Tauaofiaga “O Ē Vivii ma le Olioli”—Po o le a E I ai i Inā?

OLIOLI! Po o se upu e ese, pe e lē masani foi ona e faalogo i ai i nei taimi ua tumu i faalavelave? E mautinoa lava e lē o aumaia i nusipepa ni mafuaaga se tele tatou te olioli ai. O fetauaiga a tagata o atunuu, le salalau atu o le fia ʻai, le leai o ni galuega, le matautia o le polusione, le lē mautū o le faigamalo, o solitulafono—e lē o ni mea ia e faatumuina ai le loto i le olioli, a ea?

O le toatele o tagata i aso nei, latou te puʻea so o se mea latou te maua ai le fiafia mai le olaga. A e o le ā le olioli? Ua faamatalaina le olioli e faapea, o se “tulaga fiafia; alaga fiafia.” E lē toatele ni tagata o i ai lena faalogona, o le olioli moni, ma afai latou te maua, e mo na o sina taimi puupuu.

A e, i le vaavaai atu i luma i o tatou aso, na valoia e le Tusi Paia e faapea: ‘O loo faapea ona fetalai mai ai le Alii o Ieova, “Faauta, e olioli aʻu auauna, faauta, e alalaga aʻu auauna ona o le loto fiafia.”’ (Isaia 65:13, 14) E mafai faapefea ona faia o lena mea?

Ina ia taliina lena fesili, matou te valaaulia oe ina ia e auai i se tasi o tauaofiaga itumalo a Molimau a Ieova o le a faia i le 1995. O le matua o le tauaofiaga “O Ē Vivii ma le Olioli,” ma e ulu fua. O le polokalama o aso e tolu o le tauaofiaga, o le a faia aʻe i lauga e faavae i le Tusi Paia, o faataʻitaʻiga, talanoaga, ma isi mea e tele. I le faagasologa o le polokalama atoa, o le a faatāuaina ai le matua o le olioli.

O tauaofiaga, e amata i le Iunaite Setete ia Iuni ma o le a faaauau ai i aai faataamilo i le lalolagi aoao seia oo i le amataga o le 1996. E ono i ai se tauaofiaga e latalata ane i le mea o e alala ai. Aisea e lē fesili ai i Molimau a Ieova o loo nonofo i lou vaipanoa? Matou te valaaulia ma le mafana oe ina ia e auai.