“Faatauina o Masima” i Mozambique

O FRANCISCO COANA, o se uso mai le komiti o le atunuu i Mozambique, o le na faaaluina le sefulu tausaga i nofoaga o taofiofia ai tagata mo le “toe aʻoaʻoina.” Ua ia faamatalaina mai lana tala e faapea: “Sa ou iloaina o le a matou i ai i inā mo se taimi umi, o lea na ou fai atu ai i le ovasia o le matagaluega pe mafai ona faaauau pea laʻu auaunaga paeonia faasauatoa. Na fesili mai le ovasia o le matagaluega pe faapefea ona lava le taimi ou te faaaluina i le faiva i le lautele, ona talu ai e toetoe lava o tagata uma o i lea nofoaga e Molimau a Ieova? Na ou fai atu ia te ia, ou te alu atu i Milange, o se taulaga e 29 maila po o le 47 kilomita le mamao, e saili ai tagata ou te talaʻi i ai.

“E ui ina faasaina ona matou tuua lea nofoaga, a e sa leʻi faamamaluina lea tulafono. Ou te manatua pea le taimi na ou alu ai i le togavao ma tootuli, ma tatalo atu mo se auala e mafai ona talaʻi atu ai i tagata o le nuu. E leʻi leva a e tali mai Ieova.

“Sa ma feiloai ma se tamaloa e fai lana uila vili vae, ma fai ai loa se ma feagaiga. Na malie mai o ia afai ou te faatoʻaina lona fanua pe a ma le lua eka a o leʻi oo i le vaitau o timuga, ona aumai lea o lana uila vili vae e totogi ai au. O lea sa ou faaaogaina ai taeao uma taitasi e faatoʻaina ai lona fanua. Na faamanuia e Ieova lenei fuafuaga, talu ai na iu ina fai laʻu uila vili vae.

“O iuga o lenei mea, sa mafai ai ona ou alu atu i le taulaga tele o Milange ma faia ai ma le uigā laʻu auaunaga paeonia i lena fanua fuatele. Ona talu ai na faasaina la matou galuega, sa tatau ai ona ou fafauina se fuafuaga ina ia faafesootai atu ai tagata i le upu moni. Na nanā aʻu tusi ma mekasini i totonu o loʻu ofutino, utu ni masima i se taga ona agaʻi atu loa lea i laʻu pisinisi o le faatau masima. Na i lo le faatauina e taʻi 5 meticais (tupe a Mozambique), sa ou faatauina atu mo le taʻi 15 meticais. (Pe a na fai e taugofie tele le masima, se manū e vave taulia i tagata ona lē totoe ai lea o ni masima e faatau atu ma faia ai laʻu talaʻiga!) Sa faapea ona fai laʻu talanoaga:

“‘Talofa lava! O loo faatau atu au masima i lenei aso.’

“‘E fia le tau?’

“‘E sefululima meticais.’

“‘E leai. Matuā taugata tele!’

“‘Ioe, ou te iloa e taugata tele. Afai e te manatu ua taugata tele i le taimi nei, ia ona onosai teisi lea o le a i ai le taimi o le a taugata atili ai i le lumanai. Pe e te iloa ea na valoia e le Tusi Paia lena mea?’

“‘Ou te leʻi tau ane lava i lena mea i laʻu Tusi Paia.’

“‘O lena e i ai. Alu e aumai lau Tusi Paia, seʻi oʻu faasino atu ia te oe.’

“I le faia faapea, e faia ai se talanoaga mai lana Tusi Paia, a o sulu pea laʻu Tusi Paia i totonu o loʻu ofutino. Ou te faasino atu i ai le Faaaliga mataupu e 6, e tusa ai ma tulaga faigata ma oge. Pe a ou matauina se tali lelei mai, ona ou faaaogaina loa lea O le Upu Moni e Taʻitaʻi ai i le Ola Faavavau po o le Good News to Make You Happy, ma amata loa se suesuega aloaia faale-Tusi Paia.

“O le iuga, sa mafai ona ou amataina se vaega o tagata loto naunau e toʻa sefululima i Milange. A e sa leʻi umi a e iloa e leoleo la matou faatasiga. I se tasi aso a o faia saʻu suesuega faale-Tusi Paia, na lolofi mai ai leoleo ma pue matou. Na ave uma i matou, e aofia ai tamaiti laiti o le aiga i le falepuipui. Ina ua atoa le masina i inā, ona toe faafoi atu ai lea o i matou i le nofoaga na taofiofia ai muamua.”

O nei mea na tutupu sa leʻi faavaivaia ai le maelega o o tatou uso. Na i lo lea, o Francisco ma lona aiga, faatasi ai ma le faitau afe o uso sa taofiofia i lea nofoaga, o loo tapuai ma talaʻi nei i tulaga saʻoloto i Mozambique.