Le Sogasogā—O se Meaalofa o le Agalelei mai le Atua
E OLIOLI Ieova i ana galuega na foafoaina. (Salamo 104:31) O le faamalieina loloto na te maua mai i le foafoaina o mea, ua faamatalaina i le Kenese 1:31: “Ua silasila atu le Atua i mea uma ua na faia, faauta foi, ua matuā lelei lava.”
Sa leʻi faagata ai e Ieova lenei olioli tau o ia lava. Na ia tuuina atu i a Iesu le faaeaga o le avea ma ona sui sili, po o lana meafaigaluega i le faia o mea, o lē na ala mai ai le foafoaina o isi mea uma lava. (Ioane 1:3; Kolose 1:16, 17) I le avea ma ‘matai tufuga,’ sa faapea ai foi i a Iesu ona “olioli i . . . luma [o Ieova] i aso uma lava.”—Faataoto 8:30, 31.
Ae e lē na o le lagi e maua ai le uiga sogasogā i le faia lelei o mea. “Ua avea ma vaega o le tagata,” ua tusi mai ai Eugene Raudsepp i lana tusi How Creative Are You? E lē o se mea e tupu fua lenei mea, auā o le tagata na faia i le faatusa o le Atua. (Kenese 1:26) Na faapea ai ona foaiina e Ieova i tagata, le sogasogā e fiafia ai i le faia lelei o mea.—Iakopo 1:17.
O le mea lea ua lē faateia ai i le tautala faaviivii o le Tusi Paia i pesega, o siva, o le lalagaina o mea, o le kukaina o meaai, o le poto i le mamanuina o mea, ma isi lava taumafaiga sogasogā i le faia lelei o mea. (Esoto 35:25, 26; 1 Samuelu 8:13; 18:6, 7; 2 Nofoaiga a Tupu 2:13, 14) O Pesaleli, o se tagata poto i le mamanuina o mea, na ia faaaogaina lana taleni lea i “galuega faigata” e fesoasoani ai i le fausiaina o le fale fetafai. (Esoto 31:3, 4) O le fai lafumanu o Iapalu, atonu o ia le uluai tagata na faia faleie, o se fausaga maoae ua fetaui lelei mo ē aumau solo. (Kenese 4:20) O Tavita sa lē gata o ia o se faimusika ma o se fatupese, ae sa avea foi o ia ma sē na fausiaina mea fou fai musika. (2 Nofoaiga a Tupu 7:6; Salamo 7:17; Amosa 6:5) O Miriama atonu na taitaia ma faatulagaina le siva manumalo lea na faamanatuina ai le laveaiga faavavega o tagata Isaraelu mai le Sami Ulaula.—Esoto 15:20.
E masani lava o le sogasogā i le faia lelei o mea o se vala tāua i le faaauilumaina o le tapuaiga moni. O le sogasogā o Iesu i le faatupuina aʻe o ni mea fou, na faaaogā ai faataitaiga ma manatu faaoso naunau e faaoo atu ai lana feau i tagata. Ua faapena foi ona uunaia ona soo ia matuā “galulue i le upu atoa ma le aʻoaʻo atu.” (1 Timoteo 5:17) Ioe, o la latou galuega talaʻi ua lē na o se gaoioiga e masani ai o le olaga. O se tomai e manaomia ai le sogasogā mo nisi auala lelei e aʻoaʻo atu ai. (Kolose 4:6) E tāua tele lenei mea ae maise lava pe a aʻoaʻoina le fanau a se tasi.—Teuteronome 6:6, 7; Efeso 6:4.
O lea, ua avatu ai foi e Ieova i isi le olioli lea na te maua mai le foafoaina o mea. Maeu se meaalofa o le agalelei!