O se Mauga e Foliga mai e “Gaoioi”

I LE itu i Sisifo o Aialani, e tu matilatila mai ai le tumutumu o le mauga o Croagh Patrick mai isi mauga o loo siomia ai. I tausaga taitasi i le Aso Sa mulimuli o Iulai, e foliga mai ai e gaoioi le tumutumu o le mauga a o feaʻei atu i lona tumutumu (2,510 futu po o le 765 kilomita) le anoanoai o tagata e tusa ma le 30,000 o ē matutua faapea ma talavou, i se malaga faaletausaga e tapuai ai.

I lena aso, e ō aʻe ai ma toe ō ifo nei tagata tapuai i se auala vaiti, gaoā, ma e matautia foi i nisi o vaipanoa. O le mea moni, o le laasaga mulimuli e feaʻei ai (e tusa ma le afe futu po o le 300 mita), e matuā tafatō ma e solo gofie maa, ua faigata ai ona āʻea ma oo ai ina vaivai.

O nisi e feaʻei e leai ni seevae, ma e toaitiiti lava e taunuu i nisi vaega e ala i le fetolofi i o latou tuli. I aso ua mavae, o lenei malaga sa amata i le pogisa o le po.

Aisea ua matuā tāua tele ai le mauga o Croagh Patrick i le toatele?

Ua Leva ona Faavaeina e Avea o se Nofoaga mo Faigamalaga e Ō e Tapuai

I le amataga lava o lona lima o senituri T.A., na auina atu ai faamisionare e le Lotu Katoliko ia Patrick e avea ma epikopo i Aialani. O lona sini autū, o le faaliliuina o tagata Aialani i le Faa-Kerisiano, ma i tausaga o lana talaʻiga ma galulue faatasi ma tagata, ua faamamaluina ai Patrick ona o lona faavaeina o le Lotu Katoliko i inā.

O lana galuega na māfua ai ona alu atu o ia i nisi vaega o nofoaga i le atunuu atoa. O se tasi o nofoaga, o le itu i sisifo o Aialani, o i inā e tusa ai ma nisi faamatalaga, na ia faaalu ai ao ma po e 40 i le tumutumu o le mauga lea na mulimuli ane faaigoaina i lona igoa—o Croagh Patrick (o lona uiga o le “Mauga o Patrick”). O i inā sa ia anapogi ai ma tatalo ina ia taulau manuia lana galuega faamisionare.

I le faagasologa o tausaga, e tele lava ni tala o le vavau na mapuna aʻe e uiga i ana gaoioiga. O se tasi o tala e sili ona taʻutaʻua e faapea a o i ai i luga o lena mauga, na tulia ai e Patrick gata uma mai i Aialani.

Fai mai tala faauputuu, na ia fausia se falesa laitiiti i le tumutumu o le mauga. E ui lava ua leva ona leai lena fale, a e o loo i ai pea lona faavae mai i le amataga, ma ua avea ai lea nofoaga faapea foi le mauga o se nofoaga e faimalaga atu i ai tagata mai mea mamao i le faagasologa o tausaga e tapuai ai.

Vala o le Malaga

Mo se tasi ua matua, po o se tasi e lē masani ona aʻe i se mauga, i le na o le faataunuuina o se faigamalaga e tolu maila (po o le 5 kilomita) e aʻe ai ma toe alu ifo ma le saogalemu, e pei lava lena ua faataunuuina se galuega tele. I nofoaga tāua i le faagasologa o le auala, e tutū ai se vaega ua toleniina e tuuina atu le fesoasoani i ni manuʻaga eseese e ono tulai mai.

E i ai nofoaga e tolu e malolo ai i le auala, e faia ai e tagata faimalaga e tapuai ni faiga eseese e tusa ma uputuu faalotu e faaalia ai le matuā salamō. O loo faaalia manino lea i se laupapa mo faaaliga i le amataga o le mea e feaʻei ai.—Tagai i le pusa.

Aisea Latou te Feaʻei Ai?

Aisea ua faia ai e le toatele lenei faigamalaga e matuā faigata? Aisea ua faia ai e nisi tagata ia tulaga matautia pe a feaʻei?

Ia, ua manatu nisi e faapea, o le tatalo i le taimi a o faia le faigamalaga mo ni lelei mo i latou lava, e foliga mai e sili atu ona talia. E faia e isi ona o le mananao ina ia maua le faamagaloga mai ni mea sese na faia. A o isi, o le auala lenei e faafetai atu ai. A e o le mea moni, o le toatele, e ō atu i le mauga ona o le agaga o lea aso, o le fia mafuta faatasi ma isi. Na faapea mai se tasi e mautofiga, o lenei faigamalaga, sa avea ‘o se faaaliga o le agaga felagolagomai ma le fealofani o le nuu.’ Na ia faapea mai foi, o le feaʻei i le mauga o Croagh Patrick “o le auala lea latou te mulimuli ai i tulagavae o St. Patrick, ma faailoa ai o loo latou nofo aitalafu ia te ia i le faatuatua.” Na ia faaopoopo mai e faapea, o le mea e sili ona tāua, o le feaʻei atu i le mauga, “o se ituaiga lea o faasalaga auā o loo aafia ai le malosi faaletino, o le faatinoina moni lea o le salamō. O le aʻe faagesegese atu i le tumutumu o le mauga, o se laasaga umi lea e faaalia ai le salamō.”

Na taʻua ma le mitamita e se tasi tamaloa e faapea, ua faaluasefulu lima ona aʻe o ia! Na faapea mai o ia, na ia faia faapea ina ia “faia ai sina vaega o le faasalaga!” Na faamatala mai e se tasi tamaloa e faapea, “A leai se tiga, e leai foi se aogā!”

E ui lava e lē tāua, a e e toatele lava e feaʻei i le mauga e leai ni seevae. Aisea latou te faia ai faapena? Muamua, ona ua latou manatu e “paia” le eleele ma ua aveesea ai o latou seevae. Lua, ina ia ogatasi ma lo latou sini e ‘faia se vaega o le faasalaga.’ Ua faaalia ai foi i lenei mea le mafuaaga e savavali tootutuli ai nisi.

Uunaia e Talisapaia Lē na Foafoaina Mea

A e faapefea se tasi e lē auai i lea talitonuga faalotu o ē feaʻei i se aso faapitoa? E mafai lava ona feaʻei i le mauga i so o se taimi pe a lelei le tau, ma se pea seevae malō. Matou te leʻi feaʻei i se aso na ō aʻe ai le anoanoai o tagata faimalaga e tapuai lea na peiseai ua gaoioi ai le mauga. I le taimi o a matou malologa fai soo, sa mafai ai ona matou manatunatu i le feaʻei aʻe i le mauga ma le āuga ua na faia i le matuā toatele o tagata. Seʻi manatu i le faitauafe o tagata faimalaga o faia lenei malaga fitā, ma faia faiga eseese e faaalia ai le salamō, na faagaeetia ai i matou e tau manatu ai e faapea, ‘Po o le mea lenei o manaomia e le Atua? Po o le faia ma masani o le feaʻei atu i le mauga, po o le savali faataamilo i nisi o maa faamanatu, ma tautū i upu o le tatalo, ua faalatalata moni atu ai se tasi i le Atua?’ A e faapefea le fautuaga a Iesu e uiga i le tautū i tatalo lea e i le Mataio 6:6, 7?

O le mea moni, matou te leʻi feaʻei i le mauga ina ia faia ai ni faiga faalelotu. A e na mafai lava ona matou lagona le vavalalata atu i Lē na Foafoaina i tatou ona sa matou talisapaia lana foafoaga, ona o mauga i so o se mea ua avea o se vaega o mea ofoofogia i le lalolagi. Mai i le tumutumu, na mafai ai ona matou olioli i se vaaiga manino o laufanua matagofie, ma mafai foi ona iloa atu ai i tafatafaʻilagi le tuaoi o le laueleele ma le Vasa Atalani. O motu laiti o loo tauātaāta mamao mai i le fagaloa i lalo ifo o i matou i le isi itu ua matuā eseese ma lē lafulemu ma valevalenoa i le tasi itu.

Sa matou mafaufau i tulaga e tolu. Na manatua ai upu a Iesu ina ua ia taʻu atu i ona soo moni: “A outou tatalo, aua neʻi tautū i a outou upu, e pei o nuu ese; auā fa te i latou, o le tele o a latou upu e talia ai i latou.”—Mataio 6:7.

Na matou iloa ai, ua avea le mauga ma vaega o faiga faauputuu ua fusia ai le faitauafe o tagata i gaoioiga faalotu. Na matou manatunatu i le eseesega ma le saʻolotoga na tautala i ai le aposetolo o Ioane i lona faapea mai: “Ia tatou tausi i ana poloaiga [poloaiga a le Atua]; e le mamafa foi ana poloaiga.”—1 Ioane 5:3.

Na matou olioli i la matou faigamalaga, e aofia ai ma le feaʻei i luga o le mauga o Croagh Patrick. Na faagaeetia ai i matou e aloalo atu mo le taimi o le a faasaʻoloto ai tagata mai uputuu e lē faale-Tusi Paia ma mafai ai ona tapuai i Lē alofa na Foafoaina le lalolagi “i le agaga ma le upu moni.”—Ioane 4:24, NW.

[Pusa i le itulau 27]

Vala Autū o Faigamalaga

O tagata faimalaga uma e āʻea le mauga i le Aso o St. Patrick, po o totonu o aso e valu, po o so o se taimi lava i le masina o Iuni, Iulai, Aokuso ma Setema, ma TATALO I TOTONU PE LATALATA ANE I LE FALESA ona o fuafuaga a le Pope, e mafai ona maua se faamagaloga e ala i le faia o se Kofesio ma se Misasa Paia i le Tumutumu o le mauga po o totonu o le vaiaso lena.

MALOLOGA FAAUPUTUU

E tolu “malologa” o loo i ai (1) I lalo o le auvae mauga po o Leacht Benain, (2) I le tumutumu, (3) o Roilig Muire, e lē mamao ma le itu lea e i ai ia Lecanvey [o se taulaga] i le mauga.

Le Malologa 1 - LE LEACHT BENAIN

E savali faataamilo faafitu ai le tagata malaga i le faaputuga maa ma fai faafitu le Tatalo a le Alii, e faafitu ona tatalo: Si Oʻu Alofa Maria, ma le faatasi o le Tatalo i Tagata Paia

Le Malologa 2 - LE TUMUTUMU

(a) E tootuli le tagata ma fai faafitu le tatalo a le Alii, faafitu le Si Oʻu Alofa Maria, ma le faatasi o le tatalo i Tagata Paia

(e) E tatalo le tagata faimalaga i tafatafa o le Falesa mo manaoga o le Pope

(i) E faasefulu lima ona savali faataamilo le tagata i le Falesa ma fai faasefulu lima le Tatalo a le Alii, e faasefulu lima le Si Oʻu Alofa Maria, e faatasi le tatalo i Tagata Paia

(o) E faafitu ona savali faataamilo le tagata i le Leaba Phadraig [Le Moega o Patrick] ma fai faafitu le Tatalo a le Alii, faafitu le Si Oʻu Alofa Maria, e faatasi le tatalo i Tagata Paia

Le Malologa 3 - O ROILIG MUIRE

E faafitu ona savali faataamilo le tagata i le faaputuga maa ma fai faafitu le Tatalo a le Alii, faafitu le Si Oʻu Alofa Maria, ma le faatasi o le tatalo i Tagata Paia i faaputuga maa taitasi [e tolu] i Roilig Muire, ma i le faaiuga, e savali faataamilo faafitu ai le tagata i na faaputuga maa e tolu ma e faafitu foi ona tatalo.