Fesili Mai le Au Faitau
O le ā le amio e tatau ona faaalia i le papatisoga faa-Kerisiano?
E tāua tele lena fesili, auā e ui lava ua uma ona papatisoina le toatele o la tatou au faitau, a e e aafia ai i latou, e pei foi o i latou o papatisoina. Seʻi tatou talanoa muamua e faatatau ia i latou o papatisoina, ua faatofuina atoatoa i lalo. O ā amioga e tatau ona latou faaalia?
I le Mataio 28:19, 20, na fetalai atu ai Iesu i ona soo ina ia fai tagata ma soo, ia aʻoaʻo ma papatiso ia i latou. Na te leʻi faia le papatisoga o se mea e matautia faalogona e oo i ai pe a tupu, se gaoioiga e māfua mai ona o le faagaeetia o faalogona i lea taimi. O se laasaga e tāua tele, e pei ona tatou iloa mai i le faaaʻoaʻoga a Iesu. Ua faapea mai le Luka 3:21: “Ona papatisoina ai lea o Iesu, ua tatalo o ia, ona faaavanoaina ai lea o le lagi.” Ioe, na faatāuaina ma tatalo lo tatou Faaaʻoaʻo e tusa ai ma le papatisoga. E lē mafai ona tatou faapea atu a o ia afio ese mai le vai sa ia faia se faailoga o le manumalo, pa aʻe se ʻalaga leo tele, po o le faalālā o lima ma le lē pulea, e ui ina faia faapea e nisi i se taimi e leʻi mamao atu. E leai, i le na o i laua lava ma Ioane sa i ai, na liliu atu ai Iesu i lona Tamā i le tatalo.
Peitai, e lē o manatu le Tusi Paia o le papatisoga e ao ona avea ma mea e paū ma matuā paia naua e manaomia ai ni tulaga faapitoa po o le faia o ni faamatalaga ua taulotoina, e pei ona tāpāina e nisi lotu a Kerisinetoma i aso nei. Ioe, seʻi manatu atu i le aso o le Penetekoso ina ua papatisoina le faitau afe o Iutaia ma ē na liliu i le papatisoga faa-Kerisiano. Ua maeʻa ona latou suesueina le Tulafono a le Atua ma ua i ai i se faiā lelei ma ia. O lea, e pau lava le mea latou te manaomia o le aʻoaʻo ma talia o Iesu o le Mesia. O le taimi lava latou te faia ai faapea, ona papatisoina loa lea o i latou.
Ua lipotia mai faapea i le Galuega 2:41: “Ona papatisoina lea o e na talia lana upu ma le fiafia.” Ua faitauina faapea le faaliliuga o le Tusi Paia a Weymouth: “O lea, o i latou na talia ma le fiafia lana upu na papatisoina.” Na latou olioli i tala faagaeetia e faatatau i le Mesia, ma e mautinoa lava na oo atu lena olioli mai le loto i le papatisoga, o se papatisoga i luma o le faitau selau ma selau o ē na maimoa ane ma le fiafia. E oo foi lava i agelu i le lagi sa vaavaai mai ma le olioli. Manatua fetalaiga a Iesu e faapea: “Ou te fai atu ia te outou, ua faapea le olioli i luma o agelu a le Atua, ona o le tagata agasala e toatasi ua salamo.”—Luka 15:10.
E i ai auala eseese e mafai ai e i tatou taitoatasi ona faaatagia atu ai le tāua ma le olioli i se papatisoga. I nisi lotu, o i latou e papatisoina e ofuina ni ofu talaloa papae po o le uliuli. E leai se mea o i le Tusi Paia e lagolagoina ai le faia faapea. A e o laei e valavala ma e lē o ufiufia ai se vaega tele o le tino, e lē talafeagai mo tane atoa foi ma fafine. Ma e pei ona matauina, pe a alu ese mai ma le vai, e lē tatau i se Kerisiano fou ona faia ni taga faapitoa po o se amio e pei e foliga ua ia manumalo. O le toatele o le auuso Kerisiano ua fiafia ona ua papatiso lē e fou. E ao ona ia lagona o lea faatinoina o le faatuatua ua na o se amataga o le ala umi o le faamaoni ina ia talileleia mai e le Atua.—Mataio 16:24.
O i tatou o ē o loo matauina se papatisoga i le lautele, tatou te fiafia i lenei mea, a e maise lava pe afai o lē ua papatisoina o se tauaiga po o se tasi sa tatou faia lana suesuega i le Tusi Paia. E ui i lea, ina ia atoatoa le fiafia, e manaomia ona tatou faalogo i le lauga atoa faatasi ma sui papatiso, faalogo atu a o taliina i luma o le lautele fesili ua tuuina atu ia i latou, ma aufaatasi ai i le tatalo. I le faia faapea o le a fesoasoani lea ia i tatou e tausia le vaaiga saʻo i le papatisoga; o le a i ai ia i tatou le manatu e pei ona silasila i ai le Atua. Pe a uma ona faia le papatisoga, e lē manaomia ona sami lo tatou olioli, i se teu fugalaau, po o se patī e faamamaluina ai lē na papatisoina. A e e mafai ona tatou faafeiloai atu i lo tatou uso po o le tuafafine fou e taʻu atu i ai lo tatou fiafia ona o lea laasaga matagofie ma faaoo atu i ai le talileleia ma le mafana o ia i lo tatou auuso Kerisiano.
I le aotelega, o i tatou uma lava e aofia ai ma ē ua tuuina atu i le papatisoga i le vai, e ao ona feagai ai ma le papatisoga i se uiga tāua e talafeagai ai. E lē o se taimi e vavaō ai, e faia ai ni patī, po o ni fiafiaga tetele. A e e lē o se taimi foi o le a paū ai po o le matuā paia naua. E mafai ona tatou olioli ona ua aufaatasi mai ē fou ma i tatou i le ala e tau i le ola e faavavau. Ma e mafai ona tatou faafeiloaia ma le olioli o tatou uso ma tuafāfine fou.