E Mafai Faapefea ona E Faatamaoaigaina Au Tatalo?

O LE tatalo, e tutasi lava i le tele o sauniuniga alofa a Ieova le Atua. Atonu e mafai e tagata tetee ona aveesea lau Tusi Paia pe taofia oe mai le auaufaatasi ma uso tapuai, ae e lē mafai e se tasi ona taofia oe mai le tatalo. E matuā tāua lava le tatalo. Maeu la le tāua mo i tatou taitoatasi ona faapelepele ma faaaogā atoatoa lenei faaeaga. Ae o le ā e mafai ona fesoasoani i a te oe e faatamaoaigaina au tatalo?

O le Tusi Paia e lē o se tusi tatalo. Peitai, e mafai ona faamatalaina e faapea, o se tusi aʻoga sili mo tagata e faatatau i le tatalo. I le vaega o le Tusi Paia na tusia i le gagana Eperu, o loo iai tatalo e sili atu i le 150. O nisi e pupuu; a o nisi e uumi. Sa faia i le lautele pe patino foi e tupu po o i latou na faatagataotauaina, i taimi o le manumalo po o taimi o puapuaga. E pei ona usuina e Tavita i le Salamo 65:2, o “tagata uma lava” e liliu atu i a Ieova, o ‘Lē Faafofoga i tatalo.’ Aisea na faagaeeina ai e le Atua ia tusitala o le Tusi Paia e faamauina sea faasologa umi o tatalo?

Ina ia taliina lena fesili, seʻi manatunatu i le 2 Timoteo 3:16. Ua faapea mai: “O Tusi Paia uma lava e mai le Agaga o le Atua ia, e aoga foi ia.” O lea, ua iai i inā tatalo faale-Tusi Paia e taʻitaʻiina ai i tatou, faapea foi ma valoaga faale-Tusi Paia, mataupu silisili, ma le talafaasolopito. E mafai faapefea ona aogā nei tatalo i a i tatou?

I le vaavaai totoʻa i tatalo faale-Tusi Paia, ua mafai ai ona tatou iloaina tatalo na faia i tulaga e pei o ō tatou tulaga. E mafai ona tatou iloa ai le eseesega o mafuaaga ma faatulagaga o tatalo. E lē gata i lea, o le a mafai ai ona tatou maua ni faaupuga fou o viiga ma faafetai ma tatou maua ai ni upu fou mo a tatou talosaga ma faatoga. I ni upu manino, e mafai e tatalo faale-Tusi Paia ona fesoasoani i a i tatou i le faatamaoaigaina o a tatou lava tatalo.

O Maria, o lē na avea ma tinā o Iesu, o se tagata e manino na maua ni aogā mai faamatalaga na faaaogā i tatalo ia e faamauina i le Tusi Paia. Sa asiasi atu o ia i lona tau aiga o Elisapeta ina ua tofu i laua ma se tama tane na afuafua ona o le fesoasoani tauatua. Na vivii Maria ma faafetai atu i le Atua, ma o nisi o ana upu e matuā tutusa lelei lava ma upu i le tatalo o i le vaega o le Tusi Paia i le gagana Eperu. E foliga mai sa masani lelei Maria ma upu o le tatalo a Hana, le tinā o Samuelu le perofeta. Sa maua foi e Hana se tama ona o le fesoasoani a le Atua ua sili atu i le 1,000 tausaga ua mavae. Pe faamata sa mafaufau loloto i ai Maria i lenei tatalo ona sa atagia mai ai ōna lava faalogona?—1 Samuelu 2:1-10; Luka 1:46-55.

Ae faapefea oe? E mafai ona e manatuaina se tatalo i le Tusi Paia na faia i tulaga e pei o ou lava tulaga? O le sailia, faitauina ma mafaufau loloto i na tatalo, o le a fesoasoani i a te oe e faatamaoaigaina la lua fesootaiga ma le Atua. I le isi mataupu o sosoo mai, matou te valaaulia ai oe ina ia iloiloina ni tatalo se tolu mai le Tusi Paia. O na tatalo taitasi, na ofoina atu i lalo o tulaga eseese atonu e tali tutusa ma ou tulaga.