafolaina. Mo se vaitaimi umi lava, sa tetee atu nei tagata Filisitia anamua i tagata o le Atua, e pei ona faamatilatilaina mai e le tala e uiga i le fetauiga a Tavita ma le toa tinoese o Filisitia e igoa i a Koliata.—1 Samuelu 17:1-3, 23-53.

Ua faaalia e le Tusi Paia e faapea o tagata Filisitia anamua na malaga mai Kafetori e agaʻi atu i le talafatai i saute i sisifo o Kanana. (Ieremia 47:4) O fea na iai Kafetori? Ua faapea mai le International Standard Bible Encyclopedia (1979): “E ui ina lē lava faamaoniga e mafai ai ona maua se tali mautinoa, ae o suesuega ua iai nei ua manino ai atonu o le motu o Kereta (pe atonu o Kereta ma Aegean Isles, ia e soofaatasi i aganuu) o le nofoaga moni lea.”—Tusi 1, itulau 610.

E tusa ai ma lenei mea, ua faitauina faapea le mau i le Amosa 9:7 mai le New World Translation of the Holy Scriptures: “ʻLe fanauga a Isaraelu e, e lē ua pei ea outou o tagata Aitiope i a te aʻu?’ o loo fetalai mai ai Ieova. ‘Pe na ou lē aveina aʻe ea Isaraelu ai le nuu o Aikupito, o Filisitia foi ai Kereta, ma Suria ai Kira?’”

E lē o iloa po o anafea na malaga ai nei tagata anamua sa nonofo latalata i le sami, mai Kereta i le vaega o Kanana lea na faaigoaina o Filisitia, i le talafatai i saute i sisifo i le va o Iopa ma Kasa. E foliga mai na latou iai lava i lea vaipanoa o fanua laugatasi e latalata i le sami i le vaitaimi o Aperaamo ma Isaako.—Kenese 20:1, 2; 21:32-34; 26:1-18.

Na fai si leva ona iai pea le aafiaga malosi a tagata Filisitia i lea vaipanoa talu ona mavae le oo atu o Isaraelu i le nuu na folafolaina atu e le Atua i a te i latou. (Esoto 13:17; Iosua 13:2; Faamasino 1:18, 19; 3:3, 4; 15:9, 10; 1 Samuelu 4:1-11; 7:7-14; 13:19-23; 1 Tupu 16:15) E oo mai lava i le nofoaiga a le tupu o Iuta, o Usia, na iai pea tagata Filisitia i ō latou aai i Kata, Iapene, ma Asetota. (2 Nofoaiga a Tupu 26:6) O nisi ō latou aai o loo iloga i faamatalaga a le Tusi Paia, o Ekerona, Asekelona, ma Kasa.

Na faatoilaloina e Alesana le Sili le aai Filisitia o Kasa, ae e foliga mai na sau se taimi na lē toe iai se vaega maʻoti o ni tagata Filisitia. Na tusia faapea e le polofesa o Lawrence E. Stager i le Biblical Archaeology Review (Me/Iuni 1991): “Na faaaunuua foi ia tagata Filisitia i Papelonia. . . . Ae e ui i lea, e lē o iai ni faamaumauga po o le ā na tupu i tagata Filisitia na faaaunuua. O i latou ia atonu na totoe i Asekelona ina ua mavae lo latou faatoilaloina e Nepukanesa, e foliga mai na lē toe iai o se ituaiga tumaʻoti. Ua lē o iai ni faamaumauga i talafaasolopito o nei tagata.”

O le igoa faaonaponei o Palesitina e maua mai lea i upu Latina ma Eleni, ia e tau atu i tuā i le upu Eperu mo “Filisitia.” O nisi faaliliuga o le Tusi Paia i le gagana Arapi ua faaaogaina ai se upu mo le faaliliuga o “Filisitia” lea e faigofie ona fenumiai ma le upu mo Palesitina i ona po nei. Ae ui i lea, ua faaaogaina e le Today’s Arabic Version se isi upu faa-Arapi, ma ua faaeseeseina ai ia Filisitia anamua ma Palesitina i ona po nei.

[Ata i le itulau 31]

O ni faatafunaga i Asekelona

[Ē Ana le Ata]

Pictorial Archive (Near Eastern History) Est.